فَجَعَلْناهُم سَلَفاً
وَ مَثـــَلاً لِلْاَخِرينْ
(الزُّخرف/56)
سوروشورسان:«- نييه بابا
آغرير سنين اۆره‌گين؟»
اۆره‌گيمي آغريدانلار،
منيم قيزيم، آز دگيل.
هانسين‌‌دئييم، هانسي قالسين؟ هانسينا سن دؤزه‌رسن؟
سنين ده كي سئرچه قلبين، منيمكي تك ساز دگيل.
« دونوق اولسا،
دورغون اولسا»سؤيله‌ميشدير فضولي:
« اۆره‌ك دگيل، پارچا بوزدور، گر اولماسا
دردمند.»
ائله اولو درد و غم وار، اۆره‌گي ده آغريدار
انسان وار كي، وجودونو نئي تك ائيلر بند - بند.
ائلجه بيلن وورغونلاري كيمسه سايماز اولاندا،
بير قلبين يوخ، بيركسين يوخ، بو درديدير وطنين.
شاعرلرين كتابلاري قولتوغوندا قالاندا،
نئجه منيم قيزيل قلبيم هئچ آغرييا دۆشمه‌سين؟
دۆگۆنله‌نيب تورپاقلاردا
آنالارين باخيشي،
يۆز ايللر يول‌گؤزله‌يرمي بير ائل- اولوس، بير ملّت؟
اسارت قانداللارينا
دؤزه‌رلرمي آسلانلار؟
غيرت كاني اوغوللاردان
گؤرۆنمزمي بير غيرت!
باشي اوجا ملّتيميز اؤز
منليگين اونودور،
اجنبي‌نين چيراغينا
هي سۆزۆلۆر، ياغ اولور.
اريمه‌سي، تؤكۆلمه‌سي
دره‌لره داغلارين،
اۆره‌گيمده، قيزيم
منيم، هي ديكه‌لير، داغ اولور.
كدرلتمك ايسته‌ميرم
سنين دوغوم گۆنۆندۆر
گلجه‌گين قوتلو اولسون،
آيدين اولسون گۆنلرين!
ايتيرمه‌سين سيادتين،
باشي اوجا ياشاسين،
ياخشي بؤيۆتسۆن‌اولادين،بيرگۆن‌‌گؤرسۆن
ائللرين.
مجروح قلبيم آغريسادا،
قيزديريرسان سن اونو،
قيزيم سنين دوغوم گۆنۆن مبارك اولسون بوگۆن.
سون غلبه دؤزۆمده‌دير، دؤزۆر قارتال اۆره‌گيم،
گؤزله‌ييريك گله‌جه‌كده بؤيۆك ظفر، توي، دۆگۆن.
بوگۆن بايرام ائله‌ييبسن،
چاليرسان، اويناييرسان،
هركيم سنين بايرامينا بير هديه گتيرير.
آنان يئنه كدريمي سۆزۆر منيم اوزاقدان،
چونكو بابان شعر پايي ايله بو بايراما قاتيلير!
سنه بوگۆن قولتوغومدا
بير قالاق شعر گتيرديم،
«شيخ محمّد» حماسه‌سين، قيزيم سنه
يازميشام.
منيم بو دولتيم - واريم يئنه نيسگيلدير سنه
كلمه‌لرين، اۆره‌گيمين لاپ ديبيندن قازميشام.
باشي اوجا عاليميميز
سره‌لنركن يئره
دئدي: «عشقه، فضيلته، دۆزگۆنلۆگه وورولون.
هر هاوايا اوينامايين اجنبي‌يه خوش گلسين،
منيم تكي عشق اودونا يانين، دؤزۆن، دورولون.»
اوخو قيزيم، اوخو قيزيم،
شيخ محمّد ناغيلين،
سوروشما داي: «نييه بابا آغرير سنين اۆره‌گين؟»
اۆره‌گيمي آغريدانلار منيم قيزيم آز دگيل،
ايندي بيرين سؤيله‌ييرم، دينله، قولاق آس درين:
فَانـــْظُرُوا اِلي آثارِ
رَحْمَةِ اللهِ كَيفَ يُحْييِ الْاَرْضَ بَعْدَ مَوتــَها.
(الروم/50)
«شبستر»دن
قيراقدا، گۆن باتان بؤلگه‌سينده،
شيخ
محمودون سؤزۆنده، سسينده، نفسينده،
يۆز ايللر بوندان قاباق وئرديگي ايلقار اۆسته،
غريب بير نغمه ياشار، غملي دويغولار اۆسته،
اۆره‌گي‌نين باشيندان دنيزه پنجره وار،
سونسوز سماني اونون اۆزۆنه هر گۆن آچار.
«ميشو» قوجاقلاميشدير، دريا قده‌ر غصه‌سين،
قوينوندا ساخلاميشدير زمان سارسيدان سسين.
مين دؤرد يۆز ايلليك چنار نغمه‌سيدير بو شه‌هر،
غريب غملي دويغونون گۆر سسيدير بو شه‌هر.
اؤز اگنينه گئينده غريبليك ياپينجيني،
گؤز اؤنۆنه گتيرير دشمنين قاخينجيني.
ميشو بۆتۆن ايسلانير، گؤزلريندن ياش آخير،
ايلديريملار شاققيلدير، چينار گؤيلره باخير.
گؤيلر بۆتۆن قاپقارا، نه اولدوز وار نه‌ده آي،
نه آغلاييش دويولور، نه سس سمير، نه بير هاي.
سوسغونلوق بۆرۆيۆبدۆر بۆتۆن قاياليقلاري،
غم كرواني يۆكسلير «خامنه»دن
داغا ساري.
ميشو داغي،
شمالدان، اورمو گؤلۆ جنوبدان،
قوينوندا بئجريرلر خامنه‌ني، سانكي بيرجان.
«تسوج» گيلانارليغي سولدا، «شبستر»
ساغدا،
قيوريم- قيوريم بزه‌يير گؤيچك اۆزۆن هر چاغدا.
داليني وئرميش داغا اۆزۆن دنيزه آچميش،
آغير قارا ماتمين دۆزنگاهليغا ساچميش.
شيخ‌محمّدي دوغموش، بئجرتميش،
هم ايتيرميش،
هم سئوينج، هم بركت، همده سكوت گتيرميش.
«باقرآباد»، «حاج حسين» مسجدلرين ساووشدوم،
«حاج احمد» كوچه‌سي‌نين باشيندا
آتدان دۆشدۆم.
دئييرلر كه او شيخين بورادا ايدي ائوي،
بوردا دوغموش ياشاميش، بوردا سۆرمۆش عُمرۆنۆ.
قاناليقلار، آلماليق، آرمودلوقلار، گۆللۆكلر،
بۆرۆمۆش بير باخچادا، اونو گؤره‌رميش ائللر.
سن بو داركوچه‌لرده شاعر نه آختاريرسان؟
تعظيم ائت، قوي سارسيلسين حقّه باغيران شيطان.
حق هارا، حق سؤز هارا، الله هارا، دين هارا،
اۆره‌گيمه وورور او، يارا اۆستۆندن يارا.
اوتور، آخشام چاغي‌دير، گۆن يؤنه‌لير باتماغا،
سني آپاراجاغام يۆز ايل قاباقكي چاغا.
سيل كؤنلۆنۆن پاسيني آخيت گؤزۆن ياشلارين،
باخ قيزاران شفقه، دۆگۆنلمه قاشلارين.
سكسن ايل بوندان قاباق خامنه گۆنشي باتدي،
بير ساتقين دين‌سيز كؤپك، شيخ محمّدي
ساتدي.
اۆره‌گينده نه آشوب، آي شاعر! نه عصيان وار،
داريخما، اوتور آغلا، يوخسا وقتين دارالار.
سن حله يازماليسان قهرمانليق دستانين،
حماسه‌لر يارادان شانلي آذربايجانين.
ياز، خائنلردن دانيش جنايتلردن سؤز آچ،
گۆنش اسرارين سؤيله، قارانقولوقلاردان قاچ.
اوتور بوردا، بو كوچه مقدس‌‌دير سنين چين،
بو آنا جاده‌سيدير، شاه‌راهيدير وطنين.
شيخ
محمّد خياباني آدديم باسميش
بورايا،
اوتور آغلا، هئچ ترپنمه، هارا گئديرسن، هارا؟
عصيانلي ايمانلارين جاده‌سيدير بو كۆچه،
صاف عشقين شربتي‌دير، باده‌سيدير بو كوچه.
دۆشۆنجه‌نين، آرزونون ديلكلر صحيفه‌سي،
آزادليق اسراري‌‌دير، فضيلتلر نغمه‌سي.
اؤپمۆشدۆر آياقلارين شيخ محمدين بو تورپاق،
دويموشدور اميدلرين دوتموشدور اوندان سوراق.
ايكي ركعت نماز قيل، آلنيني تورپاغا قوي،
تكبر قابيغيني گل اۆره‌گيندن سوي.
قوي آپاريم تاريخين انگين كوچه‌لرينه،
قولاق آس شيخ محمدين عصيان دولو سسينه.
گؤر نئجه معراج ائتدي ساواشلار مِيدانيندان،
جبرائيل قانادين‌دا اؤتدۆ، كئچجك جانيندان.
اورمو گؤلۆن بزه‌دي، ميشودان قاني آخدي،
خامنه قانلي چيچك تك غملي - غصه‌لي
باخدي.
غريب بير نغمه كيمي وئرديگي ايلقار اۆسته،
غملي دويغولاريني داغيتدي دسته - دسته.
گئده‌ك تاريخيميزين گل بير دؤنگه‌لرينه،
قولاق آساق زمانين گيزلي ترانه‌سينه:
لَقَدْ خَلَقْنَا
الاِنـــْسانَ في اَحْسَنْ التَّــَقْويم
(التين/4)
كؤكسۆنده هيجان،
گؤزۆنده اميد،
اوگۆن سئوينيردي حاج عبدالحميد.
اوتاقدا گئديردي اويان
بويانا،
بيلميردي نئيله‌سين، باخسين هايانا.
باييردان گؤزۆنۆ تيكدي ميشووا،
بوغازيندان قوپدو غملي بير نوا.
صلوات چئويردي، اوخودو دعا،
بركتلر گلسين، ساووشسون بلا.
اۆفۆقده ساراليب گۆنش باتيردي،
سهند اتگينده
دُنيا ياتيردي.
خامنه اهلي كنده گليردي داغدان،
سس سمير كسيليب سوسوردو هريان.
گئجه ساللانيردي، قاش قاراليردي،
قارانليق اطرافي ساريب آليردي.
قادينلارين هايي گليردي ياندان،
آغريلار چكيردي «رقيه سلطان».
بير قادين اوياندان سئوينجك قاچدي،
حاج عبدالحميدين قاپي‌سين آچدي.
دئدي:«-موشتولوق‌وئر،بيراوغلون‌اولدو»
حاج عبدالحميدين گؤزلري دولدو.
قالديردي گؤيلره ساري باشيني،
«- شۆكۆر الله!»دئدي،تؤكۆب
ياشيني.
يئرينه گتيردي شوكور سجده‌سي،
آيه‌لر اوخودو، اوجالتدي سسي:
«- فَتَبارَكَ الله» دئدي:«- ياالله،
سنين اؤز بيلديگين ياخشيدير، بالله»
دُنيادا ياراتماق ايشيندير
سنين،
سنين عبدين اولماق بورجو بنده‌نين.
خيالدا گؤيلري زيارت ائتدي،
بيردن هوشدان چيخيب اؤزۆندن گئتدي.
الله بخش ائتميشدير، بير اوغول اونا،
آللاهين وئرگي‌سي گلرمي سانا؟
ايكي‌اۆچ‌گۆن‌سونرا قوهوم
قونشونو،
بير آرايا ييغدي حاج
عبدالحميد.
شادياناليق ائتدي چاي شيرني وئردي،
گؤزلرينده سئوگي
كؤنلۆنده اميد.
خامنه‌نين ان عاليم
ماللاسي گلدي،
صلوات گؤنده‌رسين، اوخوسون
قرآن.
حاج عبدالحميدي دعا ائيله‌سين،
اونا چوخ گؤرمه‌سين
اوشاغي دوران.
آديني «محمّد» قويدو اوشاغين،
اوخودو اذاني ساغ
قولاغينا.
قدمي خِيردير، يئيدير
سؤيله‌دي،
دئدي اقامه‌ني سول
قولاغينا.
سئچميشدير او ماللا ان
گؤزه‌ل آدي،
آناسي بير راحت نفس
چكيردي.
گؤزلريني يومموش
رؤيالاريندا،
گله‌جك حيات چۆن
چيچك اكيردي.
آنا بير گئرچكدير، دانيلماز
گئرچك،
«آنا حقّي تانريي حقّي» دئميشيك.
آنا حقّين آياق آلتينا
سالساق،
ظلم ائديب تانري‌نين
حقّين يئميشيك.
سِير ائيله رتبه‌سين
باخ مقامينا،
تانري آنالارا وئرميش
جنّتي.
اوغلو بويا- باشا
چاتانا قده‌ر،
آنا قبول ائدير هر
اذيّتي.
آنانين كمالي، آنا
ادراكي،
معراجا يۆكسلده‌ر اوغولو
قيزي.
آنا سۆتۆ تميز اولارسا،
اوغلو،
فتح ائده‌ر گۆنشي،
آيي، اولدوزو.
فضيلت‌لي آنا، تقوالي
آنا،
مقدس آرزوسون توپراغا
وئرمز.
نور ياغار آنانين
يان- يؤره‌سيندن،
شيطان صاف سئوگي‌نين قوينونا گيرمز.
حكمت بولاغي‌ميش سؤزۆ
آنامين،
ناغيلي، نغمه‌سي، ترانه‌لري.
اؤيۆدۆ، دعاسي، حربه
- زورباسي،
قولاغيمدا قاليب
ايللردن بري.
معنوي دُنياسي، حياتي
پارلاق،
نغمه‌سي الاهي، سؤزۆ الاهي.
يۆكسك ذيروه‌لرده ياشايير آنام
ديله‌گي الاهي، اؤزۆ الاهي.
الاهي موهبت، الاهي
وئرگي،
سنيندير، منيمدير باجيم، قارداشيم.
بئله بير ذيروه‌دن قوپوب گليره‌م،
يادلار قارشيسيندا اوجالير باشيم.
فَلا تـَقُل
لَهُما اُف‌ٍّ وَ لا تـَنْهَرْهُما وَ قُل لَهـُما قُولاً كَريماً
(اسراء/23)
گۆن به گۆن يۆكسلدي
محمد، قيزيم!
دؤرد ياشلي، بئش‌ياشلي بير اوغلان اولدو.
كؤكسۆ صحبت دولو خان آناسي‌نين،
حكايت‌لريله قولاغي دولدو.
يازين او سئللمه ياغيشلاريندا،
قيشين چووغون دولو چن هاواسيندا،
يايدا، گۆزده، يازدا، پاييزدا، قيشدا،
هرنه‌يي گؤرۆردۆ اؤز آناسيندا.
تقوالي آناسي لاپ تك
باشينا،
اۆچ - دؤرد ايل اوغلونو تربيه ائتدي.
بير نئچه ايل سونرا، «ماخاچ قالا»دا،
آتانين تجارت ايشلري بيتدي.
خامنه‌يه گلينجه اوغلون
چاغيردي،
اۆزۆن گؤزۆن اؤپۆب باغرينا باسدي.
«- داغيستانا بابا مني‌ده آپار»
محمد آغلادي، او قولاق آسدي:
«-بابا، دۆنن سني يوخودا
گؤردۆم،
منه درس دئييردين مكتب خانادا.
دُوره اوتورموشدوق حصيرلر اۆسته،
بۆتۆن اوشاقلارلا، من‌ده، آنادا»
وَ مِنْ آياتِه
خَلْقُ السَّمواتِ وَ الاَرْضِ
وَ اخْتِلافُ
الْسِنَتِكُم و اَلـــْوانِكُم اِنَّ في ذلِكَ لاياتٍ لِلْعالِمين.
(الروم/ 22)
خامنه نين بۆسبۆتۆن
مسجدلرينده،
اوشاقلار درس اوخور حصيرلر اۆسته.
مسجدلرده هرگۆن شربت وئريلير،
آخوندون آلتينا خالچا سريلير.
ابجد، هوز، حُطّي بير - بير اوخونور،
گله‌جك چون جانلي خيال توخونور.
درسلر اۆچ سطحده مسجدده گئدير
اوشاق بير - بيريله رقابت ائدير.
بيرينجي سطحده: اوخور جزء عمه،
حركه‌ني، حرفي اؤيره‌نير بيرده.
ايكينجي سطحده: «آنا ديلي»
لي،
اوخويور، تانييير شانلي ائليني.
«رشديه»
يازميشدير گؤزه‌ل خطّيله،
يايميشدير هر يانا اوخونسون دئيه.
اۆچۆنجۆ سطحده: قرآن دئييردي،
آخوند حكمت وئرير، دين اؤيره‌ديردي.
آتا محمّدي قويدو
مكتبه،
يؤنلسين قرآنا، علمه، ادبه.
محمد بير ايلده هم جزء عمه‌ني،
اوخودو، بيتيردي هم چره‌كه‌ني1
اوشاقلاردان بۆتۆن قاباغا كئچدي،
جهالت كؤكۆنۆ بيلگيله بيچدي.
«ايكي‌سطحه»كئچدي‌سكگيزياشيندا،
«آنا ديل»
اوخودو، كۆرسۆ باشيندا.
«حاج ميرزا حسن رشديه»
كيمي،
دانيشديغي تكي بۆتۆن سؤزلري،
يازيردي لوحه‌يه، نئي قلميله.
ديلين اؤيره‌نيردي آخوند اليله.
محمد، گل اوغلوم، اوخو بو سؤزۆ،
بير گۆن اونا دئدي آخوندون اؤزۆ.
محمد اوخودو: اوشاقلار، حاضير!
«حسن بن مهدي رشديه»
يازير:
«بير چمن‌زار، بير
گؤزه‌ل اوتلاق،
اولموش ايدي ايكي اؤكۆزه ياتاق.
اوتلاماق ايسته‌سه، اوتو وار بول،
ايچمك‌ايسترسه، سو يانيندا، سو، بول.
ارسلان اولدو حالدان آگاه،
ايسته‌دي اولسون اونلارا همراه.
يعني اوتلاقدا مقام
ائتسين،
آنلاري اؤلدۆرۆب طعام ائتسين.
وئرمه‌ديلر اؤكۆزلر اونا مجال،
اتفاق ائتديلر، اولوب هم حال،
شير حمله ائده‌نده شب يا روز،
گؤستريردي اولار اونا بوينوز.
شير گؤردۆ كي اولمايير چاره،
حيله‌يه اۆز چئويردي بيچاره
يانلاييب آنلارين بيريني ياواش،
دئدي:«- بند اولما يولداشا، قارداش!
اوتلا صحرايي، گزگيلن تنها،
سنه مندن اولور حمايتها!
اثر ائتدي اؤكۆزه شير سؤزۆ،
ياغلي سؤزلره آخدي پيل گؤزۆ.
اولدو بو سؤزله ياردان تنها،
ائتمه‌دي مِيل يولداشا، اصلا.
شير چون ياري ائيله‌دي اغيار،
تك به تك ائتدي آنلاري مردار.
بودو مقصود قصّه‌دن حصّه،
متّفق قوم چكمه‌دي غصّه.»2
آخوند دئدي اونا:- «اوغلوم، آفرين
درسيني اوخودون چوخ شيرين، شيرين.
آتاوا آناوا مبارك اولسون،
اونلارين اۆره‌گي سئوينجله دولسون.
سني خلف ائتسين حق‌ّ تعالا
بركتلر اولسون، سنه، آي بالا.»
سونرا آخوند اونا دئدي
نفاقدان،
اتفاق، اتحاد، همده شقاقدان.
قرآندان آيه‌لر گتيردي اونا،
آللاهين بويروغو گلرمي سانا؟
هم ظلمدن دانيشدي همده عدلدن،
محمّد آخونددان اؤيرندي هرفن.
اۆچۆنجۆ سطحده، «مختارنامه»ني،
«نصابي»، «معجمي»، همده«دُرّه»ني،
اوخودو، اؤيرندي عجم ديليني،
خدمته، باغلادي او اؤز بئليني.
عجمجه اؤيرنمك‌فرض‌اولموش بيزه
كئچميشدن بو ايميش عادت تبريزه.
عجمجه يازانلار بؤيۆك شاعرلر،
هر فنده علمده ديلده ماهرلر،
تۆركلر آراسيندا يئتيشميش، چيخميش.
اؤزگيه ائو تيكميش، اؤز ائوين ييخميش!
ايشين بير اۆزۆنده سئوينج اولسادا،
دالغالي اۆره‌گيم راضي قالسادا،
او بيري اۆزۆنده بير آجي غم‌وار؛
«يانيق كرم» ايله بيرده «ديلقم» وار.
اؤزگيه «نظامي» بسله‌ميش ائليم،
ديللره سركرده اولموشدور ديليم.
ولاكن چوخ مردار ساتقين نوچه‌لر،
دشمنليگه تۆركۆ - عجمي چكر.
تۆرك-فارس دشمنليگين تبليغ ائديرلر،
نوچه‌لر، «كسروي» يولون گئديرلر.
بير، حكمت سؤيله‌نير مين ايلدن بري:
«فارس‌سيز تۆرك اولانماز!»ديللر ازبري.
بير- بيره باغلانميش طالعيميز باخ،
بونو دويماليييق دريندن، آنجاق.
آتاليق ائتميشدير بابالاريميز،
فارسادا، كۆرده‌ده، گل اينان، آي قيز!
اما كي كيمسه‌نين ديلين كسمه‌ميش،
تاريخين دانماميش، ائلين باسماميش.
ياراتميش كۆرده‌ده تاريخ، فارسادا،
مدنيّت وئرميش، او، كؤچمۆش هارا.
باشلارين اگمه‌ميش هئچ زمان يادا،
ساتقينلار اونلارا دؤنۆك چيخسادا.
مظلومدان حمايت ائتميش باباميز،
سيغينما قالاسي اولموشدو تبريز.
تاريخ آدديملاميش صاباحا ساري،
تۆرك آدديملاريله هر ايلك باهاري.
هر تۆرك انسانليغين دادلي ميوه‌سي،
جسارت نغمه‌سي، شجاعت سسي،
ايگيدليك رمزي‌دير، حيات قوخوسو،
دۆشۆنجه‌آغاجين بير سوواران سو.
قوللاري قاندالدا اولسادا بئله،
آزاد ايلقاريني وئرمه‌ميش اله.
اۆره‌گيم دولودور،
يازارام سونرا،
كئچك شيخ محمد اوشاقليغينا.
اون ايكي ياشينا چاتان زماندا،
مكتبي قورتاردي بابا يوردوندا.
قرآن اؤيرنميشدي، بيليردي احكام،
شعر سؤيله‌ييردي، آليردي چوخ كام.
ادبيات، تاريخ، اخلاق اوخوموش،
بيز اوخويانلاري، چوخدان توخوموش.
گؤرجك بو حالتي حاج عبدالحميد،
اوغلونا باغلادي درياجا اميد.
سوادلي، بيليك‌لي يئني يئتمه‌ني،
چاغيردي يانينا سؤيله‌سين بونو:
«- سن اوغلوم اولوبسان يئتگين‌بير جوان،
ايندي تجارته ال قويماليسان.
داغيستانا ساري، ماخاچ قالايا،
گئده‌ليم اورادا ذوقۆنۆ سينا.
تجارت ايشي‌نين اؤيرن اسرارين،
چوخالسين بو ايشده قازانجين، وارين.»
«- آتاسي سؤزۆندن چيخماز او»، دئدي
آناسي، باشماغين گئييمين وئردي.
خامنه‌دن سفره چيخدي محمّد،
سفر اثناسيندا پيشه‌جك البت.
لا تـَاكُلوُا
اَمْوالَكُمْ بَينَكُمْ بـِالْباطِلِ اِلاَّ اَنْ تـَكُون‌َ تِجَارَةً
(نساء/29)
بير نئچه آي قالدي
ماخاچ قالادا.
تجارت ايشينه باخيردي اوردا.
حسابين ساخليردي آليش وئريشين،
سِير ائديردي اوردا زمان گئديشين.
روسلارلا ياناشي داغيستانليلار،
چئچن‌لر، تاتارلار، هم عثمانليلار،
آذربايجانليلار ايله بيرليكده،
گميلر ساليردي هر گۆن دنيزه.
محمد ذكالي بير جوان كيمي،
سئزيردي باش وئره‌ن هر مراسيمي.
سُنّي‌ني، شيعه‌ني، وهّابي‌لري،
اوردا سئير ائديردي گؤزه‌تچي تكي.
ناحقّي آتاراق، حقّي سئچيردي،
حقيقت شربتين چكيب ايچيردي.
اوجا اذان سسي مناره‌لردن
يۆكسليردي هرگۆن گؤيه شه‌هردن.
«دربند» شه‌هريندن گلن شيعه‌لر
اورادا، مكتب‌ده تأسيس ائتميشلر.
شريعت علميني اوخويوردولار
تفسير ائديرديلر قرآن، شارحا شار.
هم «كشف الحقايق»، «تفسير البيان»
همي‌ده «تفسير عن نكت القرآن»
تملي قورولور، سؤزۆ يازيلير.
اۆره‌كلر ايچينده شرحي قازيلير.
گؤزلـه‌ييردي گلن ايام بونلاري،
چاپ اولسون، ياييلسين هر يانا ساري.
گؤزلـه‌ييردي دوران «نعمان زاده»ني.
ياخشي دينلمه‌لي اوخوجو بونو.
داغيستان«شيخ
شاميل» يوردونا دؤنمۆش،
ايندي خصم اليله چيراغي سؤنمۆش.
داغيستان اسلامين بايراقداريدير،
تقوا دُنياسي‌نين ايلك باهاريدير.
فضيلت مۆلكۆنۆن مركزي اولان
داغيستان ياداكي آذربايجان،
اسكيدن دايانميش دشمن اؤنۆنده،
روسا، ائرمني‌يه دؤزمۆش، او گۆنده.
داغيستان مۆلكۆنه گئده‌ندن بري،
محمد گزيردي بۆتۆن يئرلري.
مسجدي،كيلسه‌ني،جامعي گؤردۆ،
ذهنينده دۆشۆنجه دُنياسين هؤردۆ.
اوخوماق هوسي، اؤيرنمك مِيلي.
اونو ائيله‌ييردي ناراحت خِيلي.
دشمن قارشيسيندا دايانماق اۆچۆن،
مظلوملار اودونا هم يانماق اۆچۆن.
درين بيليك‌لره يئيه‌لنمگي،
زحمتي، يازماغي همده امگي.
سئويردي‌محمد، شيرين جان كيمي،
بونو بسله‌ييردي بير ايمان كيمي.
بير نئچه آي سونرا، دئدي اوجادان:
«قالا بيلميرم من بوردا، آتاجان!».
آتاسي دويموشدو روحيّاتيني،
آجيلي ائتمه‌دن هئچ اوقاتيني،
دئدي: «- اولسون اوغلوم، آپاررام‌سني،
گؤره‌رسن بيرداها گؤزه‌ل خامنه‌ني.
تبريزه يوللارام بيرده
سني من،
اوردا اوخويارسان هرنه ايسته‌سن ...»
وَ وَصَّيناَ
اْلِانـــْسان‌َ في عامين بــِوالِدَيهِ حَمَلَتـــْهُ اُمَّه‌ُ وَهْناً عَلي
وَهْنٍ وَ فِصالُهُ
(لقمان/
14)
بير نئچه آي سونرا گؤردۆ
آناسي،
محمد دير گلير، كؤنۆل آيناسي.
گليب اؤپدۆ الين، اؤپدۆ اتگين،
او ضايع ائده‌رمي آنا امگين؟
آرادان‌چوخ اؤتمۆش،ياي گئتميش قيشا،
آنانين اۆره‌گي دۆشمۆش تشويشه.
چوخدان‌آيريلميشدي پاك قوجاغيندان،
سيغميردي روحونا اونون داغيستان.
آنا قوجاغينا دؤندۆ محمّد،
اؤزۆنه قاييدار صاف روحلار البت.
«- آناجان،آغلاما، گؤز ياشلارين سيل،
مني اؤز يانيندا، اؤز قوينوندا بيل!»
دئيه‌رك محمد، گۆلدۆ، آغلادي،
آنايلا بير داها پيمان باغلادي:
«- سنين يانيندايام گؤزه‌ل آناجان،
آناسيز ياشاماز دُنيادا انسان.»
دئدي عبدالحميد خانيمينا: «- باخ!
محمد تبريزده درس اوخوياجاق.»
سئويندي بو سؤزدن رقيّه سلطان،
دئدي: «- حق ساخلاسين سني هر زمان.
اوغلومو گتيره‌ن الين ساغ اولسون،
اۆره‌گين سئوينجله - شادليقلا دولسون!»
محمدي آليب باغرينا باسدي،
حرمانين، غصه‌نين يوللارين كسدي.
وَيزَكّيهِم وَ
يعَلِّمُهُمُ الكِتابَ وَ الْحِكْمَة
(جمعه/ 2)
تبريز بيلي يوردونا سفر
آغ گئيينميش ايدي
بۆتۆن طبيعت،
بادام آغاجلاري گول‌لنن زامان.
خياللار اۆزۆردۆ ياشيل داغلاردا،
ذيروه‌لر باشيني آلميشدي دومان.
عيني آچيلميشدي ميشو
داغي‌نين،
دنيزه باخيردي گۆللر ايچيندن.
توراغايي قالخيب سئيران ائديردي،
يام - ياشيل چؤللرين انگينليگيندن.
لپه‌لر قالخيردي «اورمو»
گؤلۆندن،
ياماجي آليردي، دۆزۆ آليردي.
قايناييب چاغلايان نغمه‌لر كيمي،
دۆز نگاهليقلارا سس - كۆي ساليردي.
نمازين قيلميشدي رقيّه
سلطان،
دُعايا دورموشدو سحر شئهينده.
آللاها يالوارير دولو گؤزۆيله،
دئييردي:«- الله من مقصر بنده،
اوغلومو باخ سنه تاپيشيريرام،
قادادان بلادان سن اونو ساخلا.
اوغلومو دره‌دن ذيروه‌يه چاتدير،
جايسا، ائله اوردا الاهي حاخلا!»
انساني ساخلايار هر
بير بلادان،
آنانين تدبيري، خِير دعاسي.
دئييرلر هرگئجه، هر سحر آخشام
ذيروه‌يه يۆكسلر آنا صداسي.
هۆندۆر داغلاردان‌دا يوخاري
قالخار،
آغاردار گؤيلري دان يئري كيمي.
آنا اۆره‌گيندن قوپان آغلاييش،
ترپه‌ده‌ر ذيروه‌ني تيتره‌ده‌ر سيمي.
او گۆنده اوغلونو يولا
ساليردي،
بير آنا خامنه‌دن تبريزه ساري.
اؤرپگين باشينا آتيب چيخميشدي،
سو سپسين دالينجا اوغلونون باري.
تبريزه يوللاندي اون
دؤرد ياشيندا،
بير باهار چاغيندا، يازين باشيندا.
دروازادان كئچيب ايچه‌ري گيردي،
اركين قاباغيندا، آتاسي دوردو.
گؤزلري ياشاردي، قلبي دؤيوندۆ،
نغمه اوخوماغا قالخيب اؤيۆندۆ.
اركين تاريخيني يادينا سالدي،
درين تلاطم‌لي فكرته دالدي.
كئچدي «خدابنده»
گؤزۆ اؤنۆندن،
باخدي اركه ساري «سلطانيه»دن.
«شاه ختايي» قالخدي «سايين»
داغينا،
گؤزۆندن ياش آخدي اركين باغينا.
«عبدالحميد»
ياواش ترنم ائدير،
محمد دالينجا يولونو گئدير:
اي سينه‌سي
مينلر يارا ايله دولو اركيم،
يۆزلرجه ايلين خاطره‌سي، اي اولو اركيم!
غيرتلي اوغوللار وطني، مسكني سن‌سن،
مينلرجه مقدس جسدين مدفني سن‌سن.
اونلارجا شهنشاهلاري سويدون يولا سالدين،
عُمرۆن باشا وئردين اوجا، باشي اوجا قالدين.
آللاها باش اگدين، جلالين شانين اوجالدي،
اوغلون بؤيۆدۆ قيصر رومدان‌دا باج آلدي.
شاهلار شاهي اگدي باشيني اوغلون اؤنۆنده،
سن فخر ايله قالدين ابدي، دۆن‌ده، بوگۆن‌ده.
صرّاف ايله لعليله، شكوهي‌لري دوغدون،
نامردلري هرتنگه‌ده، هر دؤنگه‌ده بوغدون.
سارسيتدي دني دشمني كبرين اوجا اركيم،
هر بير اويونا طنز ايله گۆلدۆن قوجا اركيم.
آلنيم آياغين تورپاغينا قويماغا گلديم،
شيطان گؤزۆنۆ سجده ايله اويماغا
گلديم.
آتاسي‌نين دردين
سانكي دويوردو،
محمد، آغليردي گؤزۆن اوغوردو.
ايكيسي كئچديلر اركين اؤنۆندن،
«گؤي مسجد»ه ساري يوللاندي همن.
«خياوان»دا
اونون قوهومو وارميش،
«سيد حسين»
آدلي ملا اولارميش.
خامنه‌لي بير سيّد، تقوالي سيّد،
بيليك‌لي، علملي، چوخ عالي سيد.
پئشنمازي «كريم خان» مسجدي‌نين،
فقاهتي، علمي، دنيز تك درين.
آتاسي سؤيله‌دي:«- گل گئده‌ك اورا،
حاجي سيد حسين ائوينه، بالا!»
«خياوان»
آغزيندا، اۆستۆنده يولون،
گؤره‌نده جاده‌نين آرخادا سولون.
«گؤي مسجد»ه ساري يئنه چاتاندا،
كارواني ساخلادي سؤيله‌دي آتا:
«جهانشاه
حقيقي» يادگاري،
يارميش ادواري،
بودور، تبريز ايچينده گؤيلره
قالخماقدا انواري.
فضاسي بير
الاهي نور ايله دولموشدو گؤي قبّه،
بوراخميش‌حيرته‌اقماري، شمسي، چرخِ دواري.
شاخاندا ايلديريملار قيسقانان چرخين هواسيندان،
سؤكۆب‌يانديرماق‌ايسترميشسه‌گؤي‌گۆنبذدن‌آثاري،
طبيعت‌تيتره‌ميش،خلقت
آياقلانميش، فغان ائتميش،
آماندير ياخما قلبين تبريزين، ييغ- تيغ غداري.
ايشيق قايناغيني
غارت ائده‌نلر صف به صف دورموش،
قارانليقلار ايچيندن ترپه‌ديب قالخيزميش اشراري.
كئچيرتمك‌چۆن،
بۆتۆن‌شرقه‌الاهي‌نورساچان‌شمعي،
مسلط ائيله‌ميش بو مسجده هر شاهي، طراري.
بو گۆن‌هم، باخ‌محمد!
سينه گرميش باطل اوغروندا،
بو گؤي مسجددير اوغلوم، گل قورو
بو گنج اسراري.
الين آللاها
آچميش بير ايشيق درياسيدير اوغلوم،
منيم تك سن‌ده باخسان نور گؤره‌رسن بوردا احجاري.
آماندير قويما
تحقير ائيله‌سين ياد، قالخ اؤزۆن‌گؤستر،
تكان وئر ذوالفقاره قاوگيلن اوباشي، اشراري.
بورا تبريزدير، دُنيا بويو
تاريخي فتح ائتميش،
يوخويا گئتمز البته بو شهرين بخت بيداري.
اونون‌دۆزگۆن‌كيمي
اولادي‌‌واردير،قورخو يوخ،غم يوخ،
شجاعت ميدانين قويمازلار اونلار صدقدن عاري.
بورا فضيلتين ايشيق
بولاغي،
صائبلر اؤلكه‌سي خطيب‌لر يوردو.
قوجا تبريزدير بو، هر زمان، هر واخت
دشمن قارشيسيندا آسلان تك دوردو.
يئتگينليك‌لر ائوي،
كمال اوباسي،
قهرمانليقلارين بئشيگي تبريز.
غيرتين،عصمتين اوجا ذيروه‌سي،
بشر تاريخي‌نين كئشيگي تبريز.
سني چئينتمره‌م
نامرد يادلارا،
اولو اجداديمدان قالان مكانيم.
نئجه من ياشاييم آدسيز، نشان‌‌سيز،
تاريخيم، شرفيم، ايليگيم، قانيم.
مجسم غيرتي اسلاميّتين،
قورقودلاردان قالان اؤيۆد قايناغي.
تبريزيم، بير سؤزله سؤيله‌سم اوغلوم:
ائليمين اوبامين يانار چراغي.
وطن دارالعلمي، ائل
بيلي يوردو،
آيه‌لري تفسير ائيله‌ين شه‌هر.
دۆزلري آرخادا قويوب گلميشم،
عشق ايله آخميشام باخ گؤر، نه ته‌هر!
خامنه‌دن گلميشم قوجاغينا من،
بورا وطن دئديم فضولي ساياق.
پناهيم، يورد- يووام، آنام، آمانيم،
دوردوم كئشيگينده ار كيمي اوياق.
آردي وار. . .
