سنده جانلانميشدير منيم آماليم،
قاراداغلي
گؤزه‌ل ايگيد قهرمان.
قانادلاندي يئنه ترلان خياليم،
بودور، قوشدوم سنين شأنينه داستان.
تزاري - قاجاري سانجيردي سؤزۆن،
غضبله دولوردو هر ايكي گؤزۆن.
ظۆلمۆ – ايشكنجه‌ني گؤرمۆشدۆن اؤزۆن،
ايره‌لي گئديردين هئچ دايانمادان.
ائللرله بيرليكده قياما قالخدين،
آرزولار گؤيۆنده اولدوز تك آخدين.
شاهلارين كؤكسۆنه سۆنگۆده تاخدين،
سندن نور آليردي اؤلكه‌ميز ايران.
سسيوه سس وئردي آذر ائللري،
دالييا آتيردي قارا ايللري.
كندلي‌نين فحله‌نين پولاد أللري،
يارادماق ايستيردي يئني بير دؤوران.
سۆرۆلدۆن تهرانا چيراقلار سؤندو،
رضاخان ديرچلدي، قاجارلار يئندي.
گۆن اؤتدو، ايل كئچدي، زمانا دؤندو،
قيرغينلارا دۆشدۆ آذربايجان.
محمدرضا خان سانكي داو اولدو،
آنالاري آغلار قويدو ساوولدو.
بيرگۆن ده ايراندان ايت تك قاوولدو،
«شاه گئتدي» بايرامي قالخدي بوردان.
قوروب جمهوريت ايندي بو يئللر،
كسيلمه‌ييب آنجاق حله سام يئلر.
يئنه گؤزله نيلير او داشغين سئللر،
آخين - آخين آخسين دنيز تك انسان.
ايشچيله - اكينچي بايرام ائيله‌سين،
هر آغيز هر دوداق نغمه سؤيله‌سين...
قانلي بايراق آلتدا ائل بئله دئسين:
دؤنه - دؤنه سنه: «ياشا، ستارخان!»
اوچغون داخما - ص 31 - مرداد 1358.
