تبريز يوللاريندا - ص 79.
«سهند» هفته‌ليگي‌نين امكداشي
«فاضيل ميرخاني»نين اؤلۆمۆ مناسيبتيله.
سالخيم - سالخيم اۆزۆملر
ساللاناندا ديواردان،
گۆنشين توتقون ايشيلتيسيندا،
اۆره‌گيمه هيجريندن بير داملا هوپدو؛
اۆره‌ك آغريسي‌نين نه اولدوغون بيلديم.
اۆره‌گيوين آغريسي،
مني يئريندن ترپتدي.
دۆنيالارجا دويغو يئرلشيرميش اۆره‌گينده،
بعضا باخيشلارينلا سن دانيشيردين!
بيز هئچ هوش ائله‌ميرديك،
اۆره‌گينده نه‌لر يئر سالميشدي...
آه!
اۆره‌ك وار دۆنيا يئرلشير اوندا،
اۆره‌ك وار بير داملادا ايچينه آلانماز،
اۆره‌ك وار بير اوفاجيق داخمايادا يئرلشمز.
اۆره‌ك وار داش كيمي،
اۆره‌ك‌ده وار زۆلال سو كيمي!
اۆره‌ك وار قاراداشدير،
اۆره‌ك وار دورو گۆزگۆ،
صاف بير آينادير.
دئديلر فاضيلين صاف اۆره‌گينه
بير قان داملاسي هوپموش.
سنين گؤزلرين منه گۆزگۆ اولاندا،
من يالنيز اؤزۆمۆ سئير ائده بيليرديم.
كاشكي اۆره‌گيني منه گۆزگۆ ائده‌يدين،
سنين اۆره‌گي‌نين قان داملاسيندا،
بۆتۆن وارليغيمي قوربان ائده‌رديم.
واي اولسون منه كي،
سنين اۆره‌گيندن خبر توتماديم!
بلكه‌ده قلبينه هوپموشام بير واخت،
آمما قان داملاسيني نه‌دن،
نه‌دن دويماديم؟
نييه گؤرمه‌يم؟
زۆلال صاباحيندا آدديم آتسايديم،
بۆتۆن وارليغيمي قوربان ائده‌رديم.
دردينله، غمينله،
آشنا ايديم من.
آمما هئچ ظن ائتمزديم
بو غم، بو كدر،
سنين صاف اۆره‌گينده
بير قان داملاسينا چئوريله‌جكدير.
بلكه سنين
اوبايغين باخيشلاريندادا،
داملا وار ايميش،
بير قان داملاسي.
اؤزۆمۆ شماتت ائديره‌م ايندي
كاش بيرده باخايديم بايغين گؤزۆنه.
بير كره باخسايديم، گؤره‌رديم اينان،
گؤزۆنده اوينايان قان داملاسيني.
اوندا زۆلالينداكي قان داملاسينا،
بۆتۆن وارليغيمي قوربان ائده‌رديم.
سن دۆشدۆن قاباغا،
دولغون عاطفه‌لرينله!
بوراخدين بيزي قارقالار كيمي،
اؤزۆن شاهين تك گؤيلره اوچدون!
گؤيلرين او انگين دنيزلرينده،
گؤزلردن ايتدين.
من ايندي ظۆلمتلر -
چيركابلار ايچيندن،
بو ذليل دۆنيادان،
رذالتلرله دولو فيرتينا آنباريندان،
رذيل سانسورچو اليندن،
ياخامي قورتارماغا جان آتيب
سهند ذيروه‌سينه،
تبريزين قلّه‌سينه چيخماق ايستركن،
گؤيلره گؤز تيكيرم، هي...
تبريز يوللاريندا - ص 85 - 3 / 5 / 1373 - تهران.
