5
صمد، كؤنلۆم قوشو قانادلانيبدير،
آيريليقدا جانيم يامان يانيبدير.
جانيملا قلبيمله يازيرام سنه،
قولاق وئر هم ياشين شاعير «مشفق»ـه:27
«يازمارام اۆره‌گيم سني آنماسا،
اۆره‌ك دؤيۆنرمي آلوولانماسا؟»
آجي بير آنيلار دۆشۆر ياديما،
تاب گتيرمير قلم داها بورادا.
قوي دئييم قالماسين سؤز اۆره‌گيمده،
سؤز گليب دايانيب يانير ديليمده،
گئتديز مشفق‌ده سن، گنج ياشلاريندا،
چيچكلي گنجليگين لاپ باشلاريندا.
«مشفق»ين اؤلۆمۆ چوخ اولدو آجي،
سنين اؤلۆمۆن واه! نه جان ياخيجي.
«مشفق»، خلقين گؤردۆ محبتيني،
ترنم ائيله‌دي سعادتيني.
ائلين قوجاغيندا ابدي ياتدي.
آدين اؤلمزلرين آدينا قاتدي.
سن ايسه شقاوت، بيرده اذيت.
حقارتلر گؤردۆن، چوخ چكدين ذلت.
سونرادا آرازين قوينوندا ياتدين،
نه يازيق! هارايا اؤزۆنۆ آتدين!
باخ ايكي انسانين طالعينه‌سن،
مشفق ايله صمد، ايكي هم وطن!
آجيرام اۆره‌كدن بو احوالاتا،
داي قلم دايانير، تابي يوخ يازا.
منيم عظمتلي ناكام مشفقيم!
اۆره‌گيم درديني كيملره دئييم؟
منيم آراز قلبلي جان قهرمانيم!
قاراباشاقلي‌‌دير آذربايجانيم.
منيم گله‌جگيم، منيم موراديم،
سنسيز وطن سويون من نئجه داديم؟
باخا بيلره‌ممي بيرده آرازا؟
گؤستر كيمدير اونا مدحيه يازا؟
آرازلار قوي بۆتۆن قوروسون، يانسين.
دورسون جيلوولانسين، داها دايانسين.
قوي بونو دۆشۆنسۆن آزغين دۆشنلر،
آرازا قمه‌لر سد سالا بيلر.
قوي قورسون انتقام آتشين ائليم،
آتشه چئوريلسين قوي منيم ديليم.
قوي گلسين اؤلۆمۆ وايي آرازين،
قوروسون چشمه‌سي چايي آرازين.
انتقام دهشتي گؤيلره قالخسين،
هر ديلدن آغيزدان آتشلر آخسين.
6
آراز سني بوغان گۆنلر بيلسنمي،
نئجه هيجقيرتيدان بوغولدو هامي.
اۆره‌كلي سهند28يم اۆره‌ك
داغلادي،
«نه يازيم من سنه؟» دئدي آغلادي.
«آلوولاندي منيم دنلي خرمنيم،
او سرين سو كۆزه‌م جالاندي، نئيليم؟»
گؤز ياشي دورمادي آنا وطنين،
يامان يانيقليدي اؤلۆمۆن سنين.
ائل بير دنيز كيمي دالغايا گلدي،
«صمد» اؤلدۆ سؤزۆ اۆره‌كلر دلدي.
قانلي كؤينگي‌ني ساخلادي آنان،
اۆره‌كدن چكيردي فغان! الامان!
دئدي:«- بونو اؤزۆم بايراق ائده‌رم،
آرازين اؤنۆنه قده‌ر گئده‌رم.
داغلاردا داشلاردا سنگر سالارام،
اوغلومون اؤجۆنۆ ياددان آلارام.
منتظم داياننام قاياليقلاردا،
گئجه‌ني سحره قاتارام اوردا.
وطندن وطنه گئچر ايگيدلر،
آزادجا ياشارلار هامي برابر.
دۆشمن خلقيميزدن باج آلا بيلمز،
آذربايجاندا
ياد يورد سالا بيلمز.
چاغريلماميش بورا گيره‌ن قوناقلار،
قارا بايقوش كيمي چكرلر هاوار.
جنوبا آخارلار، بيز داللارينجا،
جنوب ائللري‌ده قالخار آياغا.
بايراغي سانجارام دماونده من،
مني ساخلايانماز بير يئرده وطن.»
معناسي هر سؤزۆن، او گۆن سئومكدير،
انسان ائولادينا بؤيۆك وطن بير.
دۆشۆندۆرۆر مني انسان طالعي،
نظرده دوتموشدون سن اؤزۆن بونو.
كيمسه وطنيندن قيراق دۆشمه‌سين،
وطن‌ده كيمسه‌ني دوستاق ائتمه‌سين.
7
دور صمد، اۆره‌گيم ايلهاملا جوشور،
گله‌جگه باخيب، نغمه‌لر قوشور.
كؤنلۆمۆن شاهيني قاناد چالاراق،
ايسته‌يير قاوزانا داهادا اوزاق.
لاله دريالاري دالغالانير، گل،
جانيم آيريليقدا يامان يانير، گل.
ايلك باهار گليبدير، گۆل چيچك آچيب،
گۆنش بوردا قالخيب، اؤزگيه ساچيب.
گل، توراغاييلار اوچوشور چؤلده،
قوشا- قوشا چيمير اؤرده‌كلر گؤلده،
گل سني گؤزله‌يير آغ قاغاييلار،
سني سلاملايير يوردومدا باهار.
گل يئنه گيلاوار اسير بورادا،
گل شفق، اۆفۆقۆ كسير بورادا.
باهاردير، كندليلر پالچيغا باتير،
گلينلر قارا بير داخمادا ياتير.
دور گل، قارا تورپاق يئنه شوملانير،
گۆنشين آلتيندا بيچينچي يانير.
ايلك سحر توپلانير بير ييغين فعله،
هر دؤنگه، هر بوروق، هر بير كۆچه‌ده.
اوردا گؤره‌جكسن عاشيقلار‌ي‌‌دا،
گليرلر بورايا چؤره‌ك دالينجا.
بوجاغا چؤكۆرلر ناهارا قده‌ر،
كيمسه ديللنديرمير، دوروب گئديرلر.
8
گۆللرين اۆزۆندن نم سۆرۆشۆر، گل،
يومشاق ياناقلاري باخ بۆزۆشۆر، گل!
داغلاردا هۆركۆيۆر جيرانلاريم، گل!
غضبدن قاينايير، جوشور قانيم، گل!
دور گل كي قودوزلار هله اؤلمه‌ييب،
تاريخ قولدورلوغون ايزين سيلمه‌ييب.
دور گل كندلريمه، داغلاريما گل،
«صاحبعلي»29 اكن باغلاريما گل!
دور گل، دايانمايير قلم بير زامان،
ايره‌لي يئرييير اوغوللار، اينان!
«ياد گؤرمه‌سين» - دئيه، بورايا سۆرۆن،
ايشچي آلاجاقدير حققين بۆسبۆتۆن.
گؤيلرده اويناسين يالين قمه‌لر،
قيزيلباش بۆرۆسۆن داغي سر به سر.
بيليرسن كي ائليم جسارتلي دير،
«گۆنش ساچاغيني داغيتسين»، دئيير.
بيزه اينام وئردين، سنه عشق اولسون!
گله‌جگي گؤردۆن، سنه عشق اولسون!
قاتدين اؤز آديني اؤلمزلره سن،
قهرمان اوغلونو اونوتمور وطن.
دهشتلي انتقام گؤزله‌يير يادي،
سيلينمير تاريخدن يوردومون آدي.
اؤلكه‌م ايندي يوخسا خريطه‌لرده،
ياشاميشدي آدي قرينه‌لرده،
يئنه گؤيۆللرده حددي – سددي وار،
آنا يوردومون‌دا اؤز سرحددي وار.
بير زامان بورادا شاه اسماعيليم،
دئدي:« اود يوردونا من سجده قيليم! »
سؤيله‌دي:« ائشيدين اي حق سئوه‌نلر!
حققه - حقيقته سجده ائده‌نلر!
حقيقت بايراغي گؤيه يۆكسلسين،
خارجي‌لر بۆتۆن لعنته گلسين.
تامام آغالارين كسيلسين باشي،
غازيلر اولسونلار حققيق سيرداشي.
«نسيمي» جيسميمده حلول ائديبدير،
آي – گۆنش حؤكمۆمۆ قبول ائديبدير. »:
«عين الله
هم، عين الله هم، عين الله،
گل ايندي
حققي گؤر اي كور گۆمراه.
منم اول
فاعل مطلق كي دئرلر.
منيم حؤكمۆمده‌دير
خورشيد ايله ماه.»
« انسان اؤزۆ گره‌ك سلطانِ عالم،
باشقا هر بير سؤزۆ اويدورما بيللم.
انسان زينتي دير كايناتلارين،
بونو سؤيله‌ييرم من داها درين.
كلاميمي گۆمراه كور دينله‌مه‌سين،
غازيلر مئيداندا هيچ اينله‌مه‌سين.
يارلار يارستانا صادق قالسينلار،
خارجي‌ني توتوب يوردو آلسينلار.
قارشي گليب يارلار، نوروز ائتسينلر،
غزا مئيدانيندا حققه يئتسينلر،
منيم بابام يازان «قارا مجموعه»،30
گره‌ك كي يول آچا مدرسه‌لره.
آنا ديليم منيم مقدّس اولسون،
كلاملاريم سيزه دادرس اولسون. »
منيم اولو بابام «عمادالدين»ين،
حلبده
سويدولار بير گۆن دريسين،
دئدي:
«حق عاشيقي دؤزه‌ر ذلته،
سون قويار قيزيلباش بو شقاوته.»
«ميناره‌سينده» دئدي:«كؤنلۆمۆن پاشام،
قيمتلي بير گنجي پنهان بولماشام.
تك دابانيمدان سوي منيم دريمي،
ناحق پيچاق كسمز هئچ بير يئريمي.»
بيرده «نعيمي»31مي سرّ اللاهيمي،
قارانقو گئجه‌ده شمع راهيمي،
نخجواندا
كسدي «ميرانشاه» باشين،
قاري ياد! قويمارام قوروسون ياشين.
دهشتلي انتقام آلارام سندن،
غازيلر قانيله گۆللنسين وطن».
تكي سن ياشا اي قهرمان وطن،
استثمارچي‌لاري سن اگه‌جكسن.
گؤزه‌ل توپراغينا قورباندير جانيم.
ياشا دۆنيا وارجا آذربايجانيم.
«مقصدين بوش شعار» دئمه‌سين منه،
دۆزمه‌سين هر يئتن بير تئز وطنه.
آذري اوغلويام سؤيله كي: اي يار!
گؤرمۆشم سيناقلار چوخ امتحانلار.
سئير ائيله تاريخي، بير واراخلا باخ،
ياددان قوروموشام يوردومو هر واخ.
مين ايل قهرمانليق ائتميشم، اينان!
داغلارا گل دئييم، نه لازم يالان!
بيليره‌م كي سيناق هله بيتمه‌ييب،
منيم‌ده خصلتيم هئچده ايتمه‌ييب.
همان «كور اوغلو»يام، همان «قورقود»ام،
وار صمد يارادان شانلي بير اوبام.
ساغالماز ياراسي قهرمانيمين،
غضبي، رنگي وار منيم قانيمين.
اوخويوبسان صمد سن اؤزۆن بونو،
ياخشيجا تانيرسان آذربايجاني.
تاريخلر يازميسان، ياخشي بيليرسن،
عصيرلر اوزونو نه چكميش وطن.
منيم ديري گؤزلۆ شاه اسماعيليم،
قويما اۆزۆم اۆسته بيردن ييخيليم.
منيم اي مقدّس كلاملي بابام!
مشعللري قالدير، ظۆلمتدير اوبام!
غازيلر دالينجا صف باغلاييبلار،
داياق اولسون گره‌ك يارستانا يار!
منيم قورخماز باش اي اولو نسيميم!
ديري – ديري سويدو دريني دۀ كيم.
منيم عظمتلي «شاه فضل الله»يم،
دۆشمن اسير قيلدي، نه‌دير گۆناهيم؟
«قاضي برهان الدين»32 نه اولدو، اي يار!
قانلا قورودوغو هاني او ديار؟
هاني او دؤيۆشكن حروفيلريم؟
نامرده ساتيلير مقدس يئريم.
هاني بكتاشيلر،33 هاني گورانلار،34
هاني او قمه‌لي يوردا قوربانلار؟
هاني قانلي ايزلي او قيزيل باشلار؟
هاني او هۆجوملار؟ هاني ساواشلار؟
9
قوي افسانه‌لشسين «صمد بهرنگي»،
انساني ياشادار مسلك چلنگي.
قوي عاشيقلار قوشسون آدينا داستان،
اوغوللار دينله‌سين سني هر زامان.
عشقينله اۆره‌كلر قوي آلوولانسين،
آديني چكنده دۆشمن اودلانسين.
ترپنسين يئريندن قوي بؤيۆك تبريز،
اؤز باشيناليقدان داي قالماسين ايز.
قوي يانسين اودلارا شعريم، داستانيم،
حؤكمدن قورتولسون آذربايجانيم.
دۆشمه‌سين وطنيم هيچ زامان اله،
گؤتۆر سازي سؤيله سن صمد ائله،
سنين خاطيره‌نله بير يئره دولسون.
قُدرتين گؤسترسين تا آزاد اولسون.
آنالار اۆره‌گي قوربان هزمينه،
او شجاعتينه، بؤيۆك عزمينه.
سنه قوربان منيم ناغيليم بۆتۆن،
سحرلر آخشاملار شفقده گؤرۆن.
آغالارين جاني دۆشسۆن قورخويا،
ائل مينلر، اون مينلر گلسينلر هايا.
گؤزۆنده اوخودوم عشقيني يوردون،
كؤنلۆمده چالخانان آتشي دويدون.
ازلدن وورولدوق آذربايجانا،
كؤنلۆمۆز چيرپيندي، جان وئردي اونا.
قوشا ووردو هردم اۆره‌كلريميز،
دۆشۆندۆردۆ بيزي ديلكلريميز.
هاميميز بير وطن، بير ائل ائولادي،
وطنه باغلانميش قهرمان آدي.
10
عؤمرۆنۆ شؤهرتسيز باشا ووردون سن،
دئدين: «شؤهرت تاپار انساني بعضن!»
تمناسيز كئچدي گؤزه‌ل حياتين،
ساده دانيشاردين، ساده هر زادين.
آلداتمادي سني قيزيل يالديزلار،
صنعتي قورودون اصيل صنعتكار.
ايللرين داليندان، من «وورغون»لارين،
سنه گتيريره‌م درين سلامين.
اي «آخوندوف»ومون35 اصيل وارثي،
«جعفر جبارلي»36 مين بؤيۆك انيسي!
اي «حسين مهدي»37 مين قلم يولداشي،
بۆتۆن انسانلارين بؤيۆك ائلداشي.
نسيللر اۆستۆنه سلام سرپه‌جك،
دايانمير، چيرپينير سينه‌مده اۆره‌ك.
يارير دالغالاري، دايانماق بيلمير،
آليشيب اودلارا اوسانماق بيلمير.
ايستيره‌م آديني شاللاق ائيله‌يم،
عشقينله اۆره‌كدن نغمه سؤيله‌يم.
ايستيرم اؤزۆمۆ داغلارا سالام،
سنين قصاصينا مين قصاص آلام.
اؤنۆمۆ دوتماسين قاري اشغالچي،
آتلاري ناللاسين قهرمان نالچي.
ارگيمه، قالاما گئتمك ايستيرم،
انسان آخينيندا ايتمك ايستيرم.
جانا دايانديرديز، ديغلاتديز بيزي،
وطنيمدن چكين مشؤوم اليزي. . .
منه سن اي ظاليم! غنيم اولما، گئت.
زامانين اؤنۆندن واختيله گل ايت.
حؤكمۆنۆ وئره‌جك بو دقيقه‌لر.
نه‌لر گتيريبسن باشيما، نه‌لر؟
عالَم احواليمدان خبرسيز قاليب،
كيم بيلير كي رنگيم نئجه ساراليب.
آردي وار . . .
