شئيخ محمد خياباني
شئيخ محمد خياباني‌نين
حياتي، فعاليتي، بو بؤيوك عاليم و روحاني‌نين خائينجه‌سينه شهيد اولوب تبريزين كوچه‌لرينده
سورونمه‌سي و او بيري‌طرفدن اوستاد دوزگون سؤيله‌ديگي محتوالي، معنالي و دگرلي
منظومه‌سي، مني وادار ائتدي قلمي گؤتوروب بو باره‌ده، ده‌گرسيز اولموش اولسادا،
اؤز نظر و تاثّراتيمي يازام.
هر شئي‌دن اوّل بونو
دئمه‌لييم بيزيم دوغما يوردوموزون اؤلمز عاليم و قهرماني باره‌ده چوخ آز دانيشيليب
و حقيقتده بو صادق، فداكار خطيبين و يئنيلمز قهرمانين حاققيندا حددن آرتيق قصور اولوب،
شئيخ محمد خياباني بو گؤركملي
عاليم و روحاني غريب قالميش و بو عظمتلي انسانين باره‌سينده اينديه‌دك نه بير قلم
و نه بير نمايش گؤستريليب و بو حاقدا يازيلان كيتابلارين سايي بارماقلاريميزين ساييندان‌دا
آزدير. اوستاد دوزگونون بو حماسه‌ني اوره‌گي آغرييا – آغرييا ياراتماسي و سئويملي
قيزي‌‌نين دوغوم گونو مناسبتي ايله اونا هديه ائتمه‌سي چوخ يئرلي و تقديره لايق‌دير.
بونو بورادا دئمه‌ليك، بيزلرده بئله بير دب واردير، اوشاقلارين دوغوم گونونو، آتا-
آنا آغيرلايارلار، مجلس قورارلار و بو شادليق مجلسينه، قارداش- باجي، آتا- آنا،
قوهوم، هديه گتيريب دوغوم گونو اولان قيزا يا اوغلانا تقديم ائده‌رلر.
اوستاد – شاعير بو اثري
ياراداندا، اوره‌گي درده گلير، دوشونجه‌لره دالير، خلقي‌نين، قهرمانلارينين،يازيچي‌‌لارينين،
شاعيرلرينين، عاليم و صنعتكارلارينين نيسگيل و حسرتي شاعيري ياخيب يانديرير.
احساسلي شاعير جمعيتده اولان حق‌سيزليكلري، عدالت‌سيزليكلري دريندن گؤرور، خلقي‌نين
ديلي، مدنيتي و منليگي آياقلانديغيني دوغما شاعيرلرين كيتابلاري قولتوقلاريندا، گؤزه‌ل
و حق يولوندا سؤيله‌ديكلري سؤزلري آغيزلاريندا قالماقلاريني گؤرور، اودور شاعير
سؤزه گلير و اوره‌ك يانديريجي سؤزلري گؤر نه قده‌ر شعريّت و گؤزه‌لليكله ايفاده
ائدير:
«شاعيرلرين كيتابلاري قولتوغوندا قالاندا،
نئجه منيم قيزيل قلبيم هئچ آغرييا دوشمه‌سين؟
***
دوگونله‌نيب تورپاقلاردا آنالارين باخيشي،
يوز ايل‌لر يول گؤزله‌ييرمي بير ائل، اولوس، بير ملت؟»
شاعير بو فاجعه‌لري و
بو حق‌سيزليكلري گؤرور و اونون اوره‌گي اود توتوب يانير و اؤز سئويملي قيزينا اوزونو
توتوب، اوره‌گي‌نين درينليگينده ديكله‌نيب، داغ اولان كدرلرين بئله ديله‌گتيرير:
«كدرلتمك ايسته‌ميرم سنين دوغوم گؤنوندور،
گله‌جگين قوتلو اولسون، آيدين اولسون گونلرين.
ايتيرمه‌سين سيادتين، باشي اوجا ياشاسين،
ياخشي بؤيوتسون ائولادين، بير گون گؤرسون ائللرين.»
اوستاد – شاعير، شاعيرانه
بير طرزده سؤيله‌يير: بوگون سنين اوچون بايرامدير، بوگون دوغوم گونون‌دور، چاليرسان
اويناييرسان، شادليق ائديرسن، بورا گلن هر كيمسه، سنين بو دوغوم گونون اوچون بير
هديه گتيرير، من‌ده سنين اوچون قولتوغومدا بير قالاق شعر گتيريرم. قيزيم! شئيخ
محمد خياباني حماسه‌سيني
سنين اوچون يازميشام، اوندا يازيلان كلمه‌لر، هاميسي اوره‌گيمين درينيندن قالخيب.
اونو اوخو، ياخشي اوخو، گؤر بيزيم بو عاليم، روحاني و خطيبي‌ميز سون نفس‌لرينده نه
دئييبدير:
«باشي اوجا عاليميميز سره‌لنركن يئره،
دئدي: عشقه، فضيلته، دوزگونلوگه وورولون،
هر هاوايا اوينامايين، اجنبي‌يه خوش گلسين،
منيم تكي عشق اودونا، يانين، دؤزون، دورولون.»
اوستاد – شاعير، حقيقتده
بو حماسه‌ني چوخ درين قايغي و بؤيوك عشقيله و سئوگيله ياراديبدير، او، شئيخ محمد، بو عاليقدر انسانين باره‌سينده يازيلان كيتابلاري،
الده اولان قايناقلاري، شعيرلري، دئييلن‌لري اوخويوب گؤزدن كئچيرتمه‌يه كيفايتله‌نمير،
او، پيادا، آتلي، شبسترين اطرافيني، شئيخ محمد آنادان دوغولان
شه‌هري، خامنه‌ني، حتي اورادا اولان مسجيدلري، دار- دودوك كوچه‌لري آياقدان سالير،
هر يئره شئيخ محمد قدم قويوب، ايز
بوراخيب اونلارين هاميسيندان خبر وئرير. شاعير دار كوچه‌لردن كئچير، اؤزو – اؤزونه
دئيير: «شاعير سن بورالاردا نه آختاريرسان؟» شاعير خيال آتينا مينير، گونلري، آيلاري،
ايللري آياقلايير، اوزاقلارا گئدير، تاريخين درينليگينه باش وورور، سكسان ايل
بوندان اوّل خامنه‌نين باتان گؤنشيني اوخشايير:
«سكسان ايل بوندان قاباق خامنه گونشي باتدي،
بير ساتقين، دين‌سيز كؤپك شئيخ محمّدي ساتدي.
اوره‌گينده نه آشوب، آي شاعير! نه عصيان وار،
داريخما، اوتور آغلا، يوخسا واختين دارالار،
سن حله يازماليسان قهرمانليق داستانين،
حماسه‌لر يارادان شانلي آذربايجانين.»
شاعير اوچون اؤز خلقي‌نين
حقيقي، صادق و يئينيلمز قهرماني‌‌نين يوردو، شهري، حتـّا كوچه‌لري مقدس‌دير، شاعير
بو حاقدا نه قده‌ر آخيجي، دولغون و اوره‌ك يانديريجي جمله‌لر قوشوب، قوي شاعيرين
ايشله‌تديگي كلمه‌لري، مصراعلاري و بيت‌لري، گؤزوموزون قاباغيندان كئچيره‌ك:
«اوتور بورادا، بو كوچه مقدّس‌دير سنين‌چين،
بو آنا جاده‌سيدير، شاهراهيدير وطنين.
شئيخ محمد خياباني آدديم باسميش بورايا،
اوتور، آغلا، هئچ ترپنمه، هارا گئديرسن، هارا؟»
تاريخ عبرت گؤزگوسودور
اوندان گره‌ك درس آليب اؤيره‌نك. اوستاد- شاعير تاريخين قالين صحيفه‌لريني واراقلايير،
او، قهرماني‌‌نين دوغوم گونوندن سؤز آچير – نه‌قده‌ر ائشيتمه‌لي، نه‌قده‌ر دوشونمه‌لي!
شاعير گونشين ساراليب باتماسيندان قاش قاراليب ظولمتين چؤكمه‌سيندن، شئيخ محمدين
بو وفاسيز و فيريلداقچي دونيايا قدم باسماسيندان، نه قده‌ر اينجه، گؤزه‌ل و معنالي
سؤزلر ايله دانيشير:
«بير قادين اوياندان سئوينجك
قاچدي،
حاج عبدالحميدين قاپي‌‌سين آچدي.
دئدي:«موشتولوق وئر بير‌اوغلون
اولدو»
حاج عبدالحميدين گؤزلري دولدو.»
شاعير آتانين حاليني اوغولونون
دونيايا قدم باسماسيندان سونرا، جانلي بير حالدا قلمه‌چكير، شاعيرين سؤيله‌ديگي هر
بير بيت‌ده دوغماليق، اوستادليق و شعر صنعتي گؤز اؤنونده جانلانير:
كؤكسونده هيجان–گؤزونده اوميد،
او گون سئوينيردي حاج عبدالحميد.
اوتاقدا گئديردي اويان بويانا،
بيلميردي نئيله‌سين باخسين هايانا!
اوستاد – شاعير خياباني‌نين
ائويني، شهريني، دوغوم گونونو، آد قويما گونونو، آتا- آناسي‌نين روحيه‌سي‌ني
مختصر، بو بؤيوك شخصيتين باشيندان كئچه‌ني، شاعيرانه بير طرزده شرح ائدير و اوخوجودا
درين ماراق و علاقه يارادير و اوخوجونون گؤزلرينين قاباغيندا بو وطن سئوه‌ر، شرفلي،
قهرمان، ساتيلماز و يئنيلمز انسانين حياتيني تجسم ائدير. خامنه شهري‌نين اَن عاليم
ملاسي طرفيندن اونون ساغ قولاغينا آذان و سول قولاغينا اقامه اوخونماسي و «محمد»
آدي آلماسي اوخوجونو چكير اوزاقلارا، تاريخين درينليگينه كيمي آپارير.
شاعيرين ياراتديغي بو
حماسه، هر بير باخيمدان ديقـّته لاييق‌دير. او شئيخ محمدين حياتي و فداكارليغيني ياراتديغي
حالدا، اؤز دوغما خلقي‌نين، عادت عنعنه، اينام و اعتقادلاريندان دانيشير ، آنانين
زحمت و محبتي‌ني بورادا چوخ ده‌گرلي و يئرلي قلمه‌چكير و بيزيم خلقي‌ميزين آنايا بؤيوك
حؤرمتي‌ني و آنانين بير حقيقت اولماسي و بو حقيقتين انكار ائديلمه‌مه‌سيني جانلي بير
تابلو كيمي جانلانديرير:
آنا بير گئرچك دير، دانيلماز
گئرچك،
آنا حقي تانري حقي دئميشيك.
آنا حقين آياق آلتينا سالساق،
ظلم ائديب، تانري‌‌نين حقين يئميشيك.
شاعير قهرماني‌‌ميزين
مكتب‌ده اوخوماسيني‌‌دا نظردن بوراخمايير، او زامان بيزيم مكتب‌لريميزده تحصيلين
نه شكيل‌ده اولدوغونو آچيب گؤسترير، او، يازير او زامان مكتب‌لرده نئچه سطح‌ده درس
دئييليردي، قهرمانيميز، حاج ميرزا حسن رشديه‌نين، «وطن ديلي» آدلي كيتابين اوخويور، اورادا يازيلان اوشاقلار اوچون
حكايه‌لردن، لذّت آپارير. او، «تك الدن سس چيخماز، غاليبيت بيرليكده‌دير» جمله‌سيني
دريندن منيمسه‌يير و بو جمله اونون حياتي‌نين سونونا دك حافظه‌سينده قالير. شاعير
بو فصل‌ده، اؤز عقيده‌سيني قيزينا بئله بيان ائدير:« توركلر هر فن‌ده، علمده، ديلده
ماهير ايميشلر. تأسف‌لر اولسون كي، بو توركلر اؤزگه‌نين ائوين برپا ائديب، اؤز
ائولريني ييخيبلار.» شاعير تورك خلقلري‌نين تاريخ بويو، شجاعتيندن، جسارتيندن، مرد
– مردانه‌ليگيندن دانيشير. شاعير يازير بيزيم بابالاريميز تاريخ بويو مظلوملاردان
حمايت ائتميش و قولدورلارين، ساتقين‌لارين اؤنونده مردانه دورموش و اؤز حقلريندن
مدافعه ائميش‌لر.
شاعير تاريخه
آرخالاناراق شعير و صنعت ديلي ايله يازير، شئيخ محمد خياباني اون ايكي ياشينا
چاتاندا، اؤز آنا يوردوندا مكتبي قورتارير، ادبيات، تاريخ، اخلاق ايله تانيش اولور
و بو زامان آتاسي اونا تكليف ائدير، اوغول ايندي سن ائله‌بير ياشا چاتيبسان كي گره‌ك
تجارته ال قوياسان. قهرمانين آتاسي تاجير ايدي و روسيه‌ده ماخاچ قلعه‌ده آل – وئر ايشينه باخيردي. بو كيچيك اوشاق آتاسي‌‌نين سؤزونه
«بلي» دئييب، روسيه‌يه گئدير و اورادا تجارت ايشي ايله مشغول اولور. محمد درّاكه‌لي، ذكالي بير
جاوان اولدوغونا گؤره، اورالاردا سئيره چيخيب، بوتون يئرلره باش چكيردي، مسجيدلري،
كليسالاري، شهرين مختليف يئرلريني گؤروردو و ذهنينده بير جمعيت شناس كيمي بونلاري تجسم
ائديردي. محمد بير نئچه آي ماخاچ قالادا قالاندان سونرا، آتاسيندان ايسته‌يير اؤز
دوغما يوردونا دؤنسون. آتاسي اوغلونون خواهيشيني قبول ائدير و اونا جاواب وئرير:
اولسون اوغلوم، آپاررام سني،
گؤره‌رسن بير داها گؤزه‌ل خامنه‌ني.
تبريزه يوللارام، بيرده سني
من،
اوردا اوخويارسان هر نه ايسته‌سن.
محمد اؤز آنا يوردونا
قاييدير، آناسي اوغلونون قاييتماسيندان چوخ فرحله‌نير، او، آناسينا دئيير: «آنا
جان گؤزلرينين ياشين سيل، بونو بيل، من داها هميشه سنينله و سنين يانيندا اولاجاغام»
و حاج عبدالحميدده اؤز حيات يولداشينا اوزونو توتوب دئيير: خاطير جمع اول، محمد تبريزده
قاليب اورادا درس اوخوياجاقدير.
شاعير انقلابلار يوردو
اولان آذربايجان و اونون مركزي
اولان تبريزي چوخ بؤيوك قدرتله تصوير ائدير:
او، يوردونون،گؤزه‌ل طبيعتيندن،
يام ياشيل داغلاريندان، ال چاتماز ذروه‌لريندن و هميشه يادلار اؤنونده ووقار ايله
دايانان اركيندن، گؤي مسجيد كيمي تاريخي
آبيده‌لريندن، يوردونون، اؤز دوغما قوجاغيندا بسله‌ديگي، صرّاف، لعلي و شكوهي كيمي
اؤلمز شاعيرلريندن، انقلاب مركزي اولان تبريزدن چوخ درين معنالي و محتوالي ميصراعلار
ايله دانيشير:
اي‌سينه‌سي مين‌لر يارا ايله د‌ولو اركيم!
يوزلرجه‌ايلين‌خاطيره‌سي، اي‌اولو اركيم!
غيرتلي اوغوللار وطني، مسكني سن‌سن،
مينلرجه‌مقدّس جسدين مدفني سن‌سن.
و يا:
الين آللاها آچميش بير ايشيق درياسي‌دير اوغلوم،
منيم تك سن‌ده باخسان نور گؤره‌رسن بوردا احجاري.
آماندير قويما تحقير ائيله‌سين ياد، قالخ، اؤزون،
گؤستر،
بو گؤي مسجيددير اوغلوم گل قورو بو گنجِ اسراري.
اوستاد – شاعير بو
جاوان و گله‌جگين بؤيوك عاليم، انقلابچي، اؤز دوغما خلقي‌نين صداقتلي نماينده‌سي‌نين،
تبريزده «طالبيه»ده تحصيليندن، تاريخ، طبيعيات، فلسفه، كلام و ادبيات اوخوماسيندان
رساله و احكام يازماسيندان شرح وئرير و شئيخ محمدين تحصيليني بيتيره‌ندن سونرا،
انقلابچي روحو اولان بير پيشنمازين قيزي ايله ائولنمه‌سي‌ني، وقايناتاسي‌‌نين وفاتيندان
سونرا اونون مسجيدينده رسميت ايله پيشنماز اولوب، هم گوندوز و هم گئجه نماز قيلماسيندان
و خلقين آراسيندا بؤيوك محبوبيت تاپيب و
جماعتين عشقيله بو مسجيده گليب، بو جاوان عالم و عادل پيشنمازا اقتدا ائديب اونون
داليندا نماز قيلماسيندان صحبت آچير:
«كريم‌خان» مسجيدين اونون آديله،
تانيردي جماعت تبريزده بوتون.
«خياوان» ترپه‌نيب
دالــغــالانيردي،
منبـره قـالخاندا هفته‌ده بير گون.
نه قده‌ر سليس، آخيجي
و ييغجام ميصراعلار ايله شاعير، بو بؤيوك خلق قهرماني‌‌نين كئچيرتديگي معنالي گونلريندن
و ساعتلريندن، خلقي‌نين اونا سارسيلماز اينام و اعتقاديندان شعر ديلي ايله دانيشير.
شئيخ محمد منبر اوستونده
بيان ائتديگي حق سؤزلر تهراندا قاجار شاهينين تختينه لرزه ساليردي.
اوستاد شاعير، شئيخ
محمد خياباني، بو آذربايجانين افتخارلي اولان عاليم و سارسيلماز قهرماني حاقدا شعر ايله دانيشاندا،
دئمك اولار آذربايجانين اون سككيز ايل مشروطيت تاريخيندن دانيشير. آذربايجان مجلسي‌نين
شورا مجلسي آدي آلديغيندان و شئيخ محمدين هر گون، عدالت، مساوات و بيرليك سؤيله‌ديگيندن،
شعر و صنعت ديلي ايله نه قده‌ر، اوره‌گه ياتان سؤزلر ايله دانيشير.
اوستاد – شاعيرين سسي
خلقين قدرتي و بيرليگي اؤنونده، تبريزده مشروطه طبلي‌نين چالينماغيندان، مظفرالدين
شاهين خلقين اؤنونده تسليم اولوب، مشروطه فرمانيني امضالاماسيندان سونرا دا،
اوزاقلارا گئدير. او، تاريخي واراقلايير، ايتي و قاباقجيل بير دونيا باخيشي ايله،
كوروش‌دان، داريوش‌دان صحبت ائدير و اونلارين ايچ اوزونو آچيب گؤسترير. شاعير سونرا
معاصره دوغرو قاييدير، استبدادين، ظولمون، خيانتين تملي اولان ساتقين محمد عليشاه
دان و اونون ملت مجليسيني توپا باغلاماسيندان،
تهراندا و بوتون ايراندا حق دئيه‌ن اينسانلاري اؤلدوتدوروب و تبريزه ساري
هوجوموندان دئيير:
هرگون پؤسگوروردو‌آغزيندان
قان- قان،
داها بيلمه‌ييردي: آللاه
قورويان-
چيراغي كيمسنه سؤندوره بيلمز،
لكه‌ني نه بومبا، نه‌ده توپ
سيلمز.
شاعير، دوغما يوردو اولان تبريزي بوتون وارليغي ايله اوخوجونون
گؤزلري اؤنونده تجسم ائدير. او، آند ايچير دوغما شهريني هئچ زامان اونوتماياجاق،
تبريز، بو انقلاب بئشيگي هميشه آزادليق و حرّيت قورباني اولوب
و اونودولماز بير عشقين رمزي كيمي اونون خاطيره‌سي دائما ياشاياجاق:
سن منيم حياتيم، بؤيوك آماليم،
عشقيم، افتخاريم، جاه و جلاليم،
سندن آيريلمازدير فيكريم، خياليم،
مقدّس آرزولو، تبريزيم منيم.
خياباني، بو خلقي‌ميزين
افتخاري، اؤز حياتي بويو، يالنيز بير عاليم، روحاني يا بير خطيب اولماييب، او، هر
بير ايشده اؤز دوغما خلقي اوچون بير اؤرنك ايدي؛ گئجه‌لر حق يولوندا جهاددان دانيشان
عاليم، گوندوزلر سنگرلرده ياتيردي، اونون عملي، سؤزو ايله بير ايدي. او، ايران انقلابيندا
چوخ سايي آز اولان شخصيت‌لردن ايدي. او، بوتون وار قوه‌سييله خلقي آييتماغا، ظولم
اؤنونده دفاع ائتمه‌گه و اؤز خلقي‌نين فيكيرلريني آيدينلاتماغا هر بير حالدا يورولمادان
چاليشيردي. او، عين‌الدوله‌لري و بو كيمي حاكيم‌لري، قُدرتيله، عملي ايله، خلقه
گؤونمك يولي ايله رسوا ائتدي. ايكي ملعون يابانجي اينگيلتره (انگليس) و روسلارين بيري – بيري ايله ال‌بير اولوب، بيري جنوبدان، او بيريسي شمالدان دوغما
وطنيميزي اشغال آلتينا آلاندا بو بؤيوك انقلابچي‌‌نين امري ايله، تبريزده بو
انقلاب يوردوندا، گئنيش خلق كوتله‌لري، خياباني‌نين امري ايله – كوچه به كوچه
سالداتلارين ايچينده قيرغين سالديلار. شئيخ محمد بو يورولماز
و اؤلمز رهبرين سلطنته قالديرديغي عصيان بايراغي نتيجه‌سينده، بوتون ايراندا بؤيوك
ترپه‌نيش ياراندي، شاه بو ملعون و خائن انسان، سلطنتدن خلع ائديلدي، بونون نتيجه‌سي
اولاراق بو جاوان عاليم و قورخماز انقلابچي دوققوز مين سس (راي) ايله تبريز اهاليسي طرفيندن
شورا مجليسينه نماينده سئچيلدي. خياباني ايكي ايلدن سونرا روسلارين اولتيماتومي قاباغيندا و هابئله خائن وثوق‌الدوله‌نين انگليس‌لر ايله باغلاديغي پيمان قارشيسيندا قد علم ائدير. و دئموكرات فيرقه‌سي‌نين
(شئيخ محمدين) اورقاني اولان تجدد روزنامه‌سي يازير:« بو پيمان مجليس تصديق ائتمه‌دن
قاباق بير وراق پاره دير و ملّت اونا هئچ زامان بوگون قويا بيلمز.»
شئيخ محمد خياباني‌نين شورا مجليسينده اولتيماتوم عليهينه چيخيشيني، اوستاد- شاعير گؤرنه آيدين
و گؤزه‌ل قلمه چكير:
من بير ايرانلي تك ائديرم حيرت،
سيز نه‌دن ائتميرسيز ذره‌جه
همت؟
... اوجادان دئييرم جسارت ايله،
سيزه سؤيله‌ييرم من غئيرت ايله.
وئرمز استقلالين، الدن بو ملّـت،
روس باغيرماسينا نه اولموش
علّت؟
روسلارين اولتيماتومو شورا مجليسينده رد اولدو، وثوق‌الدوله بو خائن، هله
ايش اوستونده ايدي. بو بؤيوك انقلابچي، قيام‌دان باشقا بير چاره گؤرمه‌ييب، 1299- ينجي
ايل فروردين آيي‌‌نين 17 سينده اؤز مقدس قيامينه باشلادي. ايكي گون عرضينده بوتون
شهر و اداره‌لر خلقين الينه كئچدي و تهرانين جنايتكار، ساتقين و خائن مأمورلاري مركزه
قاييتماغا مجبور قالديلار. شئيخ محمد خياباني گئنيش خلق
كوتله‌لريني و اؤلكه‌ني بو مظلوم خلقين يارديمي ايله آلتي آي تمام بؤيوك قايغي و
نزاكت ايله اداره ائتدي و هر گون اوجا سس
ايله دئموكرات‌لارين مرامي باره‌ده، هابئله آزادليق، حرّيت، برابرليك، و مدنيت
باره‌سينده چيخيش ائتدي. اونون گونده‌ليك سؤزلري تجدد روزنامه‌سينده درج اولونوردو
و بو درين معنالي سؤزلر يئنيلمز عاليم و روحاني‌نين صداقت و وطن سئوه‌رليگينه بؤيوك
بير شاهيددير.
اوستاد- شاعير بوتون
بو صحنه‌لري و چيخيش‌لاري، خلقين آزادليق يولوندا گؤتورولن قدم‌لري، بؤيوك ديقـّت
و مهارتله تصوير ائدير، او، قيزينا خطابين بو حماسه‌ده شهيدلر باره‌ده ساتقين‌لار
و خائينلرين افشاسيندا، شهرين وضعيتيندن چوخ گئنيش صورتده دانيشير:
نئجه بيرگه اولار، يزدانلا، شئيطان،
هوش‌ائله،سن‌قيزيم،دوشون‌بيرجه‌آن.
عدالتدن، حقدن دوغولان اينسان،
يونه‌لمز ناحققه، شرّه، هئچ
زامان.
خياباني يعني: عدالت سسي،
محمد(ص)ين ساوي،
قرآن نفسي.
... او صالح بنده‌نين تميز وجداني،
تانيماز دؤوله‌ني، شاهي،
سلطاني!
آلتي آي تبريزده خلق،
شادليقلا، فرح ايله ياشايير، گله‌جگه اوميد باغلايير. گؤزلرده سئوينمك، گولمك هوسي
گؤرونور. آزادليق و سعادت قوشو خلقين باشي اوستونده سمالارا اوچور. امنيت، شه‌هرين
هر بوجاغيندا حؤكم سورور: «چؤره‌ك واي سسي كسيلير». گل ايندي اوستاد- شاعيرين ديليندن
بو حالتي، بو حياتي، بو گؤزه‌ل‌ليگي ائشيده‌ك و بير نئچه آن او شرفلي كئچميشيميزده
سئير ائده‌ك:
تبريزي‌خيالدا تجسم ائيله،
دورنالار گؤيلرده قاطارلانيرلار.
بادام آغاجلاري آغ چيچك آچير،
قيش گئدير،هر ياني بورويور باهار.
آرخلاردان آرخماقدا بال
شلاله‌سسي،
ياشيلليق شهرده اوجسوز،
بوجاقسيز.
توستو قالخير بوتون
داملاردان گؤيه،
كيمسه قالماميشدير‌گئجه اوجاقسيز.
... او قيزيل دؤوراني تاريخ
اونوتماز
او گونلر باهارين گلين چاغييدي.
تبريز بيرشه‌هريوخ،بير حكومت‌يوخ
حيات نفسييدي، عزت باغييدي.
بوزامان تهراندا
حكومت دگيشيلير، وجيه‌المله آدي قازانان بير باش وزير ايش اوسته گلير. تاريخده هميشه
اولدوغو كيمي، خلقلر قياميني لكه‌له‌ييرلر، اونا مختليف آدلار قويورلار. ايندي بو
خلق ترپنيشينه‌ده آد قويدولار و اونو بوغماغا وار قوه‌لر ايله چاليشديلار. مشيرالدوله
يالاندان آزادليق سئون آدي ايله تانينان باش وزير مخبرالسلطنه، بو ساتقين و خائن
وطن‌پرورليك و آزادليق سئون نقابي ووراني، شئيخ محمد يارادان نهضتي
بوغماق اوچون تبريزه گؤنده‌ريرلر. بو خائن ابليس (مخبرالسلطنه) تهراندا اولان حاكيم
دايره‌لري‌نين هاميسي‌‌نين فيكريني ياخشي بيليردي و اودا، قيامي خفه‌له‌مك و خلقين
اوره‌گينده اولان آزادليق و برابرليگه داير سئوگيني و عشقي سؤندورمك ايدي و شهره
داخيل اولان كيمي قازاق‌لار ايله همدست اولوب خلقه هوجوم ائديرلر، اود يانديريرلار، ائولري و
دودمانلاري غارت ائديرلر. خياباني، بو اؤلمز و آدي خلقين يادداشيندا تاريخين صحيفه‌لرينده
دايم ياشايان شخصيتي خائنجه‌سينه شهيد ائديب و بو يئنيلمز و خلقي‌ميزين فخري عاليم،
روحاني و مبارز رهبرين جنازه‌سي‌ني شهرين كوچه‌لرينده سورودولر.
من بورادان بير حاشيه چيخمالييام.
بيلميرم نه زامان هارادا، چوخ ايل‌لر بوندان قاباق، اوستاد – شاعير تجسم ائتديگي كيمي،
شعري قولتوغوندا قالان، بير غريب وطن شاعيري‌نين شعريني اوخودوم. بو شعر، باشدان –
آياغا زامانلار منيم حافيظه‌مده قالميشدي، يازيقلار اولسون كي، ايندي بو درين
معنالي و اوره‌ك يانديران شعرين يالنيز بير سون نئچه بيتي خاطيريمده‌دير.
بو يوكسك سويّه‌ده اولان
منظومه‌ني، اوستاد – شاعير، ملك‌الشعراي بهارين شعرينين ترجمه‌سيله بيتيرير و من
بو مقدّمه‌يه بير غريب، شعري قوجاغيندا قالميش شاعيرين بو بيت‌لري ايله سون قويورام:
يوخ، اؤلمز سن، سن ديري‌سن، دونيا نه‌قده‌ر كي‌وار،
سنين درين تفكّرون دونيا دوردوقجا دورار.
سن برلشدين اؤز قانينا، دوغما وطن اوغروندا،
قانين قالماز يئر اوستونده آند ايچريك بوردا.
قيصاصووي آلاجاييق دوشمنلردن بونو بيل،
بيزيم گؤزه‌ل شعاريميز گزه‌جكدير ديل به ديل.
يات امين اول، چاتاجاقدير بو ايشيميز تئز باشا،
سن اي قاندا چوبالايان رهبريميز، چوخ ياشا!
بئله‌ليكله فخر ائديرم
كي اوستاد – شاعيرين درين خلاقيت ايله يازيب – ياراتديغي بو منظومه‌نين نشرينده من‌ده
بير سوچيله‌ييرم.
تهران – 1379.
