حبيب ساهر، بولود قاراچورلو سهند، عليرضا اوختاي، حسين دوزگون كيمي شاعرلرين شعرلريندن سئچمه‌لر سعيد موغانلي و ياشماق نشرياتي‌نين فعاليتلرينده چاپ اولموش قيمتلي اثرلردير.
حبيب ساهردن «يانان ياشيل»، عليرضا اوختاي‌دان «ايشيق»، بولود قاراچورلو سهنددن «قارداش آندي»، و حسين دوزگوندن «تورپاق قوخوسو» شعر كيتابلاري بو انتشارات طرفيندن ايشيق اوزو گؤردو. بو گونلرده «تورپاق قوخوسو» 300 صحيفه‌ده و حسين دوزگونون يوز نئچه قطعه شعرلري ايله چاپ اولدو. كيتابين مقدمه‌سيني و بير نئچه شعريني تقديم ائديريك:
«سايين حسين دوزگون آدي، بيزه كلاسيك ادبياتيميزين قوروقچوسو كيمي تانينميشدير. اصلينده دكتر حسين محمدزاده صديق دئيه بير عمر درس كلاسيندا اوتوروب، و يا كلاسيك و عرفاني ادبياتيميزين آراشديريجي‌سي و ادبيات تاريخيميزين و آذربايجان ديلچيليگين اوزماني كيمي تانيديغيميز سايين اوستادين گنجليگينين ايلكين دووروندن باشلاياراق شعر ياراتماسي بير آز گيزلين قالميشدير.
گونوموزه كيمي يوزدن آرتيق، ادبي- بديعي- تاريخي - تدقيقي اثرلري تورك توپلوموندا ايشيقلانديران قوجامان يازارين آرا - سيرا شعر مجموعه‌لري ده ايشيق اوزو گؤرموش، آنجاق بؤيوك آذربايجان كلاسيك‌لرينين او جمله‌دن (فضولي، نسيمي، نباتي، معجز، شيرواني و . . . ) كيمي‌لرين، اوستادين امه‌يييله ساهمانلانميش سسانباللي اثرلرينين آراسيندا آرتيق گؤره چارپماميشدير.
اوزون- اوزادي دانيشمادان بيزه و بيزيم نسله دوشن بورج، ادبياتيميزين اؤزه‌لليكله ده چاغداش شعريميزين بوتون الوانليغيني حاضيرلاييب، نشره يئتيريب و گؤز اؤنونده اوخوجولارين قضاوتينه قويماقدير.
حسين صديق كيمي بير سيرا اوجامان آراشديريجي‌لار كئچميش ادبياتيميزين اؤرنك‌لريني بيزه چاتديرميشلارسا، بيزده چاغداش ادبياتيميزي (چاغداش شعريميزين آتاسي حبيب ساهردن، سهند، اوختاي، سحره و مرقاتي‌دن قاراچايا و لوايي‌يه كيمي) و داها گنجليگين ياراتديقلاريني يايينلاييب، دونيايا پاي وئره‌جه‌گيميز باريش توپلولاريني گووه‌نه- گووه‌نه هنر انگينليگينده ايشيقلانيراق.»
999
منيم تورپاغيمدا چايلاقلار توتغوندور،
آمما دوغورماز دگيلديرلر.
گئجه- گۆندۆز آخيرلار
آخماجا ساياغي
يورغون گؤزلريله
گؤيلره باخيرلار
سئير ائديرلر هر ياني
اولدوزو، آيي،
دره‌ني، داغي . . .
منيم تورپاغيمدا دنيز سوسغوندور
سيلاحلاري دا
قوينوندا يوخ، الينده يوخ،
آلتيندا ساخلير.
گاهدا اؤزۆن گؤسته‌رير
كور اوغلونون آتي
دنيزدن چيخميش كيمي.
خيالدا ايسه گؤرۆنۆر
بابكين قوشونو گلير
همده فاتحانه
دۆشمني ييخميش كيمي.
منيم تورپاغيمدا چايلاقلار توتغوندور.
آمما دوغورماز دگيلديرلر.
دنيزه آخيرلار،
هر گئجه- گۆندۆز.
هر داملادا
999 نۆطفه
دنيزه تؤكۆلر.
ختمي گولو
هله سؤيلنمه‌ميش شعريم جوشماقدا
اوره‌ك سؤزلريني هانسي بير شاعـر،
يازا بيلميش،
كي من ده يازيم؟
گولون يارپاغيندا، اوره‌ك تئلينده،
چيچگين عطرينده،
اوخويا بيلرسن
بو شعريمي سن.
گئجه آتلي‌‌سي‌نين قارانقولوقدا
آتي‌نين توزونو سئير ائده بيلسن،
اوجا شمشاد قدّي
يئره دوشنده،
اونون طرفينه
سن گئده بيلسن،
هله يازيلماميش شعريمي اوندا،
اوخويا بيلرسن،
بلكه، دئييرم.
تبريزده قويلانميش
هله سؤيلنمه‌ميش شعرلريم منيم.
گئت گز «حسينيه» مزارليغيني،
بيرجه گول بيته‌جك آقابابامين
باشينين اوستونده.
بير ختمي گولو.
او، منيم
هله سؤيلنمه‌ميش شعريم اولاجاق!
تبريز يوللاريندا - ص 74.
ابدي حيات
هميشه‌ليك، ابدي بورجلويام سنه بيليرم
وطن!
بو بورجو ادا ائتمگه توانيم يوخ
منيم كي جانيم يوخ
كي او ابد اولسون!
سن اي منيم ابدي اومدوغوم آنا يوردوم
بوتون اومودلاريمين قايناغي
ترانه‌سي‌سن،
اوركده اكديگيم هر بير گولون‌ده دانه‌سي‌سن،
ديلك فسانه‌سي‌سن.
منيم اؤزوم ده گؤزوم‌ده سنه نثار اولسون!
سنين بؤيوك گله‌جك -
اعتبارلي شانلي گونون،
هميشه وار اولسون!
هميشه‌ليك، ابدي بورجومو منيم، تبريز!
قبول ائيله‌گيلن،
قوي ياواش - ياواش اؤده‌ييم.
اؤزوم،
هم اولاديم
و احفاديم،
تورونلاريم، نسيليم،
هميشه‌ليك - ابدي اعتبارلي گونلرينه،
بورجوموزو،
قوي ياواش - ياواش اؤده‌يك،
بير به بير وطن يولوندا گئده‌ك.
وطن!
بو بورجو ادا ائتمگه
بيزه مجال گل وئر...
تبريز يوللاريندا - ص 36.
آيدين اوفوق
احمد شاملودان ترجمه.
گؤيرچينلريميز بيرگون تاپيلار
گؤزلليك، محبت اليندن توتار.
اؤپوشدور ان كيچيك نغمه اوگون، باخ.
انسانلار
بير - بيره
قارداشدير آنجاق!
داها باغلامازلار ائو قاپيلارين
قيفيل ناغيل اولار
كؤنول ايسه بسدير
ديريليگه اوگون.
اوگون معناسي هر سؤزون سئومكدير،
سون سؤزون چين، سؤزلر دالي گزمزسن.
اوگون آهنگي هر سؤزون حياتدير،
سون شعريم چين من‌ده، قافيه درديني چكمرم اصلا.
بير گؤزل نغمه‌دير اوگون هر دوداق،
ان كيچيك نغمه ده اؤپوشدور آنجاق!
هميشه‌ليك گلسن سن اوگون اگر،
گوزه‌لليكله بير اولسا محبت،
اوگون كي بيرده بيز گويرچينلره.
يئنه سرپك دنه...
منسه اوگون اوچون اينتظار دايام
حتي اگر بئله داها اولمايام...
كيچيك شعرلر - ياي 1347 تبريز - ص 60 .
يادا سال!
سن اي داغ!
سهند، اي يوز مين ايللر قبله‌گاهي، اي اولو معبد!
سينه‌نده لاله‌لر بيتميش،
سولار آخميش، سئل آتلانميش،
بوروقلاريندا آهولار جيلولانميش،
بير چوخو ايتميش.
آنالار ياسا باتميش، درده قانلانميش،
چادرلار، ائولر اودلانميش.
يادا سال، گل!
سهنديم،
اي اولو معبد!
فضوليني گؤروبسن سن،
دده‌م قورقود اؤتوب سندن،
و هم زردوشت پيغمبر،
نباتي‌ني يادا سال گل!
سهنديم!
اي اولو معبد،
قارانليقلاردا آتلانماغي گؤرموش‌سن،
آنالار قلبي ايچره داغي گؤرموش‌سن.
شهيدلر قاني آخميش دامنيندن هر گئجه گوندوز،
نه‌لر سن گؤرموسن داغيم،
نه‌لر،
بير يادا سال،
گل باخ!
سينه‌ن حكمت بولاغي،
تجربه قايناغي،
تاريخين دياري،
يوردومون دفتر كـتابي!
يادا سال، گل!
سهنديم،
اي اولو معبد!
ائلين تاريخيني دانماق،
نه پيس ايشدير!
كيشي‌ديرمي ائلين چاكر ائد‌ن هر ناخلف؟
نه دؤوراندير كي يالتاقلار سنين سينه‌نده آت چاپسين؟
سهند، اي يوزمين ايللر قبله‌گاهي!
سؤيله تاريخه،
شهادت وئر كي: «پيس ايشدير،
ائلين هر ناكسه چاكر نؤكر سانماق.»
يادا سال گل، خلف اولادي،
هم ده ناخلف قارنين قاداسين،
يادا سال گل!
باشيوين يوزلر بلاسين.
بوگون سينه‌نده اوتلاقلار،
سورو سئيرانگاهي اولموش.
چوبانلار ني چالير بوردا.
سرين يايلاقلاريوا ائل اوبا دولموش،
جوانين يورد سالير بوردا،
قوجان‌دا ذؤوق آلير هر دم.
نه‌دير غصه، نه‌دير غم، هئچده من بيلمم،
ائلين قوربانليغي سايسيز حسابسيز دير سنه.
قبول ائيله بو شن گونده،
كئچن گونلريني،
بير – بير،
يادا سال، گل!
سهنديم،
اي اولو معبد!
اوزاقدان بير چوبان سسلير مني ده،
دئيير:
شاعـر!
بو يوردون قهرماني، سؤز بيلن انساني واردير، بيل!
وطن خالي دگيل اصلا،
خلف اولادي دوزگوندن.
تبريز يوللاريندا – ص41 – 1380.
