منيم اسكي آشنام، دۏغما قارداشېم،
منيم مرحمتلي عؤمۆر سېرداشېم.
كئچميشم شيمشكدن فېرتېنالاردان،
چۏخ بلالار گؤرۆب بلالي باشېم.
اسكي‌دن منيمدير بو يورد، بو چيمن،
جانېمدېر شانېمدېر بوشانلې وطن.
مني ياخشې دينله، كركۆك بۆلبۆلۆ!
سني اۏخشايېرام توفان ايچيندن.
سنين سؤزلريني من ايزله‌ييرديم،
آذربايجانېمدا
يۏل گؤزله‌ييرديم.
بؤيۆك داياق ايدي منه غرورون،
گؤرمۆردۆنمۆ يادي چۏخ ديزله‌ييرديم!
شعريمدن قانلې بير دفتر ديزميشديم،
گؤيده گؤيرچينين قانېن سيزميشديم.
كركۆكلۆ محمد صادق آدېنې،
آنا ورقينده اۏنون يازمېشدېم.
ايستي تموز آيې قارا بير گۆنۆ،
بولوتلا توتولدو گۆنشين اؤنۆ.
دئديلر كي: كؤچدۆ محمد صادق،
گئرييه بوراخدې سئوديكلريني.
تبريزيمده
ارگيم قارا باغلادې،
ياش تؤكۆبن هاوار- هاوار آغلادې.
اوچغون ذروه‌لري قانلا ايسلاندي،
آمان! ايواه! نئجه اۆره‌ك داغلادې!
دئييرديم كركۆكه گلرم قۏناق،
بير- بيريميز اۆچۆن اۏلارېق داياق.
سنينله گؤرۆشۆب شنليك ائده‌رم،
نه كي باغلايارام بير قارا باشاق.
دئييرديم گلرسن سنده بير بيزه،
عزيزليكله چېخيب مجليسيميزه.
بيزه نغمه‌لرله اۆره‌ك اۏلارسان،
اۏ جۏشغون ديلينله گلرسن سؤزه.
بيرليكده دوتاريق مجليسده دمي،
قۏجامان - مجرّب بير آتا كيمي.
اؤيره‌درسن بيزه مبارزليڲي،
وئره‌رسن اليمه ايتي قلمي.
آچېب صحيفه‌سين ابديّتين،
قاندېرارسان بيزه ائل محبتين.
بو ظاليم ياد ائللي اشغالچي‌لارا،
گؤستره‌ريك خلقين شانېن قدرتين.
كؤنلۆمدور كؤنلۆنۆن قارداش سېرداشې،
دوتاجاق آبيدن بوردا هر داشې.
آخي شانلې خلقين بيليرسن كيمدير؟
منيم ملّتيمين دۏغما قارداشې.
ازلدن خلقيوه حؤرمتيم واردېر،
وطنيمده منيم شُهرتيم واردېر.
اشغالچې يادلارا نفرتيم واردېر،
يئنيلمز مبارز قدرتيم واردېر.
بودور اؤز خلقيمه سؤز وئره‌جڲم،
نغمه‌يله يوردووا بير گله‌جڲم.
اينام بسله‌ميشم چۏخ دينلميشم،
شن بير گله‌جڲم، من گله‌جڲم!
گله‌جك، گله‌جك! آ صادق! اينان،
بو بير حقيقتدير، نه لازم يالان؟
آنالار دئييب‌لر، من اينانېرام،
اؤله‌جكدير اؤلن، گؤره‌جك قالان.
آما سن اؤلمزسن، ياشارسان هر آن،
خلقيوين كؤنلۆنده قالارسان اينان.
«هجري دده» كيمي «فضولي» تكي،
چكيله‌جك آدېن سنين هر زامان.
خلقيوه، ديليوه سن عاشيق ايدين،
اوجا ذروه‌لره تام لايېق ايدين.
اينجيدين، دردچكدين، يالقېرجا قالدېن،
«فصل ائديلدين، چۆنكۆ سن صادق ايدين».
دۏغرودور، آي «جۏشغون دويغو» لو آتام!
فصل اۏلور بورادا صادقلار تامام.
لاكين سۏن قۏياجاق بونا اولوسلار،
بو سؤزه وارېمدېر دريندن اينام.
صادقلار داها فصل ائديلميه‌جك،
ائللر قدرتي ظۆلمۆ اڲه‌‌‌جك.
سنين اولادلارېن گونه چېخاجاق،
آذربايجانلې‌دا
خوش گۆن گؤره‌جك.
قازمېشام كؤنلۆمده سنين قبريني،
سيلميشم غميني، تام كدريني.
گؤرمۆشم غرورلو - شرفلي ائلين،
قۏيمايېر قالسېن بۏش اصلا يئريني.
ساواشا حاضېرلېر بيرليكده اؤزۆن،
بيزيم تك يادلارا چاخاراق گؤزۆن.
منليڲين ساتمايېر بير قارا پولا،
اؤز آناديلينده سؤيله‌يير سؤزۆن.
يئنه گلدي ديله آه نه گؤزه‌ل سؤز،
«آنا، آنا!» ، قوربان سنه ايكي گؤز.
بوراخماياجاغام سني هئچ زامان،
دۆزگۆنم، ايلقارېم دۏغرو، سؤزۆم دۆز...
كيچيك
شعرلر - ص 40 - 1967 نجي ايلده يازيلمش
(1346 ش.).
