تاريخين سۏنسوز رواقېندا منيم ده بير رواقېم وار

بير اولو «سلطانيه» [1] آدلې

بؤيۆك قصريم‌‌‌،

بؤيۆك طاقېم

اۏتاقېم وار‌‌‌.

«تان يوقوق» [2] لاردان گلن‌‌‌، هئچ سؤنميه‌ن قېزمار اۏجاغېم  

هم سېغېنماق چين بوجاغېم وار‌‌‌.

من‌‌‌، محمد ^(ص) نسلي‌يم

انسان اۆچۆن عزت وئره‌ن مسلك 

عطْرلي قۏينوم، قوجاغېم وار‌‌‌.

من ايشېق بخش ائتميشم دۆنيالارا‌‌‌.

تاريخين هر بير واراغېندا ايزيم قالمېش‌‌‌.

دوهام تاريخي جانلاتمېش‌‌‌،

نبوغوم دۆنيانې سارمېش‌‌‌.

من گۆنشدن دۏغموشام

الده چيراغېم وار‌‌‌.

اوجا داغلار باشېندا سؤنمه‌ين پارلاق ماياغېم وار‌‌‌.

 - 2 -

يئددي مسجيد‌‌‌، «شام قازان» تك تيكدي سلطانيه ده

شاه خدابنده‌‌‌، بورادا چۏخلو احسان ائيله‌دي.

حلّي اول علامه‌ني‌‌‌، يۆزلر بؤيۆك عاليم ايله

دعوت ائتدي شهره‌‌‌،

دانشگاه سلطانيه بنيان ائيله‌دي‌‌‌.

هم نظام الدين مراغي [3]

هم محمد آملي [4]

خواجه‌ي اعظم‌‌‌، رشيد الديني گئتدي‌‌‌،

شهر سلطانيه قوردو‌‌‌،

دؤرد بوجاغېن

اهل علمه باغ رضوان ائيله‌دي.

باخ‌‌‌، بو دانشگاه ايچينده

حلّي‌‌‌، «منهاج الكرامه» يازدې [5]

«نهج الحق»ي ديوان ائيله‌دي.

شيعه‌‌‌، حلّي چين بيرينجي دفعه

بوردا «آية الله» سؤيله‌دي‌‌‌.

اۏغلو «ايضاح الفوائد» يازدې

«تحصيل النّجات»‌‌‌،

«منبع الاسرار»ي انشاء قيلدې‌‌‌. [6]

بوردا‌‌‌، عزّ الدېن زنجاني گليب «تصريف» يازدې [7]

قوشچو اۏغلو سۏنرالار‌‌‌.

حق يۏلون خلقه نمايان ائيله‌دي.

ميثلي يۏخموش دۆنيادا‌‌‌، اۏل عصرده بو حوزه‌نين‌‌‌.

خواجه اولجايتو‌‌‌، دمادم‌‌‌،

يۆز مدّرس‌‌‌، يۆز مؤذن‌‌‌، يۆز معلّم

اۏردا مهمان ائيله‌دي.

بير نئچه دار الضّيافه‌‌‌، بير نئچه دار السّياده‌‌‌، بير نئچه دار الشّفاء

هم ده دارُ التّربية،

قوردو اخلاص ايله‌‌‌،

قانماز فارسي لقمان ائيله‌دي.

شاه قازاندان سۏنرا دۆنيادا نه توفان ائيله‌دي.

عزتي‌‌‌، اخلاصي‌‌‌، اقبالي‌‌‌، صفاني

قصريچۆن، دؤرد اركان ائيله‌دي.

«عقلي‌‌‌، بير غواص درياي كمال علم تك

جوهر ذاتېنا حيران ائيله‌دي.»

تبريزين ربع رشيدي‌‌سين‌‌‌، مراغه حوزه‌‌سين

شام قازان دانشگاهېن‌‌‌، اركين بؤيۆك مفكوره‌‌سين‌‌‌،

قاتدې سلطانيه‌يه‌‌‌، ايراني  توران ائيله‌دي‌‌‌.

اۏلدو ايران‌‌‌، علم اۏجاغې‌‌‌،

اۏلدو تاريخين بوجاغې

اؤلكه‌ده باشدان باشا تۆركانه فرمان ائيله‌دي‌‌‌.

ياندې ايچدن آغلايان مظلوملارا

مظلومو خندان ائيله‌دي‌‌‌.

ياسا يازدې ائل اۆچۆن‌‌‌،

قانون چېخارتدې ملّته

يوردو تابان ائيله‌دي.

شاه خدابنده باغېشلانمېش دلاور حرّتك

حق درگاهېندا اؤز جانېنې قوربان ائيله‌دي.

- 3 -

قوردو اردولاردا «كرباسيه»‌لر [8]

كؤچ ائديردي مدرسه‌‌‌،

ايللر بۏيونجا ائل ايله

چېخدې كرباسيه‌لردن چۏخلو عاليملر اۏگۆن

حلّي‌نين شاگيردي عزّ الدين آبي

اۏنون «كشف الرّموز» و ياكه شمس الدين‌‌‌، شهيد اۏل شيعه

اۏنون «ارشاد الاذهان»ي

ياكه جرجاني

اۏنون «تجريد»ي‌‌‌، باللّهي دانېلمازدېر‌‌‌.

نه يازسام من سنه آزدېر

خدابنده‌‌‌، خدابنده ‌‌‌...

- 4 -

تاريخي انكار ائده‌نلر باشېما يۆزلر بلالر گتديلر

خوليالار ايچره سۆرۆكلركن‌‌‌،

منيم اولاديمې غفلتده يۏخلاتدې

قادالر گئتديلر‌‌‌.

«كوروش» اويدوردو‌‌‌، بورادا تۆركۆ داندې

«آريا»‌لر گئتديلر. [9]‌‌‌

اؤز دۏنون‌‌‌، خلقه‌‌‌، چېخارت گير اؤزگه دۏنلارا دئييب‌‌‌،

چۏخلو مۏدالار گئتديلر‌‌‌.

منّت‌لريمه منتهالار گئتديلر‌‌‌.

كور عجم‌‌‌، باخ‌‌‌،

يېخدي سروي يئرلره يۆزلر ارن‌‌‌، يۆزلر ايڲيد‌‌‌، يۆزلر اري‌‌‌.

بو بلاني اؤزگه‌لر يۏخ‌‌‌، باشېما چۏخ آشينالر گتديلر‌‌‌.

ياتمادې تورپاقدا لاكين ارلريم

مۆلكه‌‌‌، انوار ايلاهي‌دن ضياءلر گتديلر‌‌‌.

ايرانا چۏخ اصفيالار گتديلر

شاه خدابنده‌‌‌، او حرّي

چون حدوث كبريالار گتديلر‌‌‌.

باخ دني خصمه‌‌‌، اۏنو انكار ائديب

اسلام آدېنا داندېلار تاريخيمي

ديلده چۏخلو ناسزالر گزديريب‌‌‌، چۏخ ناروالر گتديلر‌‌‌.

باشېما يۆزلر بلالار آچدې

مينلر ماجرالر گتديلر‌‌‌.