|
يوللارې يۏروب گلميشم،
گزه - گزه، سينله داغلار.
گۆل چيچكلر گتيرميشم،
اتڲينه چينله، داغلار!
اوزاقلاردا تۏزوم قالدې،
دؤران مني ظولمه سالد‌‌ې،
يارېمې اليمدن آلدې،
ياغې گلدن كينله داغلار!
ائل منيم درديمي بيلدي،
گؤزلريمدن ياشې سيلدي.
صولتيم انكار ائديلدي،
سن ده آغلا، اينله، داغلار!
ياد گؤزۆنده سؤزۆم اۏخدور،
غميم وار، سئوينجيم يۏخدور.
دۆزگۆنۆن نيسگيلي چۏخدور،
آل كؤكسۆنه دينله، داغلار!
گرايليلار- قاشقايې لوحه‌لري - ص 29 .
|
