|
من سنه بير دسته گول باغلاميشديم
ارمغان ائده‌م.
اؤزومو داغلارا داشلارا سالديم
توفانلاردان كئچديم
دنيزدن آشديم
سنه چاتديم
آمما
يئل اسدي
اليمدن گوللري
قاپدي!
سنه گؤزل گونلر آرزولاييرديم
گؤزه‌ليم!
نه قده‌ر چيرپينيرديم
كاشكي بيلسئيدين.
بير گون قاغام دئدي:
«- داغا چيخ! داغدان يئن!
دنيزده توفانا بوراخ اؤزونو!
قوي گل نسيللر گونشي گؤرسون
گونشله دوغسون!
بير دسته گول آپار، گونشه ساري
چاتدير اونلارا!»
قاغامين سؤزونو چؤله سالماديم،
آلديم تاپشيريغين،
آمما يولدا، گوزه‌ل!
يئللره وئرديم.
|
