|
تبريزلي‌يم، داماريمدا تبريز آخير قان يئرينه.
عئينالي دان جدّيم آق ميرعلي دير
او، داغلاردان دوروب گلميش باخير منه.
قيزيل سولار محلّينده يورد سالميشدير،
اوردا مسجيد قاييرميشدير.
مشروطه انقلابيندا
اؤزۆن هر بير گئريچيدن آييرميشدير.
من، تورونو او سيّدين
اؤزۆمۆ تبريز بيلميشم.
دۆنيانين هر بير يئرينده،
اؤزۆمدن كيمسه‌ني اصلا
هئچ يوخاري گؤرمه‌ميشم،
بونا «مباهات» دئميشم.
سؤز وئرميشم، ازل گۆندن
فضيلتلر يايان ائله.
خدمت ائتمك شعاريمدير،
سوسماميشام، دورماميشام،
سؤز وئرديگيم فضالارا ايز سالميشام.
خيدمت اۆچۆن يول تاپماغا،
فيكره خيالا دالميشام،
بونا «صداقت» دئميشم.
ائل دۆشمني، ديل دۆشمني، تقوا، فضيلت دۆشمني،
بير سؤزله شاه مفكوره‌سي قارشيسيندا دايانميشام.
عشقيم قالخيب سمالارا،
شعله ايچره اودلانميشام،
بونادا «غئيرت» دئميشم.
كؤك سالميشام، ايز سالميشام
قوتسال تبريز يوللاريندا،
قاراگيله‌م سئومه‌سه ده،
غوربتلرده بوروق - بوروق جيغيرلارا دۆشسم بئله
قوپماميشام اؤز كؤكۆمدن،
بونادا «همّت» دئميشم.
تبريز يوللاريندا - ص 5 – 1380.
|
