|
اسكي بيللور لاله‌‌سيني،
هر گون سحر - سحر سيلر.
توزون آلار، پاريلدادار،
دوروب بير آنليق سئير ائده‌ر.
تيكر يورغون گؤزلريني،
سانكي دالار كئچميشلره.
آغ بيرچكلي قادين آنام،
هئچ باخيشين سرمز يئره.
باشي اوجا، گؤزو ديري،
لاله‌سينه باخار، باخار.
باخيشي‌‌نين وسعتينه،
يولدان گلر گوللو باهار.
گؤزلري‌نين شعاع‌سيندا،
دؤزوملردن نشانه وار.
دوغرولوقدان، دوزگونلوكدن،
صداقتدن ترانه وار.
آذربايجان ائللري‌نين،
آناسيدير منيم آنام.
قلبدن قوپان شعرلريمين،
آيناسيدير منيم آنام.
قلبينده ذره‌جه توز يوخ،
تميز بيللور لاله‌‌سي تك.
صافدير، تميزدير، آري دير،
كؤكسونده آليشان اوره‌ك.
زنگان لوحه‌لري - ص 71 - 11
/ 3 / 77 .
|
