وَقَالَ الذّينَ
اُوتــُوا العِلْمَ وَيـْلَكُم ثــَوابُ اللهِ خَيرٌ لِمَنْ امَنَ وَ عَمِلَ
صالِحاً.
(قصص/80)
تبريزه گلندن نئچه
گۆن سونرا،
محمد يوللاندي «طالبيه»يه.
اوردا بير حجره‌يه يئرلشديريلدي
درسه باشلاياراق اولدو طلبه.
اوردا بير نئچه ايل
قاليب داياندي،
اوخوتدولار اونا «لمعه»، «امثله»،
«عوامل»،«صرف‌مير»،بيرده
«سيوطي»،
«منطق كُبري»، هم «شرح الامثله».
«حاجي ميرزا ابوالحسن
انگجي»،
اونا «فقه» اؤيرتدي، هم «اصول» دئدي.
بيرده «حاجي ميرزا حسن مجتهد»،
اونا «شيخ محمد» آديني وئردي.
شريعت علميندن قيراقدا
اونا
ميرزا عبدالعلي «حكمت» اؤيرتدي.
«ارثماطيق»،همده «هندسه»،
«حساب»،
بيرده«عروض»،«نجوم»،«هئيت»اؤيرتدي.
بوردا شيخ محمد، خامنه‌لي جوان
اجتهاد مرزينه ياخينلاشيردي.3
ماخاچ قالا گزن، دربندي گؤرن،
علمين ذيروه‌لرين بير – بير آشيردي.
«طبيعيات»،«تاريخ»،«رجال» اؤيرنميش،
اوخوموش «فلسفه»، اوخوموش «كلام».
«ادبيات»،
«بديع»، «منشآت» گؤرمۆش،
يازيردي «رساله»، يازيردي «احكام».
فَانـــْكِحُوا ما
طابَ لَكُم مِنَ النِسَّاءِ
(نساء / 3)
حاجي سيد حسين،
خامنه‌لي عالِم،
داها چوخ سئويردي شيخ محمدي.
انقلابچي روحلو، اولو پئشنماز،
داها چوخ سئويردي شيخ محمدي.
يانيندا بسليردي بير
طاهر كيمي،
عمّاندان آيريلميش جواهر كيمي.
اونو يئتيرميشدي بير شاعر كيمي،
داها چوخ سئويردي شيخ محمدي.
اۆره‌گي‌نين بارين
يئديرده‌جكميش،
اونا شيخ محمد خوش گله‌جكميش.
اميدلر ييغناغي، بيرده ديلكميش،
داها چوخ سئويردي شيخ محمدي.
آينا بولاقلاردان
دورو آخاني،
شجاعت قايناغي، محجوب باخاني،
وئردي اونا قيزي «خير النّسا»ني،
داها چوخ سئويردي شيخ محمدي.
وَ رَفَعَ
بَعْضَكُمْ فَوْقَ بَعْضٍ دَرَجَاتٍ لَيبلُوكُمْ في ما آتاكُم.
(الانعام/ 165)
بئله‌ليكله، «شيخ محمد»
ائولندي
«خياوان»ين
بؤيۆك ماللاسي اولدو.
«خير النّسا» اونون آغير گۆنلرده
دؤزۆمله يانيندا قالاسي اولدو.
وفاتيندان سونرا «سيد حسين»ين،
پئشنمازليق ائتدي رسميت ايله.
هم‌گۆندۆز، هم‌آخشام نماز قيليردي،
او، اؤز مسجدينده جماعت ايله.
«كريم خان»مسجدين اونون آديله،
تانيردي جماعت تبريزده بۆتۆن.
«خياوان»
ترپه‌نيب دالغالانيردي،
منبره قالخاندا هفته‌ده بير گۆن.
مِيدان اوخويوردو
منبرده هر وقت،
دئييردي شيطانا:«- باش اگ انسانا!»
ظالمي، شاهلاري، غصب كارلاري،
چاغيريردي هر وقت اولو مِيدانا.
يوخوسوز قويوردو غصب
كارلاري،
منبرده موعظه ائده‌ن زماندا.
تهراندا لرزه‌يه ساليردي شاهي،
منبرين اۆستۆنده حق دانيشاندا.
اونا «خياباني» دئييردي ملت،
منبرينه ميندن چوخو گليردي.4
ايشيقلي گؤزلري، اودلو سؤزلري،
مسجدده ظلمتين باغرين دليردي.
موعظه ايللري، ائلين
غمينه،
«خياباني»
قالدي، قايغي‌‌سين چكدي.
شرعي مساله‌لر سياستي‌ده،
دئييب خلقه، حقّين توخومون اكدي.
همده درس دئييردي
طالبيّه‌ده،
فقه، اصول، رياضي اوخودوردو او.
نجوم دا، هئيت‌ده تدريس ائديردي،
دورمادان يازيردي هم پوزوردو او.
لايــُحِبُّ‌اللهُالجَهْرَ
بِالسُّوءِ مِنَ‌القَوْلِ‌اِلاَّمَنْ ظُلِمَ
(نساء/148)
چوخ اولموش تبريزين قانلي
گۆنلري،
شانلي سنه‌لري، شانلي گۆنلري.
بؤلگه‌يه‌‌روح وئرميش جان باغيشلاميش،
تاريخي ديرچلتميش جانلي گۆنلري
قيشين‌چووغونوندا ياي بۆركۆسۆنده،
دشمنلره ساري گرميشدير سينه.
صاباحا بويلانان قانلي ايللرده،
آزادليق طالعين يازميش ديز اۆسته.
مين اۆچ يۆز ايگيرمي
دؤردۆنجۆ ايلدير،
تبريز دالغالانير
يئرده دايانمير.
ياغديرير بلالار، تؤكۆر بومبالار
قهرمان شه‌هردن دشمن اوتانمير.
سياسي حياتي خياباني‌نين،
يئني بير آخيندا باشلاماقدادير.5
انجمن قورولموش آذربايجاندا،
دشمن هر طرفدن داشلاماقدادير.
عدالت، مساوات،
بيرليك ايسته‌يير،
خياباني هرگۆن منبره چيخير.
حدتلي نۆطقيله، گۆنده يۆز كره،
استبداد قصريني داغيدير، ييخير.
بودور شعبان آيي،
مبارك بيرگۆن،
مبارك ساعاتدا دئدي اوجادان:
«- تبريزده قورموشوق «ملّي انجمن»6
بيزه يول گؤستريب سؤيله‌ييب قرآن:
الله يارديم ائتمز هئچ بير ظالمه،
مظلومون ناله‌سين ائشيده‌ر، بيلر.
حالتين دگيشمك ايسته‌ين ائلين،
دگيشر حالتين، اونا رحم ائده‌ر.»
خياباني اولدو رهبر اورادا،7
عمومي، خصوصي مجلسلر قوردو.8
دانيشدي هر آخشام، نۆطۆق سؤيله‌دي،
ظلمۆن قارشيسيندا دايانيب دوردو.
قوردو بيرنئچه‌ده
فرعي انجمن،
«مساوات»، «اتحاد»، «حقيقت» آدلي،
بيرده‌كي «خياوان انجمني»نده،
اؤزۆ دانيشيردي هر آخشام چاغي.
تبريزده مشروطه طبلي
چاليندي،
شاهي تهراندا دا تسليم ائيله‌دي.
مظفرالدين شاه اۆچ آيدان
سونرا،
باش اگدي شاهليغين آتين پئيله‌دي.
خياباني اوگۆن تبريز شهرينده
انجمن‌ليلره نۆطۆق سؤيله‌دي.
مشروطه فرمانين امضالاماغي،
اونون بو ايشيني تحسين ائيله‌دي.
اِنَّ الله لا يصلِحُ
عَمَلَ الْمُفْسِدينْ
(يونس/81)
محمد علي شاه تخته چيخاندان،
آزادي‌خواهلارا وئرميردي آمان.
تبعيد ائتديريردي، شهيد ائديردي،
عجم شاهلاري‌نين يولون گئديردي.
«خسروپرويز»كيمي، «نوشيره‌وان»تك،
اولايدي تاريخده او «عادل» گره‌ك!
بۆتۆن بابالاري شاه اولموش اونون،
گئديردي دورمادان اونلارين يولون.
تاريخ قارشيسيندا باخسان شاهلارا،
هاميسي‌‌نين اولموش اۆزلري قارا.
باباسي داريوش فخر ائديردي: «- به!
مصرده اؤلدۆردۆم پيشك‌لري‌ده.»
كوروش‌سؤيله‌ييردي:«كيمسه‌قويماديم،
ديري بابل‌ده من، ديريلتديم
آديم!»
شاپور ايسه بۆتۆن يازان پوزانين،
ايپ كئچيرتمك اۆچۆن، دليردي‌چيگنين.
هاميسي فضيلت، بيليك دشمني،
هاوايا ساووران گؤزه‌ل وطني.
محمدعلي شاه «خلف!» اوغول تك،
باخاليم تاريخده نه ائتدي گؤره‌ك:
باغلاتديردي بۆتۆن گۆنده‌ليك‌لري،
اؤلدۆردۆ تهراندا حق سؤز دئيني.
«لياخوف»
امريله توپا باغلادي،
شورا مجلسيني، هركس آغلادي.
اؤلدۆردۆتدۆ بير چوخ مجاهدلري،
تختي - تاجي اله آلديقدان بري.
سونرادا تبريزه حمله امريني،
وئردي قازاقلارا9، سارسيلتسين
ديني.
هرگۆن پۆسگۆرۆردۆ آغزيندان قان، قان!
داها بيلمه‌ييردي: الله قورويان-
چراغي كيمسنه سؤندۆره بيلمز،
لكه‌ني نه بومبا نه‌ده توپ سيلمز.
تبريز،
شاهلار شاهين هئچده سايمادان،
اؤز قوردوغو يئني مقدّس دوران،
مقدّس آرزولار مسكني شه‌هر،
گؤره‌ليم پوسقودا دوردو نه ته‌هر:
قوي ايلكجه تبريزي اؤيۆم قيزيم چين،
تبريزه يازميشديم بو شعري بير گۆن:
* * *
سن منيم
شعريمين روحونا دؤندۆن،
مقدّس آرزولو تبريزيم منيم.
سيلينمز كؤنلۆمدن قهرمان آدين،
مقدّس آرزولو تبريزيم منيم.
من سنده
تاپميشام بابك عنادين،
باهار گۆنلري‌نين قوخوسون، دادين.
چيخماز خاطريمدن هئچ زمان آدين
مقدّس آرزولو تبريزيم منيم.
سن منيم
حياتيم، بؤيۆك آماليم،
عشقيم، افتخاريم، جاه و جلاليم،
سندن آيريلمازدير فكريم، خياليم،
مقدس آرزولو تبريزيم منيم.
* * *
تبريز قوردو او ايل يئني بير دوران
اون بير آي داياندي، دورمادي، اينان!
انقلابچيلاري ايشه چاغيردي،
استبدادچيلارا قالخيب باغيردي.
محكمه ياراتدي، قاراقول قوردو،
محمد علي شاه اؤنۆنده
دوردو.
ستارخان، باقرخان ياراندي او گۆن
تبريز ماجراسين
ياخشيجا دۆشۆن.
خياباني اولموش اونلارا رهبر،
هر نه يازسان شاعر، ياز اونا، ده‌يه‌ر.
ده‌يه‌ر، ده‌يه‌ر البت، خياباني چۆن،
جان فدا ائده‌نلر، چوخ ايدي او گۆن.
«خياباني»
دئيه، هايغيردي ملّت،
سنگرلر ياراتدي ائيله‌دي همّت!
اِنْفِروا خِفافاً
وَ ثِقالاً وَ جاهِدوُا بِاَموالِكُم وَ اَنْفُسِكُم في سَبيلِ اللهِ
ذَلِكُم‌‌خيرٌ
لَكُم اِنْ كُنـْتـــُم تَعْلَمُونْ.
(توبه/41)
يئتيشدي تبريزه شاهين
اوردوسو،
اون بير آيليق ساواش باشلاناجاقدير.
بئله ظن ائتمه كي اوردو اوداجاق،
شاهچيلارين قصري داشلاناجاقدير.
ووروشقان، دؤيۆشچۆ، ساواشچي
ارلر،
قافقازدان‌دا گلميش چوخلو مسلمان،
تبريزه دولموشلار دسته به دسته،
قورخويا دۆشۆردۆ گۆن به گۆن تهران.
«ستارخان»،
امره قيز محله‌سينده،
بايراقلاري بير - بير يئره ساليردي.
«باقرخان»،
خياوان كوچه‌لرينده،
«خياباني»دن
چوخ الهام آليردي.
گئجه‌لر مسجدده نۆطۆق
سؤيله‌يير،
گۆندۆزلر سنگرده تفنگ آتيردي.
شيخ محمد بوردا اؤرنك اولموشدو،
مسجدي سنگره گليب قاتيردي.
گئجه‌لر جهاددان دانيشان
ملاّ،
گۆندۆزده سنگرده جهاد ائديردي.
ظلم ايله ووروشور، دورمادان، بالله!
مولاسي علي(ع)نين يولون گئديردي.
جماعت نمازي اقامه
ائدير،
انجمني بۆتۆن ايمانا چكير.
غِيرت قانلاريني جوشدوران بو شيخ،
آزادليق توخومون سنگرده اكير.
اودلو سؤزلريله،
اراده‌لرين،
پولاد تك ائديردي مجاهدلرين.
دۆزگۆن ياشاياني آنا يوردونا،
تاپيردي، اؤيۆدلر وئريردي درين.10
* * *
تفنگي چيگنينده
اؤنده گئده‌ن گۆن،
باقرخان روحلاندي، ائللر روحلاندي،
رحيم خاني باسدي بيرجه حمله‌ده؛
انگليس، اودلاندي، روسيه ياندي.
قورخودان «رحيم
خان»
ائله قاچدي كي،
قازانلاريني دا آپارانمادي!
«پاخيتانوف» روسون گوبود قونسولو،
اوندان سونرا اوردا داي دايانمادي.
فَلا تـَاْسَ
عَلَي الْقَوْمَ الْكَافِرين‌َ
(المائده/ 68)
دئديلر بير گئجه
خياباني‌يه،
عين‌الدوله گلير، نه ياتيبسان، دور!
بو جلاّد، آسلانلار يوردونا گيرير،
اونون‌دا قولاغين رحيم خان تك بور!
اوتوزمين تهراندان اوردو چكيرميش،
تبريزي يانديردي، قانلار آخيتدي.
دؤرد طرفدن شهره بومبا ياغديردي،
بازاري، ائولري، يوردو داغيتدي.
بو نه‌دير؟ هر يئردن
گؤيلره قالخان؟
آنالار ناله‌سي قيزلار سسي‌‌دير!
تبريز اود پۆسگۆرۆر،كيمدير
اود ووران؟
تبريزدير، دؤز، بورا، حق نفسي‌دير.
مقدّس گئييمين اگنينه
گئييب،
تفنگين چيگنينه سالان بير ملاّ،
شاهين‌كيمي اوچان، سرو تك گئده‌ن،
اوجا بويلاردان باج آلان بير ملاّ.
ريحانلار عطريني
سنگره يايير،
شهيدلره بير- بير نماز قيليردي.
گؤزلرين ايشيقلي صاباحا
تيكيب،
انگين سمالاردان الهام آليردي.
شاه عين الدوله‌يه تلغراف ائتدي:
«- سن رحيم خان كيمي اؤزۆنۆ يورما!
داشي داش اۆستۆنده قويما تبريزده،
آلت اۆست ائيله‌گيلن بو شهري، دورما!»
امّا شيخ محمد رسواي ائيله‌دي،
عين الدوله‌ني‌ده، شاهلار شاهين‌دا.
قوي بيلسين، بيلمسه عجم دُنياسي،
آسلانلار ياتيبلار آذربايجاندا.
عين الدوله قاچدي واسمينجا ساري،
انجمنه تيكدي گؤز بۆتۆن ايران.
تهران، مشهد،
قزوين، رشت، بيرگه دئدي:
آماندير، دايانما، قالخ آذربايجان!
فَانـــْظُرْ كَيفَ
كَانَ عاقبَةُ مَكْرَهُمْ اَنــّا دَمَّرْناهُمْ وَ قَوْمَهُمْ اَجْمَعين.
(نمل/ 51)
قولاق آس قلبيمين
نيسگيلي قيزيم،
اۆره‌گيمدن آخير كاغذا سيزيم.
شاهين ال اوشاغي گئري دؤنسه‌ده،
روس ايله انگليس گلديلر يئنه.
قيرخ‌مين قوشون گؤنده‌ر،شاهلار، شاهينا،
دئديلر كي: «- يارديم ائده‌ريك سانا!»
شاهين نوكرلري پاريسه گئتدي،
شاهلار شاهي اوردان«استقراض» ائتدي.
او پول ايسته‌دي كي
تبريزي باسسين،
خياباني‌لري دارلاردان آسسين.
نفسيني كسسين حسين باغوانين،
اۆره‌گين داغلاسين آذربايجانين.
لاكن خياباني، بونا دؤزمه‌دي،
هئچده‌كۆسگۆنله‌شيب دوداق بۆزمه‌دي.
تلغراف خانايا دۆز گئتدي بيردن،
پاريس مجلسينه تئل ووردو اوردان:
«- مجلسين‌اذني،باخ، اولمادان، بيلين!
شاها پول وئريلسه، ملت اؤده‌مز!
صاباح‌شاهلارشاهي،يورددان قاچاندا،
شاهين بورجو، يۆكۆ بيزيمدير، دئمز!»
* * *
شاها پول وئرمه‌دي
فرانسا، لاكين،
روسلارا سؤيله‌دي:«- ايرانا گيرين!»
انگليس جنوبدان، روسلار شمالدان،
وطن اشغال اولدو، قوشاندي ايران.
قاتل عين‌الدوله قيرخ مين قوشونون،
گؤتۆرۆب، امر ائتدي:«- تهرانا سۆرۆن!
تبريز رۆسلاريندير، قوي اشغال اولسون،
نيقالاي سالداتي قوي شهره
دولسون!»
بودا رسوايچيليق، شاهلار شاهي‌چين،
اۆزۆ قاراليقدير، عيبدير، بيلين.
اِنَّ كَيدَ
الشَّيطانِ كانَ ضَعيفاً
(نساء/ 76)
آت چاپيردي روسلار تبريز ايچينده،
قولاق وئر دئييرم سؤزۆم يئرينده.
مرثيه يازميرام بوردا من، قيزيم!
قلبيمده آغري‌‌وار ديليمده سيزيم.
ائللر آغلاسالار قهرمانلارا،
قان آلارلار بۆتۆن گئده‌ن قانلارا.
روسو گتدي عشقين اوجوزا ساتان،
عشقه سؤز وئرمه‌ين، وجدانين آتان.
عشقدير خلقتين، تملي - داشي،
صداقتدير اونون دوغما قارداشي.
صدقي تانيمايان عشقي قانمايان،
جهل يوخوسوندان اويانماز، اينان.
وطني ده ساتار، ائلي‌‌ده ساتار،
اجنبي كؤشكۆنده ياشايار، ياتار.
تۆلكۆ دالداسيندا گيزلنن نامرد،
خياباني قلبين ائتدي دردمند.
عالِمين اۆره‌گين آغرييا سالدي،
عالم يئنه دوروب فكرته دالدي.
روسلاري قويمادي ملّتي ازسين،
گله‌جگه باخيب دۆشۆندۆ درين.
صاباحي گؤرۆردۆ، يولا باخيردي،
قارا ظلمتلره نورتك آخيردي.
اجنبي بلاسي تبريزي ساردي،
وطن اولادي‌نين گۆنۆ قاراردي.
سينديرا بيلمه‌دي لاكن شه‌هري،
نه شاه ساتقينلاري، نه روس نوكري.
آغ بايراقلار يئنه بيربه بير يئندي،
ايگيدلر آتلانيب يه‌هره ميندي.
تفنگ اللرينده كۆچه به كۆچه،
روسلاري قيرديلار لاپ اۆره‌گينجه.
«قوناق قيردي» قوپدو تبريزده قارداش،
قاچيردي شه‌هردن اراذل، اوباش.
سانكي بيرده قاينير «كلانتر كوچه»،
داها كسمير كيمسه روسلارا بئچه!
* * *
خياباني عصيان قالديردي
بوردا،
سلطنته قارشي چيخدي بو ملاّ.
بندر عباس،
گرگان، همدان، شيراز،
قالخيردي دالينجا او شيخين آز- آز.
تهراندا ترپندي تبريزه داياق،
هايغيردي،«ساغ اولسون!» دئدي، نه‌ساياق!
تهران فتح ائديلدي بيرگئجه ناگاه،
سلطنت تختيندن خلع اولدو او شاه.
«آده‌سا»يا
گئتدي تبعيدگاهينا،
ملتي بوراخدي شاه اؤز حالينا.
گيرمك ايسته‌ديسه يوردا دوغودان
دفع اولدو حمله‌سي، دۆزلدي دوران.
خلع اولدو بير ديبليك او اۆزۆ قارا،
باغلاندي دوسيه‌سي، هم دۆشدۆ دارا.
مكر ائده‌ني الله مكر ايله ييخدي،
بير آن دايانمادان بوغازين سيخدي.
وَ رَفَعْنا
بَعْضَهُمْ فَوْقَ بَعْضٍ دَرَجاتِ
(الزخرف/ 32)
او، كند يوللاري‌نين
قهرمانيدي،
خلقين اۆره‌گينده مكان سالميشدي.
پالچيقلي‌يوللاردا، توزلو يوللاردا،
شاهلارين باشيندان تاجلار آلميشدي.
قالخميشدي آياغا خوروز
بانيندا،
داغ، گليردي اونا دۆزنلر كيمي.
باشيني اگيردي بير تك آللاها
نعره‌لر چكيردي شاها نركيمي.
گۆللۆ گۆنئيلرده لاله
باغيندا،
شهيدلر قانيندان سوراغ آليردي.
«- بو يولون يئنيشي يوخوشو اولار»
دئييردي گزه‌رك فكره داليردي.
عؤمۆر-گۆن‌‌دولاندي،
ساووشدو ايللر،
خياباني اولدو ملت وكيلي.
كندليلر، فعله‌لر، الي يالينلار،
اونا سس وئرديلر بير رهبر كيمي.
تبريزلي‌دئييردي: «- اوجا بوي بو شيخ،
مبارز، مدبّر، ديانتلي‌دير،
مؤمندير، شجاع‌دير، صادق‌دير،تك‌دير،
قورخماز باش، ساواشقان،چوخ همّتلي‌دير.»
سؤزۆده، ايشي‌ده دۆز
اولموش اونون،
امامي علي(ع) تك ياشاميش
مظلوم.
جماعت امامي، حوزه اوستادي،
ايشلري تبريزين اهلينه معلوم.
تبريز احسن دئيير خياباني يه،
اوتوز ياشيندا بو عالِم ملاّيا.
شورا مجلسينه وكيل سئچيلير،
ميرزا اسماعيلله گئدير تهرانا.11
وَلا يفْلِحُ
السَّاحِرُ حَيثُ اتي
(طه/ 69)
تهرانا گلندن ايكي
ايل سونرا،
يئددي آذر گۆنۆ، گۆن اورتا چاغي12،
مجلسده اوخوندو بير اولتيماتوم،
روسيه ايرانا دئميشدير: «- ياغي!
گليريك قزوينه اوردو
سالماغا،
سالداتلار، قازاقلار جنوبا آخير!
كؤرفزين، عمّانين ايستي سويوندان،
انگليس‌ده دوروب شيرازا باخير.»
اؤلۆلره تاپان قورخاق
عجملر،
مجلسدن چيخاراق گئتديلر ائوه.13
آلچاقلار شأنينه خطر گلمه‌ميش،
اگميشلر شيطانا، اگميشلر دئوه.
مينلر آرواد كفن گئييب
گليردي،
قورخاقلار مجلسي ترك ائديب گئتدي.
خياباني بيردن آياغا قالخدي،
تريبون داليندا گؤر نه‌لر ائتدي:
«- دينله‌ديم من
روسون اولتيماتومون،
نه‌دن اوتوروبسوز بؤيله‌جه سوسغون؟
من بير ايرانلي تك ائديرم حيرت،
سيز نه‌دن ائتميرسيز ذره‌جه همّت؟
جوابي وئريلميش اولتيماتومون،
اۆچ- دؤرد يۆز ايل قاباق، بونو سيز بيلين!
مذاكره‌يه‌‌مي قويوبسوز بونو؟
دورون ييغيشديرين بساطينيزي!
ملّتين الده‌كي استقلاليّتي،
وئرگيدير، ييخانماز كيمسه ملّتي.
من وئرگي ساييرام، الله وئرگي‌سي
طبيعي حقلري، فطري نفسي.
كافر روس بو ايشله هارايا
گئدير؟
بو اولتيماتوم، بو حقّي نفي ائدير.
اوجادان دئييرم جسارت ايله،
سيزه سؤيله‌ييرم من غيرت ايله،
وئرمز استقلاليني الدن بو ملّت،
روس باغيرماسينا نه اولموش
علّت؟
قوي روسلاردا ييغسين عاغلين
باشينا،
بير باخسين اؤلكه‌مين قوجا ياشينا.
قوي تزار دۆشۆنسۆن بير فيكر ائيله‌سين،
كيمسه عاغيل
قويسون، اونا سؤيله‌سين،
گئري آلسين بوگۆن اولتيماتومون،
دُنيادا قيلماسين روسلاري زبون...
دشمنين باشينا يئنديررم باتوم،
رد اولسون همي روس، هم اولتيماتوم!»
* * *
خياباني يئندي، «حاجي شيخ رضا»،
سونرا «شيخ اسماعيل»
چيخدي منبره،
گؤيلره ياغيردي آتشين سؤزلر،
سولموش بير طرفده «وثوق الدوله»!
اولتيماتومو رد
ائتميشدي مجلس،
ملّت دايانميشدي تزار اؤنۆنده.
ويرنيخيردي هر گۆن روس نوكرلري،
بلكه خفه‌له‌سين ملّتي بيرده.
آردي وار . . .
