قاشقايى لوحه‌لرى
تورك ائللرى، عدالتى سئوه‌ن، حاققين آرخاسيندا هميشه
دوران، زوراكيليق قبول ائتمه‌ين، ايگيد و دؤيوشكن خالقلار اولموشلار.
واختى ايله دونيانين ان گوجلو امپراتورلاريندان اولان، 500 ايله ياخين، شرق
ايله غرب عالمينه حؤكم سورن تورك قهرمانلاري، سارسيلماز و جومرد ايگيدلر
اولارلار، اونلارين اؤنونده دايانيب، قارشي قارشيلا قيلينج چالماق غير ممكن ايدى.
باشقا خالقلار بونا اينانيرديلاركى، تورك‌لره غلبه چالماق اونلاري ايسته‌ييندن،
يوللاريندان دؤنده‌رمه‌يين قارشيسيندا بير يول وار، اودا اونلارين ايچينده نفاق
توخومو اكيب، اونلاري بير– بيرلرينه دوشمن ائتمك دير. دونيانين مختلف قوملارى
اوزون– اوزادى، سياست‌لرين يولونو ايزله‌ييب نهايت اؤز مقصد‌لرينه نايل اولدولار.
گؤره‌سن نئيه بئله اولموشدور؟ اونون بير نئچه سببى واردير اونلاردان بيرى بو
ملّتيق آچيق اوره‌ك‌لى و هاميني اؤزلرى كيمى دوز بيلمه‌لرى‌دير. آمما ان
سارسيديجيسي اودوركى، آغاجي اؤز ايچيندن قورد يئسين، تورك – توركه دوشمن اولسون.
سلطان سليم، چالديران دؤيوشونده، شاه اسماعيل ختايى ايله دؤيوشه چيخيب، ايكى مسلمان توركون،
بير – بيرينين الى ايله قاني تؤكولسون.
امير تيمورون اوغلونون امرى ايله آذربايجان داهي شاعيرى عمادالدين نسيمى‌نين دريسى سويولسون و نهايت شاه عباس صفوى‌نين تضييقى
نتيجه‌سينده قاشقايى ائلى اؤز دوغما يوردلاري آذربايجاندان فارس ولايت‌لرينه سورگون ائديلسين. بو تشبّوث صفوى‌لردن
سونرادا دوام ائده‌رك اينديه كيمين‌ده اولدوغو كيمى قالير. قاجار شاهلاري
آذربايجاندا اولمازين اويونلاريني يولاسالاراق، گولوستان و توركمن‌چاى معاهده‌لرينده اؤز عيبه‌جر عمل‌لرينه نايل اولا
بيلميشلر. نهايت مشروطه حركاتيندا ستارخان قارشيسيندا دايانان اساس عامل‌لر بيزيم
اؤزلريميز ايديك. پهلوى دودمانيندا رضا و اونون قولدور اوغلو محمد رضا‌نين
تورك‌لره قارشي آپارديغي عيبه‌جر سياست‌لرينى كيم‌لر ائتميشدير. همين سايي
اؤزوموزدن اولان كسروى‌لر، يحيى ذوكالار و ايندى‌ده عنايت الله رضالارين، رضا زاده شفق‌لرين مئيدانلاريني سولايان كاوه بيات‌لار، نصرالله پور جوادي‌لرين ساييني سايماقلا قورتارمير. اونا گؤره‌ده قاشقايي ائلى‌نين اوزاقلاردا قالماسي بيزه غريبه گلمير.
«قاشقايى لوحه‌لرى» آدلانان كيتابى آراشديرمادان اؤنجه بو
ائل باره‌ده الده ائتديگيم بيلگى‌لرى عزيز اوخوجوما چاتديرماغي يئرلى گؤروه‌رم.
قاشقايى ائلى، ايران تورك‌لرينين و يا خود اوغوز تورك‌لريندن،
24 قبيله‌لرينين بيرى ديرلر. بعضى عاليم‌لرين فيكيرينجه، قاشقايى، ائلى‌نين ديللرى
توركيه تورك‌لرينين (عثمانلي تورك‌لرينين) ديللرينه ياخين اولدوقلاري اوچون شاه
عباس صفوى اونلاري توركيه سرحدلريندن، فارس ولايت‌لرينه كؤچورمه‌يه مجبور ائتميشدير. گويا
بو ائل 8– نجى عصرده مغوللار روسيه‌دن گئده‌ن زامان، اسلاولار قوزئى‌دن گونئيه دوغرو
آخينديلار و اوردا اولان غربى تورك‌لرينى سيخينتييا قويدولار. اونلار (غربى
توركلر) اؤز اراضى‌لرينى الدن وئريب، آرازين شيمال و جنوب حيصه‌لرينده
مسكونلاشديلار. اونلاردان بير دسته‌سى كريمه و بوگونكو توركيه‌ده سيغينديلار.
قاشقايى‌لر باره‌ده باشقا بير فيكيرده مؤجود دور: گويا شاه عباس پايتختى تبريزدن،
اصفهانا آپارديغي اوچون بو ايش بير سيرا تورك‌لرين خطيرينه ده‌يميش
اونونچون شاه عباسين عليهينه، بير سيرا مبارزه‌يه ال آتميشلار. نهايت شاه اؤلدوره‌نلرى
اؤلدوروب قالانلاري ايسه، فارس ولايت‌لرينه سورگون ائتميشدير. فارس ولايت‌لرينده
اونلارين سايي گئت – گئده چوخالاراق، بؤيوك بير ائله چئوريلميشلر. و اونلار اؤز
يوردلاريني ترك ائتديكلرى اوچون «قاشميشلار» آدي ايله ائل آراسيندا تانينميشلار.
بو فيكيرين عكسينه اولاراق باشقا دوشونجه‌ده قاشقايى‌لر باره‌سينده مؤجود
دور. گويا شاه عباس تورك‌لرى ايرانين باشقا اراضى‌لرينه يايماق اوچون هم پايتختى
تبريزدن اصفهانا آپارميش هم‌ده قاشقايى آدلانان تورك‌لرى فارس ولايت‌لرينده يئرلشديرميشدر.
قاشقايى ائلى باره‌ده بير سيرا معلومات وئرمكدن مقصد
بودوركى، دوقتور دوزگون كيمى بؤيوك تدقيقاتچي و شاعيرين بو اوزاق دوشموش
وطنداشلاريميز باره‌ده دوشونوب، اونلارين آدينا اثر ياراتماسي، شاعير اوچون آرتيق
اهميتلى، آرتيق ماراقلي ايدى.
شاعير «قاشقايى لوحه‌لرى» آدلي اثرينه يازديغي اؤن سؤزده
مهم بير مسئله‌يه توخونموشدور:
«قاشقايى و يا خود قاش قايى سؤزو «قاش» و «قايى» سؤز
بيرلشمه‌لريندن يارانميشلار.»
مؤلف وطن حسرتينده يانيب، ياخيلان قاشقايى ائلى‌نين بير ائل ماهنى‌سيندان نمونه گتيرمه‌يى
آرتيق يئرينه سالميشدير:
قاشقايى‌لر وطن دردلى بير ماهنى دا دئييرلر:
بو يول گئدير تبريزه،
قناتى ريزه – ريزه.
الله بيزه بير يول وئر،
بيز واراق اؤلكه‌ميزه.
«قاشقايى لوحه‌لرى» كيتابيندا ايلك نؤبه‌ده انسانين
نظرينى چكن «سسيم قاشقايى» شعرى دير. بو شعري شاعير قاشقايى ائلى‌نين بير خالق
ماهنيسيدان الهام آلاراق يازميشدير. او بو شعرده، قاشقايى‌لرى، آذربايجانلي‌‌لارين بير حيصه‌سى كيمى گؤرور، اؤز ائلينى، اوباسيني
قاشقايى‌سيز دويمور و نه‌دنسه شاعير بو شعرده قاشقايى‌لردن يارديم ديله‌يير، اونون
اصل سببينى يالنيز شاعير اؤزو بيلير. چونكى تاريخ بويو قاشقايى، آذربايجانلي‌‌لاردان
كمك‌ليك طلب ائتميشلر، آنجاق بو شعرده اصلى تبريزده‌ن اولان شاعير نه‌ايسه قاشقايى‌لره
اؤز يارديم الينى اوزاتميش و دئميشدير:
دومانلي داغلارين آرديندا
قالديم،
داديما يئت فريادرسيم،
قاشقايى!
باشقالاريندان داى محبت
اوممام،
سنين محبتين بسيم، قاشقايى!
دوزگون دئيير: منيم سسيمه سس
وئر،
نفسيم، هوسيم، سسيم قاشقايى!
«قاشقايى لوحه‌لرى» كيتابي‌‌نين يازاري بو اثرده
گؤسترميشدير كي او قاشقايى توركجه‌سينى مكمل شكيلده بيلير. قاشقايى لهجه‌سينده
ايشله‌نن لغت لرى، شعر ديلينده بيان ائتمك بؤيوك اوستادليق و بارجاريق ايسته‌يير.
حالبوكى، شاعير بو شعر توپلوموندا قاشقايى لهجه‌سينده ايشله‌نن لغت‌لرى بؤيوك
مهارتله اؤز اثرينه داخل ائتميشدير:
گونگلوم ايستير آلان منى
قوينونا،
بير آنا تك سؤزلر دئين
بويوما،
ائليم، اوبام، دئيم يووام
قاشقايى،
عطرين آلام، فخر ائله‌يم
سويوما.
بو بير بند شعرده شاعير قاشقايى لهجه‌سينده اولان دؤرد لغت ايشله‌تميشدير.
«آلان» لغتى باره‌ده آرتيرمالي‌‌ييق كى، قديم توركو متن‌لرده گلن يازيلاردان آيدين
اولموشدوركى، فعل، ضميردن آيري صرف اولونور، آلان سؤزونه گلديكده بو سؤز آذرى
توركجه‌سينده آلاسان كيمى آنلام داشيير و مفرد ايكينجى شخصى آنلادير. بو مسئله
اونو گؤستريركى، قاشقايى ائلى تورك‌لرين ان قديم قبيله‌لريندن بيرى اولموشدور.
بيزه بو معناني باشا سالان، حسين دوزگونون شعرلرى اولور.
شاعيرين بو كيتابدا دقت يئتيرديگى مؤضوعلاردان بيرى‌ده، قاشقايى ائلى‌نين وارليغيني قورويوب ساخلايان صنعت‌كارلارين
وصفى دير. شاعير بو كيتابدا بير نئچه صنعتكارين آدينا شعر يازاراق، اونلارين هنر و
صنعت‌لرينه بؤيوك ده‌يرلر وئرميشدير. قاشقايى موسيقيسى‌نى قورويوب، ساخلايان
«فرهاد خان» اوچون يازديغي شعرينده دئيير:
قاشقايى ائلى‌نين صنعت‌كار اوغلو،
چال مضرابين قوى اوره‌گيم
تيتره‌سين.
غريب‌ليگين درينليگيندن
دانيش،
روحوم بئينيم، قوى وارليغيم
اينله‌سين.
شاعير باشقا بير شعرينده قاشقايى‌لرين تانينميش شاعيرى منصور شامحمدينى وصف ائده‌رك، اؤزونون تبريزدن اوزاق دوشوب، تهراندا
ياشاماسينا اشاره ائدير. آنجاق شاعير، بلكه تانيش اولاجاغينيز بو شعرده زامانلارى
ده‌ييشيك سالير. حسين دوزگون دئيير:«بيزده سيزين كيمى غريبليگه باتاريق.»
يعنى گلجه‌كده، حالبوكى، شاعير دئسه ايدى «بيزده سيزين كيمين غريب‌ايك»
ياخشي اولاردي بو شعره بير باخين:
بير گون سن‌سيز اوزاقلاردا
ياتاراگ،
بو دونيانين غم – غصه‌سين
آتاراگ،
بيزده سن تك غريبليگه
باتاراگ،
يئردن قالخيب، وطن – وطن
دئيه‌روك،
غريب‌ليگى، يالقيزليغي اؤيه‌روك.
بلكه ده شاعير بو شعرده اونلارين آديندان اؤزونو غريب حس ائدير؟
ائل شاعيرى منصور شامحمدى اوچون يازيلان شعرده دوقتور دوزگون، هميشه
زواركيليق آلتينا گئتمه‌ين، يابانجي‌‌لارين الينى ايراندان اوزمه‌يه چاليشان
قاشقايى ائلى‌نين قيزيل صحيفه‌لى تاريخينى يادا سالير.
صولت الدوله‌نين رهبرليگى ايله انگليس‌لرين قارشيسيندا دايانان
قاشقايى ايگيدلرينى شاعير اؤز شعرينده بئله ده‌يرلنديرير:
انگليزى حمله ائده‌نده بيزه،
آلتميش مين ايگيدين تؤكدو
دنيزه،
امّا حسرت قالديق نه‌دن
تبريزه؟
ائللرين ايچينده اوجالان
دنا،
حسرت غمى ايله قوجالان دنا.
شاعير بو كيتابيندا، ائليميزين، آغيز ادبياتي‌‌نين ان چوخ ايشله‌نميش و ان
چوخ اوره‌گه ياتان قوللاريندان اولان باياتيلارا گؤزه‌ل اشاره ائتميشدير. او بو
باياتيلاردا باشقا لهجه‌لرده دانيشان تورك‌لره، خصوصى ايله آذربايجانلي‌‌لارا اؤيره‌تمك ايسته‌ميشديركى، قاشقايى ائلى‌نين‌ده، بيزيم كيمى فولكلور، زنگين شفاهى
ادبياتى، اوره‌گه ياتان، كؤنول اوخشايان باياتيلاري واردير:
گؤزه‌ل سوزه‌ر قاشقايى،
گونگلوم اوزه‌ر قاشقايى،
حسرتلى گؤز ياشلاري
شعره دوزه‌ر قاشقايى.
و يا باشقا بير باياتى‌دا قاشقايى‌لرين وحدت و بيرليك‌لرينه گؤزه‌ل صورتده
اشاره ائتميشدير:
داغدان باخار قاشقايى،
جانيم ياخار قاشقايى،
واختى گلسه، ياز چاغي،
سئل تك آخار قاشقايى.
شاعيرين بو كيتابدا دئييله‌سى بير چوخ سؤزو واردير. آنجاق من ايكى مؤضوعايا
اشاره ائديرم. اونلارين بيرى، شاعير تورك‌لرين اينانديغي تك آللاها بئل باغلاييب،
باش اگمه‌يى، قاشقايى ائلينه‌ده مصلحت گؤرور:
غيرتين وئرمه‌سين الدن
ائليزين گنج‌لرى،
ديلينى، تاريخينى دانماسين
هشيار اولسون.
يالنيز آللاها باش اگسين
اوجا توتسون اؤزونو،
ايستيرم كيم اودا «دوزگون»
كيمى بيدار اولسون.
شاعير قاشقايى ائلى‌نين مين بير گؤزه‌ليك‌لريندن سؤز آچديغي
حالدا، باشقا يئرلرده اولدوغو كيمى بو ائللرين آراسيندادا بير نئچه، آنجاق چوخ آز،
لاپ بارماق سايى آدملاردا وار، اؤز ائلينى، اؤز ديلينى آتيب، باشقالارينا قاريشما‌سي‌‌نين
پيسله‌نيلمه‌سى دير. شاعير كيتابي‌‌نين سون حيصه‌لرينده اؤز ديللرينه دؤنوش
چيخانلاري بئله پيسله‌يير:
علم اودوركى، قارالاري
آغاردا،
قويمايا ائل قالا بوروقدا،
داردا،
اؤزون اسكيك سانان گؤروبسن
هاردا؟
ائلين، ديلين كس‌سن بئلى
بوكولر.
دوزگون دئيه‌ر گل توت منيم
قولومدان،
خثير اولمادي نه ساغي، نه
سولومدان،
قاشقايى آيريلماز رسم يولوندان،
ائلين، ديلين كس‌سن، بئلى
بوكولر.
زنگان لوحه‌لرى
آذربايجانين گؤزه‌ل بير گوشه‌لريندن اولان زنگان شهرى، اؤز گؤزه‌لليك، تاريخى آبيده‌لر و سياسى
باخيمدان ايرانين اهميتلى ولايت‌لريندن بيرى دير. بو احتشاملي منطقه تاريخ بويو
بير سيرا حادثه‌لرين و اولايلارين شاهدى اولموشدور. زنگان آذربايجان اوچون اهميتلى اولدوغونا گؤره، دونيا قدرت‌لرى،
خصوصى ايله استثمار عامل‌لرى ايلك نوبه‌ده زنگانى، تبريزدن، اورميه‌دن و اردبيلدن آييريب، آذربايجان آديني گؤتورمكله، اؤز شوم هدف‌لرينه نايل اولا
بيلميشلر. رضاخان ايش اوستونه گلديكدن سونرا زنگاندا و قزوينده فارسلاشديرما سياستى، باشقا شهرلره نسبت گوجلو ايدى. بونون
سببى زنگان، خصوصى ايله قزوينين، مركزه ياخين
اولماسيندان ايره‌لى گلميشدير. تاريخى قايناقلارا گؤره قزوين واختى ايله تورك‌لرين
ياشاديغي منطقه اولموشدور. چونكى قزوين اؤزو تورك سؤزو دور. توركون قيزيل كيتابيندا قزوين باره‌ده
بئله بير معلومات وئريلميشدير:
«آلپ ارتونقانين (افراسيابين) اوغوللاري و قيزلاري وار ايدى. قيزلاريندان
بيرينه قاز (كؤيو) قده‌ر گؤزه‌ل اولدوغو اوچون قاز آديني وئرميشدى. آتاسي اونا
«ايله سؤيو»نا آخان بؤيوك بير چايين كناريندا بير قالا – ساراى ياپديرميشدي. قاز
بورادا اوينار، اؤزه‌ردى. اونون اوچون توركلر بو سويا (قاز سويو) دئييرديلر. داها
سونرا قازين ياشاديغي اوينايا – اوينايا بؤيودويو يئر بؤيوك بير شهر اولدو. بو
شهرده قاز اوينى (قاز اوينو) آدي وئريلدى. (بوگونكو قزوين شهرى). دئمك قزوين سؤزو
تورك سؤزودور. بونونلا استثمارين زنگان، خصوصى ايله قزوين شهرينده
آپارديغي سياست‌لرى باشقا يؤنلرده آختارماق لازيمدير.
شاعير «سنه گلديم» - دئيه تاريخى سلطانيه شهرينه مراجعت ائده‌رك يازير:
علم و هنر مدينه‌سى،
سلطانيه سنه گلديم.
تاريخين اودلو سينه‌سى
سلطانيه سنه گلديم.
«زنگان لوحه‌لرى» آدلي شعر كيتابيندا شاعير گزيب
دولانديغي زنگان ولايتينده هم اؤيونور، هم سئوينير هم‌ده شكايت‌له‌نير،
شاعيرين شكايت ائتمه‌سى اوندان عبارت‌دير كى، وطن ائولادلاري بير – بيرلرينه آرخا
دورماقدان‌سا، هر نه‌دن آرتيق بيرليك و اتفاقلاريني قورويوب ساخلاماقدانسا بير –
بيرلرينه دؤنوش چيخيب، بعضا بير وطن ائولادي باشقا قارداشي‌‌نين محوينه راضى
اولماسي شاعيرى هرنه‌دن آرتيق ناراحات ائدير. آنجاق ائلى‌نين دوغرو و حقيقى
يولوندا اؤزونو و باشقا دوستلاريني «ثابت قدم» حس ائله‌يير:
اوز چئويرمم مقصديمدن دؤنمزم
بو راهدان،
كيم حقيقت ذيروه‌سى‌دير
توتدوغوم راهيم منيم.
من ييخيلمازديم دمادم سن
امين اول دوزگونوم،
حيله ائتدى، دوستجا گلدى،
ييخدى بدخواهيم منيم.
شاعير زنگانا حصر ائتديگى شعر توپلوموندا، بو يوردون تاريخينى
دانانلارا، ائلين، ديلين كولتور و مدنيتين دانانلارا، گؤزه‌ل بير جاواب وئرميشدير.
او تورك ائللرينين شانلي تاريخينى اؤز اوخوجوسونون
يادينا سالاراق، بو يوردون تاريخينى، دونن، بوگون يوخ بلكه يئددى مين ايل بوندان
اؤنجه‌يه باغلاييب و بايات ائلى‌نين بو اراضى‌لرده مسكون‌لاشماسيني، بير تاريخى
فاكت كيمى قئيد ائدير:
كيم دئيير تاريخين يوخدور؟
ذيروه‌سى سن تاريخ لرين.
يئددى مين ايل مكان اولموش،
باياتلارا هر بير يئرين.
شاعيرين بو كيتابدا «شاه خدابنده» آدلي شعرى خصوصى ماراق دوغورور.
بير بو شعرده چوخ سؤزلر اؤيره‌نديك، هم شاه خدابنده‌نين اولو كئچميشينى، هم تورك‌لرين
افتخارى اولان تان يوقوق آدينين چكيلمه‌سى. نئچه عصر بوندان اؤنجه،
توركون ايلكين يازيچيسي، او زامان تورك آديني اوجا ذيروه‌لره قالديرماق ايسته‌يه‌ركن،
ياخشي بيليردى كى، اونون قدير بيلن ائلى، گله‌جك عصرده اونون آديني، خصوصى فخر
ايله چكه‌جكلر و شاعير دوزگون يؤيوك بير شاعير، يازيچي، تدقيقاتچي، اونون آديني،
اورخون آبيده‌لريندن، گؤتوروب زنگان ولايتى‌نين سلطانيه و شاه خدابنده آبيده‌لرى ايله ايلگيلى اولدوغونو، اؤز
چاغداشلارينا بير تاپينتي كيمى تقديم ائده‌جكدير:
تاريخين سونسوز رواقيندا
منيم‌ده بير رواقيم‌وار،
بير اولو «سلطانيه» آدلي،
بؤيوك قصريم،
بؤيوك طاقيم،
اوتاقيم وار،
تان يوقوق‌لاردان گلن،
هئچ سؤنمه‌ين قيزمار
اوجاغيم،
هم سيغينماق چين بوجاغيم
وار.
«شاه خدابنده» شعرينين اؤزونه بير كيتابدان
آرتيق تحليل (آچيقلاما) يازماق لازيمدير، چونكى بو شعرده چوخ بير شخصيت‌لرين، بير
چوخ تاريخى بينالارين آديني چكن شاعير، اؤزو ياخشي بيليردى كى، هانسي شخصيت‌لرين
آديني چكسين، هانسي منطقه‌لرده هانسي آبيده‌لرله، زنگان آبيده‌لرينى ياناشي قئيد ائتسين:
تبريزين ربع رشيدى سين،
مراغه حوزه‌سين،
شام قازان دانشگاهين، اركين
بؤيوك مفكوره‌سين،
قاتدي سلطانيه‌يه، ايرانى
توران ائيله‌دى.
شاعيرين زنگاندا اولدوغو مدتده، بير سيرا گؤروشلرى اونونچون بؤيوك
بير خاطيره‌يه چئوريلميشدير. او چوخدان برى تانيش اولدوغو، قلم دوستو، يازيچي،
تدقيقاتچي محمد رضا كريمى ايله اولدوغو مدتده زنگان گؤروشلرى، اونون اوچون ال وئريشلى اولموشدور.
حسين دوزگون زنگانين اولو كئچميشينه باخاركن، محمد رضا كريمى‌نين اورادا ياشاديغيندان اؤيونور و بو يوردون شرفينه بير
داها شعر يازماغي، اؤزو اوچون وظيفه سانير و بو يوردا بير داها ساغ اول دئيير كى،
بؤيوك شخصيت‌لرى، خصوصى ايله كريمى كيمين باجاريقلي بير يازيچي‌يا اؤز قوينوندا
يئر وئريبدير:
يوردومدا قويمادي ياد بيرجه
داشي،
يارادير اليندن اوره‌گيم
باشي،
سوسمارام، دوشمنه ياغييا
قارشي،
هر زامان سؤيله‌يير: قوجام،
جوانيم:
اولو زنگانيم!
اينديه كيمى دفعه‌لرله اؤلكه‌ميزين (ايرانين) راديو – تلويزيون تشكيلاتى
تورك ديلينه قارشي قوردوغو سرت و عينادكارليق سياستى،
بير چوخ تورك ديللى يازيچي و شاعيرين اعتراضى ايله اوزله‌شميشدير.
ايللر بويو مطبوعاتدا غيرتلى آذربايجان يازارلاري بو پيس سياستى دفعه‌لرله پيسله‌ميش،
دفعه‌لرله بو مسئله‌يه سون قويولماسيني طلب ائتميشلر، حالبوكى شاه رژيميندن قالان
رژيسورلار، آپاراجي‌‌لار بو اعتراضى قولاق آردينا ووروب، اونلارين حق سس‌لرينى
ائشيتمك بئله ايسته‌مه‌ميشلر. شاعير حسين دوزگون ده بير چوخ شاعير و يازيچي‌لار
سيراسينا دفعه‌لرله، ايرانين راديو – تلويزيون تشكيلاتيندان اؤز - نثر و شعر اثرى
ايله انتقاد ائتميشدير. شاعير زنگاندا اولان زامان بو شهرين راديو - تلويزيون آپاريجي‌لارينين
غلط و هئچ بير قايدا و علمى قورولوشلارا اساسلانمايان تورك ديلينده يازيلاريني
گؤروب، يامان داريخميشدير. او بير شعرده آپاريجيني گوناهكار بيلير. حالبوكى،
اونلارا امر وئره‌نلر وار ملت‌لرين آراسيندا آجي‌‌ليق‌سالان شوُنيست‌لر وارديركى،
هله‌ده اؤز عيبه‌جر عمل‌لريندن ال چكميرلر. هر حالدا، شاعير حسين دوزگونون زنگان راديو - تلويزيون اداره‌سينه ائتديگى شكايت، چوخ
يئرلى دير:
قارداشيم راديونو ائلين
دينله‌يير،
پوزما ائلين ديلين، قان بير
آز بارى!
منى، سايا گلمه‌سنده، گلمه
هئچ،
اؤز ننه‌وى آدام سان بير آز
بارى.
***
دانيشديغين بو ديل هئچ يئرده
يوخدور،
قايداسيز قانونسوز كليمه‌ن
چوخدور.
سؤزون ائل قلبينه زهه‌ر‌لى
اوخدور،
ائلين‌ده حالينا يان بير آز
بارى.
شاعيرين «زنگان لوحه‌لرى» باشليقلي اثرى بير چوخ باخيمدان
مركب بير اثردير. اوندا غزل‌وار، قوشما‌وار، سربست شعر و داها چوخ تنقيد واردير.
اونون تنقيدى شعرلرى ايچريسينده «ياريمچيليق نؤكر» آدلي بير شعرى وارديركى، اوندان
بير نئچه بند گتيرمكله، بو كيتاب باره‌ده دانيشماغا سون قويورام. او اؤز ديليندن قاباق
باشقا ديللرده دانيشاني بئله قينايير:
ياددان اجنبى‌دن نه‌يين
اسكيك دير؟
وارليغين وار، اينان، گوجون
وار اينان.
داللاريني سالما كؤكونو
قازما،
اؤزگه بالتاسينا ساپ اولما
دايان.
***
فارسجا دانيشاندا اؤز اوشاغينلا،
فارسى‌دا، توركوده ايگره‌نديريرسن.
اينجى‌تك ديلينى اونوتما
قانماز!
شالپام – شالپام بئله نه‌دير
دئييرسن؟
آناما هديه
اسلام پيغمبرى حضرت محمد (ص)- ين بئله بير بويوروغو واردير: «جنت آنالارين
آياغي آلتيندادير» بو سؤزون اوجوندان ياپيشيب، بير چوخ داهي‌‌لرين بؤيوك- بؤيوك
شخصيت‌لرين آنالار باره‌ده، سؤزلرينى ائشيده‌ركن، آنالارين مقدس‌ليگينه بير داها
باش اگيريك. دونيادا هامي آنالاري اوجا ذيروه‌لره قالديريب، بو الهى موجود باره‌سينده
شعرلر قوشولوب، كيتابلار يازيليب، سايسيز- حساب‌سيز فيلم‌لر اكرانا چيخميشدير.
تصادفى دئييلديركى، امير تيمور كيمى بير حؤكمدار آنا قارشيسيندا باش اگميشدير.
روايته گؤره آنانين اوغولو امير تيمورا اسير دوشور. آنا حؤكمدارين كاروانى هارا
گئديب، اونونلا سورونوب امير تيمورون چاديرينا، ياخينلاشماق همن، قوللوقچولار،
اونو قووب هده‌له‌يير‌ميشلر. آنا هر جوره سيخينتيا دؤزه‌رك، اؤز ايسته‌ييندن ال
گؤتوره بيلمير. نهايت بو مسئله اون آى مدتينده دوام ائدير. بير نفر
قوللوقچولاردان بو مسئله‌نى امير تيمورا چاتديرير. تيمور امر ائدير، آناني
گتيريرلر، اميرين اطرافينداكيلار بتر ناراحات اولورلار، اونلارا ائله گليركى، امير
تيمور بو آروادي اؤلدوره‌جكدير. آنجاق ايش ترسينه اولور. امير تيمور آناني، گؤرمك
همين، باش اگيب، اوغلونو ايسه آزاد ائدير. شاعير بولود قاراچورلو سهند بو تاريخى مسئله‌نى، اؤزونون بير بند شعرينده
بئله دوغروتموشدور:
ازلدن- ازلدن بو ائل بو
اوبا،
آناليغا درين حؤرمت بسله‌ميش.
آنا قارشيسيندا توپال
تيموردا،
آياق دالي قويموش، باغيش
ديله‌ميش.
دوغرودان هر يئرده خصوصى ايله تورك ائللى خالقلاردا آنايا حؤرمت سونسوز درجه‌ده
منيمسه‌نير. تصادفى دئييلديركى، «آتا- آنا انسانين كيچيك تانريسي‌دير» دئيه‌ن بير
ائلين بوتون صنعت‌كار‌لار، يازيچي و شاعيرلرى آنا آدينا اثر ياراتماقدان
دويمورلار. هئچ بير آذربايجان شاعيرى تاپا بيلمزسن كى، آنا وصفيندن دويسون.
شاعير حسين دوزگون‌ده باشقا شعر كيتابلاريندا آناسيني دؤنه- دؤنه وصف ائتسه‌ده،
بير كيتاب اؤز آناسينا هديه ائتمكله، اؤز اوولادليق بورجونون مينده بيرينى اؤده‌يه
بيلميشدير. او آناما هديه آدلي كيتابيندا ايلك نوبه‌ده آنالاريميزين پاك اوره‌ك‌لريندن،
تميز قلب‌لى ايمانلاريندان سؤز آچير:
آنا زيارتدن نه‌دن
دويمورسان؟
بير آى اؤنجه گئتدين سن
خوراسانا.
غريب امام رضا دئيه
چاغيردين،
نيسگيلين ياغديردين
آذربايجانا.
دوقتور حسين دوزگون بوگون يوزجلده ياخين كيتاب يازيب، حاضيرلاسادا، علمى
تاپينتي‌لاريني، اؤز دوغما يوردو آذربايجاندان و آناسيندان قازانديقدا گؤرور. آناسي‌‌نين
لايلالاريندان ناغيل‌لاريندان الهام آلان شاعير، «منيم آنام» شعرينده، تكجه اؤز
آناسينا اشاره ائتمير، بلكه بوتون آذربايجان خالقي‌نين آنالاريني اؤز آناسي حساب ائده‌رك
يازير:
آذربايجان ائللرينين
آناسي دير، منيم آنام.
قلبدن قوپان شعرلريمين،
آيناسي دير، منيم آنام.
شاعير بعضا قديم‌لرده كند و شهر لرده، كورسو باشيندا آنالارين خوش
سؤزلرينى، ناغيل، باياتيلاريني، اؤيود وئريجى كلاميني يادا سالير:
بوى آتديقجا افتخارلا،
بويوماسن بوى بويلادين.
منه جوراب توخوياندا،
كورسوده باغرينا باسيب،
عزيزليك‌له سوى سويلادين،
بئله‌ليكله بويا چاتديم.
شاعير آنا قدرينى ايلك باشدان دويوردو. او 1347 - نجى ايلى قلمه آلديغي بير
شعرينده، ياراديجيليق دونياسينا آياق قوياراق هر نه‌يينى آناسينا بورجلو بيلير. او
بو شعرى يازان ايللرده شاهين قارا تورمه‌سينده اؤز ائلينه عدالتى ايسته‌ديگى اوچون
آغير گونلر كئچيريردى. او خوش گونلرينده ده، پيس گونلرينده ده، دوستاقدادا اؤزونو
آنا نوازشيندن آنا محبتيندن آيري گؤرمه‌يه‌‌رك، ياراديجيليق دونياسيني آناسينا
عايد اولدوغونو بيلديرير:
آنام شعريم، بس دئمه‌لى،
سنينكى‌دير، سنينكى‌دير.
آنا منيم سؤز دؤولتيم،
سنينكى‌دير، سنينكى‌دير.
اوره‌گيمين سيزى‌لارى،
سنينكى‌دير، سنينكى‌دير.
نهايت شاعير دوزگون‌ده شهريار كيمى قرآن اوخوماغي اؤز ننه‌سيندن، آناسيندان اؤيرنميشدير،
نئجه كى بير شعرينده يازير:
قرآنى- پيرانى آنام وار
منيم،
قرآن اوخوماغي اؤيرتميش منه.
حققه باش اگمه‌يى دوزگون
حياتى،
سايغي بسله‌مه‌گى گؤزه‌ل
وطنه.
تبريز – 1379.
