كۆلك قالخيب دولاشيردي چووغونلو بير هاوادا،
هۆندۆر داغلار ياتميش، باشقا يوخ ايدي هئچ سس - صدا.
قارا گئجه آپارميشدي آخيشلاري يوخويا،
شاختا امكان بوراخميردي جاناوارلار اولويا.
كند آشاغي درين بير چاي آغير - آغير آخيردي،
آغ گئييملي بير تك آغاج، اوزاقلارا باخيردي.
اودقون - داشغين سئل سولاري سيخيلميشدي شاختادان،
دره‌لرده تۆلكۆ بگميش، تپه‌لرده قار- بوران.
دليكلري، چالالاري شپه دوتوب باسيردي
هارداسا بير آلچاق آخيش، بئله زورا سوسوردو.
دار بير جيغير بوروش - بوروش باسيليردي قارلارا،
آت - اولاقلار آچان ردلر، اؤرتۆلۆردۆ آستاجا.
بو جيغيرا قانلي - قانلي لۆت آياقلار قويولوب،
قالين - قالين دابانلاردان قات - قات دري سويولوب
بو جيغيردا مينلر انسان، چاتيلارلا سۆرۆنۆب،
پارا - پارا چوللاري‌‌دا قيزيل قانا بۆرۆنۆب.
بو جيغيردا مينلر گلين آتلار اۆسته قاچيليب،
سحر - آخشام دورغون گۆنش مينلر ائشه ساچيليب.
ساعاتدا بير مينلر قادين داش اۆستۆنده اوتوروب،
بالالارين بئللريندن آچيب، سۆددن دويوروب.
بو جيغيردا خانلار - بگلر احتراملا آتلانيب
يانلاريندان اؤتن كيمسه اؤنلرينده قاتلانيب.
بو جيغيردا يالقيزلاري جاناوارلار بۆرۆيۆب
دوتوب بوغوب، لئشلريني ياماجلاردان سۆرۆيۆب.
بو جيغيردان گه‌وه‌نچيلر اوباشداندن اؤتۆبلر،
ارباب اؤترۆ داغ – داشلارا، بئعار ايشه گئديبلر.
مينلر آنا اۆره‌كلري داغلانيبلار بورادا.
مينلر ايگيد بو جيغيردا باغلانيبدير آتلارا
اكينچيلر يورغون – يورغون آخشام بوردان كچيبلر،
شاهلار بوردا ييغوا قوروب قيزيل شراب ايچيبلر.
دار بير جيغير بوروش - بوروش باسيليردي قارلارا،
آت اولاقلار آچان ردلر اؤرتۆلۆردۆ آستاجا.
كۆلك قالخيب دولاشيردي چووغونلو بير هاوادا،
هۆندۆر داغلار ياتيب باشقا يوخ ايدي هئچ سس - صدا.
ظلمت ايچره زورلانيردي آمانسيز بير چووغون – قار،
آنجاق چن‌لر آراسيندا سئچيليردي داخمالار.
ويييلدييا ايز ساليردي گاهدان سسي ايتلرين،
كۆلك هردن شپه‌لري ياتيرديردي ان قلين.
گئجه اؤتمۆش ياريسيندان، يوخلاميشدي طبيعت،
بۆرۆمۆشدۆ كندين ايچين قويروقلو بير چن - ظلمت.
ياتيشميشدي چؤلده دۆشن هر داغ، آخيش، هر قايا،
حتا كۆلك يورولموشدو، ايسته‌ييردي يوخلايا.
«جناب سروان» ساراييندان لاكن ايشيق ساچيردي،
ساراي دؤره قارانليغي - دومانلاري بيچيردي.
ساراي ايچي سانكي اصلا چؤلدن يوخموش خبري،
قالماميشدير اوردا هئچ بير قوجا قيشين اثري.
اويناييردي آغ ديواردا سوزماني‌نين كؤلگه‌سي،
سۆرۆنوردۆ ايستي‌ليكله تارين اينجه خوش سسي.
قاوزانيردي، يئنيليردي، تيتره‌ييردي زخمه‌لر،
باجاريقلي أللريله، آچيليردي پرده‌لر،
پنجره‌نين پرده‌سيسه، گؤستريردي بونلاري،
آخيشيردي اونون اۆسته رقصلرين ده بسياري.
فرماندهين دولغون گؤزۆ بو رقصلره باخيردي.
او جنابين دؤوره‌سيني، بۆرۆمۆشدۆ قادينلار،
كيميسي لۆت، كيمي پالتار ايچره، سانكي نوبهار.
كيمي اونون باشين آليب اينجه بودو اۆستۆنه،
كيميسيده گۆلاب تؤكۆر آياغينين پوستونه.
كيمي آچيب سينه‌سيني، چيچك سريب اۆزۆنه،
كيميسيده خمار گؤزۆن تيكيب اونون گؤزۆنه.
كيمي قيزيل ياناغي ايله اوخشاييردي شنليگي.
«بابا كرم» هاواسيله اويناييردي بيريسي،
ان آشاغي اوخويوردو كيميسي.
بيرده قالخدي آلني اۆسته فرماندهين گؤزلري،
تئز سارسيتدي قادينلاري باخيشينين كؤزلري.
چكيلديلر بير بوجاغا اينجه بدن قادينلار،
سوسدو هرزاد حتا كؤلگه، حتا شراب، حتا تار.
بۆتۆن ساراي انتظارلا او جنابا تيكدي گؤز،
كيمسه‌ده يوخ هئچ سس - سمير، كؤنۆللرده سوسدو سؤز.
نئچه لحظه آغير سكوت باسدي تمام سارايي،
بوردا چؤكدۆ ايچرييه چؤلۆن سس – كۆيۆ هايي،
بورولاراق ويييلدادي كۆلك بير آن ائشيكده،
سرخوشلاردا آنلاديلار قيش دوروبدور كئشيكده.
انتظارا سون وئريلدي، سؤزه گلدي او شئيطان
هامي قيرپدي قولاقلارين هره ائتدي بير گۆمان.
كيمي دئدي:
- واي آللاه اي، من چاشديممي هارادا؟
كيم دۆشۆندۆ:
- گؤره‌سن كي كيم اؤله‌جك آرادا؟
آللاه نه‌دير بو حالتين، بو غضبين سببي؟
او باغيردي:
- كجاس گلناز؟
و تيتره‌دي نفسي.
سكوت ايچره فيرلانيبان قاييديردي گۆر سسي،
بير آن كئچدي، سس - سمير يوخ، بيرده دئدي:
- آ مُراد!
سارايدا سس، چؤلده كۆلك، قوپارتديلار داد - بئداد.
يئنه ده يوخ جواب وئره‌ن، او باغيردي:
- ها! گُم شين!
و قادينلار داغيم - داغيم باسدي چؤله بير - بيرين.
بير لحظه‌ده ساراي دولو باسيم - باسيم انساندان،
قالمادي هئچ نه بير اثر، نه ده بير ايز، نه نشان.
چؤكمۆش ايدي قيزيل شراب گؤزلرينين ايچينه،
قالخميش ايدي گۆر بير هوس اۆره‌گينين ديبينه.
خوليالارين عالمينده چيخميش ايدي اؤزۆندن،
دولغون غضب چاخماقدايدي بوش سارايدا گؤزۆندن.
گاهدان يئرده قالان تارين سيملريني بوروردو،
گاهدانسادا اودقونوردو، نفس - نفس ووروردو.
آغ ديوارا بيردن چؤكدۆ جانلي قارا بير كؤلگه،
آچيق قاپي بير تيتره‌دي جناب سروان اؤنۆنده.
بودور، موراد ايچريده اووا - اووا گؤزلرين،
گؤرن كيمي فرماندهي ايتيرميشدي سؤزلرين.
- بله قربان!
دئيه! دوردو سؤيۆد كيمي قيراقدا،
اۆره‌گينده دؤنه-دؤنه چاغيريردي:
- بيسميللاه!
فرماندهين دولغون گؤزۆ چاخدي بيردن مورادا،
ايسته‌دي كي قالخيب جوما ياغديرا مين بير قادا.
لاكن لبين چئينيه‌رك:
- بگو بينم چي شد اين؟
دئيه، دوردو، چيرپيناراق دالي وئردي نفسين.
- يا آللاه هي!
دئيه موراد بئله آچدي اؤز سسين:
- بله قربان درخدمتم!
و تيتره‌دي قيچلاري.
- كجاس گلناز پدرسوخته!
او قوپارتدي هاواري.
فرمانده اؤز نظريندن كئچيريردي گۆلنازي.
سانكي بيرده آغاج آرا باسديلار بير پاوازي،
او باغيردي:
- پاشو، گم شو، دختره رو بيار اينجا؟
آياق اۆسته قالخدي بيرده تعظيمينه اگيلدي،
- چشم قربان!
دئيه - دئيه قاباغيندا بۆزۆلدۆ،
دۆشۆنه‌رك موراد چيخدي دالي - دالي سارايدان،
سيزيلدادي چؤلده كۆلك، دولاشاراق بو زمان.
- داها گئتمك!
دئيه موراد، اؤزۆن سالدي باييرا،
ياتيشميشدي تمام دۆنيا، يوخ ايدي هئچ سس – سمير،
آنجاق كۆلك اولموش ايدي طبيعتده بير اسير.
ياخاسيني قالديراراق موراد دئدي:
- بيسميللاه!
لاكن شاختا سانماييردي نه خان، نه شاه، نه آللاه!
ساللانيردي بوز قنديلي بوغلاريندان مورادين،
يۆكسلديردي گئده - گئده شاختا، كۆلك بئدادين.
جۆر به جۆره مفكوره‌لر كئچيرتديسه بير آندا،
- گره‌ك گئتمك خان بويورور،
دئيه دوردو بيرياندا.
شاختا مجال وئرمه‌ييردي هئچ بير فيكره دورماغا،
ناچار موراد:
- گره‌ك گئده‌م اوشاقلاري ييغماغا،
دئيه جومدو چؤله، بيردن آياق قويدو قاچماغا.
بودور، ايندي گئتمك سارايدان گره‌ك،
گۆلناز داخماسيندا نه واردير گؤره‌ك.
سارايين آلتيندان بير قات آشاغي.
سريليبدير قارا خانليغين باغي.
قار - چووغون هاوادان شدّتله تؤكۆر،
قوجا آغاجلاري آغليغا بۆكۆر.
باخچادان اوتايا آلچاق داخمالار،
گئيينيب آخ باشاق، توتقولاييب قار.
نه سس وار نه صدا، ظلمتدير آنجاق،
گۆنشدن سحردن يوخدور هئچ سوراق.
قار تؤكۆر آمانسيز، سانمايير هئچ نه،
چؤكۆر قارا دومان دۆزه چيمنه.
آنجاق گاهدان گاها ايتلرين سسي،
قالخاركن دينله‌يير آزان هر كسي.
داها بوردا يوخدور خانليقدان خبر،
گؤرۆنمۆر بورادا سارايدان اثر.
داخمالار قوينوندا اوجا بير گونبد،
سانجيليب قارلارا دوروبدور برت - برت.
بير امامزادانين نشانيدير بو،
آچيقدير رعيته قوجاغي، قوينو.
دردلي‌لر گئجه‌لر بورادا قالير،
صيدق ايله ياپيشيب مطلبين آلير،
مظلوملار بورايا پناه گتيرير،
جيگرلر داغيدان مين آه گتيرير.
قادينلار نذيرين بورايا وئرير،
سؤزلۆلر سؤزلرين بورايا دئيير.
بۆتۆن قه‌هرليلر گليب آغلايير،
اۆميدسيز كيمسه‌لر اۆميد باغلايير،
خان ايسه بورايا آند - ماند ايچير،
رعيتين بوينونو سۆنبۆل تك بيچير.
بورانين خددامي موللا بيلالدير،
اونوندور بورادا هرنه كي واردير.
تاريخيندن آنجاق بيلال آگاهدير،
باشقا كيمسه بيلمك بؤيۆك گناهدير.
گونبدي گئجه‌نين باغريني بيچير،
توپا – توپا قاري، چووغونو ايچير.
كۆلكدن - شاختادان كئچيب چراغي،
قار ايله آغاريب ياشيل باشاغي.
داخمالار بورويوب دؤرد - دؤره‌سيني،
چن باسيب گيزله‌يير شن ذروه‌سيني.
اوزاقدان باخاندا، سانكي بير آنا،
بالالارين ييغيب اويان – بويانا.
بودور آز اويانا، ايتلر اولايير،
بوروشلاردا كۆلك سسين دولايير.
ظۆلمتده دايوخدور باشقا سس، آنجاق،
هو! وورورساندا، هو! ائشيدير قولاق،
ياتيب يئر، ياتيب گؤي، ياتيب طبيعت،
بورويوبدور كندي آغير بير ظۆلمت.
آنجاق قار نه‌دنسه ياتيشماق بيلمير،
قارا اۆره‌گينين پاسيني سيلمير.
فاغيرا - يوخسولا قان ياش ايچيردير،
جانلارا مين كسگين قيلينج كئچيردير.
قورخورسا، اۆلكۆرسه جناب سرواندان،
قصاصيني آلير خسته جانلاردان.
قالانير، قالانير، سانمايير هئچ نه،
كيم بيلير نه اولا؟ بوغازدير گئجه.
كيم بيلير اوچوردا هانكي داخماني،
كيم بيلير آغلادا هانكي انساني؟
كيم بيلير باتيرا هانكي اولدوزو،
كيم بيلير قارالدا هانكي گۆندۆزۆ؟
كيم بيلير آغاردا هانكي ساچلاري،
كيم بيلير قارالدا هانكي ياخاني.
كيم بيلير قوجالدا هانكي قوچلاري؟
كيم بيلير جيرديرا هانكي چوخاني؟
قارلي بير گئجه‌دير، اۆره‌گي ظۆلمت،
يارادير مشقت، يارادير ذلت.
ياتيب يئر، ياتيب گؤي، ياتيب طبيعت،
بورويوبدور كندي آغير بير ظۆلمت.
بير آزجا اويانليق ايتلر اولايير،
بوروشلاردا كۆلك سسي دولايير.
ويييلتي ساليري دار تنگه‌لره،
دايانميب، چيرپينير هاوادا - يئرده.
بودور، ديب تنگه‌ده جانسيز بير ايشيق،
دئمك اوردا واردير بير نئچه آييق.
بو ظۆلمت ايچينده اوياق وار دئمك،
فرماندهدن باشقا كيمسه‌دير گؤره‌ك.
فدايي «مختار»ين آروادي گۆلناز،
گئجه‌نين قوينوندا ائيله‌يير نياز:
باغلار سيلكيندي باردان،
دۆشمن كام آلدي ياردان.
نولا بير خوش گۆن گله،
بيزده قورتاراق داردان.
اودلان فلك، يان فلك،
قلبين اولسون قان فلك،
كيمينه درد وئريبسن،
كيمينه درمان فلك.
اۆچ گۆنۆن ايچينده باسيلدي تبريز،
انسانليقدان داها قالماميشدير ايز.
بيرچوخ فدايي‌ني داردان آسميشلار،
امام‌زاده‌ايادا قدم باسميشلار.
گلميشدي بورايا جناب سروان،
كندستان اهلينه دئييردي قان! قان!
فدايي مختاري گۆلـلله‌ميشدير،
- آروادي بيزيمدير!
كنده دئميشدير.
آرخ ديبينده آغ گئيينميش گؤيۆمتۆل بير سرو آغاجي،
قارا قيشا هئچ باخمادان يۆكسلميشدي باشدا تاجي.
اۆره‌گينده قورخو، موراد يؤنه‌ليردي اونا ساري،
آزاد سروين اؤنۆنده او، اوخويوردو آراز باري:
آرخ ديبينده بويلانان سرو،
عؤمۆر سۆرمه غرور ايله.
رخصت يوخدور كيمسه بوردا،
بير ياشاسين سرور ايله.
سن تكي هر گؤزه‌ل مخلوق،
قوربانليقدير بير هوسه.
بير هوسدن اؤترۆ بوردا،
سون وئريلير مين نفسه.
شادليق بوردا حرام اولار،
چيچكلنن هر باهارا.
بوردا بۆلبۆل سينه‌سينه
وورورلار مين آجي يارا.
ايسته سنسه آسوده‌ليك،
قاتلان ديزه آرتيق قالخما.
گؤزه‌لليك قوي نابود اولسون،
اۆفۆقلره بايغين باخما.
مايدانلاري، كه‌هرلرين، بوزلانميشدي ياللاري،
كۆلك گؤيده اويناديردي كيم سيز - يالقيز آغ قاري.
قوش باشيلار دومانليقدا رقص ائديردي قالخيبان،
آخ تۆكلر تك سريليردي قارلار اۆسته تازادان.
چيگنينه بير «بئرنو» آتميش چاتما قاشلي جوان گۆلناز،
آغ آتينا مينميش ايدي.
سۆرۆتلۆردۆ فرماندهين نعشيني قار اۆستۆنده،
دنه - دنه بوز دونموشدو صوراتي‌نين پوسنده.
ظۆلمتين اۆره‌گين دئشيردي بئرنو،
قيزيل بير سحردن وئريردي خبر.
سؤكۆلۆر دان يئري، آچيردي سحر.
سئوگي دۆنياسيندا محبت جوشسا،
دايانانماز قارشي نه سروان، نه خان!
گؤستريب هر زمان بو حقيقتي،
دورو گۆزگۆسۆنده قوجامان زامان.
اوچغون داخما – ص 9 - قيش 1346- خنيه كندي.
