لاغ ائديرلر سنه «تمدّنلولر»،
دۆشۆبسن گؤزلردن ازل كندلي قيز.
«او آنجاق لاييقدير ياپما ياپماغا،»
بودور سن اۆچۆن سؤز، گؤزه‌ل كندلي قيز!
ساتيشا قويمورلار بو كور بازاردا،
سنين بار - به‌هرين، سنين امگين.
بيلميرم بو پوزغون ويرانا باغدا،
گۆله‌جكمي هاچان ساري چيچگين؟
آناوين قوينوندا گول تك آچيلجاق،
آلنيندا يازيلير قارا يازيلار.
بوي آتديقجا آرتيق، گۆنۆن قارالير،
خزانا واريرسان گؤرمه‌ميش باهار.
كيچيك ايكن، سۆددن يانقي قاليرسان،
سونراسا ياتيردير پيه‌ده آنان.
شيو‌ه‌نه قالخيرسان واراندا درتلر،
تاپيلمير دۆنيادا سنه بير يانان.
بوي آتجاق آنان تك عادت ائديرسن
زاوالي قالماغا يازيق اولماغا.
گنجليگين چيچه گي دوغاندا سنده،
گۆلمه‌ميش باشلايير قونچان سولماغا.
سنينله ياشايان فاغير انسانلار،
حياتين سيرريني آچميرلار سنه.
بويلانيب قالخيرسان چيچكلر ايله،
ساتيليرسان آي قيز پوللو كيمسه‌يه.
سحر هيسلي دامدا، تۆستۆ ايچينده،
تنديرده پاپيرسان گۆللۆ چؤره‌كلر.
توتغون گؤزلريندن ياش آخيداندا
سينه‌لرده نئجه تيترير اۆره‌كلر.
سونرا آخشامادك ايلمه چاليرسان،
هم الين هم خلي، قيزيل بويانير.
سيزير بارماغيندان قان داملالاري،
سالديغين ناخيشدا چيچكلر قانير.
بير مدّت دۆنيادا عؤمۆر سۆرۆرسن،
قوينوندا آچيلير نئچه غنچه جيك.
بسله نير‌لر، نئجه سن بسله نيبسن،
اونلارا يئنه‌ده «كندلي» دئييريك.
بودور ارمغاني، بودور سوقاتي،
سنه بو مقدّس پادشاهليغين!
زنجيرلر قيريلير يئر اۆزه‌رينده،
آي گؤزه‌ل! فيكر ائله، بير دۆشۆن درين.
آفريقانين قارا دوزلو قيزلاري،
آتشلر آچيرلار «هايلاس لاسي» يه.
بايراغين قالديريب ايگيرمينجي عصر،
سنه من نه اۆچۆن يازيم مرثيه؟
آذري گؤزه‌لي، يۆرۆ شه‌هره!
دايانما، بو قده ر صبر ائتدين، بستي!
چاتيشاق تئزليكله بير - بيريميزه،
گل قاچيرداق بوردان امپرياليستي.
اوچغون داخما - ص 61 – تهران، 1355.
