قوم شهرينه سفر
بوردا، قوم شهرينده بير مزارليق وار،
اونا خلق ايچينده دئييلير: «شئيخان!»
بو قانلي مزارليق يۆز ايل اولار كي،
قوينوندا ساخلايير بير اولو انسان.
خلخالي اورموي، سيد محمد،
اورميادان بورا معراجا گلميش.
اونون كسيك باشي، كسيك قوللاري،
يۆز ايل بوندان قاباق يوردا يۆكسلميش.
آجي حكايه‌دير، آجي بير ناغيل،
آجي بير حادثه، آجي ماجرا.
شرحينه كيمسه‌نين طاقتي يوخموش،
منيم نئجه گلر طاقتيم بونا؟
قوي اوّل حياتين سؤيله‌ييم سنه،
مزار صاحيبي‌نين قصه‌سين دئييم.
سونرا حالين اولسا، دؤزه‌ده بيلسن،
زمانه‌نين جؤورون - جفاسين دئييم.
يئرله شيردي بير گۆن يئددي «دگيرمان»،
گؤزه‌ل اورميانين لاپ قوجاغيندا
اوتوز بئش ايل اوردا عؤمۆر سۆرمۆشدۆر،
تقوالي بيرسيّد يئتگين چاغيندا.
سيّدغفار اوغلو سيد محمد،
مين اۆچ يۆز هيجري ده بورايا گلميش.
زنجان‌دا، تهراندا درس اوخوموشدور،
سونرا اورميايا گلميش يۆكسلميش.
رمضان آيي‌‌نين اون دوققوزويدو،
احيا ساخلاييردي سيد محمد.
قرآن اوخويوردو ناماز قيليردي،
هم «بِكَ يَا الله» چكيردي البت.
بئش داشناك ديواردان آشدي ايچه‌ري،
بيرده روس سالداتي قاباقلاريندا.
گيرديلر اوتاغا، دئديلر: «ملا!
سني اؤلدورمگه گلميشيك بورا.»
ايكي ركعت ناماز اۆچۆن اذن آلدي،
اما باش سجده‌دن قالديرانمادي.
آياق اۆسته دوروب قمه‌سين چكدي،
داشناك احوالينا هئچده يانمادي.
كسيك باش فيرلادي سجاده اۆزره،
باخا - باخا قالدي اونون گؤزلري...
اورمو لوحه‌لري - ص 21.
