اوچغون داخما
1361– نجى گونش ايلى ايشيق اوزو گؤره‌ن اوچغون داخما شعر توپلوسو، عموميتله
شعردن آرتيق شعارچيليغا آرتيق يئر وئره‌ن مؤضوعلارى عكس ائتديرير. عين حالدا او
دؤره‌ده باش وئره‌ن حادثه‌لرى دريندن ايزله‌يه‌رك، بير چوخ شعرلر يازماقلا ياناشى
خالق باياتيلاريندان فايدالاناراق، شاه دؤرونده باش وئره‌ن حادثه‌لرى خاطير‌لاياراق،
درين فيكير دونياسينا اوز گتيرير:
باغلار سيلكيندى باردان،
دوشمن كام آلدي ياردان.
نولا بير خوش گون گله،
بيزده قورتاراق داردان.
اوچغون داخما شعر مجموعه‌سينى آراشديراندا، ايستر– ايستمز سوئت‌لر بيرليگى‌نين
قبول ائتديريلميش، ادبى سبك‌لرى يادا دوشور. «ادبى مكتب‌لر» اثرينين مؤلفى «از
باروك تا پارناس» روسيه‌نين رئاليسم ادبى مكتبينى اوچ حيصه‌يه بؤلور. 1– ايلك
رئاليسم، 2– تنقيدى رئاليسم، 3– سوسياليستى رئاليسم.
ايلك و تنقيدى رئاليسم‌لر باره‌ده سؤز آچماغا آرتيق احتياج دويولمور. آنجاق
سوسياليستى رئاليسم ادبى سبكى اطرافيندا دانيشماق طبيعى نظره گلير.
سوسياليستى رئاليسم، ادبيات ساحه‌يسنده سوئت‌لر بيرليگى‌نين مكتبيندن قيدالانان
بوتون اؤلكه‌لرين رسمى مكتبى سانيليردي. سوسياليستى رئاليسم 1934– نجو ميلادى تاريخينده
مسكودا كئچيريلن، شوروى يازيچي‌لارينين بيرينجى كنگره‌سينده رسمى صورتده اؤز يئرينى
آلدي. سوسياليستى رئاليسم مكتبينده، هنرمند هرنه‌دن آرتيق انقلابچي احوال– روحيه‌ده
ياشامالي و بير سؤزله انقلابى اثرلر ياراتمالي‌دير. يئرى گلميشكن دئمه‌لى‌يم‌كى،
1932– نجى ميلادى تاريخينده كمونيست پارتياسي‌‌نين مركزى كميته‌سى سوئت‌لر بيرليينده
فعاليت گؤستره‌ن بوتون ادبى، هنرى درنگ، تشكيلاتلاري رسمى صورتده اورتادان قالديراراق
اونلارين واحد بير سنديكادا فعاليت گؤسترمه‌لرى قرارا آلينميشدير. بونونلا بئله
كمونيست پارتياسى سؤزو گئده‌ن سنديكالارين بودجه‌سينى تامين ائده‌رك، بوتون هنر
ساحه‌سينده فعاليت گؤستره‌ن يئرلرده اؤز فيكير و ائدولوژلارينى تبليغ ائتمه‌يه
باشلاميشلار. بئله‌ليكله 1934– نجو ميلادى تاريخينده سوسياليستى رئاليسم هنرمندلر
ايچره‌سينده اؤزونه مخصوص يثر آچماغا باشلادي. سوسياليستى رئاليسم مكتبينده، پارتيانين
ايدئولوژيك اوصولونا اويغون فعاليت گؤسترمك و خالقا خدمت گؤسترمك، زحمت‌چى‌لر
مبارزه‌لريندن مدافعه ائتمك و انترناسيوناليسم روحيه‌ده ياشاماغا آرتيق يثر ويريلير.
سوسياليستى رئاليسم مكتبى، بوتون سوسياليستى اؤلكه‌لرده، سؤزون دوغرو معناسيندا
دونيانين هر يئرينده آرتيق منيمسه‌نه‌رك، ايراندا خصوصى ايله آذربايجاندا، بؤيوك مؤقعيته يييه‌لنميشدير. بو خصوصدا رحمت‌ليك
صمد بهرنگى، عليرضا نابدل، بهروز دهقاني و دوقتور حسين
دوزگون آدلاريني خصوصى صورتده وورغولاماق آرتيق يئرينه دوشردى. دوقتور دوزگونون بير
چوخ شعرلرى، خصوصى ايله اوچغون داخما شعر مجموعه‌سينده سوسياليستى رئاليسم مكتبى‌نين
ايزلرينى آختارماق چوخدا چتين دگيلدير.
اوچغون داخما كيتابى‌نين ايلك شعرينده، سوسياليستى رئاليسم مكتبى‌نين تاثيرينى
گؤروروك:
بو جيغيرا قانلي– قانلي لوت
آياقلار قويولوب،
قالين– قالين دابانلاردان
قات– قات درى سويولوب.
بو جيغيردا مينلر انسان چاتيلارلار
سورونوب،
پارا– پارا چوللاري‌دا قيزيل
قانا بورونوب.
بو جيغيردا مينلر گلين آتلار
اوسته قاچيليب،
سحر آخشام دورقون گونش مينلر
لئشه ساچيليب.
ساعاتدا بير مينلر قادين داش
اوستونده اوتوروب،
بو جيغيردا خانلار بگ لر
احتراملا آتلانيب.
شاعير «اوچغون داخما» اثرينده‌ده وطن دردينى، ائل قايغي‌‌سيني، «كيم» باشليقلي
شعرينده، اؤز سنبوليك، رمزى ايله، اؤزونو آناسيز بير كيمسه حساب ائده‌رك يازير:
بلكه من آناسيز قالا ايديم،
گؤزومدن ياشي كيم سيلردى؟
اؤيره‌دردى ساز- سؤزو كيم
منه،
يوكسلمه‌ييمى كيم ديله‌ردى؟
شاعير ائلين آغير دوروموندا، اوشاقلارين وطن اوغوللارينين، آنا لايلاسينا،
باياتيلارينا، اؤيود وئريجى سؤزلرينه، ناغيللارينا حسرت قالديسيني همين شعرينده
خاطيرلاتماق ايسته‌يير:
كيم منه بس ناغيل دئيه‌ردى،
هر سحر قوشمالار قوشاردي؟
آيدين بير گله‌جكدن اؤترو،
اوخويوب، اوخويوب جوشاردي؟
و نهايت ائلسيز، اوباسيز ياشاماغين سون مرحله‌سينى، اؤز داهيانه مصراعلاري
ايله، جانلي تابلولار ايچريسينده تصويره چكير. تانيش اولاجاغينيز بو مصراعلاردا، بير
ايگيدين گرگين حياتيني گؤروب، كؤوره‌لن آنانين، باشقا سوزله، ساواش مئيدانيندان و يوزلرجه
باشينا گلن بلالاري گؤره‌ن آنانين ديليندن قوپان دئييم طرزيندن بحث ائدير:
قادا منه گلنده،
كيم «قادان دوشسون» جانيما،
«آنان اؤلسون بالا!» دئيه‌ردى؟
قاچا– قاچا گلردى يانيما.
شاعير دوزگونون «خيام» شعرينى اوخوياركن ايستر– ايستمز بير دوشونجه مئيدانا
گلير، اودا «فارس- تورك» مسئله‌سى دير. فارس ملتى ايله
تورك ملتى‌نين عصيرلر بويو، چيگين- چيگينه ياشاييب، بير-
بيرلرينين مدنيت و ادبياتلارينا تأثير و ائتگى بوراخماسي انكار ائديلمزدير. تورك‌لر
فارسلارين هم قيلينجيني چالميشلار، همده ادبياتيني اؤز سحركار قلم‌لرى ايله ايشيقلانديرا
بيلميشلر. خاقانى كيمين نهنگ بير شاعيردن تأثيرله‌نن، شيرازلي حافظ، اؤز عرفانى
غزللرى ايله بوتون اوره‌ك‌لره يول تاپميشدير. هر عصرده تورك‌لر فارس ادبياتينا گؤزه‌ل- گؤزه‌ل، قيمتلى- قيمتلى اثرلر
ارمغان ائده‌رك، بوگونكو گونوموزه قده‌رده فارس ادبياتيندا اؤزلرينه مخصوص يئر
آچاراق، حتى فارسلاردان گوجلو اثرلر ياراتماقلا، اؤز لياقت‌لرينى بروزه وئره بيلميشلر.
چاغداش دونياميزدان اولان، پروين خانم اعتصامى، اوستاد محمد حسين شهريار، مفتون امينى، غلامحسين ساعدى، رضا براهنى و يوزلرجه داهي سؤز اوستادلاري، اؤز اعجاز كار
قلم‌لرى ايله فارس ادبياتينا مثل‌سيز خدمت گؤسترميشلر. بونون عكسينه
اولاراق محمود دولت آبادى، احمد شاملو، صادق هدايت، صادق چوبك و باشقا فارس ديللى عاليم و شاعيرلر تورك‌لره،
اؤز منفى مناسبت‌لرينى بسله‌ميشلر. ماراقلي حالديركى، احمد شاملو كيمى دونيا شهرتلى بير شاعير «دونيا كيچيك بير
كنددير» دئميشدير، آنجاق او اؤز دئديگينه آرخا دورماياراق، ملت‌چى‌ليك ساواشيني قيزديرماقدان
چكينمير، احمد شاملو اؤزونون بير شعرينده يازير:
«من بامدادم
شهروندى با اندام و هوشى
متوسط.
نسب‌ام به يك حلقه به
آوارگان كابل مى‌پيوندد،
نام كوچكم عربى است.
نام قبيله‌ام تركى است.
كنيه‌ام پارسى است.
نام قبيله‌ام شرمسار تاريخ
است.
نام كوچكم را دوست ندارم
تنها هنگامى كه تو آواز مى‌دهى،
اين نام زيباترين كلام
جهانست
و آن صدا غمناكترين آواز
استمداد»
ترجمه:
«من بامدادام
اورتا بويلو، اورتا دوشونجه‌لى
وطنداش.
اصل، نسبيم كابل شهرى‌نين ديدرگين
دوشنلرينه چاتير.
كيچيك آديم عربى‌دير،
ائليمين آدو توركو دور،
لقبيم پارسى دير.
ائليمين آدي تاريخين لكه‌سى
دير.
كيچيك آديمي سئومه‌ييرم.
و يالنيز سن اوخوياركن،
بو آد دونيانين ان گؤزه‌ل سؤزلريندن
دير و او سس،
يارديم ديله‌ين‌لرين ان غملى
سسى دير.»
احمد شاملونون بو شعرينى اوخويان هر بير غرضسيز آدام، دوقتور دوزگونون
خيام شعرى ايله اونو توتوشدورمالى اولور و دوزگونون بو شعرى احمد شاملونون سولچلوق اييدياسينا باطل بير خط چكير، او دئير:
من اؤز ائليمى سئويرم، باشقالارينادا حؤرمت گؤزو ايله باخيرام، شاعير بعضا
اؤز منطقى باخيشي ايله، فارس ديللى شاعير و عاليم‌لرى علمى باخيمدان آراشديرير
و فارس ديلينده اولان گوجلو اثرلرى اورتايا چكير.
او «خيام» شعرينده خيامدان الهام آلان تورك ديلينده يازيب يارادان كشورى‌دن، اوستون گؤرور،
بو اونو گؤستريركى، او قورو تعصبه يول وئرمير:
سنين غمين– دردين اولو كدرين،
اوره‌ك دؤيونتون‌ده بيزيمكى،
خيام!
بيليرسنمى منيم «كشورى»لريم،
اضطرابلاريندان آلميشدير
الهام.
شاعيرده اولان بو صداقت، گؤره‌سن اؤزونو هاميدان اوستون بيلن شؤونيست‌لرى
اوتانديرا بيله‌جكمى؟
«اوچغون داخما» كيتابيندا شاعيرى دوشوندوره‌ن مسئله‌لردن بيرى‌ده ستارخانين ايگيدليگى و قوچاقليغي‌نين دقت مركزينده دورماسي‌دير.
ستارخانين آدينا چوخلو شعرلر يازيلميش، چوخلو سؤزلر دئييلميشدير.
هر بير قلم صاحبى بو ائل قهرماني‌نين بير خصوصيتينى اؤز ياراديجيليغيندا عكس ائتديرميشدير.
اونلارين هاميسي اؤز يئرينده اؤنملى و ديه‌رلى ديرلر. شاعير دوزگونون ستارخان شعرينده، بير نئچه مؤضوع اؤز عكسينى تاپير. مثلا
بير يئرده اونو فهله‌لرين رهبرى حساب ائدير، باشقا بير بندينده، ستارخانين، قهرمانليغين بو اؤلكه‌ده ياراتديغي ملى آزادليق
حركاتيني، گؤروب، جانينا قورخو دوشن روس تزارينين داخلى اضطرابيندان بحث ائدير. باشقا
طرفدن ايسه قاجار شاهي‌‌نين ستارخانا قارشي دوشمن‌چى‌لييندن و غضبيندن سؤز آچير.
شاعير بو شعرده آدي بوتون دونياني توتان ستارخانين، ساده بير كند محيط‌يندن
چيخديغي و قاراداغ ماحالى‌نين تاريخى و استراتژى اهميتينى، گؤز اؤنونده
جانلانديرير:
سنده جانلانميشدير منيم آماليم،
قاراداغلي گؤزه‌ل ايگيد
قهرمان.
قانادلاندي يئنه ترلان خياليم،
بودور قوشدوم سنين شأنينه
داستان.
شاعير، ستارخان شعرينده، ائلين قهرمان اوغلو ستارخانين مين آل و حيله ايله تهرانا چكيليب، اونون نامرده‌جه‌سينه
قصد ائديلمه‌سينى خاطرلادير و اؤز اوخوجوسونا آنديرير كى، دونيا قدرت‌لرى قاجار
استبدادينين آرخاسيندا باشقا بير ديكتاتوريا بسله‌يير، دئمك مشروطه قهرمانيني
آرادان آپارماقلا، آذربايجان خالقي‌نين قاتي دوشمنى اولان رضاخاني ايش اوسته گتيرمه‌يه، چوخلو سرمايه قويموشدور.
شاعير بو نئچه ايل‌ليك حادثه‌نى كيچيك بير بند شعرده بئله تصويره چكير:
سورولدون تهرانا چيراقلار
سؤندو،
رضاخان ديرچه‌لدى قاجارلار يئندى،
گون اؤتدو، ايل كئچدى زامانا
دؤندو،
قيرغينلارا دوشدو بو آذربايجان.
ستارخانين باشينا گلن كدرلى حادثه، نهايت مشروطه انقلابي‌‌نين
افلاسا اوغراماسي، شاعيرى ناراحات ائتسه‌ده، پهلوى رژيمى‌نين دئوريلمه‌سى شاعيرين بير آز نفرتينى
آزالدير:
محمدرضا خان سانكي داو اولدو،
آنالاري آغلار قويدو،
ساوولدو،
بير گون‌ده ايراندان ايت تك قوولدو،
«شاه گئتدى» بايرامي قالخدي
بورادان.
شاعير دوزگون اوچغون داخما كيتابيندا «ساواشين» نه اولدوغونو خصوصى قئيد
ائتميشدير.
آذربايجانين بير چوخ شاعيرلرى دوشمن‌چى‌ليگين ساواشين آجي ايزلزينى،
اؤز ياراديجيليقلاريندا عكس ائتديره‌رك بشريت تاريخينده اؤزلرينه مخصوص يئر آچميشلار،
شاعير كريم مشروطه‌چى (سؤنمز) محاربه و ساواش باره‌ده اؤز فيكرينى بئله بيان
ائدير:
قلم اوللام حقيقتى يازارام:
كين كدورت قورولوشون پوزارام،
من دعوادان چارپيشمادان
بئزارام،
او انسانين امه‌يينى زاى ايستر.
ماراغالي حيدر عباسى «باريشماز» ساواشين تؤره‌تديگى فاجعه‌لريندن بحث ائتديگى
حالدا، ساواش قيزديرانلارين، قارشيسينا باشقا يول قويور:
يئر اوزونو گوللر اوزه حسرت
قويان،
آغ ائولى‌لر
هئچ بيليرسيز،
سيزده اولان اسلحه‌يه مالك
اولسام
نئيله‌رم من؟
من اونلارين قارينلارين باريتلا
دولدورمارام
ماشاسينا توخوناندا،
گؤزلريندن اؤلوم شاخسين
يئر اوزونون آجلاريني دويورماغا
قارينالارين چؤره‌ك ايله دويورارام
او يئرينه چؤره‌ك سپسين
سيزده اولان اؤلوم يوكلو طياره‌لر
مينم اولسا، اونلارلا من
اؤلكه‌لره واى خبرين
داشيمارام
اونلارلا من ايلده بير يول
ات دادمايان
اوشاقلارا ات گتيره‌م.
باريشمازين شعريندن آرتيق فاكت وئرديگيم اوچون، دئمه‌لى‌ييم كى، شعرده گلن
حقيقت‌لر، دونيانين ياتان انسانلاريني بيز آز آييتسين، سوسان وجدانلار ايسه بير اؤزونه
گليب، فلاكته ساحه يارادانلارين كؤكونو قيرسينلار. شاعير دوزگونون «آجي جنگ» شعرينى
اوخوياركن، ايران خالقيني ديلنچى بير وضعيته سالان پهلوى دودمانى و باشقا يابانجي نؤكرلرى سؤزون دوغرو
معناسيندا 1359– نجو هجرى شمسى ايلينده دونيا قدرت‌لرينين بويوروغو ايله باش وئره‌ن
ايران- عراق ساواشى‌نين نه اولدوغونو، غضب دولو اوره‌كله يازير و صدام حسين– ين
داليندا دايانانلاري تانيتديرماغا چاليشير:
جورج بال سن كيمى بير خايينى
تشويق ائده‌رك،
سئوينير ايرانا بير ده قاييدا
استبداد.
نه «ضرورت» تانييرسان نه «گذشته»
نه ده «حال»،
نه «سياست» نه ده كى «مرحله»
نه «استقبال»،
سن كيمى ناخلف ائولادين اليندن
فرياد!
سؤزوموزون بو يئرينده كيتاب اوچون آد سئچيلن «اوچغون داخما» شعرى داها آرتيق
ماراق دوغورور. 1346– نجى هجرى شمسى ايلينده يازيلميش بو شعرين اوستون مزيتى اوندان
عبارت ديركى، شاعير او دؤورون سياسى حادثه‌لرينى سؤزون دوغرو معناسيندا شاه ديكتاتورلوغونون
حؤكوم سوردويو، آجي گؤنلريندن سوراق وئرير:
تاريخين ايگلنميش صحيفه‌‌سينده
اسيريك آى آمان
شئيطان تورو تكى يان– يؤره‌‌ميزى
بورويوبدور دومان
«اوچغون داخما» شعر توپلوسو باره‌ده سؤزومه «كندلى‌لرين اوخومالاري» ايله يئكون
وورماق ايسته‌رديم. منيم فيكريمجه شاعير حسين دوزگونون شعر ياراديجيليغينا خصوصى ياراشيق
گتيره‌ن سبب‌لردن بيرى‌ده، اونون آذربايجان كندلى‌سينه صميمي مناسبت‌لرى دير. او بو شعرى ايله
سياسى شعور و تكجه شهرلرده دئييل، بلكه كندلريميزده ده گؤرمك ديله‌‌يير. او «كندلى‌لرين
اوخومالاري» آدلي شعرينده، كندلى‌لرين آراسيندا بيرليك يارانيلماسيني ايلك نوبه‌ده
ايره‌لى چكديكدن سونرا يازير:
آي كندلى‌لر توپلانين،
ماهني دئييب، اوخوياق،
بير– بيريزه، ساپلانين،
اوزون زنجير توخوياق.
***
هر آدديمدان بير سالاق
بوينونا آغالارين
آجي قيشا سون قوياق
اوزون گؤره‌ك باهارين.
باكي لوحه‌لرى
ائليميزده بئله بير مثل وار، دئيرلر: چوخ ياشايان چوخ بيلميز، چوخ دولانان،
چوخ بيلر. دوغوردان‌دا دونيانين بير چوخ يازيچي و شاعيرلرى، دولانديقلاري اؤلكه‌لرين
تاثيراتى آلتيندا، اؤز شاه اثرلرينى قلمه آلميشلار. الكساندر دوما، شاردن، ناصر خسرو، مولوى، شئيخ سعدى، نسيمى، سيد عظيم شيروانى، حاج زين‌العابدين مراغه‌اى و يوزلرجه بو كيمى داهى‌لر، ان دولغون اثرلرينى، اؤز
سفرنامه‌لرى آدينا باغلاييرلار.
بو باخيمدان حاج زين العابدين مراغه‌اى نين «ابراهيم بگين سياحتنامه‌سى» و فارس ديللى شاعير، ناصر خسروون سفرنامه آدلي كيتابلاريني خصوصى ايله گؤسترمك مومكوندور.
تصادفى دئييلدير، دونيا شؤهرتلى اصلى تورك اولان مولانا جلال الدين رومى «مولوى» ، شمس تبريزى‌نين تبريز شهريندن ائتديگى سفرى نتيجه‌سينده، اونون دونياسيندا
گئنيش اوفوقلر آچيلاراق، «مثنوى معنوى» و «ديوان شمس» كيمى شاه اثرلرين يارانماسينا
سبب اولموشدور.
حسين دوزگون تورك ائللرى ياشايان بؤلگه‌لره ائتديگى سفرلرينى مثبت
قارشيلاياراق هر بير يورد باره‌سينده اؤز دوشونجه‌لرينى، ايستر نثر و ايسترسه‌ده
شعر واسطه‌سى ايلمه قلمه آلميشدير.
1360– نجى ايلين ياز گونلرينده شاعير مين جوره چتين‌ليك‌لرى
آرخادا قوياراق باكي شهرينه گئتميشدير. شاعيرين باكييا ائتديگى سفرى زامانى، اورادا
شورالار حكومتى (شوروى حكومتى) حاكميتده ايدى. شوروى حاكميتى كمونيست مكتبى‌نين
پرنسيب‌لرينه اساسلانلاراق، اؤز– فيكير و دوشونجه‌سينى دونيايا يايماغا جهد گؤستريردى.
قاباقجادان دئدييميز كيمى ايراندا، خصوصى ايله آذربايجاندا سولچولوق اييدياسيندا بير سيرا اثرلر يارانميشدير. همين
اثرلرين ايچريسينده شعرين رولونو خصوصى ايله قئيد ائتمك يئرينه دوشردى. بو تشبّوث شاعير
حسين دوزگونون ياراديجيليغينا اؤزه‌ل تاثير باغيشلاميشدير. همين عامل‌لر نتيجه‌سينده
«باكي لوحه‌لرى» آدلانان بير كيتابين قلمه آلينيب، ايشيق اوزو گؤرمه‌سى طبيعى نظره
گلير. بيرده آذربايجاندا ايرانين، باشقا ولايت‌لرينه باخديقدا سولچولوق دولو گوجلو
و بينوره‌لى ايدى. آذربايجانين سولچولوغا و باشقا خالق حركاتلارينا آرتيق رغبت
گؤسترمه‌لرى، ايكى باخيمدان ايره‌لى گلميشدير. بيرينجيسى آذربايجانلى‌لارى، ايرانين اؤگئى ائولادى بيليب، مركزى حكومت‌لر طرفيندن
تحقير ائديلمه‌سى و ديل و ادبيات آزادليغي‌‌نين اولماماسي و باشقا طرفدن ايسه
گونئى آذربايجانين سياسى باخيمدان استراتژى اهميته مالك اولماسي و دونيا ابرقدرت‌لرينين
منطقه‌ده بير سيرا حركاتلارين گوجلنمه‌سينده اولان ائتگيسى كيمى سبب‌لرى گؤسترمك
ممكن دور.
بونونلا حركاتلارين منفى و مثبت تاثيرينى، ادبياتيميزدا و مدنيتيميزده
گؤرمك چوخدا چتين دئييلدير. حسين دوزگون كيمى، تدقيقاتچي، يازيچي و شاعيرين اثرلرينده
همين ائتگينى استثنا ائتمك اولمور. چونكى شاعيرين قلمه آلديغي «باكي لوحه‌لرى» و
سفرنامه كيمى يازييا آلينان «گونشلى وطن يادداشتلاري» نثر اثرى، همين مقصددن ايره‌لى
گلميشدير. دئدييميز كيمى شاعير ائله بير واخت باكييا گئتميشدير كى، او زامان قوش–
قوشلوغو ايله دا بو تايدان، او تايا گئده بيلميردى. اونا گؤره اونون باكي گؤروشلرى
باشقا آنلام و باشقا لذت داشييردى. شاعيرين بو سفرى اونون اوچون ائله ال وئريشلى و
ائله لذتلى اولموشدوركى «گونشلى وطن يادداشتلاري» نثر اثرينى يازماق اونو راضى
سالماياراق، شعر ايله بو سفرين تاثيراتينى اؤز اوخوجوسونا چاتديرماغي مصلحت گؤرموشدور
و «باكي لوحه‌لرى» آدلي اثرين ياييلماسينا آپاريپ، چيخارميشدير.
اونون بو اثرينى اوخو ياركن، ايستر– ايستمز، خيال عالمينه جومورسان و دوشونورسن
و همين دوشونجه‌لر ايچينده دئيرسن: شاعير حسين دوزگون مين جوره، عذاب و اذيت‌لره
قاتلاشاراق، باكيدا اولور. اونو ائليميزين لياقتلي خالقى چوخ گؤزه‌ل قارشيلايير
و گونئى‌دن اولدوغو اوچون داها آرتيق حؤرمت گؤرور. ايش او يئره چاتيركى، شاعيرى
باكيدا دولانديران زامان، اونلارين ماشينلاري، سوروجولوك قايدالاريني پوزور، پليس
فيت چاليب، ماشيني ساخلادير و گؤروركى، بو ماشيندا جنوبدان (گونئى دن) گلن بير شاعيروار.
پليس نه اينكى ماشينى جريمه‌ده ائتمير، بلكه «اؤزوموزده، قانونوموزدا، سيزه قوربان»
دئيه ماشيني اؤتوروب، گئدير. شاعير بونا اوخشار يوزلرجه محبت گؤروب اؤز شعر الهاميني
گوجلنديره‌رك يازميشدير:
سن آچيق اوره‌كله عزيز قارداشيم،
منى قارشيلادين، عشق اولسون سنه!
عشق اولسون ساچاقلي گونشلى يورد!
آزادليغي قوران بؤيوك وطنه.
شاعير باكيدا اولدوغو زامان همده بير چوخ تاريخى مكانلارا گئتميش و بير چوخ
تاريخى آبيده‌لرى زيارت ائتميشدير. شاعير او يئرلرين وصفينى اوجا ذيروه‌لره قالديريب،
سؤز– قوشوب، شعر يازميشدير. اونون باكي آدينا يارانان اثرلرينى اوخوياندا، غرور
حسى ايله ياناشي كدرلنديريجى بير حالدار يارانير. شاعير او زامان باكيني داها آرتيق
گؤزه‌ل گؤرمك ايسته‌ييردى. او باكي متروسونون نظم– انضباتيندان سؤز آچاندا آدام بير
ته‌هر اولور، چونكى اونون گؤردويو متروون گيريش و چيخيش يئرلرينده نظم عوضينه،
ائرمنستانين تجاوزى نتيجه‌سينده اؤز يوردلاريندان قوولان قاچقينلار
الده شئى ساتيرلار. اونون گؤروش ائتديگى فضولى مئيدانيندا داها دوغروسو فضولى هئيكلى
قارشيسيندا قاچقين آنالاريميز ديله‌نيرلر. اونوندا سببى‌نى ائرمنى‌لرين تجاوزكارليغيندا،
اوگون اؤزوموزه قارداش بيليب، بوگون بيزه دوشمن اولان روسلارين عيبه‌جر سياست‌لرينده آختارماق اولار. شاعيرين
«باكي لوحه‌لرى» كيتابيندا فضولى‌نين هئيكلى قارشيسيندا
يازديغي شعرينى اوخوياندا بو فيكيرلر ال وئرير. آنجاق فضولى‌نين سؤزلريندن الهام
آلان شاعير بو شعرينده، «فضولى‌نين هئيكلى اؤنونده» آدلي شعرينده، گؤزه‌ل بير جهته
توخونموشدور، اودا رنگى هئچ واخت سولمايان، باشينا مين بير بلا گلسه‌ده، اؤز
اولدوغونو قورويوب، ساخلايان باكي شهرينين گؤركملى دير. بو گؤركمه ياراشيق وئره‌ن
همين آبيده‌لر و نظامى و فضولى و ... كيمى داهي‌‌لرين لال هئيكل‌لرينده يارانان مينلرجه،
سورغو– سواللاردير.
باغدادانمى يوخسا تبريزدن قالخيب،
بولودلا ياريشير بير بؤلوك
دورنا،
زولال هاواسيندا گؤزه‌ل باكينين،
دالير اونلارمي فضولى بابا؟
شاعير فضولى‌يه حصر ائتديگى شعرينده، مهم بير مسئله‌يه توخونور، اودا فضولى‌نين
بير نئچه ديلده شعر يازماسي آنجاق قدر– قيمتى‌نين بيلينمه‌مه‌‌سى‌دير. اوچ ديلده
مكمل ديوان يارادان شاعير ملا محمد فضولى باره‌ده، «باكي لوحه‌لرى» كيتابي‌نين
مؤلفى اؤز فيكرينى بئله بيلديرميشدير:
فارسادا توركه ده اوز چئويرميش
او،
قدر– قيمتينى كيمسه بيلمه ميش.
«چه كنم! چه كنم!» ناله‌سى
چكميش
زمانه اليندن فرياد ائيله
ميش.
نهايت شاعير دئيير:
تبريزين، باكى نين قيزيل گولونو،
كربلا چؤلونده اكميش توربته.
عربه بخش ائتميش دوستلوق عطرينى،
تورك ده حئيران قالميش بو
طراواته.
«باكي لوحه‌لرى» باشليقلي كيتابين يازاري همين توپلومدا
1360– نجى گونش ايلينده باكى سفرينده، سايسيز، حسابسيز ادبيات خادملرى ايله، گؤروشوب،
دانيشميشدير. آنجاق اونلارين بعضى‌لرينين آديني گتيرمكله كفايت‌لنميش و سئچگين شخصيت‌لرين
بير نئچه‌سينه شعر حصر ائتميشدير، اونلاردان بيرى‌ده اصلى گونئى‌دن اولان، اوتايا (باكييا)
سيغينان مدينه خانم گلگون و اونون عؤمور گون يولداشي بالاش آذر اوغلو دور. شاعير مدينه گلگونه يازديغي شعرينده، مدينه
خانمى مهربان، اوره‌گى يوموشاق بير آناكيمى حساب ائتديگى حالدا، اونون سياسى ياشاييشينا
اؤزه‌ل يئر وئرميشدير:
ايچيمده توفانلار قوپارديبسان
سن،
باشيندان توفانين اسگيك اولماسين.
قوجاغيندا آچان قيزيل لاله‌لر:
قارا قيش گؤرمه‌سين هئچ واخت
سولماسين.
حسين دوزگونون مدينه خانيما يازديغي شعرينى اوخوياركن هر بير دويغولو اوره‌گه
نيسگيل وئرير. چونكى شاعير وصال عشقى ايله ياشاييردى. اونون اوره‌گى تبريز، اردبيل، زنجان، اورميه و ... عشقى ايله چيرپينيردى. آمانسيز حيات مدينه
خانيما آمان وئرمه‌دى، او آيريليق دردينى، هجران نيسگيلينى، اؤزو ايله قبر ائوينه
آپاردي. شاعير بير نئچه ايل ياشاسايدي اودا، حيات يولداشي شاعير بالاش آذر اوغلو ايله بيرليكده ايرانا گليب، ايللر بويو حسرت
قالديغي آنا يوردونو، دولاناردي، نوه– نتيجه‌سينى ايسه باغرينا باسيب، آيريليغا سون
قوياردي. شاعير بير آز دا قالسا ايدى، روس امپراتورونون داغيلديغيني گؤروب، اودا، سئوينه‌ردى.
حسين دوزگونون دقت يئتيرديگى مهاجير شاعيره‌لردن بيرى‌ده اصلى زنگاندان اولان حكيمه خانيم بلورى‌دير. او حكيمه خانيم بلورى
اوچون آزاد شعرينده، اؤزونون، درديندن، نيسگيليندن سؤز آچاراق يازير:
اوره‌گيمه چوخ ده‌ييب اوخ،
بير شاعيرم،
غميم، درديم، كدريم چوخ
سئوينجيم يوخ.
آغير گونلر، آغير ايللر، پيس
آيلاردا دوغولموشام،
صنعتيمين بئشيينده بوغولموشام،
كدر ايله يوغرولموشام.
شاعير باكينين كوله‌يى اوچون يازديغي شعرينده جانلي بير تابلو يارادير. دوزگونون
«باكي كوله‌يى» آدلي شعرينى اوخوياندا ايستر– ايستمز، «باكي كوله‌يى» باره‌ده ديلده
آغيزدا گزه‌ن بير ائل دئييمى يادا دوشور:
«روايته گؤره بيريسى، باشقاسيندان سوروشوركى،
باكيدا نه واخت قيش اولور؟
بو شخص او شخصه جاواب وئريب، دئييركى: نئجه هر يئرده اولدوغو كيمى باكيدا
دا قيش اولور. سونرا سوروشان آدام قاييديب، گولومسه‌يه‌رك دئيير: باكيدا هر زامان
كولك اسنده، دئمك قيش او واخت باشلانير.
بيرده باكي يوللاري آچيلاندان سونرا، ايراندان بير نئچه يازيچي و شاعير
اورايا دعوت اولونموشدور. پروفسور حميد محمدزاده ايله من شهرى دولانيرديق، عين
حالدا حزين يئل اسيردى، باكينين كوله‌يى بيردن– بيره شدّتلندى. قارشيميزا چيخان
بير گنج قادين پروفسور حميد محمدزاده‌يه اوزون توتاراق دئدى: آى قارداش گؤزله كولك
پاپاغيني آپارماسين. پروفسور اونون جاوابيندا دئدى: باكينين كوله‌يين كى، من گؤروره‌م،
پاپاق سهل دير، آدامين شالواريندا آپارار.»
بو دئييم‌لرين عكسينه اولاراق شاعير حسين دوزگون باكينين كوله‌يينده
توفانلى اوره‌ك‌لرى، زرتشتون ايزلرينى، اسكى قوبوستان قايالاريني، نسيمى‌نين، صمد وورغونون سؤزونو مغاماتيميزين اوره‌ك آچان، كؤنول اوخشايان خوش
نوالاريني، بير سؤزله 10 ايلدن سونرا، روس امپراتورونون داغيلماسي ايله تبريز يوللاريني آچلديغيني دينله‌يه‌رك يازير:
دئييرلر آچيلاجاق تبريزين ده
جاده‌سى،
بو سئودالى كوله‌يه وئريلميش
عشق باده‌سى.
باش آياق تانيمادان بيزه
سارى يورويور،
نه زاماندان برى بو كؤنوللره
ديلك دير،
باكينين يئلى كولك، كولكى‌ده
كولك دير،
سينه‌ميزده چيرپينان
بير توفانلي اوره‌ك دير ...
.
«نسيمى! نسيمى!» دئيه‌ن شاعير، بؤيوك عارف شاعيريميز، حروفيه مكتبى‌نين لياقتلي
اوغلو، تورك، فارس، عرب ديللرينده يازيب – يارادان، «من حقم» دئيه، تپه‌دن
ديرناغا كيمى سويولوب، آنجاق، اؤزو تورك اولالي، تورك امرى ايله اؤلن عمادالدين نسيمى‌نين، ياشاييشيندان سوراقلار وئرير:
سيررينى عالمده پنهان ائيله‌ميش،
عالمى هم حق، هم انسان ائيله‌ميش،
آلتي يوز ايل قاباق عصيان
ائيله‌ميش،
نسيمى! نسيمى!
طغيان ائيله ميش.
