عبدالعلي مجازي (آسلان)
اي ائلين آرزوسو، ديله‌گي، سؤزو!
اي ياتان خالقيمين، او آييق گؤزو!
اي شن مجليسلرين، دادي، هم دوزو،
اي گؤزه‌ل انسانيم، اونوتمام سني!
اي باهارين ـ يازين گولو، بولبولو،
فعله‌نين كندلي‌نين بوغدا، سونبولو،
اي تامام يوللاري انقلاب يولو،
ايگيد قهرمانيم، اونوتمام سني!
اي وطن اوغروندا چاليشان اوغول،
اي اوره‌كدن يانا، آليشان اوغول،
اي وقارلي آتا، عالي‌شأ‌ن اوغول،
عزيز مهربانيم، اونوتمام سني!
اي ائلين شوكتين اوجالدان اوستاد،
اي اؤزون بو يولدا قوجالدان اوستاد،
فايدالانان، آن دان- ماجالدان اوستاد،
خوجام،
قوجامانيم، اونوتمام سني!
اي اومودسوزلاري وجده يئتيره‌ن،
اي «دوزگون» دانيشان دوز يولا گيره‌ن،
اي «آسلان»ي داغدان شهره گتيره‌ن،
اي ديليم، ديلمانيم، اونوتمام سني!
