جاندان‌دا‌‌‌، جهاندان‌دا‌‌‌، گذر قيلديم‌‌‌.

عشقين اۆره‌گيمده دوغرو يئر تاپدي‌‌‌،

عؤمرۆمده بئله بؤيۆك هۆنر قيلديم‌‌‌.

تۆركۆن اۆزۆنه دئديم گپيم تۆركجه‌‌‌،

دۆنيادا آديني ناموَر قيلديم‌‌‌.

ائل تاريخي‌نين فضائلين بيلديم‌‌‌،

ائل ايله اؤزۆمۆ مفتخر قيلديم‌‌‌.

خصمين حركاتين آلچاق حس ائتديم‌‌‌،

اوندان اؤتۆكندن [1] الحذر قيلديم‌‌‌.

اؤزگه منه «چاكرم!» دئدي‌‌‌، لاكين‌‌‌،

روحوندان‌‌‌، او بيلمه‌دن‌‌‌، خبر قيلديم‌‌‌.

دۆشمنلري قاودي تؤكدۆ دريايا‌‌‌،

قاشقايي‌ني مۆلكه راهبر قيلديم‌‌‌.

دۆزگۆن دئيير اعتبارا آلدانما،

صيدق ايله‌دي ياري معتبر قيلديم‌‌‌.

قاشقايي لوحه‌لري - ص  34 - 1377.

داملادا عمّان اولارميش باللهي‌!

هر چتينليك‌‌‌، غيرت ملّي ايله،

انسانا آسان اولارميش باللهي‌‌‌.

آتچييا هر تنگه‌‌‌، هر دؤنگه - بوروق‌‌‌،

بير بؤيۆك ميدان اولارميش‌‌‌، باللهي‌!

يار ايله دوسدوغرو [1] ديدار ائده‌نين‌‌‌،

كؤنگۆلۆ تابان اولارميش‌‌‌، باللهي‌!

صيدقه قاشقايي ائوينده قلبي‌نين،

سؤنمه‌ين نئيران اولارميش باللهي‌‌‌.

دينله كيم دۆزگۆن دئير: «د‌ۆز عشقيمه،

قاشقايي بورهان اولارميش‌‌‌، بالهي‌!»‌‌‌.

قاشقايي لوحه‌لري - ص  33 - 1377.

سن چكيلدين‌سه‌ده من‌‌‌، سنده تجلاّ ائتديم‌‌‌.

سني منده‌‌‌، مني سنده هامي گؤردۆ‌‌‌، اويدو‌‌‌،

دۆنيالار هاييما غرق اولدو‌‌‌، نه غوغا ائتديم‌‌‌.

منه آل - وئرچي دئسن بوردا قبولومدو منيم‌‌‌،

عشقيني قلبيم ايله جان ايله سئودا ائتديم‌‌‌.

من مسمّاني‌دا اسماني‌دا بير گؤردۆم‌‌‌، اينان،

گرچه اَحوَل تكي هر اسميني اسما ائتديم‌‌‌.

سنين عشقين ائله گۆج وئردي منه كيم بورادا‌‌‌،

ملّي بير پارتلاييشي‌‌‌، دالغاني بر پا ائتديم‌‌‌.

وصف ائده‌نميردي ديليم قامتيني‌‌‌، فارسيمدان‌!

ديليني اؤيره‌نه‌رك نُطقومو گويا ائتديم‌‌‌.

دۆزگۆنۆن عشقي آغير ائللرينه آرخ ايدي‌‌‌،

من او آرخا قوشولوب گؤلچه‌ني دريا ائتديم‌‌‌.

قاشقايي لوحه‌لري – ص 32 - 1377.

دكتر حسين محمدزاده صديقين (دوزگون) - ايكينجي شعر وبلاگينه باخين

سانكي جانسيز جانيما جان گلدين‌!

منه كيمسه دئمه‌دي عشق نه‌دير‌؟

سن منيم قلبيمه پنهان گلدين‌!

قرنلر يورودومو نورلانديردين‌‌‌،

قاراچادرلارا مهمان گلدين‌!

سنه «قاشقايي» دئديم‌‌‌، داغ چيچگي‌‌‌،

يارا جانان‌‌‌، يادا طوفان گلدين‌‌‌.

قوي سنينله آليشيم نشئه‌لنيم‌‌‌،

گئتمه آسان‌‌‌، مگر آسان گلدين‌؟

سؤزۆنو دينله‌مه‌ييرلر، نه يازيق‌!

سن ده دۆزگۆن تكي ارزان گلدين‌!

قاشقايي لوحه‌لري - ص  31- 1377.

دكتر حسين محمدزاده صديقين (دوزگون) - ايكينجي شعر وبلاگينه باخين

بيزيم بوگؤزه‌لليك تاپيلار هاردا‌؟

آذربايجانيمين اينجه‌ليكلري،

دگيلمي ميثيلسيز مگر دۆنيادا؟

بيلور آياق آوي چؤللريميزين،

آغ بوخاق گۆللري دۆزلريميزين.

شرفي، شؤوكتي ائللريميزين،

معنا‌‌سي - شكري سؤزلريميزين.

آ گه ده! سانماكي عاجزدير ائليم،

توره‌در يئنه‌ده ستارخان، باخ ها!

تُهمتيندن سنين اوزاقدير ديليم،

آغزيمدا اينجه‌لير گؤر آخا-آخا.

منيم آرزوم بودور آزاد ياشاياق،

شادجا حيات وئره‌ك بيرليكده باشا.

يوخسا دلي‌لري هارايلايارام،

باشيوي دؤيرلر مين كره داشا.

وطنيمي منيم اودانماز پنجه‌ن،

ايگيدلريم سني باسار گئرييه.

چوخ ظاليم گؤرۆبدۆر قوجامان تاريخ،

گۆوه‌نمه بو ظۆلمه بو نامردليگه!

كيچيك شعرلر - ص  31- قيش 1350 - اردبيل .

دكتر حسين محمدزاده صديقين (دوزگون) - ايكينجي شعر وبلاگينه باخين

بورالاردا گۆنش ايشيق ساچاندا‌‌‌،

سعادت نغمه‌سي اوخوياجاغام،

قاراقيش عدمه ساري قاچاندا‌‌‌.

قيراغا چكيلسين قوي خولياليلار‌‌‌،

ابدي بير نفرت ساتقينا نثار‌‌‌.

منجه حۆرمتي يوخ هر سؤز دۆزه‌نين،

دئگيلدير كي شعرين دۆنياسي بازار‌‌‌.

 بيزيم سؤزلريميز يادا آجيدير،

چۆنكۆ ائل قووه‌تي‌‌‌، خلقين گۆجۆدۆر‌‌‌.

من ياخشي بيليرم سنين اليندن،

كاغيذا دامان هر شعير اينجي دير‌‌‌.

أن گؤزه‌لدير منيم وطنيم ساهير‌‌‌،

سن اولان يئرده داي نه غميم ساهير.

آرازين مسيرين دؤنده‌رجه ييك،

بو سؤزۆمه قووه ت وئر منيم ساهير.

گله‌جك دئييركي تئز گله‌جگم،

دۆزۆ دۆز پيسي‌ده پيس بيله جه گم‌‌‌.

خلقيمين نفرتي اولان كيمسه‌نين،

آديني تاريخدن من سيله‌جگم‌‌‌.

كيچيك شعرلر - ص  31 .

دكتر حسين محمدزاده صديقين (دوزگون) - ايكينجي شعر وبلاگينه باخين

كؤنلۆمۆن سيزيسين آنلاييرسانمي‌؟

اودوما يانماغا شريك اولاراق،

گيزلي درتلريمي هئچ سورورسانمي‌؟

اونلار افغاني‌‌دير قانلي كؤنلۆمۆن،

بئله اعتناسيز اونلارا باخما.

غميمدير، درديمدير، غصه‌مدير منيم،

اونلارلا شاد اولوب جانيمي ياخما.

يازماديم اونلاري شنليكلر اۆچۆن،

غملي بير كيمسه هئچ گؤره‌رمي شادليق‌؟

عئيشسيزده اونلاري گۆلۆنج ائتمه‌گين،

آشنالار! شعريمه قيلمايين يادليق.

باسيلميش ازيلميش ائللريم اۆچۆن،

آغيتديرلار بونلار دئيين آغلايين.

محبت، شفقت حرملرينه،

تازه- ترلريندن دسته باغلايين.

كيچيك شعرلر - ص  30 .

هر نه حس ائيله‌ديم سنه سؤيله‌ديم.

انتهاسيز آغير مشقت چكديم،

سنه دؤنۆب بۆتۆن بيان ائيله‌ديم.

كيم بيلير بورادا نه‌لر چكيره‌م،

اۆره‌گيمده آغير غبار قالانيب‌‌‌.

غصه‌دن دۆيۆندن آچيلمير اۆزۆم‌‌‌،

گۆلۆنجۆم شادليغيم نئجه تالانيب‌‌‌.

داها پارچالانير غملي اۆره‌گيم،

دولوبدور قاپ قارا بير بولود كيمي.

آغير محنتيمه‌‌‌، فلاكتيمه،

شريك ائديم كيمي؟ چاغيريم كيمي‌؟

باخ، شعريم اولماسا داها ديغلارام،

يۆز دولو آهيمديم سطره دۆزۆلۆر.

ياش دا چيخمير نييه گؤزۆمدن بيلمم،

كؤنلۆم پارچالانير جانيم اۆزۆلۆر‌‌‌.

سن ايندي نئيليرسن‌‌‌، خزان چاغيدير،

باخ من بوغولورام، دۆزۆن دۀ گؤزه‌ل.

مني ياديوا هئچ ساليرسان يا يوخ‌؟

دور گل قولاغيما اؤزۆن دۀ گؤزه‌ل.

ياريماسين گؤرۆم مكتب آچاني.

بو خراب آباددا، يوخدور هئچ ادب،

يارچيماسين گؤرۆم بينا قوياني‌‌‌.

اون ايلدير بير اوغلوم مكتبه گئدير،

«‌جاويد شاه» دان باشقا بيرزاد بيلمه‌يير‌!

ساده انسان ديلين بوراخيب تئز – تئز،

ياد ائللي‌لر كيمي «قوربونت!» دئيير‌!

مكتبي ايكي ايل سونرا بيتيرير،

باشيما كۆل اولسون صنعتي يوخدور‌‌‌.

باجارمير جۆتچۆلۆك‌‌‌، نه باشقا بير ايش‌‌‌.

آنجاق ياد سؤزلري ديلينده چوخدور‌‌‌.

دئييرسن، «مكتوب ياز، ايش ايسته شاهدان،»

قيرجانيب دئيير كي: «چي مي‌فرمايين‌؟»

دئييرسن قانميريق ساده‌جه دانيش،

دئيير: «بي‌ساوادين، نباشين غمين‌‌‌!»

بيليره م مكتبي قورتاران زامان،

قاچاجاق تهرانا كۆلۆنگ وورماغا.

اون ايل درس اوخويان كۆلۆنگچۆ اولور،

جواب اولاجاقمي بو بيدادلارا‌؟

كيچيك شعرلر - ص  28- 1346- قيصره كندي .

بير بالاجا ساري كؤينك.

جهجهيندن دويولوردو‌‌‌.

باشينا بلا گله‌‌‌جك.

بير شرارت كند اوشاغي،

اوتلاديردي قوزو – قويون.

شاپاند - قايا تاولاياراق‌‌‌.

چيخارديردي مينلر اويون.

كؤشنلري گزه – گزه،

گليب چاتدي او چمنه.

گؤردۆكي بير ساري كؤينك،

سس ساليبدي جهجه ايله‌‌‌.

قولاقلارين شاخلاياراق،

دينله‌دي او قوشون سسين.

سانكي دئيير سؤزلريني،

دالي وئردن اؤز نفسين.

سس آرديجا گزدي - گزدي‌‌‌،

توخدادي تا بالا قوشا.

بير ساپ چكيب شاپانديندان،

ووردو اونون قيچين داشا.

توپلادي بير باش قوزونو،

گۆنش داغدا اگيلنده.

ايپله قوشو ساللاياراق‌‌‌،

سۆرۆ ايله گلدي كنده.

اوشاق ائوده سئوينه‌ره‌ك،

آناسيندان غربيل آلدي.

ايچينه ده سپيب بوغدا،

آراسينا قوشو سالدي.

غربيل ايچره‌‌‌، بوغدا اۆزره‌‌‌،

بير قاب دورو سودا قويدو.

بير شه‌ده‌ره قاپاق ائديب‌‌‌،

دؤوره‌‌سيني ايپله هؤردۆ‌‌‌.

گئجه بويو ساري كؤينك،

ياتمادان سس - صدا سالدي.

سحر اونو دولو گؤرۆب‌‌‌،

اوشاق درين فيكره دالدي ‌‌‌...

كيچيك شعرلر - ص  85 - 26 / 2 / 46 - مهرام كندي .

تا هاراجاق گئده‌‌‌جكسن‌؟

بيلير سنمي نه واخت‌‌‌، نئجه‌‌‌،

هارادا سن ايته‌‌‌جكسن‌؟

هئچ خبرين وارمي سوندان‌؟

آشناسانمي گله‌جكله‌؟

يارا - يارا يوسما يئري‌‌‌،

اوغرانيرسان هارا بئله‌؟

بيليرسنمي چيخاجاقدير،

قاباغينا يول كسنلر‌؟

شوش قايالار بويلاناجاق‌؟

زور ائده‌‌‌جك سنه نه‌لر‌؟

بئله يئنيش يئنمكده‌‌‌، سن،

مقصديوي تانيرسانمي‌؟

آخيشلاري اويا – اويا،

باغيريرسان دلي – دلي!

كيچيك شعرلر - ص  84 .

سينه‌نده ناري ايسته‌رم‌‌‌.

گله‌جگي يئتيرمگه،

سنين تك ياري ايسته‌رم‌‌‌.

اؤز ائليمه جان دئميشم‌‌‌،

دۆشمنه قان-قان دئميشم‌‌‌.

سئوگيليمه يان دئميشم،

يارِ بيداري ايسته‌رم‌‌‌.

گؤزه‌ل سني من آتمارام‌‌‌،

يانيندان هئچده گئتمرم‌‌‌.

حله - حله من اؤتمرم،

«بنده سواري» ايسته‌رم‌‌‌.

منيم اۆره‌گيم بيداردير‌‌‌،

سنيندير هرنه كي واردير‌‌‌.

اوّليم آخيريم ياردير،

كؤمگي‌‌‌، ياري ايسته‌رم‌‌‌.

منيم تك اشعار يازاني،

حق يولو‌‌‌، شرطي ميزاني.

اؤز ايچيميزه گزه‌ني،

گؤزه‌ل دلداري ايسته‌رم‌‌‌.

تات دگيلم من اگيلم،

دۆزگۆنۆم وار‌‌‌، آج دگيلم‌‌‌.

كيمسه‌يه محتاج دگيلم‌‌‌،

صاحب ديداري ايسته‌رم‌‌‌.

كيچيك شعرلر - ص  52 . 1348

اليم بيلمير يورولماغي‌‌‌.

مني دينله‌‌‌، مني دينله،

بيليرسن كي اؤزۆن بئله.

چوخ آجيدير بير شاعيرين،

تك اولماغي‌‌‌، تك اولماغي‌‌‌...

داغ دؤشۆنۆن بولاغي تك،

من گؤزلردن آتيلميشام‌‌‌.

سانيلمايير بوردا امك‌‌‌.

آياق اۆسته دورام گره‌ك‌‌‌.

ايللردير دۆشمن اوخونا،

دوتولموشام‌‌‌، دوتولموشام‌‌‌...

منيم شعريم‌‌‌، منيم سؤزۆم،

ائللريمه چاتماييبدير‌‌‌.

انتظاردا سوسوب گؤزۆم‌‌‌،

قاراليبدير هر گۆندۆزۆم‌‌‌.

ياد ائللي‌نين يالاني دا،

اۆره‌گيمه ياتماييبدير‌‌‌...

اؤز يوردومدا‌‌‌، اؤز اوبامدا،

غريب گزيب دانيلميشام‌‌‌.

قلميمدن كاغيذلارا‌‌‌،

ياش تؤكمۆشم داملا - داملا‌‌‌.

بودور نرون‌‌‌، بودور فرعون -

آتشينده يانيلميشام‌‌‌.

عشقي مقدّس شاعيرم،

سينه‌مده وار قيزيل اۆره‌ك‌‌‌.

بورا منه اولوب وطن‌‌‌،

مني هارا آتيرسان سن‌؟

نئجه يوموم من گؤزۆمۆ‌؟

بير دۆنيا وار بوردا ديلك‌‌‌...

كؤنلۆم ائوي اولوب برباد،

قولاق وئرين‌‌ سيز آ دوستلار:

حددن آشيب ظۆلم و بيداد‌‌‌.

يئرسيز من چكميرم فرياد‌‌‌.

ائل نيسگيلي بير شاعيري،

بيليرسيز نه حالا سالار‌؟‌‌‌...

كيچيك شعرلر - ص  47 .

دكتر حسين محمدزاده صديقين (دوزگون) - ايكينجي شعر وبلاگينه باخين

رنگين اولدو ساري بۆلبۆل‌‌‌.

قلبين ظاليم قيش آولادي‌‌‌،

گل آغلاما باري بۆلبۆل‌‌‌.

كؤكسۆنده اودلاندي اۆره‌ك‌‌‌،

گۆلۆنج اولور بوردا ايسته‌ك‌‌‌.

هاني كئچميش زامانلار تك -

باخچالارين باري بۆلبۆل‌‌‌.

نييه سئچدين سن ظۆلمتي‌‌‌،

قبول ائيله‌دين ذلّتي؟

بيلميردين بو حقيقتي،

قيشين اولماز عاري بۆلبۆل‌؟

قارا بولود يان گئده‌‌‌جك‌‌‌،

قهرمانلار قان ائده‌جك.

گۆن داغدان قالخيب گله‌جك.

اريده‌‌‌جك قاري بۆلبۆل‌‌‌.

عاشيق ترپه‌دجك سازي‌‌‌،

قالديراجاق خوش آوازي‌‌‌.

گؤره‌‌‌جكسن يايي – يازي،

اؤيه‌‌‌جكسن ياري بۆلبۆل‌‌‌.

بيليرم آخر ياز گلر،

گۆنش يئره نور سرپَلر.

يئنه گۆللر عشوه ائيلر،

ائيلمه چوخ زاري بۆلبۆل‌‌‌.

گيرريك قيزيل گۆل باغينا‌‌‌،

بنفشه‌لر اويلاغينا.

يئتر يارين قولاغينا،

سن ‌‌سيزيلدات تاري بۆلبۆل‌‌‌.

دۆزگۆن دئيير دؤنه‌‌‌جك ايل‌‌‌،

ياناغيندان قان - ياشي سيل‌‌‌.

سازي گؤتۆر آچ گيلن ديل،

اوخو اوخو ساري بۆلبۆل‌‌‌.

كيچيك شعرلر - 12 / 11 / 46 هريس - ص  31 .

يازدا باهار‌‌‌، گۆز[1] ده باهار‌‌‌، اي گؤزه‌ل‌!

باغدا آييلجاق سحر ائركن‌‌‌، گۆلۆم‌‌‌،

چكدي هاوار‌‌‌، مينلر هزار‌‌‌، اي گؤزه‌ل‌!

من سنه حيرانليغيمي گيزله‌مم‌‌‌،

يوخدو بو ايشده منه عار‌‌‌، اي گؤزه‌ل‌!

يانديم ايچيمده مني وورجاق دني‌‌‌،

چكمه‌ديم عشقيندن هاوار‌‌‌، اي گؤزه‌ل‌!

قاشقايي‌نين غيرتيني‌‌‌، مردليگين‌‌‌،

دۆنيايا سال بير داها جار‌‌‌، اي گؤزه‌ل‌!

كئچميشينه باخ گيلن، اوز جدّي‌نين،

قدريني بيل‌‌‌، ائيلمه خوار‌‌‌، اي گؤزه‌ل‌‌‌.

دۆزگۆنو دۆز عشق ساليب چؤللره‌‌‌،

قويمادي قلبينده قرار‌‌‌، اي گؤزه‌ل‌!

قاشقايي لوحه‌لري - ص  30 - 1377.