گوللر آچاجاق
ادبياتيميز و كولتوروموزه گئجه- گوندوز يورولمادان، جان‌دان مايا قويان‌لار
ايچينده شوبهه‌سيز كى، اوستاد دوقتور حسين صديقين پايي هامي‌‌دان چوخ اولماسادا، چوخ‌لاريندان
آرتيق اولموشدور.
مبالغه‌سيز دئسه‌ك، اونون چاليشقان‌ليغي تانيديغيميز ادبيات‌چى و شاعيرلر
ايچره تاى‌سيزليغي آپ- آيدين دير.
او، ايسته‌ر شاعير، ايسته‌ر قزئته‌چى، ايسته‌ر ترجمه‌چى و ايسته‌رسه باش
رئداكتور اولدوغوندا آغير وظيفه‌لر داشيميش‌دير.
دوقتور صديقى، ياراتديغي اثرلرينه
گؤره بير شاعير، عاليم، بيلگين اديب و تاريخ‌چى كيمى تانيريق. فيكريميزجه او، ائلى‌نين
يانيندا همه‌شه باشي اوُجادير. نييه كى او، اؤز وطنداش‌ليق بورجونو ائلى‌نين و
وطنى‌نين قارشي‌‌سيندا، اوست سطيرلرده دئديگيميز كيمى دؤنه- دؤنه آغير و تَهلوكه‌لى
زامان‌لاردا اؤده‌ييب‌دير.
شاعير، اوستاد حسين دوزگون يا‌زيچي‌‌ليق عَرَفه‌سينه آياق قويدوقدا، شاه و اونون
فيكيرداش‌لاري‌نين ايچ اوزونو قات- قات آچيب گؤسته‌رمه‌كده و اونلارين ظاهيرده
گيزلى ماهيت‌لرينى ايفشا ائتمه‌كده دوغرودان دوغروسو شهامت و جسارت گؤسته‌رميش‌دير:
.... قيزيل گول دوغاندا منى
ياد ائله،
فعله‌لر قالخاندا منى ياد
ائله.
انقلاب اولاندا منى ياد ائله،
آى گؤزه‌ل انسانيم اونوتما
منى ....
اونون شئعرى اولدوقجا ساده، آنلاملى و معنا باخيميندان زنگين و فورما جهت‌ده‌ن
ايسه اوره‌گه ياتيم‌دير. دوقتورون اثرلرى‌نين بير چوخوندا، ياشاديغي گنج چاغ‌لارداكى
دؤورون اجتماعي نقصان‌لاريني وار گوجو ايله قورخمادان اوزه چكمك‌ايله، موباريز
شئعريميزين سارسيلماز ايراده‌لى شاعير‌له‌رى‌نين سيرالاريندا دايانميش‌دير.
قفسه ساليب‌لار منيم تك شئرى،
من قيرا بيلميرم تكجه زنجيرى.
قورخورام او زامان هايلاياسان
كى،
قارداشين اولمايا داها داى
ديرى.
اوستاد، اؤز ائلينه خيدمت گؤسته‌رمه‌گى، سو و هاوا كيمى گه‌ره‌كلى بيلير و
بوُنا گؤره بوگون 56 ياشيندا اولماغينا باخماياراق، آتالار دئميش‌كن سو دوُرار، او
دوُرماز. هابئله اونون شعرلرينده، اينسان سئوه‌رليگه ساري يؤنه‌له‌ن فيكير و
ايفاده اولدوقجا ماراق‌لي‌دير.
شاعيرين شئعرلرينده، آذربايجان يا خود تورك‌لرين داهي شاعيرلرى‌نين يئرى گلميش‌كن
آدي آپاريليب و اونلارا شئعرلر حصر ائديلميش‌دير. اؤرنك اولاراق نسيمى شرفينه بئله
يازير:
سيررينى عالمده پنهان ائيله‌ميش،
عالمى هم حق هم انسان ائيله‌ميش.
آلتي يوز ايل قاباق عصيان
ائيله‌ميش،
نسيمى، نسيمى، طغيان ائيله‌ميش.
اَلده اولان شئعر توپلوسوندا، انقلاب‌دان اوّل‌ده‌كى شئعرلرينده بول- بول
كينايه‌لر و ايستيعاره‌لر ايشلنميش‌دير كى، يئرينده چوخ ده‌رين معنالي و گوج
آپاران ايدى‌لر. باخين: سحر آچيل، گئجه گئت، باهار اولاجاق، قارا قيش، گوللر
آچاجاق و ... اونلار بو كيمى اوستو اؤرتولو سؤزلر كى، شاعيرين اته‌گينه چؤره‌ك‌ده
قويموشلار.
بؤيوك عاليم، اؤز طبعينى هَر ژانئرده سيناميش‌دير: غزل‌ده، قوشمادا، سربست
شئعرده، پوئمادا، گَرايلى‌دا و باشقا قاليب‌لاردا. جالب دير كى شاعير بو سيناق‌لاردا
اوست- اوست‌ده موفق اولموشدور. باخين شئيخ محمد خييابانى‌يا عاييد قوشولان منظومه‌يه كى ادبياتيميزدا
چوخ ده‌يه‌رلى، ديقَّته لاييق و اؤنه‌ملى ايش‌لردن دير و اوندا شهيد خيابانى‌نين
آنادان اولماسيندان جان دوداغيندان چيخانا كيمى گؤزه‌ل، آخيجي و عئلمى شكيل‌ده
نَظمه چكيلميش‌دير. باخين:
ايگيرمى ايكينجى گون،
شهريورده،
ماتم اؤز قانادين سَرميشدى
يئره.
بير داها عاشورا تكرار اولوردو،
بير باغري قان لاله يئنه سولوردو.
بير باشقا شهيده مزار قازيلدي،
اونون باش داشينا بئله يازيلدي:
عشقين مئراجينا شهيد
قاووُشدو،
مَلَكى‌ده اؤتدو، گؤيدن
ساووُشدو،
فضيلت شهيدى اوچدو گؤيلره،
جسدى اورادا سَريلدى يئره.
عقيده اوغروندا، مرام
اوغروندا،
شهيد اولدو حسين (ع)
موولاسى كيمى،
آغريسي آغريدير منيم قلبيمى
...
پروفئسور صديقين ان چاليشقان چاغ‌لاريني اوچ فصله بؤلمه‌ك اولار:
1- گه‌نج چاغ‌لاري
بوُ دؤورده، اوستاد آرديجيل مقاله‌لر يازيب يا ترجمه ائديب آز- آز چاپا
بوُراخذيغينا گؤره اوگونكو تورك‌چولويون مدافئعه ائده‌نلرى‌نين ان تانينميش‌لاريندان
و باشدا گئده‌ن‌لريندن ايدى.
2- انقلاب چاغ‌لاري
بو دؤنه‌ده، دوقتورون، ژورنال چيخاريب باشقالاري‌‌نين شئعر‌لرينى توپلاييب
چاپا بوراخماق‌لا ادبيياتيميزدا فايدالي ايزلرى و دانيلماز رول‌لاري اولموشدور.
3- سون بئش- آلتي ايل
بو ايل‌لرده، استاد، بير چوخ گه‌نج‌لرله علاقه ساخلاييب اونلارين اَل‌لرينده‌ن
توتوب، اونلارين چاليشمالاري‌‌نين چيچك‌لنمه‌سينده چوخ گؤركملى رول اويناميش‌دير.
او، هفته‌نين بو باشي تبريزده، او باشي تهران‌دا، زنگان‌دا، اوُرمودا، اصفهان‌دا و نه بيليم ها‌رادا اوزون- اوزاق يول‌لاري يورولمادان
گئديب ديل كيلاس‌لاريندا شيركت ائديب، 40 ايل‌د‌ن آرتيق آلده ائتديگى بيلگى‌لرى
اؤز طَلَبه‌لرى ايله پاى‌لاشير. بو گئت- گل‌لرين آساسيندا، اونون بير چوخ گه‌نج‌لرين
اثرلرى‌نين ياييلماسيندا اه‌رده‌ملى رولو اولموشدور.
بيز بو اثرين توپلاماسي‌‌ني اؤزوموزه بير بورج بيله‌ره‌ك اونو بو شكيل‌ده
اؤده‌يه بيلديك. حال بوكى بو شئعر توپلوسونو باشقا بير كيمسه توپلاسايدي يقين كى
آيري بير طرزده يئكون‌لاشديراردي. سون گون‌لرده، ادبى دوستوموز، يازي‌چي و
تنقيدچى- بهروز ايمانى‌نين «سؤز سوراغيندا» آدلي كيتابيندا استادين شئعرلرينه
عاييد توخوندوقلارينا گؤره بيزيم ايشيميز بير آز ساده‌له‌شدى. بو معنادا كى، بيزيم
بو اؤن سؤزده ذكر ائده‌جه‌گيميز سؤزلرين بير چوخونون اورادا اولدوغونا گؤره،
تيكرار اولماسين دئيه يازماغيندان واز كئچديك. شئعرلرين آچيق‌لامالاريني آختاران‌لار
او كيتابا مراجعه ائده بيله‌ر‌ل‌ر.
سؤزلريميزين سونوندا بونودا آرتيرمالي‌‌ييق‌كى، بلكه‌ده گوللر آچاجاق
كيتابى، استادين شئعرلرى‌نين توپلانماسيندا بير گيريش اولاراق گله‌جك‌ده دوغروداندا
گوللر آچيب ادبيات باغچاميز دوقتور صديقين شئعرلرى ايله داها عطيرله‌نيب گؤزه‌لل‌نسين.
تبريز – 1380.
