بير بالاجا ساري كؤينك.

جهجهيندن دويولوردو‌‌‌.

باشينا بلا گله‌‌‌جك.

بير شرارت كند اوشاغي،

اوتلاديردي قوزو – قويون.

شاپاند - قايا تاولاياراق‌‌‌.

چيخارديردي مينلر اويون.

كؤشنلري گزه – گزه،

گليب چاتدي او چمنه.

گؤردوكي بير ساري كؤينك،

سس ساليبدي جهجه ايله‌‌‌.

قولاقلارين شاخلاياراق،

دينله‌دي او قوشون سسين.

سانكي دئيير سؤزلريني،

دالي وئردن اؤز نفسين.

سس آرديجا گزدي - گزدي‌‌‌،

توخدادي تا بالا قوشا.

بير ساپ چكيب شاپانديندان،

ووردو اونون قيچين داشا.

توپلادي بير باش قوزونو،

گونش داغدا اگيلنده.

ايپله قوشو ساللاياراق‌‌‌،

سورو ايله گلدي كنده.

اوشاق ائوده سئوينه‌ره‌ك،

آناسيندان غربيل آلدي.

ايچينه ده سپيب بوغدا،

آراسينا قوشو سالدي.

غربيل ايچره‌‌‌، بوغدا اوزره‌‌‌،

بير قاب دورو سودا قويدو.

بير شه‌ده‌ره قاپاق ائديب‌‌‌،

دؤوره‌‌سيني ايپله هؤردو‌‌‌.

گئجه بويو ساري كؤينك،

ياتمادان سس - صدا سالدي.

سحر اونو دولو گؤروب‌‌‌،

اوشاق درين فيكره دالدي ‌‌‌...

كيچيك شعرلر - ص  85 - 26 / 2 / 46 - مهرام كندي .