|
آي كندليلر توپلانين،
ماهني دئييب اوخوياق.
بير - بيريزه ساپلانين،
اوزون زنجير توخوياق.
هر آدديمدان بير سالاق،
بوينونا آغالارين.
آجي قيشا سون قوياق،
اۆزۆن گؤره‌ك باهارين!
كندلي‌ييك آي آقالار.
درتلي‌ييك آي آقالار!
يايدا قان - تر ايچه‌ريك.
سۆنبۆللري بيچه‌ريك.
آجليغيميزدان قيشدا،
شه‌هرلره كؤچه‌ريك!
توراغايي اوچاندا،
شاهلار شراب ايچنده.
هر ياندان قاوولاريق،
كنديميزدن كؤچنده!
بيز قيللي‌ييق تۆكلۆيۆك.
عؤمۆر بويو يۆكلۆيۆك.
هرنه دئديز اينانديق،
بيز قولاغي تۆكلۆيۆك!
مكتب آچيلير يئنگي،
فارس دئيه‌ك دينگي – دينگي.
بير كيمسه هئچ
سؤيله‌مير،
بگو بينم چي ميگي؟
قاپي‌‌ني ياغيش دؤيۆر،
اۆره‌گيميز دؤيۆنۆر.
بيز بوردا تيتره‌شيريك،
او اوردا اؤزۆن اؤيۆر!
سارايدا پولو سئلله،
تبيم وار مني يئلله.
دوقتورلار دئييرلر كي:
كندليدير، جانيم، وئلله!
آي قيز، گؤزلري آلا،
دور پينجه اودون قالا.
شاهي باسديراجاغام،
نالچي ياخشي باخ نالا!
چايلار چشمه‌لر دولار،
سۆنبۆلۆ اوراق يولار.
آزادليغا چيخاريق،
گۆمان كي بيرگۆن اولار!
باغدا چيچك اكه‌ريك،
ديبينه سو تؤكه‌ريك.
ظاليملرين گؤزۆنه،
اوخ تك آخر چؤكه‌ريك!
ياشيلليقدير مئشه‌ميز،
ايشله‌مكدير پئشه‌ميز.
بيچيله‌جك شاه كؤكۆ،
ايتيليري تئشه‌ميز!
كندلي‌ييك آي آقالار،
درتلي ييك آي آقالار!...
موللا قوران اوخويار،
كندلي خلي توخويار.
خلي‌ني آپارارلار،
سارايلارا سالارلار.
سارايدا اگله‌شرلر،
قيزيل شراب ايچرلر.
كندلي قاپيدان باخار،
مني يانديريب ياخار.
بارماغيني قالديرار،
قيرميز قاني دامجيلار.
دۆشر خلي اۆستۆنه،
آغ ناخيشدا ايز سالار.
گؤز ائله اوردا قالار.
گؤز باخماقدان قارالار
قان سارالار، سارالار...
كندلي‌ييك آي آقالار،
درتلي ييك آي آقالار...
مجموعه 1 - قيش 1346 – ص 58 .
|
