خيالېمېن قوشو قاناد آچاراق،
يئنه اوچماق ايستير سرحدن قېراق.
گئده دۏغما قارداش كركۆك ائلينه،
خلق شاعيرلريندن آلا بير سۏراق.
ديله‌ييرم سرين بير نسيم اسه،
سلاميمي سرپه «صلاح نورسه».
«محمد عزته»، «عثمان مظلوما»،
شانلې باياتلاردا گؤرسه هركسه.
اليمده قلميم وار، اۏراقېم وار،
كركۆكۆ گزمڲه اشتياقېم وار.
من كي قارداشېمې اونودمامېشام،
كؤنۆل تېنجېقدېران بير فراقېم وار.
وطنيمه منيم باغلېدېر كؤكۆم،
بيليرم ياماندېر، آغېردېر يۆكۆم.
كودتالار ايچره نئجه بۏغولور،
آزادلېق حسرتلي منيم كركۆكۆم.
وطندن وطنه گله بيلميرم،
بير لحظه اۏلسادا گۆله بيلميرم.
شاهنشاه خلقيمي زالوتك سۏرور،
آنالار گؤزۆنۆ سيله بيلميرم.
قان آخېب بورادا داغدان دره‌دن،
شهيدلر مزاري آشېبدېر حددن.
بس منيم حالېما كيم يانسېن قارداش،
وطنيمده‌يم من وطنسيزم من.
دوتمازمي بير قارداش قارداش، سۏراغېن؟
قورتارمازمې قورت‌لار اليندن جانېن؟
هئچ بيليرسن نه‌لر گليب باشېنا،
بو مبارز ايڲيد آذربايجانېن؟
سيزه بسله‌ميشم درين محبت،
بودا بير وئرگيدير، وئريب طبيعت.
اۆچ زادا باغلېدېر اصيل صنعتكار،
خلق، وطن سئوگيسي، بيرده صداقت.
قارداشېم كؤنلۆنه خلقين گل آخاق،
گلجه‌ڲه درين ايناملا باخاق.
پولاد بيلك‌لرله قېوېلجېملاردان،
خرمن- خرمن آتش تؤره‌‌سين، چاخاق.
اۆميدين قۏروياق آج يالاواجېن،
آرزو ديله‌ڲينه قالاق محتاجېن.
قارداشېم گل منيم توت قۏللارېمدان،
بدنيمده واردېر ايزي قېرباجېن.
منيم اۆره‌ڲيمده قېزدېر اليوي،
اڲلنجه ائيلمه گؤزه‌ل ديليوي.
دئميرم سن باشقا ائللري سئومه،
آنجاق كي پرستش ائت اؤز ائليوي.
اۆره‌ڲيمده منيم اۏدلار سؤنمه‌ميش،
خلقدن باشقاسېنا هئچ دؤيونمه‌ميش.
شاعير قارداشلارېم بيليرلر بونو،
اصيل بير صنعتكار خلقدن دؤنمه‌ميش.
قارتال تك گؤيلرده سۆزه بيلميرم،
شعير اينجي‌لرين دۆزه بيلميرم.
بيلميرسن‌سه قارداش، آگاه اۏل گيلن،
اؤز آنا ديلميده يازا بيلميرم.
قفسه سالېبلار منيم تك شئري،
من قيرا بيلميرم، تكجه، زنجيري.
قۏرخورام اۏ زمان هايلاياسان كي،
قارداشېن اۏلمايا داها داي ديري.
قولاغېوې شاخلا منه آجومرد!
بوراسېندادېركي بير ده بؤيۆك درد.
پۏلاد قۏللارېما اۏدلو زنجيري،
سالمامېشدېر آنجاق يالنېز بو نامرد.
من اؤزۆم چئوره‌مه قفس سالمېشام،
اسكي خوليالارا آ واه! دالمېشام.
يادلارېن وئرديڲي كۆچۆك قۏلچاقلا،
عجبا گؤر نئجه مشغول اۏلموشام.
قانمامېشام عصرين واقعيتين،
آنمامېشام سيررين من طبيعتين.
يئني عصره اويغون مفكوره‌لردن،
قاچمېشېق، قاچېردېب ائل محبتين.
سارپېلېب وجودلار خوليا ايچينده،
عقليميز گئديبدير بير- بير بيچينده.
بيلميشيك صنعتكار اؤزمۆزۆ، ليك،
شعري گزميشيك بير قېزېن ساچېندا.
خيال ائيله‌ميشيك هر نه وار بيزده،
بيلمه‌ميشيك نه‌لر گئچير تبريزده.
قارداش بيز اسيريك، بير سؤز يۏخ، آنجاق،
اسارت سيرريميز اؤز ايچيميزده.
آرادان قالدېراق گل بو نؤقصاني،
دويوبان آنلاياق يئني زماني.
مبارزليك ايله اؤزۆمۆز هئچ كي،
قورتاراق بندلردن بۆتۆن دۆنياني.
خلقيميز قارنې آج، اڲني چېلپاقدېر،
منليڲي ساتېلمېش يالېن آياقدېر.
عجبا قلمي صنعتكارلارېن،
نييه بس آتشدن، قاندان ايراقدېر؟
عزيز قارداشلارېم قاپې باغلېدېر،
مني قېنامايېن سينه‌م داغلېدېر.
دئديڲيم بو كلمه افسانه دڲيل،
گله‌جك گۆنلرين شيرين ناغلېدېر.
خلقي راحات نئچه ايڲيد ياشادار،
يالان اۏلمالې كي اؤڲود ياشادار.
دۆنيادا بير گئرچك وارسا، بودوركي،
انساني بير ايش، بير اميد ياشادار.
من اونودمامېشام اسارتيمي،
دڲيشمه‌ميشم اؤز طبيعتيمي.
گؤردۆڲون اۏ جۏشغون ديللي آصلانام،
بوراخماياجاغام حقيقتيمي.
ايندي‌ده بيز دايم جمه گليريك،
آنجاق قورتولوشا نقشه چكيريك.
كؤك آغاجې قارداش امپرياليزمين،
بيليرسنمي پوكدور، چۏخداكي چۆرۆك.
ازلدن اۏلموشدون سن منيله يار،
دادېما يئتيش كي اۏلدوم گيرفتار.
اؤزۆن كي بيليرسن، اي دۏغما كركۆك!
منيمده يۆكسلميش بير تاريخيم وار.
يابانجې باخمايېر شانېما منيم،
قارا ايزلر سالېر قانېما منيم.
بيليرسن آي قارداش! قفسده نئجه،
ايلانلار بوراخېر جانېما منيم.
بورادا بۏيلانمېش اۏغوزلار بۏيو،
دده قورقود بوردا سۏيلامېش سۏيو.
بيليرسن اؤزۆن كي قوجا تبريزين،
نه گلميش باشېنا تاريخلر بۏيو.
بوردا بولانېق سو آخان دڲيلدير،
كيمسه بير جومردي يېخان دڲيلدير.
بيليرسن اؤزۆن كي آذربايجانلې،
كرپيچ آراسېندان چېخان دڲيلدير.
انسانلار بير- بيره ازلدن ياردېر،
منه ده، سنه ده بو دۆنيا داردېر.
بيليرسن كي منيم وورغونوم،
رضام،
مشفقم،
راحيميم، صائبيم
واردېر.
هچ بيليرسن‌ده كي ايندي بو زمان،
منيم احوالېم چۏخ ياماندېر يامان؟
حبيب ساهيرلريم،
جوشغونلارېم چين،
يالقېزلېق اؤلكه‌‌سي اۏلموشدور مكان؟
وطنيمي منيم قوردلار آلېبلار،
قېزېلجا گۆللريم بير- بير سۏلوبلار.
آذر اۏغلولاريم،
مدينه‌لريم،
آيرېلېق دۆشگۆنۆ ايندي اۏلوبلار.
دۆزگۆنم، آي دوستلار! دۆشمۆشم اوزاق،
يۏخدور سيزدن باشقا منه بير داياق.
استقبال نغمه‌‌سين قالدېر گؤيلره،
كركۆكلۆ كركۆكه گله‌جك قۏناق.
كيچيك
شعرلر - ص 44 - 22 مرداد 1347 - تبريز .
