اِنــَهُمْ
يكيدُونَ كَيـْداً وَ اَكيدُ كَيـْداً
(الطارق/ 15و16)
ايكي هفته سونرا
مجلس باغلاندي،
ائرمني «يپريم خان»
سركرده اولدو.
تبريزده تهراندا قانلار تؤكۆلدۆ،
يئنه آزادليغين گۆللري سولدو.
گۆللـه‌لر ياغيردي
خياوانلاردا،
قيز اوغلان سينه‌سين گريب گئديردي.
مرميلر دئمز كي گئري قاييدين،
يپريم خان، ائتديگين بوردا ائديردي.
نظميه‌ني قاجار
يپريمه وئردي
«- آنالار، باجيلار!»دئمه‌دي، دئمز.
بيلميرديمي مگر وثوق الدوله،
«- بيزيم اولاديميز!» يپريم سؤيله‌مز؟
اؤزۆندن سايماز او
مسلمانلاري،
انسانليق دۆشۆنمز، آنلاماز شرف.
يپريم قيرار بير به بير انسانلاري،
«شيخ» ايله او اؤزۆن بيليرميش طرف.
«فضل‌الله نوري»ني اؤلدۆرن قاتل،
خياباني‌ني‌ده آختارماقدايدي.
اونون گؤرۆشۆنجه شر باخيشينجا،
خياباني جايير بير نئچه آيدي.
اسلامدان دانيشير،
تقوادان دئيير،
عدالت سؤزۆنۆ ديله گتيرير.
منبرلره قالخير، موعظه ائدير
ملّته قرآندان پيغام يئتيرير.
يپريم خان ذيروه‌دن
قورخان ائرمني،
اونجا اؤلمه‌ليدير بئله بير ملاّ.
يپريم‌خان،
بير آلچاق - قارانليق دره،
قاناد گؤسته‌رنمز قارتاللار اونا.
ائشيتدي، گله‌جك «سبزه مِيدان»ـا،
بوگۆن خياباني نۆطۆق ائيله‌يه‌جك.
حنانه اۆستۆنه چيخاجاق او شيخ،
ملّته آتشين سؤز سؤيليه‌جك.
خياباني گلدي بير
ساعت ياريم،
دانيشدي تهراندا، سبزه ميداندا.
يپريم موزدورلاري گيزلنيرديلر،
قارتال قاناديني آچان زماندا.
كيمسه توتانمادي
خياباني‌ني،
آرادان چيخارتديي ملت رهبرين.
يپريم، آلچاق، زبون بير كؤپك كيمي،
هئچ فرصت تاپمادي دۆشۆنسۆن درين.
حيله كار، كيد ائتدي،
حيله ائيله‌دي،
اؤزۆنه قايتارير الله حيله‌سين.
بيتمير بو ماجرا، قان آغلير تبريز،
گؤره‌ليم نه اولور، نه اولور، دئيين!
وَ لَا تَعَاوَنوُا
عَلَي الاِثـــْم و العُدوان
(مائده/ 2)
آجي خبر واردير تبريز شهريندن،
آتش آتش اۆسته ياغديرير دشمن.
روس قونسولو يووا اورادا سالميش،
انگليزلـه بيرگه بير قرار آلميش:
اؤلدۆره‌جك بۆتۆن آزادخواهلاري،
خوش‌‌بير رقص‌‌ائده‌جك«كرمل» ـه ساري.
تاسوعا گۆنۆدۆر يئر - گؤي قان آغلير،
تبريز كفن گئييب
اۆره‌كلر داغلير.
دئيير:«هيهات! هيهات! بويون‌اگمه‌ريك
ذلّته، خوارليغا ساري گئتمه‌ريك!»
هر ياندان قالخيبدير نوحه‌لر سسي،
كؤكسۆنده حبس ائدير هركس نفسي.
ثقةالاسلامي14
قونسول چاغيرير،
«- امضالا كاغذي!» دئييب، باغيرير.
باخير بير كاغذا، ثقةالاسلام،
يازيب:«- تصديق ائدير هر اهل كلام،
كي روس
سالداتلاري تبريزده قالسين!
الله‌دا روسلاردان قوي راضي اولسون!»
دئدي: «- من كسرم اؤز اللريمي،
امضالاسا بونو بيل، بير گل بري!»
روس قونسولو گليب ياخينلاشاندا،
ثقةالاسلام ووردو بير
سيللي اونا.
دئدي:«- من‌آزاده امام قولويام،
حقّه باش اگمك چۆن، بئله اولويام.
ناحقّه ساري بيل ال اوزاتمارام،
حقّي اۆچ- بئش گۆنلۆك عُمره ساتمارام.
ولو مقتداما قاووشام بوگۆن.
دور ييغيشدير دونون، تبريزدن سۆرۆن!»
قنسول‌امرائيله‌دي«-حبس‌ائدين‌بونو!
گؤره‌جك نه اولار بو ايشين سونو!»
* * *
عاشورا گئجه‌سي ساعت
ايكي دي،
ثقةالاسلامي وورور جلادلار.
ان عُلوي محبت سارميش كؤنلۆنۆ،
بونو بيلمه‌ييرلر او
غصب كارلار.
سودا وئرمه‌ديلر
دستنماز آلسين،
تيمّم ائدير او،
قيلير نمازين.
قونسول يئددي يوخو
ايچينه جومموش،
آللاهلا ائدير او راز
و نيازين.
ولا تَحْسَبَنَّ
الَّذينَ قُتِلوا في سَبيلِ اللهِ اَمْواتاً، بَلْ اَحياء عَنْدَ رَبِّهمْ
يرْزِقُونِ.
آل عمران / 169)
عاشورا شهيدي
سحر اولور، سحر،
عاشورا گۆنۆ،
اونو گتيرديلر بير
آسلان كيمي.
ائله دورموشدو كي
قونسولخانادا،
قلّه‌دن گؤرۆنن
آسيمان كيمي.
بيرده شيخ سليمي، محمد قولو،
آقا محمدي،
صادق الملكۆ،
ضياء العلما،
قدير،
حسني،
چكدي دارا، اوردا، اوگۆن،
او تۆلكۆ15.
* * *
دار آغاجي آلتدا دئدي
او اولو:
«- شاهد اولگيلن‌سن يا
رسول الله!
دينيوي ساخلاماق اۆچۆن اؤلۆرم،
بوندان باشقا منده يوخدور بير گناه.»
او وقت‌قيرخ‌گۆنه‌دك آغلاشدي
تبريز،
آمان، دايان يئنه
قان ياشدي تبريز:
«- اۆره‌گيمدير يانير، گؤز ياشيم آخير،
آجي احوالاتيم يانديريب ياخير.
نئجه دؤزمك اولار بو فضاحته،
دؤزۆم داشير اۆره‌ك كؤكسۆمده چاخير...
«رضائي» دير دئيير بو ماتم ايچره:
«ثقة الاسلام‌مصلوب‌‌اولموش، ديك‌باخير16 »
* * *
خبردن سارسيلدي چوخ،
خياباني،
گؤز ياشي آخيتدي،
آجيدي جاني.
عائله‌يله بيرگه
مشهده گئتدي،
درگهينه غريب امامين
يئتدي.
اۆچ آي قالدي اوردا
غريب كيمسه‌سيز،
اونسوزدا غربته
دۆشمۆشدۆ تبريز.
«صمدخان» آت چاپيب شقه‌له‌ييردي،17
روسا سيغينميشدي، يئيين گئديردي.
.
اَفَلَمْ يسيروُا
في الارْضِ فَينْظروُا كَيفَ كانَ عَاقِبَةُ الَّذينَ مِنْ قَبْلِهِمْ.
(محمد/10)
خياباني چيخدي سفره
اوردان،
باكي‌يا تفليسه گئتدي دورمادان.18
اوردان داغيستانا، ماخاچ قالايا،
هر شهره، هركنده، هر
بير اوبايا،
گئتسه‌ده تبريزي
دۆشۆنۆردۆ او،
تبريز هاواسيله اۆشۆنۆردۆ او.
قالميشدي‌اوغولسوز،
قالميش‌كيمسه‌سيز،
روسون آتشينده
يانيردي تبريز.
بير گۆن بيردن دئدي
ماخاچ قالادا:
«- تبريزه گئديرم!»دوردو آياغا.
كيمسه قاباغيني آلا
بيلمه‌دي،
اونا بويوندوروق سالا
بيلمه‌دي.
* * *
دُنيادا اوتوزان
اوتان‌دا اولار،
بير چوخ گۆللر اولور،
آچمادان سولار.
ولاكن يانيلماز اولو
قهرمان،
اودوزماز صداقت،
اودوزماز وجدان.
اۆره‌ك عشق
ائويديركيمسه‌يه‌ساتماز،
غفلت يوخوسوندان
اويانان ياتماز.
«قهرمان گؤزلـه‌يير يارالي تبريز»
خياباني دئدي:«- داي ساغ قالين
سيز!»
بير‌باش‌‌اوردان
گئتدي «بادامچي»19گيله،
روسون غدارليغين او
بيله - بيله.
* * *
تبريزه گلندن نئچه آي سونرا،
او اعتراض ائتدي غصب
كارلارا.
«پروتستو» يازدي، يايدي هر يانا،20
عاشقليك سالميشدي اونو گمانا!
«ادبي انجمن»
تبريزده قوردو،
شعرلر يازديردي،
قيزديردي يوردو21.
اۆچ ايل سونرا قاچدي
شجاع الدوله،
تفليسه يئرلشدي، بيتدي ولوله.
تزاردا ييخيلدي،
انقلاب اولدو،
امپراتورلوغون گۆلشني
سولدو.
حقّين دؤنمز اۆزۆ
غلبه چالدي،
اوگۆن مستضعفلر اؤز
حقّين آلدي ...
حله قالسين، بونو
يازارام سونرا،
بيزيم مكتبيميز
اولودور، بالا!
حقدن قايناقلانميش،
ملّت يولودور،
علي (ع)نين
قيلينجي، حقّين قولودور.
منده اگري‌گئتديم‌كئچميش‌گۆنلرده،
چوخ قصور ائتميشم بو
آز عُمرۆمده.
من اؤز ملّتيمدن عفو
ايسته‌ييرم،
«- مني باغيشلاسين الله!»دئييرم.
قلميم يورغوندور،
اۆره‌گيم خسته،
گل‌كئچك‌گۆل‌قيزيم،
تئز مطلب اۆسته.
وَ اَمْرُهُم
شُوري بَينَهُمْ
(الشوري/ 38)
دؤرد يۆز سكسن نفر
گلدي تبريزه،
استبداد چؤكمۆشدۆ او
زمان ديزه.
خياباني ييغدي اونلاري
همن،
دُنيانين هر بير يئر،
هر نقطه‌سيندن.
بئش ايل قاباق
تعطيل اولان فرقه‌ني،
بير داها ديريلتدي،
قوردو بينه‌ني.
كنفرانس ائيله‌دي
تبريز شهرينده،
ايالت مجلسي
قورموشدو فرقه.
«تجدد» ياراندي بير اورقان
كيمي،
سئچيلدي بؤيۆك شيخ،
نگهبان كيمي22.
«تجدد» بۆرۆدۆ هر كندي،
شهري،
بيرينجي سايي‌‌نين
بئله‌يدي تيتري:
«- حقيقت ايشيغي
پارلاياجاقدير!
دُنياني آزادليق ،
حقّ آلاجاقدير.»
اِنَّ في ذلِكَ
لَعِبْرَةً لِاوْلي الاَبــْصار
(النور/ 44)
دوخسان آلتينجي ايل
خرداد آييندا،
بئش ايل جان
يانغيسي چكديكدن سونرا،
شهيدلر مزارين زيارت
ائتدي.
خلق هامي يوللانيب
قبر اۆسته گئتدي،
سارميشدي وطني سانكي
ايلك باهار.
دسته‌لر بير سسله
اوخويوردولار،
«صافي»نين
قوشدوغو غملي نوحه‌ني
تحريك ائديرديلر هر دينله‌يني:
«- اي وطنه بذل
ائله‌ين نقد جان،
ملّته دار اۆسته وئره‌ن امتحان.
محو اولا مشكل‌دي بو نام و نشان،
قانلا صفا تاپدي باهار وطن!»23
خياباني قالخدي
حنانه اۆسته،
ملّت يانين آلدي،
چوخ، دسته - دسته.
دئدي:«- بوگۆن مسلك غلبه
چالدي،
عقيده، هرنه‌يي آلتينا آلدي.
قوميّت، مليّت، داها نه دئمك،
انسانيّت يولون بيز گره‌ك گئدك. 24
عبرت آيناسيدير بو
گۆن، انتباه،
شهيد مزارينا چيچك
قويولور.
دۆنن تبريزليني
گۆللـه‌لين روس،
بوگۆن تكبردن، كيندن
سويولور.»25
وَ اصْبروُا اِنَّ
اللهَ مَعَ الصَّابــِرينَ
(انفال/ 46)
خياباني اولدو فرقه
باشچي‌‌سي،
بو بير مقام ايدي
ملت سئچگي‌سي.
فرقه‌ني دگيشدي،
توسعه وئردي
بير نئچه شورادا او
تاسيس ائتدي.
تبريزده‌باش‌وئردي
اؤلۆمجۆل قيتليق،
اؤلۆم چؤكدۆ شهره هي
قيريق - قيريق.
«آذوقه شوراسي»، «دارالمساكين»،
خياباني قوردو، او
ايدي امين.
بوغدا توپلاييردي،
چؤره‌ك ياپيردي،
هر يئري گزيب بير آز
اون تاپيردي.
قويموردو قيريلسين‌كاسيب،كوسوبو،
حق فاغيرلاريندير،
بيليردي بونو.
لاكن انگلله‌دي «شريف الدولـه»،
فرقه‌نين ايشيني، حق
بيله - بيله.
او دفاع ائديردي
محتكرلردن،
او قانماز نه ناموس،
نه ائل، نه وطن!
لاكن ناموسسوزون
حركتلري،
ايگيدلري چكير هر وقت
ايره‌لي.
او زماندا تبريز بيرداها قالخدي،
دره‌دن يۆكسليب
ذرويه باخدي.
قويمادي دايانسين داش
داشين اۆسته،
ملّت چيخدي چؤله
چوخ، دسته - دسته.
«شريف الدوله»ده
تفليسه گئتدي،
شجاع دوله كيمي ايت تكي ايتدي.26
سئچگيلر باشلاندي ايكي‌ايل‌سونرا،27
سس وئردي تبريزلي بو سسه، هايا.
دوققوز نفر وكيل، هم
وطن‌سئچدي.
اونلارين آلتي‌سي
فرقه عضوويدي.
آلدي خياباني دوققوز
مين سسي،
اله گتيرميشدي گۆجلۆ
نفسي.
بير داها تاپيلدي «وثوق الدوله»
انگليزلـه وئردي
بيرده ال - اله.
مين دوققوز يۆز اون دوققوز
آدي ايله،
تانينان آنلاشما
آلميشدي اله28.
شيخ محمد بونو بيلجك آتلاندي،
يئنه‌ده تهمته -
شرره قاتلاندي.
آدلانديردي اونو: «- بير ورق پاره29
داي قويا بيلمزسيز خلقي آواره!»
رشوَت اؤنرميشدي30 خياباني‌يه
اول وثوق الدولـه، اون بئش مين
ليره!
انگليز سالميشدير اونو لاپ اله،
تانيميردي تۆركۆ بو تۆلكۆ دوله!
تۆركۆن شرفيني هر تورپاق دئيير،
هر كس تۆرك اؤنۆنده باشيني اگير.
خياباني يوردون‌اصيل تۆرك اوغلو،
اۆره‌گي عشق ايله هم كينله دولو.
وَمَنْ يعْمَلْ مِنَ
الصَّالِحاتِ وَ هُوَ مُومِنُ فَلا يخافُ ظُلْماً وَلا هَضْماً.
(طه/ 112)
الهامين آلميشدي
پيغمبرلردن،
اونا گۆوه‌نيردي بو بؤيۆك وطن.
قرآن يولچوسويدو، تقوا رهبري،
هر گناهدان ايراق، هر سوچدان بري.
ابدي بير مكتب اونا روح وئرميش،
شيطان قارشيسيندا سينه‌سين گرميش.
علي(ع)هارايلاميش، حسين(ع) چاغيرميش،
آزادليق سسله‌ميش، حققي باغيرميش.
انسان سعادتي اونون شعاري،
وعده وئرميش خلقه ايلكين باهاري.
نئجه بيرگه اولار يزدانلا شيطان؟
هوش‌ائله،سن قيزيم، دۆشۆن بيرجه آن:
عدالتدن، حقدن دوغولان انسان
يؤنلمز ناحققه، شرّه هئچ زمان.
خياباني يعني: عدالت سسي،
محمد(ص)ين ساوي31، قرآن نفسي.
عُلوي بير سمادان گلميشدير آدي،
تبريزلي وئرميشدير اونا عينادي.
دايانميشدير اونا، اينانميش اونا،
خيانت مي ائده‌ر او رهبر بونا؟
تميز وجدانينا من ده حيرانام،
بير تبريزلي تۆركم، عادي انسانام.
نه يالنيز يازيرام من اونا نغمه،
دُنيا حيران قالميش عمللرينه.
ووقارين اؤنۆنده داغ‌دا باش اگير،
گؤيلر يئره يئنير، « احسنتم!» دئيير.
الغرض، دولـه‌نين
اؤنرديكلري
رد اولدو، الينده قالدي رشوَتي32.
او صالح بنده‌نين تميز وجداني،
تانيماز دوله‌ني، شاهي، سلطاني.
لَنْ يجْعَلَ
اللهُ لِلْكافِرينَ عَلَي الْمُومِنين‌َ سَبيلا
(نساء/ 141)
تبريزه، باخ‌گيلن
تهران نئيله‌دي،
بير مردار كافري حاكم ائيله‌دي.
ماژور بيورلينقي بورا گؤنده‌ردي،33
چرخين گئديشيني سانكي دؤنده‌ردي.
او، «فوكول‌كولو»
نو ائتدي معاون،
مسلمان عيرضينه اولموشلار امين!
گلميردي تبريزدن حيات نفسي،
هر يئردن قالخيردي اعتراض سسي:
خياباني چيخدي منبر اۆستۆنه،
«محلي مجلسي» قورموشدو يئنه:
«- تبريزه اهانت ائديبدي تهران،
بونو اونودانماز هئچ بير قهرمان.
وثوق الدوله‌يه دؤزنمز تبريز،
ديدم - ديديم ائديب داغيداريق بيز.»
بو سؤزلردن سونرا قوپدو اولو هاي،
كوچه‌لرده قالخدي‌‌سس-كوي،هاي،هاراي.
«خياباني»، «رابط»،
بيرده «فيوضات»،
دشمنين اۆستۆنه چاپيرديلار آت.
«سلطان الادبا»دا همراه اولدو،
«تجدد» يئرينده هيئت قورولدو.
«قارداشلار دينله‌يين» دئدي او ملاّ:
«بيز هارا، وثوق الدوله‌لر هارا؟
اون‌دؤرد‌ايل ووروشموش قوجامان تبريز،
استبداددان بوردا قالماميشدير ايز.
نئجه ايندي گلسين وثوق الدوله،
آلسين بو شه‌هري بير داها اله؟
ماژور بيورلينقي حاكم مي قيلسين؟
تبريز اولادي‌دا دايانيب دورسون؟
محمدعلي شاه، شجاع دوله‌ني
بو شهره خور باخان هر بير گلني،
ديزه‌‌چؤكدۆرمۆشۆك، ايندي سوساق‌مي؟
بودا بير رنگدير‌مي؟ بودا بوياق‌مي؟»
فَضَّل‌َ اللهُ
الْمُجَاهِدينَ عَلَي الْقاعِدينَ اَجْراً عَظيما
(النساء/ 95)
«تجدد» ائوينده هر گۆن
دانيشير،
خياباني جوشور، اۆره‌كدن داشير.
تاريخ فروردين‌ين اون يئدديسيدي،
مين ايكي يۆز دوخسان دوققوز ايليدي.
تجدد ائوينده توپلاندي هامي.
كي نه اولاجاقدير رهبر پيامي؟
« نوبار »دا
توتموشلار «ميرزا باقر»ي
ماژور آلماميشدير امريني گئري.
سلاحلي جوانلار باغلادي دسته،
بيردن يۆگۆردۆلر بيورلينق اۆسته.
او آزادي خواه‌دا آزاد اولوندو،
ماژورون هيبتي برباد اولوندو34.
صاباح چرشنبه‌‌يدي جلاللي بيرگۆن،
باخ، تبريز ماژورا سؤيله‌دي: «سۆرۆن!
دور تؤكۆل ائشيگه، قيام اولاجاق،
وثوق الدوله‌نين رنگي سولاجاق!»
بازاردا باغلادي، مدرسه‌لرده،
گلدي شهره هامي چوخ، دسته دسته.
سلاحلار گؤيلرده اوگۆن اوينادي،
شعله‌لندي شيخين درين عينادي.
ماژور تيترتمه‌يه دۆشدۆ قورخودان،
بيرداها قالخميشدي آذربايجان.
چرشنبه گئجه‌سي «فوكول كولو» لا،
تهرانا سۆرۆندۆ او، قورخا – قورخا.
قيامين صاباحي، جمعه آخشامي،
«تجدد»ه دولدو بيرداها هامي.
خياباني سئچدي «مديره هئيت»،
ايشيقلار ساچيردي، شه‌هره، غئيرت.
گۆنش‌ساچاقلارين آچميشدي اوگۆن،
تبريز ديري ايدي،
گل بيرجه دۆشۆن،
هر يئردن گليردي حيات نفسي،
آزادليق، حريّت، استقلال سسي.
اذان وئريليردي مناره‌لردن،
«الله اكبر»
ايله دولموشدو وطن.
مديره هئيتي وئردي بير اعلان:
«عاغلين‌باشاييغسين»دئدي: «قوي،تهران!»
بئله دئييليردي
بيانيه‌ده:
«اجنبي نوكرين سالديق بيز چؤله.
اساسي قانونو اجرا ائتمسه،
تهران مشروطه‌نين يولون گئتمسه،
تبريزدن تهرانا آت چاپاجاغيق،
حقّين گور سسيني بيز تاپاجاغيق.
اولوسا آسايش، اؤلكه‌يه عزت،
ايسته‌يير تجدد، ايسته‌يير همّت.»
بو بيانه‌ني تئز «تقي رفعت»،35
چئويردي فرانسيز ديلينه، البت.
يايدي هر بير يئره، يوللادي نشره،
گؤنده‌ردي بۆسبۆتۆن سفيرليك‌لره.
وَجَعَلْنَا كُمْ
شُعُوباً وَ قَبَائِل‌َ لِتــَعارَفُوا
(حجرات/ 13)
هر گۆن خياباني نطق
سؤيله‌يير،
آرزوسون، آمالين هئي بيان ائدير.
تۆركجه دانيشيردي فصاحت ايله،
وارلي تۆركجه‌ميزده بلاغت ايله.
دينله‌ينلر بۆتۆن حيران اولوردو،
عجم حناسي‌نين رنگي سولوردو.
گؤزه‌ل دانيشيردي تۆركجه‌ميزي او،
اوجاباش ائديردي هر گۆن بيزي او.
كؤنلۆده، ديلي‌ده مالييدي ائلين،
دۆز اولاد اونودماز، دانماز اؤز ديلين.
قيام قالديرميشدي شانلي تۆركجه‌ميز،
اگميردي تهرانا قهرمان تبريز.
تهراني اؤزۆنه اگديره‌جكدير،
آتلانيب تهرانا او گئده‌جكدير.
تضييقلره معروض قالميش ديليميز،
باطل جايناغيندا اسير ائليميز،
چيچكله‌نير ايندي، گۆلۆردۆ ايندي،
احسن‌دئينلر، اون يوخ،يۆز يوخ، مين دي...
او، هر گۆن تبريزده بير نطق ائديردي،
مجلسه «رفعت»له بيرگه گئديردي.
دگيشيردي خلقين معنوياتين،
هر گۆن حسّ ائديردي سسين حياتين.
«معنوي تحوّل گره‌ك ملّته،
توپلانين!» دئييردي هرگۆن امته.
بليغ ناطق ايدي، فصيح بير خطيب
تۆركجه - فارسجا يازا بيلن بير اديب.
بيرينجي نُطقۆنده36 اوپورتونيزمي،
افشاء ائتدي درين فيلوسوف كيمي.
بيرليكدن دانيشدي ايكينجي گۆنده،37
اتحاد قوخوردو اونون سؤزۆنده.
«ملي حاكميت» اۆچۆنجۆ مصداق،38
اولموشدو نطقۆنه، اونون سن‌بير باخ،
نه دئيير؟«- خائندير.»دئيير:«- ملّته.
پول ايله سئچيلن هر نماينده!»
«رأي، پولاد قولودور، ملّتيميزين،
دوراجاق باشيندا دولتيميزين!
ملي حاكميت عظمتلي‌دير
بو قدرت، بو عزت چوخ هيبتلي‌دير.»39
باشقابير نطقۆنده‌‌دئدي:«- ائل! اؤيۆن!»
ائل اراده‌سيندن دانيشدي اوگۆن.40
«ملت مولودودور.»دئدي: «حكومت.»
«- اونا گؤره حاكم اولمالي ملّت.»
دئدي: «جماعت بير معلوم قوّه‌دير»،
«- كيم دئيير آنونيم بير مجهوله‌دير؟»41
«تهران‌‌قورخاجاقدير بيزدن اوگۆن كي،
اوندان‌‌حساب چكيب دئيه‌ك:بس‌هاني؟»42
«- بيز ايلكجه تبريزي، آذربايجاني،
سونرادا تهراني، بۆتۆن ايراني.
تجدده ساري سوق وئره‌ريك،
ايرانا امنيت بيز گتيره‌ريك.»
آردي وار . . .
