قوزو اوتلور گؤي ياماجدا،

قارانقوش اوخور آغاجدا،

قيز، چؤره‌گي ياپير ساجدا،

يار قاييدير اوتاي يالدان،

آيريليري قيز ملالدان.

گؤي پري‌سي بولود ساغير،

ياغيش ياغير آغير – آغير،

منيمده ائليمي چاغير،

دوراق سلاملي سمايا،

ناماز دۀ اولدوزا آيا.

داغ دره‌ده چاي بورولدو،

هر ياندا سويو دورولدو،

ائل گلدي ائولر قورولدو،

بيرجه منيم ائليم قالدي،

گلمه‌دي گۆنۆم قارالدي.

گورولدورو جوشغون سئللر،

قيژيلديري ايتي يئللر،

گئدين دئيين كؤچۆن ائللر،

قيش گلدي غملر اوجالدي،

داغلار آغاجلار قوجالدي؟

گۆنش ساچير، هاوا سازدير،

چشمه باشي قوشدور قازدير،

يامان گۆنۆن عؤمرۆ آزدير،

يامانليق بير ماتاه ساتماز،

ياخشيليغي كيمسه آتماز.

اويناييري دۆزده جيران،

قاوزانيري يالدا داوشان،

دايانمايير نازلي مهمان.

گؤرۆنمه‌ميش تئز ساووشور،

هجرينده كؤنلۆم قاووشور.

آداخلي قيز خوش آوازلي،

قاش موغانلي گؤز شيرازلي،

خومار - خومار، نازلي - نازلي،

اوغرايير بولاغا ساري،

يال تپه‌ده دوروب ياري.

ياز گۆنشي قار اريتدي،

قوجاليغين آغاج سيلكدي،

بايرام گلدي، بوز آي بيتدي،

سنين بايرامين نه كاسدي،

باختي‌مين آيناسي تاسدي.

گۆنش سحر مۆلك آلاندا،

لاله‌لر تندير سالاندا،

بومباردوماندا، تالاندا،

قول آديله آلدي دۆشمن،

هيجقيرتييا سالدي دۆشمن.

ملعون قاري هاوارلادي،

لاپ قاپيدا دادارلادي،

برك بئليني دونقارلادي،

ايكي گؤزۆنۆ بره‌لتدي،

بو حالا مني او گتدي.

بايرام واختي موغان يوردو،

موغان يوردو، جانان يوردو،

سن كي يوخسان فغان يوردو،

دۆشمن بيزي درده سالدي،

شادليغيميزي او آلدي.

كؤنۆل دؤزمۆر آيريليغا،

فلك نئچين ائدير جفا؟

هاچان بيتر بو ماجرا،

كؤنلۆمۆ هيجران داغ ائتدي،

وار-يوخومو غم داغيتدي.

بوز آي بيتدي شاختا آشدي،

كول ديبيندن داوشان قاشدي،

كؤچ زاماني ياخينلاشدي،

آي قالاسي باخ اوتايا

سلام وئرائله اوبايا.

آي قالاسي داشلي داشلي

گۆنش ساچير ساشلي ساشلي

ايگي گؤزۆم قاليب ياشلي

ائللر ياريما يار اولسون،

يارين يولو هامار اولسون!

آي قالاسي! ائللريوه،

تئز ساوولان يئللريوه.

داش آشيران سئللريوه،

سؤيله منيم احواليمي،

دئينه بو غملي حاليمي.

گۆنش ساچاغين آتيبدي،

ائللر هامي‌سي چاتيبدي،

يار ائلي هاردا ياتيبدي،

آي قالاسي! يارحالين وئر،

باخ اوتايا احوالين وئر.

چايلارين چشمه‌ن آخاندا،

گۆنش داغلاردان باخاندا.

خيش - آلاتلاري تاخاندا،

ائل ساوولار قاتار – قاتار،

يار، ياريني بوردا تاپار.

آي قالاسي ظولوم قالدي،

نئچۆن جفاكار اوجالدي؟

ياريمي كيم قيراق سالدي؟

گؤزۆم حله يولوندادير،

ساغيندادير، سولوندادير.

آي قالاسي! صفا بسلر،

انسانلاري وفا بسلر،

فلك نئچۆن جفا بسلر؟

قارقينميشا وفا اؤيره‌ت،

وفا، وفا، وفا اؤيره‌ت!

بولود بوز آيدا جالانار،

سو گؤي بوز اۆسته قالانار،

دالغالاري چالخالانار،

دليك آچار سۆزه‌ر آلتا،

خيردا بوزو دۆزه‌ر آلتا.

يورد گؤسته‌رن دوران زمان،

آلاچيغي قوران زمان،

ديره‌ك يئره ووران زمان،

بير قوش اولوب من اوچايديم،

تئز سنه ساري قاچايديم.

ائل يۆكۆ كؤچده قالانار،

دوه‌ده تاي ييرغالانار،

قيزين سهنگي جالانار،

اوغلان آوجون آچار ايچر،

كؤنلۆنۆن غميني بيچر.

اوزالداندا گؤي قورشاغي،

قار باساندا باخچا – باغي،

چن دوتاندا تپه داغي،

باخ دوتغون قارالتيلارا،

دئييرلر ائللر اورادا.

آي قالاسي داغ تره‌سي،

جنگل كندي‌نين دره‌سي،

آي نه ياماند‌ير بره‌سي،

يول تاپ گئديم جنگله من،

نبي‌ني تاپيم او كنددن.

ياز گۆنلري نظام- نظام،

ائللر سنه يوللار سلام،

اللرينده‌ده دولو جام،

ياللارين دؤشۆن سولانار،

دؤوره‌وي چايلار دولانار.

آي قالاسي! يازدا بيتدي،

گلمه‌دي يار، گويا ايتدي،

دئييرلر بير ديبلي گئتدي،

بيرده دا گلمز بورايا،

بئلنچيك محنت سرايا.

آي قالاسي! سؤيله يارا،

گؤزه‌ل كهليك باتدي قارا،

ساغالسايدي هر بير يارا،

ديل ياراسي هئچ ساغالماز،

بير آن بئله راحات قالماز.

شاخدي گؤيده‌كي قونودلار،

گؤيه‌ردي جوشدو بولودلار،

سئل - سولارا دۆشدۆ قوردلار،

شاققيلداسين قوي سئللرين،

چيگنيوه دۆشسون تئللرين.

سنده بيتر گۆل ياسمن،

باغيشلارام جان سنه من،

جان نه‌دي؟ هر بيرزاد سن- سن،

آي قالاسي صفا يوردو،

صفا يوردو، خدا يوردو.

قيز بئچه‌ني كيشليه‌نده،

نهراني گۆن ديشليه‌نده،

دگيرماني ايشليه‌نده،

باخ اوتايا سلام گؤنده‌ر،

نيسگيل دولو پيام گؤنده‌ر.

آي قالاسي! چشمه‌ن آخسين،

ديوارلارين هايلا شاخسين،

گؤزه‌للرين سنه باخسين،

سنه هامي حيران اولسون،

سندن كئچن جيران اولسون.

آي قالاسي! چيخ سمايا،

دردلريمي سؤيله آيا،

كؤنلۆمه اول محكم پايا،

درد - غملر يوخسا ييخدي،

قارا گۆنلر اونو سيخدي.

آي قالاسي! جان پاراسي،

گؤزۆمۆن آغي قاراسي،

كور اوغلونون گهواراسي،

دۆشمه قيراق اؤز جانيندان،

شانلي آذربايجانيندان.

نوجه‌دهه يا ناهرانا،

تازاكنده، گوراوانا،

ناها، انديزه، هريانا،

سن ليجيملي گؤزه‌تچي اول،

اونلارا وئر بير آچيق يول.

آي قالاسي! آزاد اولسون،

قددي بويو شمشاد اولسون،

بوتاي كندلر آباد اولسون،

بوردادا مكتب آچيلسين،

كيتابلارا گۆن ساچيلسين.

آي قالاسي! وئر نفسين،

سسلندير ائللر جرسين،

آت دئنه، دۆنيا هوسين،

انسان گره‌ك پاك ياشايا،

دئولر يئتيرمز هارايا.

آي قالاسي! نار بيتيرسين،

دؤرد بيرياني بار گتيرسين،

قيش داغيلسين، ياز يئتيرسين،

راحات بوردا قوي يوخلاييم،

قاراوولوم سن اول داييم.

آي قالاسي! سرين اولسون،

چشمه‌لري درين اولسون،

صفا عاشيقلرين اولسون،

عشق اودونا اۆره‌ك يانسين،

هر بير كؤنۆل دردي قانسين.

آي قالاسي! گؤيلر شاهي،

عاشيقلرين قبله‌گاهي،

ائللريميزين كۆلاهي،

سن ياشا دۆنيا بويونجا،

كؤنلۆمه اود وور دويونجا.

چاتدي باشا روزگاريم،

آل بو اۆره‌ك يادگاريم،

اولسا منيم اختياريم،

گؤيلرين باشين اگرم،

سجده‌وه ساللام  گئده‌رم.

ساغليغينان قال، خوش ياشا،

باش آپار اولدوزا آيا،

گئتمه‌لي اولدوم قيراغا،

گؤرنمه‌سم آتما مني،

من كي اونودمارام سني.

اوچغون داخما – ص74 -  ياي 1343 - تبريز .