11
قوي انسان ائولادي يار- يولداش اولسون،
انسان بير – بيرينه قوي سيرداش اولسون.
آغالار اگيلسين ائللر اؤنۆنده،
هئچ ديل بويلانماسين ديللر اؤنۆنده.
وطنلر بير اولسون، باهارا دؤنسۆن،
اۆره‌كلر بير يئرده بيرگه دؤيۆنسۆن.
عشق اولسون بۆسبۆتۆن ايگيد مردلره،
انسانا آليشان صمدلريمه.
سندن كيم جانيني اسيرگردي، دۀ!
اۆره‌ك كيمي‌سينه دؤيۆنردي، دۀ!
قورخولو، دهشتلي، نه اوغورسۆز گۆن،
كيم دئدي سن اوگۆن آرازا سۆرۆن.
دئمه‌دين ميليونلار انتظاردادير؟
دئمه‌دين كي دۆهان دۆها يارادير؟
دئمه‌دين قاتيللر كمينده ياتيب؟
دئمه‌دين آداملار اؤزلرين ساتيب؟
سني ياد ائديره‌م، اۆره‌گيم يانير،
ديليم شعله چكير، شعريم اودلانير.
قوي بونو دۆشۆنسۆن وطنسيز داياز،
ات ديرناقدان اولماز، جيگر آيريلماز.
گؤز اؤنۆنده دوتسون بونو او آلچاق،
حيات حقيقتدير، دگيل اويونجاق.
وطن ايله هئچ واخت اويناماق اولماز،
وطن داغلاريندا لاله‌لر سولماز.
گؤره‌ر گؤزلو لاله، اود پارچالاري،
آردينجا گتيره‌ر بؤيۆك باهاري.
دۆشمنين عؤمرۆنه قور سالار رنگي،
محبت دوغورار چاتغين چلنگي.
هر آذر اوغلونون
اۆره‌گينده پك،
بئله بير لاله وار شير اۆره‌گي تك.
محبت ايسته‌سن وار محبتي،
دگيشمز هئچ زامان اونون خصلتي.
وورسان ووراجاقدير، سئوسن سئوه‌جك،
اودلار امانتي بئله بير اۆره‌ك...
وطنيمه منيم سن بير دئنه جان،
گؤز ببگيم سنه ائده‌رم قوربان.
وطنين اوغروندا مقصد بيرله‌شير،
فردي دؤيۆشمه‌لر يئرينده ايتير.
بورجدور آنايوردو قوروماق بيزه،
اود باساجاغيق بيز اللرينيزه.
بير زامان قولوموز باغلي‌ديرسادا،
بير حال سۆرميه‌جك بو قوجا دۆنيا.
زنجيرلر بيربه‌بير قيريلاجاقدير.
دۆشمنين اۆره‌گي ياريلاجاقدير.
قانونا اويغوندور طبيعت، اينان.
آنديريبدير بونو بيزه هر زامان.
بيز اصيل معنادا وطن ائولادي،
بيزيله چكيلير وطنين آدي.
دئميشيك ازلدن بونو بيز هامي:
ايگيد اؤلر آمما بوراخماز ياغي!
دۆشمني اؤتۆرمز، ياخالار، ييخار،
تا كي آزادليغا وطني چيخار.
12
اوخوجوم بيتمزدير وطنين سؤزو،
گره‌ك آزاد ائده اؤزۆنۆ اؤزۆ.
گل سنه سؤيله‌ييم سون مقصديمي:
هئچ زامان اونودما گۆل صمديمي.
عزيزلييه‌ك اونون خاطيره‌سيني،
او وطن پرورين گؤزه‌ل سسيني،
اؤلمز قهرمانين خوش نغمه‌سيني،
بيرليكده دينله‌ديك ترانه‌سيني:
بيرگۆن وارميش،
بير گۆن يوخموش.
ماوي سويون
قيراغيندا،
بير قيزيل
گۆل قالخميش،
ايري،
گؤزه‌ل،
دولو ياپراق.
ببريئل
اسدي،
ياغيش ياغدي،
بوران اولدو،
توفان اولدو،
قوپدو قيزيل
مخملي گۆل،
ياپراقلاري
داغيل – داغيل.
نئجه اولدولار،
باشلارينا
نه‌گليبدير،
اؤلۆبلرمي،
ديريلرمي،
كيمسه‌بيلمير.
آه! نه گؤزه‌ل
مخملي گۆل!
بيز بو گۆلۆ
تانيييريق،
هاردان گلير،
هارا گئدير؟
كيمسه بيلمير.
13
قيزيل گۆلۆم سولدو، آمان، آي ائللر!
ائشيتسينلر سونرا گلن نسيللر.
اۆره‌گيمه منيم بير داغ باسديلار،
ساغالتمير نه نغمه، نه‌ساز، نه باهار.
گؤزه‌ل «فريدون»وم بولاشدي قانا،
ماتم يۆرۆتدۆلر آذربايجانا.
وحشيجه دلديلر اونون سينه‌سين،
آرازا آتديلار جانسيز جسدين.
اۆره‌گيم باشيني اويدولار منيم،
نئيله‌سين تؤكمه‌سين ياشين وطنيم؟
گؤزه‌ل بير قونچامي بيچديلر آمان،
قانيمي تؤكدۆلر، ايچديلر آمان.
بير قيسغي قويدولار، گؤرمه‌سين ائللر!
قيصاصيمي آلسين ايگيد نسيللر.
تپه‌مه ووردولار آمان نه قاپاز،
قاپدي اللريمدن اوغلومو آراز.
كؤچۆمۆ چاتديلار داليما، گلين!
ييغيلين بير يئره، تدبير ائيله‌يين.
قالقانلا دؤيۆلدۆم، ديشيم چكيلدي،
يئريمده
گؤر نئجه آرپا اكيلدي.
اليمي قولومو بۆتۆن چيرتديلار،
آوادانليغيمي واي! اوچورتدولار.
كؤكۆمۆن اۆستۆنده اود يانديرديلار،
بوغومو يولدولار، آي ائللر! هاوار!
بيتيش
اوخوجوم! بو سؤزلر هاميسي دوغرو،
آمما سن سانما هئچ مرثيه‌دير بو.
ائللر آغلاسالار قهرمانلارا،
قان آلارلار بۆتۆن گئده‌ن قانلارا.
گؤز ياشي آخيتماق ياراشماز بيزه،
گره‌ك قان تؤكۆله گؤزه‌ل تبريزه.
قانا قان دئييبلر ازل آتالار،
ائشيتسين كومالار، بيلسين اوبالار.
نبضيني دگيشيب زامان البته،
حققه ايرمك سيرري وار شجاعتده.
گره‌ك قان تؤكۆله وطن اوغروندا،
قهرمانلار قانين وئرمم اوجوزا.
اي وطن! دايانمير اۆره‌ك بير آنليق،
اۆستۆندن گئده‌جك بو شوم قارانليق.
سن منه وئريبسن صمد تك انسان،
كيم جانين اسيرگر بئله دياردان.
سنه آلقيش اولسون اي بؤيۆك وطن!
بير داها قوي دئييم:«سن منيمكي سن!»
اي صمدلر دوغان اودلار مسكني!
ائللر آلقيشلايير هر لحظه سني.
منيم قهرمانيم سنله فخر ائديب،
«- شانلي آذربايجان، آزاد اول!» دئيب.
صمدين آناسي، اي اودلو ديار!
«قورقود»لاردان بيزه گلن يادگار.
اؤده‌رم بورجومو سنه، داريخما،
يالقيز اۆره‌گيمي بو قده‌ر سيخما.
من كيمم؟- بير قولو پولاد فعله‌يم،
آخ واخدان اۆره‌گيم باغلاييب ورم.
گۆندۆز پالچيقلارلا، گئجه داشلارلا،
ووروشورام، قارنيم آج، گؤزۆم يولدا.
من كيمم؟ - بير يازيق، بير پوزغون كندلي،
آياغي كۆنده‌لي اللري بندلي،
من كيمم؟ - ايشچي‌يم، بير محروم انسان،
دۆنيا نعمتيندن نصيبسيز قالان.
من كيمم؟- ميليونلار، ميليونلار اينان،
سنين آردينجايام، دۀ! نه‌دير فرمان؟
سون
