مجموعه شعر «ورزقان» اثر «حسين دوزگون» منتشر شد. اين كتاب كه در قطع رقعي و 127 صفحه به چاپ رسيده است حاوي اشعار جديد ايشان است. انگيزه‌ي سرودن اين مجموعه با واقعه‌ي زلزله‌ي ورزقان رقم خورد. ايشان شعري بلند در شرح اين واقعه‌ي دردناك سرودند كه در ابتداي اين كتاب قرار دارد. اما محتواي ديگر اشعار اين مجموعه به وقايع اجتماعي، فرهنگي، سياسي و ادبي باز مي‌گردد كه شاعر سال‌ها با آن مواجه بوده است. وقايعي كه شايد دغدغه‌ي خاطر بسياري از ما باشد. در زير چند شعر از اين مجموعه را با هم مي‌خوانيم:
ورزقان
قيوريليردي عزالي ساچ ايچره
رقص ائديردي گئجه، چئوريليردي.
گؤيدن اولدوز سامان تك آخيردي،
كؤرپه‌لر بير به بير يوخ اولوردو.
يئل يئريندن قوپوب ييرغالاندي،
بير ايپك پارچا سردي يئر اۆزره.
تحفه‌سي آعلاييش ماتم اولدو،
آرخاجي غم يۆكۆ، بويو غصه.
ائولري ييخدي دپرم يوخ، آي دوست!
چيخمايير كيمسه‌نين بير صداسي.
انساني‌دا ديزه چؤكدۆررميش،
بوردا يوخسوللوغون ماجراسي.
كۆسمۆش ايدي طبيعت ائليمدن،
داغلارين چيگنينه قان آخيردي.
بيز ياخيندا دوروب آغلاشاركن،
ياد اوزاقدان اوچاقلا باخيردي.
داغ كۆسۆب، يئر كۆسۆب، گؤي كۆسۆبمۆش،
محشر اولموشدو توپراقلار اۆزره،
زلزله گلميش ايدي دئييرلر،
دپرم اولموشدو يايلاقلار اۆزره.
يئر ايچينده دوروب باش چيخارديب،
شيطان ايدي بيزه چپ باخيردي.
سانكي يئردن گؤيه داش ياغيردي
چشمه‌لر باش يوخاري آخيردي.
يئل ويييلديردي دؤنمۆش اوراغا،
گۆل‌نهال‌لاريمي هئي بيچيردي.
يولدا قالميشدي يئل آتلي ممّد،
اژدها ديرچه‌ليب قان ايچردي.
سيز ايا قصرده اگلشنلر!
ايندي ويرانه‌ده نئيله‌يير سيز؟
زلزله ماجراسين گؤرركن،
بير – بيريزه نلر سؤيله‌يير سيز؟
من كي حكمت ندير بيلمه‌دن هئچ،
نورونا غرق قيلديم وجودوم.
دويدوم عشقين ايچيمده صداسين،
سرّ قنديلين آچدي شهودوم.
بير آنا آغلاييردي، بئش اوغلون
يان يانا دۆزدۆلر قارشيسيندا
حمله ائتدي طبيعت گئجه‌يكن
تيغِ جرّاريميز قالدي قيندا
يوخلوغون دانه‌سين شوم بير ال،
هر قاريش توپراق اۆزره اكيردي.
وارليغين ائوجيگين باشقا بير كس،
بير به بير دورمادان هئي سؤكۆردي.
بير بۆكۆلمۆش بئلين ماجراسي،
بير اۆزۆلمۆش چيگين داستاني.
بوندان آرتيق سيزه من دئينمم،
يوخ قلم يازماق اؤترۆ تواني.
ورزقان ايسته‌مير دومرولو داي،
«چيخ» دئيير، «چيخ يولون اۆستۆنه يئت!»
نعشيني گؤيلره توللاياندا،
سؤيله‌دي:«گيزله‌مك بسدي، چيخ گئت!»
لاپدان ائولر ياتاركن يئر اۆزره،
داملارين چؤبلري شعله‌لندي.
بير به بير چؤكدۆ پالجيق ديوارلار،
شعله‌لر ايچره توفان الندي.
بوردا آهو يئريشلي گؤزللر،
گؤرمه‌دن اوخ، شكار اولدو بير – بير.
پارچا پارچا اولور باغلي گؤللر
داغدي قالخير گؤيه، يئردي تيترير.
ساچلاريني يولاركن آنالار،
گؤز ياشي ياغديرير داملا – داملا
يئر باريشمير بو گؤز ياشلاريله
گؤي ياغير باشينا اودلا قانلا
خور باخير ياد بيزه، شور گؤزۆ وار،
هاي كۆيۆ، گل گئدي تام يالاندير.
ظاهري خوش اونا، سن اينانما،
غوغالار ايچره غوغا سالاندير.
سن اؤلۆم نامه‌سين يوللاميشدين،
بوردا يئر تيتره‌دي قوپدو محشر.
داغدا ايتدي بۆتۆن آغلاييشلار،
ائن – بويو چؤبدۆ پالچيق بو ائولر.
يئل ياغيشلا پيچيلداشدي بيردن،
داغ تؤكۆلدۆ دره دولدو داشلا.
يئر آچيب آغزيني آه چكركن،
اود دا ياندي آياق ايله باشلا.
گؤي ندن سوسغون ايميش آ تانريم!
غملريم چولقالاندي داغ اولدو.
ايللر آيلار سني ائتسه‌ده شاد،
ائللريم چين آجي بير چاغ اولدو.
* * * * * *
يالواريش
داملايام من،
سن ايسه درياسان!
يالتيزام،
بي‌كسم،
عجب تنها
قالميشام
يولدا يوخ سنه ساري.
اللريم گؤيده‌دير دعالاردا
بلكه چاتديم سنه، سنه، باري!
هر يئره دۆشجه‌گين، گؤزۆم، ناگه
گؤيده
يۆكسكده قامتين گؤردۆم،
گؤردۆم، اما،
اليم گۆده سندن!
* * * *
رنگ
قولاقلار آغيردير، قيشدان‌دا آغير،
حاليما بولودلار گؤيلردن ياغير.
هاني فرياديمي دينله‌ين بير كس؟
گؤيلره اوجاليب عصرين صداسي.
داغلاري سارميشدير ني‌ين نواسي.
قارشيمدان كئچيرلر ائله ژست ايله
سانكي هئچ يوخام من!
گؤزۆمۆن اؤنۆنده
رژه كئچيريرلر چوخ قطار قطار،
سئرچه‌ني بوياييب
قناري آدينا ساتيرلار بونلار،
ائلي رنگ ائديرلر.
* * * *
گئجه
نه قده‌ر سۆره‌جك قارانليق گئجه؟
نييه آچانميرسان پنجره‌لري؟
قونشولار قالخديلار يوخودان بير- بير،
ياتما، باشين قاوزا، دۆرگل بير بري!
سنه موشتولوغوم بشارتيم وار،
او غليظ بوياسي گئجه‌نين سولور.
كروان قيران گليب، اؤتۆب، كئچيبدير.
دان يئري سؤكۆلۆر باخ سحر اولور.
قانلي اۆره‌گيندن سحرين قالخييب،
دوغاجاقدير گۆنش، يئره آخاجاق.
گئجه ييرتاجاق اؤز قارا اؤرتۆگۆن،
سئوگيليم آزادجا منه باخاجاق.
