سؤز سوراغيندا- بيرينجي حيصه
دوقتور دوزگونون شعرلرى باره‌ده سؤز - صحبتدن قاباق، ادبى تنقيد و آذربايجان ادبياتيندا تنقيدين اؤزه‌ل يئرى خصوصوندا دانيشماق،
آرتيق ضرورت طلب ائدير.
آرتيق سؤزو اؤلچمك و تانيماق كيمى تعريف اولونان ادبى تنقيدده تنقيدچى بيرينين
ياراديجيلق دونياسينا دريندن گيريب، اونون ادبى اثرلرينى شرح و تفسير ائتمكله، او
اثرين مثبت و منفى جهت‌لرينى آچيب، هانسي قايناقلارا يييه‌لنديگينى ايره‌لى چكير.
تنقيد و آذربايجان آغيز ادبياتي:
آذربايجان آغيز ادبياتيندا تنقيدين بؤيوك رولو، درين كؤك‌لرى
و منشايى واردير. بو خصوصيت هر نه‌دن آرتيق آتالار سؤزونده و مثللرده گؤزه چارپير.
مثلا آتا اؤز – اوغلونا نصيحت وئره‌رك دئيير: « اوغول سنى گولدوره‌ن يانيندا اوتورما،
آغلادان يانيندا اوتور». بو مثلده «گولدورمك» و «آغلاتماق» آنلاميندا يالنيز تنقيد
احوال- روحيه‌سينى گؤروروك. و يا خود بير آيري مثلده « دوست- دوستونون گوزگوسودور».
تنقيدين يوكسك مقامى تكجه آتالار سؤزونده و نثرلرده دئييل، بلكه ايهاملا دئييلميش،
يوزمالاردا و لطيفه‌لرده‌ده گؤرمك مومكوندور. دئييرلر گونلرين بير گونو اؤلكه
پادشاهي‌‌نين، ادبياتا و شعره ماراغي گونو گوندن چوخاليب، امر ائديركى، اؤلكه‌ده، ياخشي
شاعير وارسا، اونون يانينا گتيرسينلر. شاعيرلر گليب، پادشاهين سونسوز محبت و رغبتى
ايله قارشيلانيرلار. دئييرلر شاه اونلارين گئييم و يئمكلرينه چوخ ياخشي يئتيشيب، سونسوز
حؤرمت بسله‌ييرميش. بو طرفدن ادبياتين و شعرين نه اولدوغونو بيلمه‌ين و استعدادى اولمايان
بير شخص، دربارا سوخولماق طاماحى ايله بير ته‌هر اؤزونو شاعيرلر جرگه‌سينه قوشور.
واخت او واخت اولوركى، شعر مجلسى قورولور. هامى شعرينى اوخويور، واخت بونا
چاتاندا، شاه اونو اؤزونه مخصوص حالت ايله ادبياتچيلارا تقديم ائدير و امر وئريركى،
اؤز شعرينى اوخوسون، او شعرينى اوخوماغينا اوخويور، آمما اورادا اولان سؤز صرافلاري،
اونون بو هدر سؤزلرينه دؤزه بيلمه‌ييب گولمه‌يه باشلاييرلار. بو گولوشلر شاها چوخ آغير
گلير، سببينى سوروشدوقدا باخيب گؤروركى، اونون اوخودوغو سؤزلرده او كى، يوخدور، او
دا شعريت‌دير. بونا گؤره‌ده شاه بتر عصبيله‌شير و فرمان وئريركى، اونو سحره كيمى،
دربارين قاباغيندا يئرلشن گؤله (حووضا) سالسينلار. شاهين خدمت‌چيلرى اونو گورولتو
ايله سويا ساليرلار. تازا شاعير سودا چاليخلايا چاليخلايا قالير. او طرفدن ده يئل اونون
پاپاغيني سويون اوزونده او طرف بو طرفه آپارير. شاهين ايتى تازا شاعيرين پاپاغيني،
ماراقلي گؤروب، سويا گيرمه‌لى اولور. بونو گؤره‌ن بو يئنى شاعير، ايته سارى گئديب،
اونا خطابن دئيير: «يقين سن‌ده پيس شعر اوخودون، شاه سنى ده سويا آتدي.» بيز بو لطيفه
ده گولوشدن آرتيق، شعرين اهميتينى و تنقيدين ضرورى اولدوغونو دويوروق.
يئرى دير كى، تنقيد باره‌ده باشقا بير ائل كلاميني دقتدن، كئچيره‌ك، ايندى
آذربايجان آغيز ادبياتي‌نين باشقا خصوصيت‌لريندن بحث ائده‌جه‌ييك:
يئنه كئچميش‌لرين سؤزودوركى، دئييرلر: اؤلكه حؤكمدارى، امر ائدير، مملكتينده يازيلان
عيب‌سيز، ايرادسيز هر هانسي بير اثره، بؤيوك انعام‌لار وئره‌جكدير. آنجاق بو ايش،
اؤلكه‌نين درين بيلگيسى اولان بير عاليمين نظارتيندن و امضاسيندان سونرا اولاجاقدير.
بير نفر يوخسول يازيچي، قاباقجادان حؤكمدارين تعيين ائتديگى آداميني گؤروب، اونا
دئييركى، سن حؤكمدارين يانيندا منيم كيتابيما ايراد چيخارما قوى من شاهدان انعاميمي
آليم. عاليم دئيير بس اوندا سنين سهولرينى نه ائده‌ك؟ يازيچي عاليمى امين ائديركى،
او كيتابدا گؤردوگو، هر هانسي ايرادى، گؤروب، بارماغيني، ايرادين اوستونه قويماقلا،
اونو اؤز يانليشلاريندان آييق سالسين. عاليم حؤكمدارين يانيندا بو كيتابى اوخويور
و بارماغيني هئچ يئرده دايانديرمير. يازيچي گؤرور، كيتاب قورتارير، آمما دئيه‌سن ايراددان-
سهودن خبر يوخدور. ائله‌ده اولور، عاليم كيتابى قورتاريب، بوكور، بو يئرده يازيچي‌نين
سئوينجى آشيب، داشير، باخيب گؤروركى،كيتاب لاپ قورتاريب، بوكولدو. عاليم كيتابى بوكندن
سونرا، بارماغيني قويدو بوتون كيتابين اوستونه و اثرين بوتونلوكله سهو و ايرادلي اولدوغونو
ايهاملا، اونون يازانينا آنديردي. آذربايجان شفاهى خالق ادبياتيندا، تنقيدله علاقه‌دار، سايسيز-
حساب‌سيز بو كيمى ايهاملار و لطيفه‌لر واردير.
آذربايجان آغيز ادبياتيندا تنقيدين درين كؤك‌لرينى آراشديرماق
اوچون باشقا بير نمونه‌يه كئچيريك. تنقيدين محبت و قهرمانليق داستانلاريندا، اوندان
اؤنجه آذربايجان ناغيللاريندا اولان رولونو دويماق چوخدا چتين دگيلدير:
«شاه و وزير» ناغيليندا، پادشاه بير نئچه وزيردن توتولان خزانه اوغروسو
باره‌ده راي‌لرينى ايسته‌ميش و بير نئچه وزير اونون گه‌بريلمه‌سينى (هلاك اولماسيني)
ايسته‌ميشدير. آنجاق اوچونجو وزير اونلارين راى‌لرينى تنقيد آتشينه توتاراق، اونون
باغيشلانيب، آزاد ائديلمه‌سينى ايسته‌ميش و دئميشدير:« آج آدامين ايماني اولماز.»
بيرده خزانه‌ده بئش قپيك پول اولماسا نه اولار.
وزيرين يئرينده، مقاميندا اولان تنقيدى شاه حؤكمونو ده‌گيشير و بيرده خزانه‌دن
پول اوغورلايان آدامى دانلاييب، اونون گؤردوگو ايشى پيسله‌يه‌رك اؤيره‌تميشديركى،
اوغورلوقدان ياخشي حالال يول ايله زحمت ايله پول قازانماق گره‌كدير.
«باغبان و شاه» ناغيليندا، شاهدان اؤز باغيني كلك و حيله يولو ايله آلان
باغبان، پادشاهين غضبينه دوچار اولور و شاه امر ائدير اونو اؤلدورسونلر، اؤزونو اؤلموش
گؤره‌ن باغبان شاهدان تنقيد ائده‌رك اونا آنديريركى، اونو اؤلدورسه، ائل آراسيندا،
اعتبارى ايته‌جك، اعتبار ايتيب، آد داكى، پيس‌ليگه چيخدي، اوندا وار دؤلت‌ده، مقام‌دا
يوخ اولاجاق، باغبانين بو تنقيدى سؤزلرى شاهين بئينينه باتيب، اؤزونو داردان
قورتارير. تنقيد موضوعو يالنيز قديم ناغيللاريميزدا دئييل، بلكه محبت داستانلاريندادا
اؤز عكسينى تاپير:
«اصلى كرم» داستانيندا، قارلي و توفانلي بير
سفرده اصلى، كرمه دئيير:
دئديم كرم
گل بو يولدان قاييداق،
گؤردوم
خان اوغلودور اونا عار گلير.
اصلى كرم داستانيندا كرمين مغرورلوغو و سؤزه باخماماغي تنقيد اولور،
قهرمانليق داستانلاريميزدان اولان «كور اوغلو» داستانيندا، كور اوغلونون كئچل حمزه‌يه
اينانماسي كسگين صورتده تنقيد ائديلير.
بو بير نئچه مثالدان بللى اولموشدوركى، تنقيد مسئله‌سى آذربايجان تورك‌لرينده آرتيق مهم اولدوغو اوچون، اونلارين ياراتديغي
زنگين شفاهى ادبياتلاريندا درين ايز قويموشدور.
تنقيد و اونون ضرورتى:
آذربايجان ادبياتيندا تنقيدين ضعيف اولماسي، بو ادبياتين
انكشافى يولونا مانعه‌چى‌ليك تؤره‌دير. ديليميزين، مكتب لرده، يازيلماماسي و اوخونماماسي
سببيندن، بو ديلده يازيلان هر هانسي ضعيف بير قلم صاحبى‌نين اثرى «شاه اثر» حساب
ائديله‌رك، اونلارين عيب و ايرادلاري بيلينمه‌دن اوجا ذيرويه قالديريلديلار. اونا
گؤره‌ده ادبياتيميزى بير نوع شهرت خسته‌ليگى چولغادي. من نه ائليميزى قيناييرام،
نه‌ده ضعيف اثرلرين مؤلف‌لرينى، چونكى، آز- چوخ اونلار يازماسايدي، ديليميز بوندان‌دا
آرتيق افلاسا اوغراردي، ايندى عصريميز علم، تكنيك و كامپيوتر عصرى اولدوغو اوچون،
ادبياتيميزدا يئنى ساحه‌لره آدديم آتير. بونونلا دا قلم صاحب‌لرينين چيين‌لرينه آغير
بير يوك دوشور. اودا ياراديلان اثرلرين «ادبى تنقيدچى‌ليگه» داخل ائديلمه‌سى‌دير. يئرى
گلميشكن آرتيرمالي‌‌يام كى، باكيدا ادبى تنقيدچى‌ليك يئنى بير مرحله‌يه يييه‌له‌نير.
ساوئت (شوروى) دؤرونده ادبياتشناسليق و ادبى تنقيدچى‌ليك، علمى باخيمدان آرتيق،
قلم صاحب‌لرى اؤز اثرلرينده اؤيمه‌يه و تعريف‌نامه‌يه آرتيق يئر وئرميشلر.
آذربايجان جمهوريتى مستقل‌ليك الده ائتديكدن سونرا، ادبياتشناسليق
و ادبى تنقيد اؤزونون مهم بير حيصه‌سينه يؤنه‌لدى. ميثال اولاراق، يازيچي آصف رستم‌لى،
سارابلي شاعير بايرامعلى عباسزاده‌نين اثرلرينده ايشه آپاريلان تحريف‌لرى بير كيمسه‌نين
كؤنلونه توخونمادان، بير كيمسه‌يه يامان يووز دئمه‌دن و بير سؤزله تحريف‌چينى
آلچاق سؤزلرله هده‌له‌مه‌دن، تنقيدچى ليين نورمال و يوموشاق مرحله‌سينه يول آچميشدير.
بو تايدا و يا خود ايران آذربايجانيندا تنقيدچى‌ليك هله‌ده اؤز نورمال وضعيتينه دوشمه‌ميشدير.
بو خصوصدا، تبريزده نشر اولان «ميثاق» و «شمس تبريز» نشريه‌لرينده على حسين زاده (داشقين) - ين نشر ائتديگى «ادبى سبكلر» آدلي كيتابي
باره‌ده ايره‌لى سورولن فيكيرلر تمامى ايله كسگين و ادبى تنقيدچى‌ليكدن اوزاق ايدى.
گرچى سؤزو گئده‌ن كيتابدا بير سيرا چاتيشمامازليقلار وار ايدى، آنجاق اونو بو سويّه‌ده
هده‌لمك بير او قده‌رده دوز ايش دئييلدير.
«فجر آذربايجان» گونده‌ليينده گئده‌ن كسگين تنقيدلردن
بيرى ده، جيغان- ويغان كيتابينا داير يازيلان تنقيد و اوندان‌دا ايكى قات و منطقدن
اوزاق وئريلن جاوابلاردير. جيغان- ويغان كيتابى باره «فجر آذربايجان» گونده‌ليينده ايره‌لى سورولن و
توتولان ايرادلارين 80٪ يئرلى ايدى. آنجاق ديلى چوخ كسرلى اولدوغوندان بو كيمى
مقاله‌لرى ادبى تنقيدچى‌لييميزه داخل ائتمك اولماز.
مطبوعاتدا و بعضى كيتابلارا يازيلان مقاله‌لرده غير نورمال تنقيدچى‌لى‌يين
باشقا ساحه‌سينه‌ده راست گليريك، اودا مؤلف‌لر باره‌ده حدّيندن آرتيق تعريفه و شيشيرتمه‌يه
يول وئريلمه‌سى‌دير. مثلا دوقتور على اكبر ترابى باشقا سؤزله حلاج اوغلو جنابلاري، طنز شعريميزى بير نوع مثلث حساب ائده‌رك،
اونون بير بوجاغيندا ميرزا على اكبر صابر و باشقا بوجاغيندا ميرزا على معجزى و باشقا بوجاغيندا ايسه، اؤز سئوديگى بير شاعيرى
يئرلشديرير. هر بير انصافلى قلم صاحبى حلاج اوغلونون بو سؤزو ايله راضى قالماديغي
حالدا، حؤرمتلى عاليمين اورتايا چكديگى فيكيرينى، ادبيات شناسليق حساب ائتمير.
بللى اولدوغو كيمى ادبى تنقيد و ادبياتشناسليق گئت– گئده اؤزونه مخصوص يول
آچير. شاعير ودود دوستى «ايلقار» طرفيندن نگار خانيم خياوى‌نين «منيم شعريم» اثرينه و اردبيللى شاعير عباسعلى يحيوى «ائلچى» نين «ملكوت آيه‌لرى» و «ايلديريملار
لهجه‌سى» كيتابلاري باره‌ده يازيلان تنقيد هر باخيمدان تقديره لايق‌دير.
يئرى گلميشكن آرتيرمالي‌‌ييق كى، ادبى تنقيدچى‌لييميزين هر باخيمدان غير نورمال
وضعيته دوشمه‌سينى ديليميزين مدنيتيميزين غير رسمى اولماسيندان آرتيق، شخصى و
خصوصى دوشمن‌چى‌ليك و ايدئولوژو ضدّيتينده آختارماق مومكوندور. بوگونكى سياستچي‌لر،
هاميني اؤز اؤلچولرى ايله اؤلچوب، اؤزلرينه مخصوص تنقيدچى‌ليگه آياق قويورلار.
بونونلا اونلاري ادبى تنقيدچى‌دن آرتيق سياسى تنقيدچى آدلانديرماق اولار. چونكى
مدنيت دونياسي اوچون آپاريلان مبارزه ضرورى نظره گلرسه، اونون ياييليب، نشر ائديلمه‌سى
اؤته‌رى اولاجاقدير، بئله‌ليكله ادبى تنقيدچى‌ليگه بير سيرا تضييق‌لر قبول ائتديريله‌جكدير.
بو وضعيت اؤز اولدوغوندا قاليب، اوزه چيخاريلماسا بو او دئمك ديركى،
قوندارما عالمده سئير ائده‌ن، داياز و معلوماتى آز اولان آداملارين گيلئى‌ليگى ايله
اوزلشن، درين بيلگى‌لى عاليم‌لرين توتدوقلارى موقعيتى گؤره‌جه‌ييك كى، بئله تمل‌سيز
اثرلره اعتبارسيزليق گؤستريرلر.
«آنتونيو گرامشى»سياست و ادبيات باره‌ده اؤز فيكيرينى
بئله بيلديرميشدير: «صنعتكارلار، سياستچى‌لرين عكسينه اولاراق ثابت تصويرلر ياراتمالي‌دير.»
او داها سونرا دئيير:
«سياسى باخيمدان سياستچى، صنعتكاردان راضى قالماياجاقدير.»
بو مثاللاردان آيدين اولوركى، ادبيات، خصوصى ايله باشقا صنعتلر كؤنول‌لردن
قيراقدا قالارسا، تنقيد و تنقيدچى‌ليين مئيدانا چيخماسي گره‌كسيز اولار. ادبيات دونياسي
آرتيق گئنيش‌له‌نيب، يازانلار و اوخويانلار آرتارسا، تنقيدچى‌ليگه اؤزه‌ل يئر آچيلار.
تنقيدچى‌ليك بعضا كيتاب مؤلف‌لرى و كيتاب نشر ائديب، ساتانلار طرفيندن ياخشي
قارشيلانمير. اونا گؤره بعضى ناشر، محتواسيز كيتابلارين نشرينه خصوصى دقت يئتيرير.
چونكى بئله اثرلرى يارادانلار هر نه‌يين باهاسينا اولورسا اولسون، اثرلرينى نشر
ائتديرمك ايسته‌يير و بعضى لرى‌ده، امك حقى آلماق عوضينه ناشره يارديم‌دا گؤسترير.
تنقيدچى‌ليگى خوشلامايان بعضى يازانلاردا واركى، بئله‌لرى، اؤز يازديقلاري ده‌يه‌رسيز
اثرى عزيز ساناراق، اؤزلريندن اوستون هئچ كيمسه‌نى گؤرمزلر. بودا ادبى تنقيدچى‌لييميزده
تؤره‌نن مانعه‌لردن بيرى‌دير.
ادبى تنقيدچى‌ليك بو گونكو دونياميزدا آزاجيق منيمسه‌نمه‌لى دير. چونكى هربير
قلم صاحبى، اؤزونو نه سويه‌ده اوستاد گؤرسه‌ده، ايستر- ايستمز اونون ياراتديغي اثرينين
آز- چوخ سهوى اولاجاقدير. مؤلف اؤز اثرينه ماراق گؤسترديگى اوچون، اؤز اثرى باره‌ده
قضاوت ائده بيلمه‌يه‌جكدير.
باشقا جهتدن تنقيدچى‌ليك اثرين مثبت خصوصيت‌لرينى گؤزه‌ليك‌لرينى اؤز
اوخوجولارينا تانتيديرير و اوخوجونون دويغو و سليقه‌سينى ياخشي اثرلر سئچمكده و بديعى
اثرلردن لذت آپارماقدا خصوصى خدمت گؤسترير. تنقيدچى هم‌ده يازيچي و صنعتكارلاري، غفلت
و سهوه توتولماقدان چكينديرير.
بعضى قلم صاحب‌لرى تنقيد و تنقيدچى‌ليگى صنعت اوچون بير نوع مانعه‌چى‌ليك
سانيرلار. بو دوشونجه تمامى ايله يانليش بير فيكيردير. چونكى تنقيد نه قده‌ر كسگين
و منطق‌سيز اولارسادا، يئنه حقيقى صنعتكار، اؤز ايشى‌نين آرديني توتاجاقدير.
تصادفى دئييلديركى، فرانسه يازيچي‌لارينين بيريندن سوروشانداكى، «صنعتكار
آلقيش‌لانمالي دير» او جاواب وئريب، دئميشدير: «يوخ اونون عكسينه هنرمنده، كؤتك
وورماق لازيم دير». تنقيد، بير سؤزله اوستون تنقيد چوخ چتين‌دير. چونكى تنقيدچى‌نين
لازيمي قده‌ر بيليگى، تميز دويغوسو و آچيق اوره‌گى و دوشونجه‌سى اولمالي‌دير. هنر
ايلديريم سرعتى ايله قاباغا گئدير، شرق ادبيات شناسليغي ايسه، هنرى كؤهنه قايدالاردا
ساخلاماغا چاليشير. بونونلا بوتون دؤرلرده، يئنيچيلرله، كئچميش عنعنه‌لره صادق
قالانلار آراسيندا چكيش - بركيش، بعضى حاللاردا ايسه دالاشما باش وئرير.
دئديگيميز كيمى ادبياتشناسليق و تنقيدچى‌ليك اينام بسله‌ديگى عقيده‌لره
آرخالاناراق، بعضى اخلاقى، اجتماعى و سياسى يؤنلره طرف چكيلير. بونونلادا جميعتده
باش وئره‌ن حادثه‌لر نتيجه‌سينده ادبياتشناسليق و يا خود تنقيدچى‌ليك‌ده عوض اولونور.
بعضى‌لرى‌ده وار ادبى اثرلرى، باشقا سؤزله دئسك ادبياتى، جمعيتده موجود اولان
اخلاقى اوصوللار چرچيوه‌سينده گؤرورلر و اؤزلرينى او اثرلرى به‌يه‌نيب، به‌ينمه‌مكده
سربست حس ائديرلر و اثرلرين غير ثابت اولدوغوندان گؤز اؤرتولور.
روسلارين بؤيوك يازيچي‌سي تولستوى هنرى اخلاقين آسقي‌سيندا گؤرور
و بو صفته مالك اولمايان اثرى ايسه رد ائدير.
تولستويون عكسينه اولاراق، اسكار وايلد هنر ايله اخلاقين هر جوره اويغونلوغونو دانور و
بو باخيمدان هنرمندى غير مسئول تانيير.
ادبيات‌شناسليغين مانعه‌چى‌لييندن بيرى‌ده، اجتماعى و سياسى عقيده‌لرين،
تنقيدچى‌ليگه و ادبيات‌شناسليغينا نظارت ائتمه‌سى‌دير. بعضا بو ايش لاپ چتين‌له‌شير،
چونكى سياست‌چى‌لر و اجتماعى تشكيلاتلار نه اينكى تنقيدچى‌لردن و يازارلاردان ايسته‌ييرلر
اونلارين عليهينه بير سؤز يازماسينلار، بلكه، اوسته‌ليك اولاراق، اونلارين
توتدوقلارى وضعيت‌لرينى، عقيده‌لرينى تبليغ ائتمكده ايسته‌ييرلر. بونونلا بئله آيدين
اولموشدوركى، اجتماعى و اخلاقى اؤلچو ادبيات‌شناسليغا اؤز ايزينى قويور، بئله‌ليكله
تنقيدچى بو اوصوللار چرچيوه‌سينده اؤزونه بير يول آختاراراق، همين ماراغي اؤز اؤلچوسونه
داخل ائدير.
ادبيات‌شناس بو وضعيتدن قاچارسا بير سيرا چتين‌ليك‌لرله اوز به اوز اولاجاقدير.
بو فيكيرلرى اورتايا چكمكدن مقصد ادبياتيميزدا تنقيدچى‌ليگى گئنيش‌لنديريب،
يازيلان اثرلرين دوزگون اؤلچوسو ايسه بللى ائديلمه‌لى‌دير.
دوقتور دوزگونون اليمده اولان بير نئچه شعر مجموعه‌سينى دريندن آراشديريب، اونون
مثبت و منفى جهت‌لرينى آچيقلاماقلا، ائليمه اولان بورجومون بيرينى اؤده‌ييرم.
كيچيك شعرلر
پهلوى رژيمى‌نين 50 ايل‌ليك حاكميتى دؤرونده ايران
جاماعاتينا خصوصى ايله آذربايجانلي‌لارا قارشي اولان تضييق اؤز دؤنوش مرحله‌سينه چاتميشدير.
دئمك ايرانين باشقا ملت‌لرينه باخديقدا آذربايجانا اولان منفى مناسبت‌لر بيره ايكى آرتيق ايدى. آذربايجانلي‌‌لار پهلوى رژيمى ايله اوچ جبهه‌دن ووروشوردو:
1- ملى، 2- مذهبى، 3- ايدئولوژى (سولچولوق).
بونونلادا تورك ديللى آذربايجان شاعيرلرى ارتجاعين، دهشتلى دؤرونده ده وورشمادان
چكينمه‌ديگى حالدا، قلم مئيدانيندادا دؤيوشوب كسگين شعرلر يازيردي. دوقتور صديقين
«كيچيك شعرلر»ى‌ده شاهين اختناق دؤروندن سوراق وئرير. دوزگونون «كيچيك شعرلر» كيتابيندا
سولچولوق مئيلى هرنه‌دن اوستون دور. بودا زامانين شاعيردن طلبى ايدى.
دوزگونون بو كيتابي‌‌نين تنقيد يئرى‌ده اونون بعضاً شعريندن آرتيق شعارچيليغا
اوستون وئرمه‌سى‌دير.
دئديگيميز كيمى «كيچيك شعرلر» كيتابي‌‌نين شعرلرينه اولان مناسبتيميز، ايستر
تنقيدى باخيمدان ايسترسه‌ده باشقا مزيت‌لر نظريندن دقت مركزينده دورور. كيتابين
باشلانيشيندا گلن «آنا وطن» شعرينده يورد سئوه‌رليك دؤنه– دؤنه اؤز ده‌يرينى
تاپسادا، شعارچيليقدان و سولچولارين بايراغينا سيغينماسي اونون بو شعرينه خلل
وورور. حالبوكى شعرين بير چوخ بؤلوك‌لرى طبيعى سسله‌نير:
بولاقلارين سرين سنين،
چشمه‌لرين درين سنين،
اوجا ذيروه يئرين سنين،
ان گؤزه‌لسن، بون بيلك،
آنا وطن، آنا وطن.
«كيچيك شعرلر» كيتابى‌نين مؤلفى بو اثرينده، ائليميزين باشينا گلن قانلي-
قادالي گونلريندن دانيشير:
بير حادثه، بير ديرى‌ليك بير
اؤلوم،
بيلمم هاچان قويدو سنى قارشيمدا.
ياديمدادير آنجاق بوكى اوگونو،
قولدورلارين زهرى وارميش آشيمدا.
پهلوى حاكميتى‌نين عيبه‌جر ايشلريندن بيرى‌ده آذربايجانين تاريخى آبيده‌لرينين، احتشاملى مقبره‌لرينين
اوچورولوب محو ائديلمه‌سى‌دير. آرتيق بللى ديركى، بير ائلين، بير ملتين وارليغينى،
تاريخيني او زامان دانماق اولاركى، اونون تاريخي بينالاريني، يئر اوزوندن محو ائده‌سن.
دونيادا بئله ايشلر چوخ گؤرونسه‌ده، آمما حقيقت هئچ زامان ايتيب باتماميشدير.
پهلوى حاكميتى آذربايجانين بير چوخ تاريخى يئرلرينين آدلاريني، باشقا خالقلارين
آدلارينا باغلايا بيلمه‌ديكلرى حالدا، آبيده‌لرين داغيديلماسينا ماراق گؤسترميشلر.
شاه اوصول اداره‌سى ارك‌ين عظمتينى آزاتماق اوچون، بو احتشاملي بيناني آز- آز محو ائتمه‌يه
باشلادي. بونو بوتون وارليغي ايله حسّ ائده‌ن شاعير دوزگون اؤز ارك شعرينده يازير:
آنا تبريزيمده‌كى اوجالان
اركيم،
آغلايير، ياش تؤكور،
هاوار- هاوار!
يوخدور قرار!
لحظه– لحظه باشيندان،
يئنى– يئنى داش كرپيچلر،
خار هاخار تؤكولور.
آمان اركيم سؤكولور.
شاعير پهلوى رژيمى‌نين قارا دوستاقلاريندا، عؤمرونون باهارينين
بير حيصه‌سينى كئچيرسه‌ده، بو چتين‌ليك‌لر اونو، اؤز يولوندان سارسيتمادي، دؤزوملوك‌له
اوميدينى قورويوب، ساخلاياراق 1357 - نجى ايلده دوغاجاق گونشه ايناندي، او همين گونلرده
يازيب - يارتماقدان چكينمه‌دى:
سوسماياراق دؤنمه‌يه‌ريك گئرييه،
دايانمادان چيرپيناريق اينان
بيز.
ايسته‌سه‌ده چتين‌ليك‌لر
قاووشسون،
چاليشيبان قوياجاييق ايزه- اوز.
شاعيرين بؤيوك نائليت‌لريندن بيرى‌ده اوستاد حبيب ساهير ايله ايللر بويو تانيش اولوب، ياخين اولماسي‌دير.
بو ياخينليقلار نتيجه‌سينده، اوستاد ساهيرين دوزگون ياراديجيلغينا اولان تاثيرينى‌ده
آچيق- آشكارا گؤروروك، تصادفى دئييلديركى، ساهيرين حاققيندا يازيلان سايسيز – حساب‌سيز
كيتاب و مقاله‌لرده دوقتور حسين دوزگون، اؤز اوستادينين تاثيراتينى باشقا
اوخوجولارا چاتديرماغي هرنه‌دن آرتيق مصلحت گؤرور.
شاعير «كيچيك شعرلر» كيتابيندا اوستاد ساهيره يازديغي مكتوبوندا مهم مسئله‌يه توخونموشدور اودا ائلين،
گله‌جكده سئل گوجوندن سوراق وئرمه‌سى‌دير:
بيزيم سؤزلريميز يادا آجي دير،
چونكى ائل قوّه‌تى، خالقين گوجودور.
من ياخشي بيليره‌م سنين اليندن،
كاغيذا دامان هر شعير اينجى
دير.
همين كيتابدا شاعير، اوستاد حبيب ساهيره يازديغي منظوم مكتوبدا اؤز اوستادينين ايچرى دونياسينا
او ائل اوزانلارينا «سوسما» دئيه، اونلارين سازلارينين گوجونو هرنه‌دن آرتيق گؤرور،
و اوخوجوسونا آنديريركى، سنين جارچى‌ليغينلا، ائل آييق- ساييق اولوب، وطنده گونش دوغاجاقدير:
سوسما چال‌كى، قارا بولود يان
گئده‌ر،
قيزيل گونش آخير دوغار
سمادا،
محبتين چيچك‌لرين بئجه‌رده‌ر،
سئودالى‌لار گونه چيخار دونيادا.
او ساهيرين سؤزونه ده‌ير وئره‌رك، اوستادين اؤز ديلينه اولان درين
محبتيندن دانيشير:
خلقيمه بسله‌دين درين بير اينام،
محبت دفترين ائيله‌دين تامام.
مقاما شؤهرته سن آلدانمادين،
ائلينى، يوردونو هئچ واخت
دانمادين.
يورد غزللرى
آذربايجان شعرينين ايلكين نمونه‌لريندن بيرى‌ده غزل فورماسي‌دير.
آذربايجان شعرينى اوجا بير چينارا اوخشاتساق، اونون ياشيل
بوداقلاريندان بيرى‌ده غزل دير. آذربايجاندا غزل شعر فورماسي‌‌نين، گونو گوندن چيچك‌لنمه‌سى
و طراوتى، اونون زامانلا آدديملاماسيندا آختارماق اولار.
سؤنوك شمع اود آلير پروانه‌ميزدن،
عاغيل، حكمت اومور، ديوانه‌ميزدن.
بو يئرده مست اولانلار، عقل
اودوزماز،
گيره‌ن عاقيل چيخير مئيخانه‌ميزدن.
بو مصراعلارين مؤلفى اولان ماراغالي حيدر عباسى «باريشماز» غزل شعر فورماسيندا بؤيوك ده‌ييشيك‌ليك‌لره
ال تاپير.
دوقتور دوزگونون غزللرينده يئنى مضمونلار آز گؤرو نسه‌ده، «يورد غزللرى» آدلانان كيتابدا بير چوخ كلاسيك‌لريميزين
ايزينى گؤروروك، حسن اوغلو، قوشچو اوغلو، شاه ختائى، نسيمى و باشقالارينين يوللارينو ايزله‌سه‌ده، ملامحمد
فضولى‌نين تاثيرينى آرتيق دويوروق.
فضولى باشقا فورمادا، شعر يازسادا، غزل فورماسيني هر شئى‌دن اوجا توتموش، (تورك، فارس و عرب) ديللرينده مكمل ديوان ياراداراق، تورك‌لرين
شعر دونيالاريني، خصوصى ايله غزل شعر فورماسيني اوستون بير بديعى‌ليگه چاتديرميشدير.
فضولى غزل شعرى فورماسي باره‌ده يازير:
غزل دير، صفا بخش اهل نظر،
غزل دير، گول و بوستان هنر.
غزال غزل صيدى آسان دئييل،
غزل منكر اهل عرفان دئييل.
غزل بيلديره‌ر شاعيرين قُدرتين،
غزل آرتيرار ناظم‌ين حكمتين.
دئديگيميز كيمى «يورد غزللرى» مؤلفى بؤيوك فضولى‌نين درين مضمونلو غزللرينى
بوتون وارليغي ايله حس ائده‌رك، بو كيتابين باشلانيشيندا اوستادينين امه‌يينى بئله
ده‌يرلنديرير:
يارب فضولى تك منه‌ده اولگيل
ابتدا،
گؤستر طريقِ جد پاكيمى اى
خالق سما!
دوقتور دوزگون ايلديريم سرعتى ايله فضولى مكتبيندن آياق گؤتوروب، اؤزونو سيد
عظيم شيروانى مكتبينه چاتديراراق، اونون اؤيود وئريجى شعرلريندن
اؤز الهام جاميني دولدوراراق، اؤز چاغداشلارينا عبرت وئريجى سؤزلرينى بئله چاتديرا
بيلميشدير:
دوستوم، قيمتينى ساخلا،
بهانى حفظ ائت.
سنه تاپشيرديغيم اسرار نهانى
حفظ ائت.
عاشقين قلبينه گر باسسان آياق
اؤز قلبين،
غيردن خالى ائله، صدق و
صفانى حفظ ائت.
بو كيچيك غزلده شاعير سيد عظيم شيروانى نين روحو ايله، سؤزون دوغرو معناسيندا سيد عظيم
شيروانى‌‌نين فيكير و دوشونجه‌سى ايله آذربايجان آچيق شعرينين (سربست شعرينين) بايراقچيسي اولان
اوستاد حبيب ساهيرى ياخينلاشديرماغا چاليشير. نهايت او اؤز فيكرينى هر ايكى
شاعيرين فلسفى دوشونجه‌سينه قاتير:
فضل ياب اول بابالاردان
گئجه– گوندوز، «دوزگون» ،
سن‌دن «ساهير» ساياغي لطف بيانى حفظ ائت.
شاعيرين غزللرينده، مهم موضولاردان بيرى‌ده اونون افتخارلى تورك ائللرينين
شانلي كئچميش‌لرينى غرور حسى ايله خاطيرلاماسي دير. او آيدان آري، سودان دورو
ائللرينى اؤز غزللرينده بئله وصف ائدير:
ختادان گلميش اجداديم سؤزومده
بير خطا يوخدور،
اولوسوم افتخار ائيلركى، ذاتيمدا
ريا يوخدور.
گل اى ساقى منيمله اگلش و اگلن،
منيمله اول،
بيزيم مسلكده دوستلوقدا
صداقت‌وار، جفا يوخدور.
يورد غزللرى كيتابيندا مهم مؤضوعلاردان بيرى‌ده آدي تاريخينين اؤزو قده‌ر
قوجامان اولان تبريز شهرينين سئوگيسى دير. تبريز باره‌ده چوخ شاعير
اؤز مهارتينى سيناميش و بير چوخ اينجه صنعت اوستادلاري، بو شهرين احتشام و عظمتيندن
سوراق وئرميشلر. حالبوكى دوقتور دوزگونون آنادان اولدوغو تبريز شهريندن اوزاق قاليب،
عؤمرونو غربت يئرلرده كئچيرسه‌ده، بير آندا اولسون بئله اؤز دوغما يوردوندان آيريلماميش
و اؤز ياراديجيليغيندا اونو دؤنه- دؤنه وصف ائتميشدير:
ائللرين عشق حديثى كيمى
داستان يوخدور،
منه تبريز تكى نه آى نه‌ده كنعان يوخدور.
اوره‌‌گيم بير تيكه دير،
لهجه نه، خوش سؤزلرينه،
لب‌لرين قندى كيمى دردلره
درمان يوخدور.
همين غزلده ائليميزين گؤزه‌ل بير مثلى يادا دوشور «هر كسه اؤز ائوى، هر
قوشا ايسه اؤز يوواسي گؤزه‌ل دير.» بونونلادا او باشقا خالقلارين يورد سئوه‌رليينى
ده‌يرلنديريب اؤز يورد سئوه‌رليينى ايسه اؤرت- باسدير ائتمير:
يادا اؤز يوردو عزيز ايسه بيزيم
ائللره‌ده،
آذربايجان مثالى روضه‌ى رضوان يوخدور.
همين شعرين آردينجا، شاعير «قالار» رديفلى غزلينده يوردونا اولان قيزغين
محبتينى، اؤز اوخوجوسونا چاتديرماق ايسته‌يير و ائلينى سئوه‌نلرى ان ناموسلو و
شرفلى شخص‌لر سيراسينا يازير:
يوردون شرفين ايتيرسه كيمسه،
ناموس و شرافت، عار قالماز.
جمع اولسا گر اردبيل و تبريز،
آشفته بو روزگار قالماز،
دوقتور دوزگونون باشقا شعرلرينده اولدوغو كيمى غزللرينده‌ده كئچميش پهلوى رژيمى‌نين آذربايجان ائلينه قارشي آپارديغي، سرت سياستى پيسله‌نير. اونون
بو خصوصدا يازديغي شعرلرينى اوخوياركن، ايستر، ايستمز، ائليميزين پهلوى حاكميتى‌نين
باشينا گتيرديگى قانلي- قادالي گونلرى يادا دوشور، تورك ديلى‌نين تحقير اولونماسي،
مكتب‌لرده بو ديلده دانيشانلار اوچون جريمه سانديقلارينين آسيلماسي، يوزلرجه، منيلرجه،
نه دهشتلى آنلار يادا دوشور:
بير بؤلوك دؤره سيزه دؤوره و
دؤوران وئرديك،
اؤروموز اللرى بوش قالماغا
دؤوران گزيريك!
قاتي كؤنوللو شاهين باغرينا
توش گلميش ائليم،
داش دلن، باغري ياران سمبه و
سوهان گزيريك.
شاعير آذربايجان ائلى‌نين دردينى، اؤز اوره‌گينده اؤز ايچريسينده
گؤرور، اونون فيكرينجه، آذربايجان توركونون آرزو و ايستك‌لرى، پارتيا، سياسى تشكيلاتلارين،
حزب‌لرين چرچيوه‌سينه سيخيشان دئييل، بلكه:
حزبلر درديميزه درمان ائده‌نمير
بيليريك،
بير سمندر ساياغي ائللره
قوربان گزيريك.
دوقتور دوزگونون غزللرى، اونون گنج‌ليك چاغيندا قلمه آلينماسادا، اونون بو
اوسلوبدا يازديغي شعرلرينين معيّن حيصه‌سى گنج‌ليك احوال- روحيه‌سى داشيير. او ليريك
و يا خود عاشقانه فورمادا ياراتديغي غزللرينده، گيلئى‌ليك دويولسادا، اونو بير سيرا
سورغولار قارشيسينادا قويور:
بير خنده ائتمه‌دين منِ بيمار
ايله گؤزه‌ل،
بو عاردير سنه، كوسه‌سن يار
ايله گؤزه‌ل.
دون باخمادين منه نييه اوز يانه
دؤنده‌ريب،
گئتدين كناره بير بؤلوك اغيار
ايله گؤزه‌ل؟
شاعير ليريك اثرلرينده، آدي، تعريفى دونياني چولغايان تورك گؤزه‌لينى دؤنه-
دؤنه وصف ائتمكدن دويمور:
سن پرى‌رو، ماه‌پيكر، توركِ
خوبانسان گؤزه‌ل،
بير فرشته باطن و ظاهرده
انسانسان گؤزه‌ل.
خصمينه تسليم اولما، كسمه‌سن
ده باس اونو،
غئيرتى ديلده گزه‌ن تورك
مسلمانسان گؤزه‌ل.
دوزگون «گؤزه‌ل» رديفلى غزلينده مهم بير مسئله‌يه‌ده توخونور، اودا تورك قادين و قيزلاريني كيشى كيمى غيرتلى، مرد،
مردانه اولمالاري‌دير. او ناموس و شرفى، هر شئى‌دن اوستون توتان گؤزه‌للرى، ائلين ايگيد
و قهرمان اوغلانلاريندان آيري گؤرمور. اونلاري شاعير، كور اوغلولار، نسيمى‌لر سيراسينا
يازير:
مرد– مردانه دولان نامردلره
مئيدان اوخو،
ناكيشى‌ليك صفحه‌سينه خط
بطلانسان گؤزه‌ل.
ظولمه باش اگمه اسير ظالم
ائتمه خالقيني،
سن «نسيمى» ميثلى سن، بير
پارچا عصيانسان گؤزه‌ل.
شاعير دوزگون يورد غزللرى كيتابيندا، اؤز اوغلانلارينا اؤيود وئريب، اونلاري
اولو بابالاري كيمى باش اوجا ياشاماغا چاغيرير و حاققين عدالتين داليندا داياناراق
جرأتلى اولماغا سسله‌يير:
پايمال ائيلمه هئچ كيمسه‌نين
حاققين اصلا،
حاققيني آلماغا فرياد ائله
جرأتله اوغول.
كيمسه اؤز تاريخينى، اؤز ديلينى
چئينتمير،
بابا ميراثينا گل باخما
حقارتله اوغول.
شاه اصول اداره‌سى‌نين آپارديغي سياست‌لرى نتيجه‌سينده، تورك اوشاقلارينين
باشقا ديلده دانيشمالاري، اوره‌ك سارسيديجي اولموشدور. فارس ديلينده دانيشان اوشاغين آتاسينا اعتراض ائده‌نده،
او آدام اؤز عناد كارليغيندان دؤنمه‌يه‌رك دئييردى: «من اوشاغيمي اؤز ديلينده دانيشديرسام،
اوشاق لهجه تاپار» يعنى فارسجانى، توركجه لهجه‌سينده ايفاده ائده‌ر. بئله شخص‌لرين
فيكرينجه بو ايش بير نوع قباحت حساب اولونور، آمما همين آدام و اونون كيمى‌لر، بير
فرانسه‌لى‌نين فرانسه لهجه‌سينده فارسجا دانيشديغيني گؤروب، آغزينين قيليغيني آخيداراق،
اؤز فيكيرينى: «نه گؤزه‌ل، نه شيرين لهجه‌سى وار» دئيه بيلديرير. آمما بير توركون،
تورك لهجه‌سى ايله فارسى دانيشماسيني مسخره ائتمكدن چكينمير. شاعير دوزگون غزللرينده
بو مؤضوعا اؤزل يؤن وئره‌رك يازير:
اوغلونا اؤيره‌ت اؤزون اؤز ديلينى،
قويما اغيار آپارا سئوگيلينى،
دئمه كى، «مدرسه‌ده لهجه تاپار!»
بير گونه ده‌يمز ائلمه، ايلينى.
دوقتور دوزگونون «يورد غزللرى» كيتابى‌نين سون حيصه‌لرينده،
آذربايجان كندليسى نين ساده داورانيشيندان، گؤزه‌ل خصوصيت‌لريندن
بحث ائدير. او شهرده دوغولسادا، بعضى قيسقانج گؤزلو شهرلى‌لر كيمى، كندلى‌لره
حقارت گؤزو ايله نه اينكى باخمير، بلكه، كند جاماعاتى‌نين صافليغيني ساده‌‌ليينى،
اوجا ذيروه‌لره چاتديرماغا جهد گؤستريير:
سلام اولسون سنه مندن صفالي
رنجبر كندلى،
اوره‌گى صاف – صداقتلي،
كلكدن بى‌خبر كندلى.
شاعير همين شعرده اؤز سويونو اوستون توتانلاري اؤز سؤز سيلاحى ايله هده‌له‌يير:
تمدّنلى بو اعيانلار، نژادى
برتر انسانلار،
منيم احواليمي سندن‌ده ائتميشلر
بتر كندلى.
سن اى آزغين جهالت ايچره
چولقايميش اوجا رتبه!
بونو بيل، گؤرمه‌ديم بير
ساده انسان من، مگر كندلى!
