يار هجرينده، گؤزۆم آغلا گيلن خونبار اول،
يئري وار، دۆش دؤشگه، خسته ييخيل، بيمار اول.
دۆشمني يانسيلايان ناموسون الدن وئره‌جك،
هئچ فضيلت يوخودور او دني‌نين، بيدار اول.
قصدي سيلمكدي سنين اسميني تاريخلردن،
هركس آلدانديسادا، سن آييق اول، هشيار اول.
سنه ميراث قالان صيدقي كنارا آتما،
دوست ايله دوستلوق ائله، دۆشمن‌دن بيزار اول.
گئت سفر ائيله، كؤنۆللر ديارين فتح ائده‌سن،
قلبلر خانه‌سينه صاحبْ اول، ديّار اول.
بيل كي بير يئرده اوتورسان، باشينا بؤرك كئچر،
تجربه اخذ ائله، گئت دۆنياني گز، سيّار اول.
دۆن گئجه دينلمه‌دينمي دئدي دۆزگۆن يارينا،
گؤزه‌ليم غير ايله اغيار، من ايله يار اول؟
يورد غزللري – ص27.
