صمد بهرنگي منظومه‌سي
جابر آليشان
40-1330 – جي ايللرده خائن شاه رژيمي، بوسبوتون حاكميتين ايرانا تحميل ائتميشدي.
بوندان اوّل، 1325- نجي ايللرده ايرانين بير نئچه يئرلرينده بؤيوك كوتله‌وي –
ملي حركتلر اولموشدور. آمما بو حركتلري، دولت قوشونلاري وحشيجه‌سينه قانا چكيب، بؤيوك
فاجعه‌لر ياراتميشدير.1330- نجي ايلده مصدق باشچيليق ائده‌ن حركت ايسه « زاهدي »
كودتاسيلا قانا چكيلدي و 30 تير شهيدلري كيمي خاطره‌لرده قالان گونلر ياراندي.كودتادان
سونراكي ايللر، ايرانين ان آغير ايللريندن ايدي. آزاديخواهلار، وطنپرورلر بوتون
توتولوب، زندانلارا سالينيب و يا سورگون اولوردولار. هابئله چوخودا اعدام جوخه‌لرينين
قاباغيندا دوزولوردولر.1341 - نجي ايل قم و تهرانداكي حركات‌دا ياتيريلدي. ولاكين
كوتله‌وي حركاتين دايانماسينا باخماياراق، آزاديخواهلار ايچينده چوخ مبارز شاعيرلر
و يازيچيلار وارايدي كي، مستبد حاكميت اوغروندا آياغا قالخيب، مبارزه ائتديلر.
البته، بونلاردان بعضي‌لري موقتي چتينليكلره تابلاشماييب، اؤز سؤزلرين دانيب حاكميته
قاريشديلار. آز ده‌گيل ايدي او ادبياتچيلار كي، ملته اوز چئويرمه‌ييب، ائل يولون
گئتديلر و بو يولدا جانلارين قويدولار. بو يازيچيلاردان صمد بهرنگي‌ني آد آپارماق اولار.
صمد بهرنگي 1312- نجي ايلده تبريزين چرنداب محله‌سينده يوخسول
بير عائله‌ده آنادان اولدو. او مينلرجه اوشاق كيمي بيرينجي دفعه اولاراق يوخسوللوقلار
ايله تانيش اولدو. صمد اؤز تاي توشلاري كيمي كوچه‌ده، بازاردا، توز- تورپاق ايچينده
بؤيودو. اما هئچواخت اؤز طبقه‌سينه اوز چئويرمه‌ييب عؤمرونون آخرينا قده‌ر اونلاردان
دانيشدي و اونلارا يازدي.
استبداد دؤورونده آناديلده يازيب اوخوماق ان بؤيوك گوناه
ساييليردي و هابئله آذربايجان ديلينده اثر يازماق و چاپ ائتديرمك‌ده بؤيوك جرم
ايدي، بونا گؤره صمد و بير نئچه يازيچيلار مجبور اولاراق اؤز اثرلريني
فارس ديلينده يازيرديلار.
صمد بيرينجي اثرين آذربايجان خلق داستانلاريندان ايلهام آلاراق «تلخون» آديله،
«ص . قارانقوش» امضاءسيلا «كيتاب هفته»ده چاپ ائتديردي.
18 ياشيندا ايكن دانشسراني قورتاراراق آذربايجان كندلرينده معلمليگه باشلادي. او تئزليكله بيلدي
كي، دانشسرادا اؤرگنديگي تعليم –
تربيت روشي، كند اوشاقلارينا مناسب دگيل. او، اؤزو دئديگي كيمي كند محيطي ايله اويغون
بير تعليم و تربيت يولو ياراتدي، بهرنگي هر نه‌دن قاباق اوشاقلاري خيال دونياسيندان
چيخارماغا چاليشدي. او، آ. ث. ماكارنكو كيمي فكرلشرك، دئييردي:«بيز نئچون اوشاقلاري
سس‌سيز – صداسيز و مطيع انسانلار تربيت ائده‌ك، گره‌ك
اوشاقلارا دئيه‌ك كي دونيانين ياريسينا قده‌ر جماعتي آجدير، نييه آجدير و نه‌جور
بو آجليغي آرادان قالديرماق اولار.»
صمد،
بيرينجي دفعه اولاراق، ايراندا اوشاق ادبياتيندا يئني بير يول آچدي. بوندان علاوه،
اونون مختلف اجتماعي مقاله‌لري، خفقان دؤرونده انسانلاري غفلت يوخوسوندان آييلدان
مقاله‌لر ايدي. نئچه اوشاق ناغيللارينا شامل اولان «مجموعه‌ي داستان»ها كيتابي،
«كند و كاو در مسايل تربيتي ايران» و باشقا اثرلري، اونون قيسا عؤمرونون
محصولودور. او، آذربايجان ادبياتي ساحه‌سينده‌ده بير سيرا تدقيقات ائتدي.
«افسانه‌هاي آذربايجان»
(بهروز دهقاني ايله بيرليكده)، «پاره – پاره» و «تاپماجالار»، بو تدقيقلرين ثمره‌سيدير.
اونون شاه اثري «ماهي سياه كوچولو»
دفعه‌لرله تجديد چاپ اولدو. سونرالار بو كيتاب ايتاليادا «قيزيل پلاك»
جايزه‌سينه لايق گؤروندو.
صمد 1347- جي ايلين شهريور آييندا اؤز اثرينين
قهرماني ماهي سياه كيمي اؤزونو وطن يولوندا فدا ائتدي. صمد، آرازا قاتيشيب،
آرزوسونا چاتيب، اونونلا دنيزه يئتيشدي. اما صمدين خاطره‌سي تاريخ بويو بوتون
انسانلارين قلبينده‌دير، اوره‌گينده‌دير.
صمد آچديغي يول، ايران ادبياتيندا بؤيوك تأثير قويدو.
بير نئچه انقلابچي شاعيرلر و يازيچيلار اؤز اثرلريني صمده اختصاص وئره‌ركن، اونون
اثرلريني و ياشاييشيني سرمشق قرار وئرديلر. آذربايجانين معاصر شاعيرلري حبيب ساهير،
ب. ق. سهند،
ع. اوختاي و باشقالاري صمد بهرنگي حاققيندا نئچه شعر يازيبلار. آمما صمدين گنجليك يولداشلاريندان
اولان حسين دوزگونون منظومهسينين باشقا بير حال و هواسي واردير. شاعير دوزگون،
«صمد بهرنگي» منظومه‌سيني 1347- نجي ايلين شهريور آييندا صمدين شهيد اولدوغو تاريخدن
بير نئچه گون سونرا سؤيله‌ميشدير. بو منظومه دهشتلي شاه رژيمي‌نين خفقان ايللرينده
جزوه، پلي كپي و كاست نواري شكلينده خلق آراسيندا ياييلميش، الدن- اله گزيردي.
اسلامي انقلابدان سونرا، بيرينجي آذربايجان ديلينده چاپ اولان كيتاب كيمي 1357- نجي ايلين بهمن
آييندا نشر اولدو.
حسين دوزگون 1344- نجو ايلدن ادبي- سياسي فعاليتلره گيريشميش
و ائله او ايللرده شعر يازماغا باشلاميشدير. شاعيرين شعر كيتابلاري اينديه قده‌ر
«كيچيك شعرلر»، «مجموعه» (4 ديگر شاعير ايله بيرليكده) و «باكي لوحه‌لري» آدلاري ايله
چاپ اولوبدور.
آز ايدي او وطن‌پرور و انسان سئون شاعيرلر كي، كئچيرديگميز
قانلي قادالي ايللرده مقام و شؤهرت حرصيني قيراغا قويوب، ساتغين اولماييب و اؤز
نعره‌لرين استبداد و ظلمه قارشي اوجالديب، مبارزه يولونو سئچديلر. شاعير حسين دوزگون
اونلاردان بيريدير. شاعيرين ان مهم سجيه‌لريندن بودور كي، انساندا مبارزليك، خلقيليك
و ضد امپرياليست‌ليك روحو يارادير. بو سجيه «صمد بهرنگي»
منظومه‌سينده‌‌ده حاكيمدير. بو منظومه، مقدمه و 14 نغمه‌دن عبارت ليريك- ائپيك
پائمادير. ايلك باخيمدان بو نغمه‌لر مستقل گؤزه چارپسالاردا كلّيتده ربطسيز دگيلديرلر.
اونلارين آراسيندا فورما، مضمون، معنا، شكيل و آهنگ جهتيندن محكم علاقه‌لر باغلانيب.
«صمد بهرنگي» منظومهسينين بديعي قورولوشو و فورما خصوصيتي استبداد دؤورونون شرايطينه
باغلي اولاراق، او دؤورون اساسيندا يارانيبدير. او دؤورون اساس شرايطي خفقان و
فشار شرايطي ايدي. انقلاب غلبه چالا بيلمه‌ميش و ضد انقلاب حمله‌ده ايدي. پس،
انقلاب ادبياتي ايسه گره‌ك بو حمله‌ني دفع ائديجي و ضد انقلاب عليهينه سارسيلمايان
بير ادبيات اولايدي. ائله منظومه‌ده ده بو خصوصيت واردير. منظومه بو خفقاني تصوير
ائديجي بير مقدمه ايله باشلانير:
گونش قيزمار، هاوا دورغون،
نفس يوخ،
كوچه‌لر بوسبوتون ازدحامسيز
بوش . . .
آمما مبارز انسانلار دوشوندوكجه آياغا قالخيب، قورخمادان
يوللارينا دوام ائدي‌رلر. بو سو آخيمينين عكسينه اولان حركتده، محكم آسفالت ائله تيترتمه‌يه
دوشور، سانكي اوستوندن بير دنيز گئدير. صمد بو انسانلاردان بيريدير:
صمد دوشونوركن، قالخير آياغا،
يئنه‌ده يولونا دوام ائيله‌يير.
آسفالت ائله تيترير سانكي اوستونده،
بير دريا، بير دنيز، بير عمّان
گئدير.
بو حركتين مقدس‌ليگينه گؤره انسان سهلدير، هر آدديم،
آغاجلاردا سلام سؤيله‌ير:
تبريزين قهرمان ايگيد اوغلونا،
هر آدديم آغاجلار سلام سؤيله‌يير.
منظومه‌نين بيرينجي حصه‌سي شهيد آنالارينين ايگيدليگين
گؤسترير و اونلارين بو چتينليكلره دؤزمه‌لرين گؤزه‌ل بويالارلا افاده ائدير:
اوغول دردي نه‌دير من كدرلنيم،
اوغوللار درديني نئجه ايتيريم؟
ميليونلار قيزلاريم، اوغوللاريمدير،
اؤز قانادلاريمدير، اؤز
قوللاريمدير.
شاعير، وطن‌پرورليگي هر آذربايجانلييا وظيفه بيليب، وطن يولوندا جاني بي‌ارزش ساناراق بو
سؤزلري تاريخيلشديرمگه گؤره، بابكين آناسينين نصيحتلرين فاكت گتيرير:
وطنين يولوندا هئچ بيراوف
دئمه!
قانيني وطندن سن اسيرگمه!
شاعير، كئچميش تاريخي حادثه‌لردن‌ده موضوع آلير. نسيمي،
نعيمي و شاه ختايي كيمي مرد سيمالاردان ياد ائده‌رك اونلارين سارسيلماز
اراده‌سيني تاريخي فاجيعه‌لر اوغروندا جانلانديرير:
منيم اولو بابام عمادالدينين،
حلبده سويدولار
بير گون دريسين.
دئدي:«حق عاشيقي دؤزه‌ر
ذلّته،
سون قويار قيزلباش بو
شقاوته.»
كئچن رژيمده وطنين بوتونلوكله خارجي استعمارچي اؤلكه‌لرينين
اختياريندا اولماسي و اونلارين سياسي- اجتماعي حاكميتي، سبب اولوب كي، شاعير،
منظومه‌ده وطن‌پرورليك دويغولاريني گوجلنديره، منظومه‌نين بير حصه‌سيني بو موضوعا
اختصاص وئره. شاعير، درين نفرتين وطن دوشمنلرينه و اونلارين داخلي مزدورلارينا
گؤسترير.
منظومه‌ده تدريجا حماسه‌يه گرايش چوخالير و حياتين واجب
مسئله‌لري گئتديكجه چوخراق عكس اولونور. گؤروندوگو كيمي منظومه حيات حقيقتلري اساسيندا
يازيلميشدير. صمدين خصوصيتلري و اونون انسانلارلا رابطه‌سي و او شخصيتين شاعيرده تأثيري،
تصوير اولونور.
شاعير منظومه‌نين آخير نغمه‌لرينده صمد اؤلومونون فاجيعه‌سيني مرثيه‌يه اوخشار
مصراعلارلا تصوير ائدير:
قيزيل گولوم سولدو آمان، آي
ائللر!
ائشيتسينلر سونرا گلن نسيللر.
و يا آيري يئرده:
كؤكومون اوستونده اود يانديرديلار،
بوغومو يولدولار آي ائللر،
هاوار!
آمما دالينجا اوخوجونون فكرينده بؤيوك انسانلارا مرثيه
دئمك تصوّرونو پوزور. قهرمانلارا گؤز ياشي آخيتماق ياراشماز. گره‌ك آتالار دئديگي
كيمي قانا قان تؤكوله و انتقام توخومو سينه‌لرده اكيله.
ائللر آغلاسالار قهرمانلارا.
قان آلارلار بوتون گئده‌ن
قانلارا.
منظومه‌نين آخرينجي نغمه‌سينده شاعير، اوخوجولاريني صمدين
يولونو گئتمگه چاغيرير. او گونو تصوير ائدير كي، قولو پولاد فهله‌لر، پوزغون كندليلر،
ايشچي‌لر و ميليونلار محروم انسان صمده بورجلاريني اؤده‌مه‌گه يولا دؤشورلر.
تهران – 1363.
