گيريش
گۆنش قيزمار، هاوا دورغون، نفس يوخ،
كۆچه‌لر بۆسبۆتۆن ازدحامسيز بوش.
آرا – سيرا نئچه قورو هئيكللر،
سيز ايله بيز ايله ائده‌جك ووروش!
بودور، 53 – دور، بؤيۆك توپلانيش،
دئييرلر:«داعواميز داوام ائده‌جك!»
بير ييغين انسانين آرزيلاريندا،
چيچكله‌نير، گۆلۆر بؤيۆك گله‌جك.1
شه‌هري بۆرۆيۆر جانلي ازدحام،
دورغون هاواسينا دومانلار چؤكۆر.
انسانلار وحشيجه تاپداق اولونور،
نيزه اژداهانين سينه‌سين سؤكۆر!2
قارانليق دۆنيانين قارا حاكيمي،
حكومت باغيشلير سويغونچولارا.
«مليك محمد»يم چشمه ديبينده،
بير كؤهۆل دۆزه‌لديب گيزله‌نير اوردا.3
آختاريش باشلايير، گزينتي اولور،
تاپيرلار آخيردا قهرمانيمي.
بيچيلير قلبيمين شاه دامارلاري،
مدت بوز ائديرلر ايستي قانيمي.
بير ديبليك ياتماسين گره‌ك كي قلبيم،
گؤر نئچه ايل كئچير، گؤر نئچه مدت.
انسان اوغلو قالخسين، ايناملا دورسون،
گؤرمه‌سين بير تورپاق بونجا اذيت.
گل سنه دانيشيم 68 – دن،
ناكام اؤلۆمۆندن قهرمانيمين.4
اون بئش باهار سونرا، سون باهاريمدان،
داوام ائتمه‌سيندن زمستانيمين.
گۆن اورتا چاغيدير، اود تؤكۆر هاوا،
ساكيتجه اودلانير يئرينده تهران.
سانكي بير اژداها باتيب يوخويا،
جهنمدير، آسفالت چكير الامان.
قارا بوغدايي بير آذربايجانلي،
بير آغاج آلتيندا چؤكره‌ك يئره.
قولتوغوندا كيتاب، گؤزۆنده عينك،
دالير نئچه لحظه چيلغين شه‌هره.
بير اوزون كئچميشين وارثي‌دير او،
اوخوموش «واقيف»ي5 آنا ديلينده.
«عاشيق علسگر»ي،6 «فضولي»7 ني ده،
دينله‌ميش بيربه‌بير سازين تئلينده.
بير ائلين بؤلۆنمز ذروه‌سيدير او،
سوواريلير كؤكۆ چوخ اوزاقلاردان.
تانير اؤز دده‌سي «دده‌قورقود»و،8
منليگي محكمدير اوجا داغلاردان.
دوغمادير ائللره، شيريندير آدي،
تبريزين وورغونو:«صمد بهرنگي».
بؤيۆك «نسيمي»9نين، «بابك»10ين اوغلو،
دۆشمنين اؤنۆنده سارالماز رنگي.
- آمانا گلديم په! جهنم شه‌هر!
دوشونو بهرنگي:«- آي آذربايجان!
نه‌سرين صفالي يايلاقلارين‌وار،
صمدين اؤز جاني يوردونا قوربان!
بئجرديم، بوي آتديم دوغما قوينوندا،
مين ايلليك وارليغا ماليك وطنيم.
هر كسين آناسي شيريندير اونا،
دۆنيا – عالم بيلير آنامسان منيم.
قورو كئچميشلره فخر ائده‌نلره،
عصيرلر استقلال سن آلمادينمي؟
بۆتۆن ياخين شرقه، بۆتۆن جنوبا،
آزادليق بئشيگي سن اولمادينمي؟
ان قديم مدني آبيده‌ن سنين،
زرتشتۆن كيتابي كيملرينديرمي؟
«كور اوغلو»ن، «كرم»ين، «ستارخان»لارين،
سونرا «فريدون»ون، ايكي‌مي بيرمي؟11»
سور اوغوللاريندان:- هانسي بير ملعون،
دۆشمن اؤنۆندن قاچ دئميش يا اگيل؟
«قربانيم، قربانيم، سر و چشم ما!»
بير آجي تله‌مي كلك‌مي دگيل؟
يانديم قاپيتاليزم جهنمينده،
مصري قيلينجلي ائليوه قوربان.
جهنّمي محو، ائت، اي هۆرمۆزد يوردو!
60- لاريوا،12 5 – گۆلۆنه13
قوربان.»
صمد دۆشۆنه‌ركن قالخير آياغا،
يئنه‌ده يولونا داوام ائيله‌يير.
آسفالت ائله تيترير، سانكي اۆستۆنده،
بير دريا، بير دنيز، بير عمّان گئدير.
كؤرپۆلر آلتيندا ياتان لطيف‌لر،14
«ياخشي يول، ياخشي يول، اوغورلار!» دئيير.
تبريزين قهرمان ايگيد اوغلونا،
هر آدديم آغاجلار سلام سؤيله‌يير.
عظمتلي هۆندۆر عمارتلرين،
يئنيلمز ووقارلا كئچير اؤنۆندن.
كيچيك بالاجالار بوينو چيگنينده،
گؤره‌نده، يئرينده دايانير بيردن.
معصوم باخيشيندان «احمد حسن»ين،15
توتولور كده‌رلي بير آتا كيمي.
«ختايي»16 هزملي سيبيللرينه،
داملايير گؤزۆندن بير – ايكي دامجي.
- كوردسنمي،
فارس‌سانمي،
بلوچمو، لُرمو؟
آذربايجانلي‌مي آي «احمد حسن»؟
يوردونو يوواني هاچان بوشلاييب،
بس بو جهنّمه نئچۆن گليبسن؟
داغلار انسانلاري آييرا بيلمز؟
طالعين هر ياندا قارادير سنين.
مرمي اويناتماغي دور گل اؤيره‌نك،
آيدين گله‌جگه امينم، امين.
1
صداقت دئگيلن بير دنيزه من،
ايلك باهار چاغيمدا گيرميشم همن.
قونماييب هر كولا كؤنلۆم ترلاني،
سئوميشم ازلدن آذربايجاني.
ديري گؤزلرينده اوخودوم سنين،
كؤك ساليب كؤنلۆنده محبت درين.
عشقينه وورولدوم، صداقتينه،
دۆنيا وارجا سۆره‌ن رفاقتينه.
ياديندامي آخشام گۆلۆستان باغي،
بولود اۆستۆمۆزه آغلايان چاغي.
گئجه‌نين اؤنۆنده توتغون هاواسي،
دومانلي تبريزين ماوي سماسي؟
ياديندامي بيرده آنالار ياسي؟
عظيمين17 گۆلۆردۆ نئجه آناسي . . .
دئييردي:
«- ياد مني آغلادا بيلمز،
آنا قلبيم يئيدير داغدان، اگيلمز!
اوغلومو سئويرديم آرتيق جانيمدان،
حقيقت يولوندا وئرميشم قوربان.
چيخسين انسان اوغلو ايشيقلي گۆنه،
مين اوغول وئرگيلن! سؤيله‌سين منه.
سعادت قاپي‌سي تاي با تاي اولسون،
خوشخبت بير اؤلكه‌يه ميليونلار دولسون،
يئني يئتمه‌لرين بويونا باخيم،
دۆشمنين جانيني يانديريم ياخيم.
اوشاقلار اؤنۆمده، مينلر اون مينلر،
سعادت نغمه‌سين بير – بير اؤتسۆنسلر.
اوغول دردي نه‌دير من كده‌رلنيم،
اوغوللار درديني نئجه ايتيريم.
ميليونلار، قيزلاريم، اوغوللاريمدير،
اؤز قانادلاريمدير، اؤز قوللاريمدير.
بابكين آناسي دئييرلر بير گۆن،»
دئميشدير اوغلونا: «بير ياخشي دۆشۆن،
سۆدۆمله من سنه قوّت وئرميشم،
سؤزۆمله سازيملا قدرت وئرميشم.
اؤيۆدۆمۆ هر واخت نظرينده دوت.
ميليونلار اؤنۆنده، اؤزۆنۆ اونوت!
وطنين يولوندا هيچ بير اوف دئمه،
قانيني وطندن سن اسيرگمه.
اودلار يوردوندانسان، اود اوغلوسان سن،
البت قويما چهره‌ن سارالسين بيردن.
چاليش وار قووه‌نله وطن اوغروندا،
اشغالچي قالماسين آذربايجاندا.
آلدانما دۆشمنين شيرين ديلينه،
صداقت باغلاسين سني ائلينه.
قورخما، يانيلما هئچ نيزه‌لر ياغسا،
گئري دؤنۆب قاچما، دۆشمنين داغسا.
آخر نفسه‌دك وطني ساخلا،
وطن‌سيز ياشادين، اوندان نه فايدا؟
وطنين نعمتي بركتي وار،
سنين آناوين‌دا بير ملّتي وار،
حدّتلي بير خلقي، شانلي بير ائلي،
ناغيللي – مئللي شيرين بير ديلي.
باياتيلاريمي قورو دۆشمندن،
اشغالچي باغيرير: «ياناجاق وطن!
ايته‌جك زردۆشتۆن،
قورقودون ايزي!»
اولو تانريم آمان! اونودما بيزي.
اوغول چيخ داغلارا، اودلار كؤمگين،
دۆشمنين تؤك قانين، ايتمز امگين.
يوردوندان خلقيندن يارديم آل گيلن،
بير آنا اۆره‌گيم، بيرده كي وطن،
بيرده اولو هۆرمۆزد، سنه يار اولسون!
يوردون باشدان باشا ايلك باهار اولسون!
آزاد اولماليدير انسان ائولادي،
بو يولدا اؤله‌نين ايترمي آدي؟. . .»
2
سن منيم شعريمين باش واراغيسان،
كؤنۆل دۆنياسينين باخچا- باغي‌‌سان.
سن اؤز ووقارينلا منه ياناشدين،
كؤنۆل خزينه‌مين قاپي‌‌سين آچدين،
« سويوق اولمامالي اليميز! » دئدين،
« وطن ائولادييق هامي‌‌ميز! » دئدين.
« قيريلماز تئللرله باغليييق ائله،
بيرليگي ميزي بيز وئرمييه‌ك اله. »
قوي ائشيتسين بونو بۆتۆن دۆنيالار.
آذربايجانيما
گله‌جك باهار.
سيز اي اووسون اولموش يازيق انسانلار!
ياراداجاغيق بيز آذربايجانلار.
قانلاري قوروماز قهرمانلارين،
رنگي دؤنميه‌جك قيزيل قانلارين.
سؤزو بير، اؤزۆ بير، مطلبي بيردير،
تام «نسيمي»لرين حلبي18
بيردير.
« ائلين صبري چوخدور » آتالار دئميش،
« ائل گۆجۆ، سئل گۆجۆ » يئنه سؤيله‌ميش.
سيز اي امپرياليزم ييرتيجيلاري!
قازيبدير نسيللر سيزه مزاري.
ساختاكار قودوزلار، قولدور آغالار!
سيزدن بۆتۆن ائللر اولوبلار بئزار.
سن اي خوتكار!19 سن اي قولدورلار
قولو!20
هارايا ييغيرسان بير بئله پولو؟
«نوح»21 عؤمرۆمۆ سنه وئريليب؟ سؤيله.
تؤكدۆگۆن قانلاردان بير حيا ائيله.
سۆرميه‌جك داوام بير ياسا، بير تئز،
غاليب گله‌جكدير انسانلار چوخ تئز.
3
ياديندامي صمد، بيرده او داغلار،
بيرده او به‌هر‌سيز ميوه‌سيز باغلار؟
ياديندامي هر واخت اوخوياردين سن،
«وورغون»ون:« ائل بيلير كي سن منيمسن،
آيريلارمي كؤنۆل جاندان » شعريني،
گؤزۆنده دويارديق بيزده سيرريني.
باخاردين داغلارا، اولو داغلارا،
نعمتسيز چشمه‌لي سولو داغلارا.
اؤتۆره‌ردين بيردن ايچدن كؤكسۆنۆ،
تيكردين اۆفۆقه ديري گؤزۆنۆ.
داغلار اگيله‌ردي سنين اؤنۆنده،
داغلار شاهي وارميش اولو سينه‌نده.
منليگين – ووقارين تعريفه گلمير،
منيم شعريم سني وصف ائده بيلمير.
ديبسيز بير دنيز ايدين، بير عمّان ايدين،
نئچه پيلانئتلي كهكشان ايدين.
بير مثل سؤيله‌ييب آتالاريميز،
دينله بونو مندن، اي قلبي تميز:
«دنيزه، بير قايا، يادا بير داش آت،
احوالي دگيشمز، اونوت يا ياشات.»
سنه داش‌دا دگدي قايادا دگدي،
اللر اوخلارا دا يايا دا دگدي.
آمما سن هئچ يئرسيز دالغالانمادين،
ديل يارالاريني هئچ نه سانمادين.
ياد ايله ووروشماق مقصددير بيزه،
يارا اثرسيزدير قلبي تميزه.
آذري اوغلونون بۆتۆن حدّتي،
بۆتۆن عظمتي، بۆتۆن قدرتي،
ائل بيلير كي صمد سنده جمعيدير،
ائلداش دا سؤيله‌يير، اؤزگه‌ده دئيير.
مندن سوروشسالار نه‌دن بو؟ هاردان؟
دئيه‌رم ووقارلا: «آذر اوغلو» ندان!
دؤيۆشكن روحونا بو شعريم قوربان،
اؤلمه‌سين، ابدي ياشاسين انسان.
4
ياديندامي «صمد» ايلك باهار گۆنۆ،
«ستارخان» جاده‌سي، هربي22 نين اؤنۆ؟
ياديندامي بيرده گؤز ببگيميز،
آرزوموز، گۆنۆمۆز، شن ديله‌گيميز،
آنا وطن، آنا يورد، بو گؤزه‌ل مسكن،
باغلانميسان بورا بۆتۆنلۆكله‌سن.
چيرپينيردي نئجه قلبين اۆره‌گين،
چيچكلنه‌جكدير آخر ديله‌گين.
گؤرۆره‌م، گله‌جك گؤزۆم اؤنۆنده،
«مدينه»23، گليبدير مزارين اۆسته.
سنه نغمه يازير بۆتۆن اۆره‌كله،
سنه سلام وئرير گۆلـله چيچكله.
سنه باغيشلايير آنا قلبيني،
مزارينا قويور بؤيۆك اليني.
«بالاش»24 باشين اۆسته
الهاملا جوشور،
«علي»،25 قدرتينه نغمه‌لر قوشور.
ائل، ناغيللاريندان قوّت آلاراق،
ييرتيجي اؤنۆنده باغلايير ياراق.
هر سؤزۆن، هر نغمه‌ن بير شاللاق كيمي،
دۆشمن اۆسته يئنير، يارير باغريني.
منه ايلهام وئرير او گۆن، او ساعات،
ياز دئيير، دايانما، اوتورما راحات.
كيمدير كي جوشماسين او گۆن يازماسين؟
وطنين عشقيله آلوولانماسين؟
سنده قالخاجاقسان او گۆن مزاردان،
قارا توپراقلاردا ياتماز قهرمان.
اؤن سيرالاردا سن سانكي قيزيلباش،26
نعره چكه‌جكسن:«آهاي! وطنداش!
سعادته دوغرو، خوش گۆنه دوغرو . . .»
آردي وار . . .
