|
بيز قيللي‌ييق توكلويوك. عؤمور بويو يوكلويوك. هرنه دئديز اينانديق، بيز قولاغي توكلويوك! مكتب آچيلير يئنگي، فارس دئيه‌ك دينگي – دينگي. بير كيمسه هئچ سؤيله‌مير، بگو بينم چي ميگي؟ قاپي‌‌ني ياغيش دؤيور، اوره‌گيميز دؤيونور. بيز بوردا تيتره‌شيريك، او اوردا اؤزون اؤيور! سارايدا پولو سئلله، تبيم وار مني يئلله. دوقتورلار دئييرلر كي: كندليدير، جانيم، وئلله! آي قيز، گؤزلري آلا، دور پينجه اودون قالا. شاهي باسديراجاغام، نالچي ياخشي باخ نالا! چايلار چشمه‌لر دولار، سونبولو اوراق يولار. آزادليغا چيخاريق، گومان كي بيرگون اولار! باغدا چيچك اكه‌ريك، ديبينه سو تؤكه‌ريك. ظاليملرين گؤزونه، اوخ تك آخر چؤكه‌ريك! ياشيلليقدير مئشه‌ميز، ايشله‌مكدير پئشه‌ميز. بيچيله‌جك شاه كؤكو، ايتيليري تئشه‌ميز! كندلي‌ييك آي آقالار، درتلي ييك آي آقالار!... موللا قوران اوخويار، كندلي خلي توخويار. خلي‌ني آپارارلار، سارايلارا سالارلار. سارايدا اگله‌شرلر، قيزيل شراب ايچرلر. كندلي قاپيدان باخار، مني يانديريب ياخار. بارماغيني قالديرار، قيرميز قاني دامجيلار. دوشر خلي اوستونه، آغ ناخيشدا ايز سالار. گؤز ائله اوردا قالار. گؤز باخماقدان قارالار قان سارالار، سارالار... كندلي‌ييك آي آقالار، درتلي ييك آي آقالار... مجموعه 1 - قيش 1346 – ص 58 .
|
