قارانليقا ايشيق او اوره‌ك گوزگون،

حقيقته آيدين بير يول گؤسترير.

عمان‌سان علمينده آي استاد دوزگون،

او بارلي علميندن هر يئتن‌ ده‌رير.

شعرين ايشيق ساچير قارانليقلارا،

ائل گئدن يوللاردا بير چراغ تكين.

هر كسي چاتديرير اؤز مكانينا،

دئيير اوره‌كلرده محبت اكين.

هر بير مصراعلارين داغلاردان آغير،

شيمشكلر ياغميرلار توفانلار بيلير.

سحريلي قلمين اعجازلار ياغير،

غواص تك عمقينه جومانلار بيلير.

بوتون آذربايجان افتخاريسان،

دونيا احسن دئيير، ائل احسن دئيير.

شمسين نسيمينين يادگاريسان،

اوره‌ك احسن دئيير، ديل احسن دئيير.

تاريخ بويو قالاجاقسان ديري‌سن،

نسيل- نسيل خلقيميزين ديلينده.

شعريّتين اوجاقيسان، پيري سن،

فخر ائله‌يير ائولادين‌ دا ائلينده.

هر بيتين دريادير، هر سطرين دنيز،

اؤزون او دريادا ماهر اوزگوچو.

كلمه‌ن دنيزلرين دالقالاريدي،

خلقيوين يولوندا سؤزون گوزگوچو.

گون تكين ياييلان دونيايا آدي،

عاجزم وصفينده نه يازيم استاد.

«گولدورلو ولي»نين قلم استادي،