بير بؤلوك دورنا
صديار
وظيفه (ائل اوغلو)
اؤتن يوز ايل‌ليكلرده اولدوغو كيمي، ياشاديغيميز يوز ايل‌ليكده‌ده،
مكتوب ادبياتيميزين آپاريجي قولو يئنه ده شعريميزاولموشدور. ائلهجهده،
چاغداش مقاومت ادبياتيميز اؤزونو يالنيز شعير فورمالاريندا گؤستره بيلدي. شعريميز
بو آپاريجيليغي اوزاق يوز ايل‌ليكلردن باشلاميش كئچيرديگي اوغورلو مرحله‌لري‌‌نين‌نتيجه‌‌سينده
اله گئچيريبدير.
ائله اونا گؤره ديركي، شعريميز هميشه ميللي شعوروموزون‌داها دا گوجلو
اولان، داهادا تأثيرلر بوراخابيله‌ن ميكرافونونا چئوريلميشدير. ميللي ذؤقوموزو
اوخشايان، ائلهجهده ميللي‌دوشونجه‌‌ميزي اؤزونده عكس ائتديرين گوجلو صنعت
نمونه‌سي اولموشدور.
اؤتن يوز ايل‌ليگه قده‌ر، توپلومسال قايغيلاريميزدان دانيشماق ايسته‌ينده،
بيرينجي دفعه شعر صنعتينه اوز گتيرميش و اونون انكشافينا چاليشيميشيق. شعرين
عكسينه اولاراق، رومان ادبياتيميز هئچ واخت اؤنملي اولماميشدير. معين سبب‌لره
گؤره، ياراديجيليق دونياميزي باشقا صنعت نؤوعلري ايله خالقا چاتديرماق ايستمه‌ميشيك.
يقين كي، بو خالقين دا ايستمه‌ديگيندن آسيلي اولابيلر. داها آرتيق شعيره مئيل
اولدوغوموزا گؤره، بيزه شاعير خالق دا دئميشلر. آنجاق شاعير روحلو خالقميز، داها
دوزگون فيكير سؤيله‌‌ييبدير. خالق داهادا پوئتيك دويغولارا مالك اولوب، بيزي
اؤز رومانتيكاسيندا ياشادا بيله‌ن وطنداشلاريميزا اصيل شاعيردير دئميشدير. اودوركي،
سؤز صرافلاريميزين شعر و شاعيرليك حاققيندا أل‌ده ائديله‌ن دوشونجه‌لري،
زامان ـ زامان فرقله‌نير. بئله بير حقيقته‌ده اينانا بيليريك كي، تئاتر، رسامليق و رومان ادبياتي كيمي صنعت اؤرنكلري بيزيم
خالقين‌دا ميللي شعورونو عكس ائتديرمگه ايمكان تاپسايدي، شعريميزين آرخيوينده،
تاپديغيميز شاعيرلريميزين سايي بو قدرده چوخ اولموياجاقدي. كلاسيك‌لريميزده
اولدوغو كيمي، چاغداش دؤورموزده ده بيرچوخ علم آداملاريميزين شاعير اولدوقلاريني
گؤروروك. اونلار، يوخاري سوييه‌ده عاليم اولدوقلارينا باخماياراق صنعته گلديكده
شعر ايله ماراقلانيبديرلار.
بو بيزيم خالقين سيرلي استعداديندادير. شعر اؤرنكلريني اوخودوغوموز
چاغداش عاليملريميزدن، پروفسور محمدتقي‌زهتابي، دوقتور حميد نطقي، پروفسور حميد محمدزاده، پروفسور بيگدلي و پروفسور دوكتور حسين محمدزاده صديق «دوزگون» جنابلاريني
آد آپارا بيله‌ريك.
آدلاريني چكديگيميز عاليملريميز، ديليمزين چاغداش ادبي شيوهسيني
جنوب‌دا داهادا پروفسيونال يازارلاريندانديرلار. صنعته گلديكده، اؤز دونيا گؤروشلريني،
احساس و قايغيلاريني، پيئس، حئكايه و رومان ادبياتيله دگيل، يالنيز شعر ايله
اوخوجو گروپلارينا چاتديرميشلاردير.
ايسترديم الينيزده اولان مجموعه‌نين شاعيري دوقتور حسين محمدزاده صديق
«دوزگون»حضرتلري‌نين شعرلريندن بير قيسميني احتوا ائده‌ن «بير بؤلوك دورنا»
كيتابينا داخيل ائتديگيم شعرلر حاققيندا، حؤرمتلي اوخوجولارلا فيكير مبادله‌ميزه
شاعيرين شعرلري‌له دوام ائده‌ك.
بير بؤلوك دورنا، احساس دونيالاريميزين درين قاتلاريندان گله‌ن بو حيس
بيزي ايلك دفع كؤوره‌لدير، اوره‌گيميزي دؤيوندورور. چيرپينتيسي ائشيديلمه‌يه‌ن
اوره‌ك دؤيونتولريميزه قاريشيب، اوره‌گيميزي اوزاق اوفقلره دوغرو آپاران
دورنا قاناتلاري بيزي، شاعيرانه‌لشديرير. بو اينجه دويغو بيزيم اوچون هميشه
مقدس، هميشه دوغما اولموشدور بو دوغما حيس، بلكه ده‌ميللي ذوقوموزو مين ايلليك لردن بري اوخشايان گيزلي بيردويغوو
رومانتيكادير.
شاعيرين اؤز شعرلريندن گؤتورولن بو آد، كلاسيك دويغولاريميزي آشيلايان
بير سؤز، بير ايفاده‌دير. شيفاهي خالق ادبياتيميزين آپاريجي قولو اولان عاشيق
ادبياتيميزدا تئزـ تئز راست گلديگيميز دورنا سؤزو، پوئتيك ذؤوقوموزون اسطوره‌لر سوييه‌‌سينه چاتديرا بيلديگي
تئرمئن‌لردندير.
اوزاق عصرلردن بري، شعرلريميزده و شيفاهي خالق ادبياتيميزدا اولدوغو كيمي
ائپيك و محبت ناغيللاريميزدا آزادليق جارچيسي، باهار مژده‌‌چيسي و حقيقت
آختاران اينسانلارين سمبولو اولان دورنا، مين ايللر بويو كؤچري چيليك‌له حيات
سوروب، يورتدان ـ يوردا، ائلدن ـ ائله داشينماقدا اولان اجداديميزين پوئتيك
ذهنينده يارانان تايسيز سمبوللار اولموشدور.
عصرلر بويو داغدان ـ داغا، بؤلگه‌دن بؤلگه‌يه كؤچمكده اولان بابالاريميزين
اوزاق ـ ياخين ائللرده قاتاردان قيريليب قالان ائللي‌لرينه باش ووروب گله‌ن
دورنالار كؤيره‌ك احوال روحيه‌لي‌اجدادلاريميزين ذؤوقونو اوخشايان اوچار بيرقوش
اولوبدور. اوچوشودا شاعيرانه اولان دورنالار وطن گؤيلريندن اؤتنده هله‌ده‌كي
وار دايانيب اونلارا باخمايان اولماز. دورنا قاتارلاري ايندي‌نين اينديسينده‌ده
اؤتدوگو بؤلگه‌لرده ياشايان وطنداشلاريميزي كؤيره‌لدير و رومانتيك‌لشديرير.
دوم ـ دورو سولاريني ايچديگيميز بولاقلاريميزا ائله‌بيل دورنا گؤزوده
دئميشيك. بو، صاف‌ليغين، دويغو اينجه‌ليگيني گؤزه‌لليگين أن شاعيرانه ثمثيلچيسي
اولماق دئمكدير. حسين دوزگون؛
باغداددانمي، يوخسا تبريزدن
قالخيب
بولوتلا ياريشير بير بؤلوك
دورنا.
زولال هاواسيندا گؤزه‌ل
باكـي‌نين
دالير اونلارامي فضولي
بابا!
كور اوغلونون ده‌لي‌لريندن اولان ايواز بالي، سئوگيسي تئللي‌خانيما
باغداد سفريندن گتيرديگي دورنا تئللري، ائلهجهده «خان‌كرم»ين داياغيندا اولوب
قارا كئشيش‌ين حاقسيز اولدوغونو، كرم‌ين‌حق عاشيقي، حقيقت وورغونو اولدوغونو گؤسترديكده حقيقي‌سئودانين اؤلمزليگينين
اثباتيندا جيغالاريني چمن‌ليك‌لره تؤكن بير بؤلوك دورنالارين مثبت رول‌لاري نين
ايللر بويو ميللي ذؤوقوموزو اوخشايان مضمون اولاجاقدير:
باغداددانمي يوخسا تبريزدن
قالخيب
بولوتلا ياريشير بير بؤلوك
دورنا!
اوخودوغوموز بو بير مثبت شعر، بيزيم تاريخي ذهنيميزين درينليگيندن گله‌ن
چاغداش شعر اؤرنگي‌دير. بيز بوكيمي مصراعلاردا تاپديغيميز اينجه‌ليك‌لرله معاصر
شعريميزين اؤز كؤكونون اوستونده دوردوغونو گؤرورو باشا دوشوروك. يوخاريدا اوخودوغوموز
مصراعلارين باغلاييجي مصراعلري؛
«زولال هاواسيندا گؤزه‌ل
باكي‌نين
دالير اونلارامي فضولي بابا؟
آذربايجانين كلاسيك ادبياتيندا تايسيز دؤنوشلر ياراديب، شعر دونياميزي
ابديليك چيچكلنديرن فضولي بابا (حكيم ملا محمد فضولي) عؤمور بويو آذربايجانيميزدان اوزاقلاردا ياشاسادا ديلميزين ادبي شيوهسيني
اؤز عصرينده نورمالاشديرا بيله‌ن اؤلمز شاعيريميزدير.
بو مثبت شعرده دونيالاريميزي تاپا بيليريك. كؤيره‌ك دويغولاريميزين
ترجماني اولان بوشعر اؤرنگينده چاغداش آذربايجان شعرينده شعريت عنصرلري‌نين ييغجاميني‌‌دا آسانليقلا
تاپيريق:
من سنده تاپميشام بابك
عنادين،
باهار گونلري‌نين قوخوسون
دادين!
چيخماز خاطريمدن هئچ زامان
آدين،
مقدس آرزولو تبريزيم منيم!
(تبريزـ 1347)
حسين دوزگونون گنج‌ليك ايللري شعري اولان بو بيربند شعرده، اونون ايللك
ياراديجيليق ايللريندن بري ادبي ديلين نورماسيني، چاغداش اوخوجو ايسته‌ييني
ائلهجهده شعر اوچون گره‌كلي اولان ايازلاري، ايشاره‌لري و باشقا اؤنملي شعر
عنصرلرين اولدوقجا نظرده آلديغيني گؤروروك. بو اؤز ياشاديغي ايللرين سوييه‌سيني
باشا دوشمك و گله‌جك ادبي نسل اوچون قايغي‌دير، اؤتن اون ايل‌ليكلرده شعريميزين
داهادا خالق طرفيندن قارشيلانان اؤرنكلري دير:
قارا بولوت يان گئده‌جك،
قهرمانلار قان ائده‌جك.
گون داغدان قالخيب گله‌جك،
اريده‌جك قاري، بولبول!
عاشيق ترپه‌ده‌جك سازي،
قالديراجاق خوش آوازي.
گؤره‌‌جكسن يايي ـ يازي،
اؤيه‌‌جكسن ياري، بولبول!
تام ظريف دويغولارلا يازيلان بوگرايلي شعرده گله‌ن «قارابولوت»، «قهرمان»،
«بولبول»، «عاشيق» كيمي پؤئتيك تئرمنلر بيزي شعرين اينجه‌ليك‌لرينه مجذوب
ائدير. بو اوخوجونو خالق‌فولكلوروندان و اونون تاريخي ذهنينده اولان شاعيرانه‌ليلكلرله
بير داهادا قيدالانديرماقدير. اوخودوغوموز شعرده تاريخ بويو قارانليقلار، ظولوملر
و عدالت‌سيزليك‌لر قارشيسيندا مقاومت ائله‌يه‌ن خالق كوتله‌ميزين اؤزونو تجسم
ائده بيليريك. بو عدالت سئوه‌ر خالقيميزين ايسته‌گي كيمي شاعيريميزين‌ده
مصراعلارينا چئوريليب، ميللي شعريميزين چرچيوه‌لريني يارالدان شعرلردن اولموشدور.
اينديه‌‌ده‌ك اون ايكي جيلد شعر توپلوسونون اوخوجوسو اولدوغوموز، جناب دوقتور
حسين محمدزاده صديق «دوزگون» حضرتلري‌نين شعرلري هميشه خالقيميزين سئوديگي
مضمون‌لاردان اولموشدور. او هئچ واخت «صنعت ـ صنعت اوچوندور» دئييله‌ن بوش
بوغارليقلارا اويماميش و شعريني خالقين ساده دانيشديغي ديل ايله يازميشدير.
او ساده‌ليگي دولغونلوقلا بيرليكده شعريميزه ارمغان ائده‌ن شاعيرلردن اولدو.
من اوستاديميزين شعر مجموعه‌لري آراسيندان سئچديگيم بير نئچه شعري «بير بؤلوك
دورنا» آديله نشر ائديرم. اوخوجولار اوچون بعضي لازم اولان ايضاحاتي‌دا پاورقي‌لرده
تقديم ائله‌ميشم. قوجامان عاليم شاعيريميزه اوزون عؤمور و اوغولارديله‌ييريك.
تهران - 1381.
