محمد باقر باقري (اركين)
دكتر صديق ساغدي هنوز قاليري،
او تبريزه هله ايشيق ساليري.
كتاب اوسته گينه كتاب قاليري،
او باسواد
بير كيشيدير، بير عارف،
يازير شهره
دايرة‌المعارف.
دئديم اونا:«ـ استاد اؤزووو يورما،
چوخ ايشله‌ييب جانيوا صدمه وورما.»
دئدي:«ـ بابا قوي گئت، بئله چيغيرما!
بو فيكري سن
اؤزون منه وئريبسن،
ايندي گليب
مني حذر ائليريسن؟
كؤمك ائله بو ايشيمي قوتاريم،
بو بارلي مزرعه‌ني من سوواريم.
بو يولدا اول منيم كؤمه‌گيم ياريم،
ائيله‌مه‌سن
كؤمك بو قارداشيوا،
گنا‌هيني
ساللام من اؤز باشيوا.»
دئديم كي:«ـ ياز دورما سنه عشق اولا،
عرفان شرابيله پياله‌ن دولا،
نييه گره‌ك سنين كيمي گول سولا.
اللي ايلليك دوسلوغوموز وار
اولسون،
كيتابلارين گول اولسون
گولزار اولسون.
دائرة المعارفي ياز صديق،
اي كتابا عاشيق! كتاب باز صديق!
قازيلماميش خزينه‌ني قاز صديق،
بير گون
گؤروم نورون عالم‌تاب اولسون،
دايرة المعارفين
چاپ اولسون.
سنين عمرون گؤروم استاد يوز اولسون،
قوي بودا بير مثل اولسون سؤز اولسون،
هر تبريزلي «دوزگون» كيمي دوز اولسون.
صداقتين
نثار ائتسين تبريزه،
گول چيچك
دسته‌سيله گلسين بيزه.
ديريليگينده من قدريني بيلديم،
زمانه‌نين توزون اوزوندن سيلديم،
گؤي گؤزونه باخديم سئوينديم گولدوم.
سنه بخش
ائده‌رم هر نه واريمي،
اليمدن
وئرمه‌رم سن تك ياريمي.
بير آدين دوزگوندور بيري صديقدير،
بوتون تبريزليلر سنه رفيقدير،
«اركين» سنه رفيقدن ده شفيقدير.
سنين بيرجه
اشاره‌نله قاچارام،
قاپيلاري
قاباغيوا آچارام.»
