يئني داشلاماني منيم داليمجا
آجي - آجي بوردا ائشيتديم، حريف!
غم ايله يوغرولموش منيم خميره‌م،
بونو بيلمه‌ييرسن، صد افسوس، حييف!
ائشيتديم يير يازيق شب‌پره كيمي،
گۆنشين اۆستۆنه هجوم ائديرسن،
منه آنلاتديلار چاشيب جاييبسان،
يئنه اگري - أوگري بير يول گئديرسن.
منيم پاك آديمي لكه‌له‌مكده
تشبّث ائديرسن، ظفر چالميرسان.
«بير شبهه سالارام خلق ايچره» دئيه،
رنگ به رنگ تهمت‌لر منه وورورسان.
سن گۆنشي گؤيده دانيرسان بئله،
چالاغان باخيشيم گؤزۆنۆ ديديب.
آيلاردير داليمجا هي وورنوخورسان،
بلكه اعتباريم سني كور ائديب؟
سن شاعير دگيلسن، هئچده بيلميرسن،
قوزغونلارا شاعير خدمتچي اولماز.
شفقلري سؤكن ترلان قانادلار،
سارين يوواسيندا بۆكۆلۆب قالماز.
منيم آياغيما قيرباج دؤينده،
سؤيله گؤرۆم حريف هاردايدين بس سن؟
دۆشمن مني سيخيب «يازما!» دئينده،
دۆشۆنۆردۆنمۆ هئچ نه اولور وطن؟
چكديگيم عذابلار، ايشكنجه‌لردن،
نييه هويوخورسان من دانيشاندا،
ايگرنج حياتي نين چيركين اۆزۆنۆ،
سيلمك مي ايستيرسن منه باخاندا؟
سنه باخ، اۆره‌كدن من آجيييرام،
داريسقال فيكرينه يازيقلار اولسون!
ازلدن ائليمين قانلي‌سيسان سن
يئني پيسليگينده ياديندا قالسين!
بودور سئير ائديره م زمان آخينين،
سني بوغاجاقدير قادر اللريم.
اي يئني نوكري امپرياليزمين!
ماسقاني ييرتاجاق شانلي ائللريم.
منيم اللريمله، ها يالواراسان.
يووا بيلمه‌زسن سن چيركين اۆزۆنۆ،
منيم اعتباريم، منيم شهرتيم،
گئري قايتاراجاق يانليش سؤزۆنۆ.
يانيب قاورولورسان، قيوريليرسان سن،
كؤنۆللر مۆلكۆنۆ
شعريم آلاندا.
سني ديديم - ديديم من اؤلدۆرمۆشم،
هر زمان قلميم ظفر چالاندا.
بيليرم گؤزۆنده تيكان تك دورور،
يئني «آزادليغيم» يئني «يولداشيم».
صاباح اۆره‌گيني پارچالاياجاق،
آغزيندان اود ساچان هر وطنداشيم.
شعريمين بايراغي سني ياخاجاق،
گؤرۆنميه‌جكدير كۆلۆن‌ده بئله.
ايسته‌ديكجه بانلا، كيم قولاق وئره‌ر:
يئل ايله گلن سؤز، وئريلير يئله.
سنه چوخ يازيقلار، حييفلر اولسون،
مني آلچالتماقلا اوجالميرسان هئچ!
هرآن ظفر چالان، غلبه چالان،
دۆهامين اؤنۆنده داي قالميرسان هئچ!
درديمي سؤزۆمۆ بلكه دوياردين،
وطن‌سيز وطنده شاعير اولسايدين!
گۆوه‌نه ردين زۆلال تك كئچميشينه
حياتدا انسان تك سنده قالسايدين.
اؤنۆمه چيخ گيلن قاچما مئيداندان،
اۆزۆمدن اوتانان نامرد حريفسن.
دۆزگۆنۆن حياتي لكه بيلمزدير،
واختيني جهت‌سيز تلف ائديرسن.
اوچغون داخما - ص 33 - 8 نيسان 1980 (1359) – استانبول.
