وَلَبـــِئسَ مَا
شَرَوْا بــِهِ اَنـــْفُسَهُم لَو كانـــُوا يعْلَمُون
(بقره/102)
خياباني «جاسوس» آدلانديريلدي،
ادب سيز - كمال‌سيز ديللر اوجالدي.
ملّت لاكن بونا قولاق آسمادي،
روسدان آلماندان‌دا گليب باج آلدي.
اؤزۆنۆ اؤلدۆردۆ «كوره‌ت وسترو»43
روس گيردي قينينا، فرانسا قاچدي،
آلمان بيناسينا گيرن نامردلر،
انقلابچيلارا هئي آتش آچدي.
«قازاق خانا»
گليب تسليم اولمادي،
خلقي اينجيديردي هرگۆن قازاقلار.
اجنبي امريله، روس فرمانيله،
گۆنۆن بو ملّتين ائيله‌ييردي تار.
اوتوز بير خرداددا
دوشنبه گۆنۆ،
خياباني گليب نطق سؤيله‌دي.
گؤزۆنۆ باغلادي، آعزيني آچدي،
بۆتۆن قازاقلاري تهديد ائيله‌دي:
«- ملّي حاكميت ايسته‌يير
ملّت،
خوش گلمير البته اجنبي‌يه بو.
ملت چؤره‌گيني يئيه‌ن قازاق‌دا،
روس دگيرمانينا هر گۆن
تؤكۆر سو.
بو گۆندن شه‌هرده
سلاحلي گزسه،
جسدي كوچه‌يه سريله‌جكدير.
قازاق هر بيركسه جسارت
ائتسه،
ملت اونو بوردا محو ائده‌جكدير!»
قازاقلار داغيلدي اؤجك - بؤجك‌تك!
گيرديلر بير به بير «قازاق خانا»يا.44
«عين الدوله» قورخوب گيردي
ائوينه،
آلا قاپيچيلار دۆشدۆلر هايا.
هرگلن قوناغا اۆز
وئرمز تبريز،
بو شه‌هرين «قوناق قيردي»سي‌دا وار.
خور باخماق ايسته‌سه تبريزه كيمسه،
دونموش داشا دؤنۆب بير يئرده قالار.
اؤزلرين ساتانلار پيس
بير زادلارا،
جهالته دۆشمۆش، بيليك‌‌سيز اولموش.
آسلانلار يوردوندا اؤجك - بؤجگين،
باغري‌‌دا چاتلاميش، رنگي‌ده سولموش!
فَلَنْ اَكُونَ
ظَهيراً لِلْمُجْرِمين
(اقصص/17)
«تبريز غائله»سين ياتيردماق اۆچۆن،
يئريندن اوينادي دربار بۆسبۆتۆن.
تهراندان بير داها، باخ، عين الدوله،
ايكي يۆز مين تۆمن پول آلدي يئنه.
دئدي:«- داغيدارام من مشروطه‌ني
ياغيلار اليندن آللام وطني!
وئرمه‌رم اللره آلا قاپي‌‌ني،
اؤلدۆررم بير آندا خياباني‌ني!»
تهران اينانيردي عين الدوله‌يه،
وليعهدين ائوي اوردايدي حله.
تير آيينين اۆچۆ، پنجشنبه گۆنۆ،
خياباني آلدي آلا قاپي‌‌ني.
دئدي:«- فرقه‌ميزين سياسي يئري،
بورادير تجدد، كيچيك بناني-
مدني ايشلره اختصاص وئرين
انقلاب سسيله قاباغا گئدين.»
اوگۆن شادياناليق
ائديردي تبريز،
«عين الدوله»دن داي قالماميشدير
ايز.
واسمينجا قاچميشدي آو آدي ايله،
تهرانا قاييديب قاچديلار يئنه.
الله يارديم ائتمز گناهكارلارا،
ياخالاياجاقدير، قاچسادا هارا.
«- ياشاسين آزادليق!»،سسي اوجالدي،
تبريزي انقلاب نفسي آلدي.
اوشاق، قوجا، جوان، هئي، دسته - دسته،
گليردي بير به بير «تجدد» اۆسته.
اورادان يوللانيب «آلاقاپي»يا،
«- ياشاسين، ياشاسين!» هئي دئيه - دئيه.
فَمَنْ عَفا وَ
اَصْلَحَ فَاَجْرُهُ عَلَي الله
(الشعرا/ 40)
خياباني اوگۆن
آلاقاپي‌‌دا،
عفو فرمانيني صادر ائيله‌دي.
مقدّس آرمان صاحبي انسان،
«باغيشلايين، كئچين!» خلقه سؤيله‌دي.
آلاقاپي ايچره قرآن اوخوندو،
آلدي حكومتي اؤزۆ الينه.
قُدرتي ملته قايتاردي او گۆن،
سؤز وئرميشدي بؤيۆك شانلي ائلينه.
«ميرزا كوچك خان»
ـا‌پيغام يوللادي،
در حال «حاجي‌آخوند»جنگله گئتدي.45
«بيرگه حمله ائده‌ك تهرانا، قارداش!»
بو پيغام «ميرزا»يا البته يئتدي.
بوردا قورولموشدو اولو
حكومت،
ان گؤزه‌ل گۆنلرين ياشادي تبريز.
امنيت هر يئره حاكم اولموشدو،
شرارتدن داها قالماميشدير ايز.
خياليم دنيزي منيم
دريندير،
جوما بيلمزسن، سن بير نهنگ اولسان.
كؤنلۆمۆن دُنياسيي انتهاسيزدير،
گله بيلرسن، سن، اميده دولسان.
تبريزي خيالدا تجسم
ائيله،
دورنالار گؤيلرده قاتارلانيرلار.
بادام آغاجلاري آغ چيچك آچير،
قيش گئدير، هرياني بۆرۆيۆر باهار.
آرخلاردان آرخماقدا
بال شلاله‌سي،
ياشيلليق شه‌هرده اوجسوز، بوجاقسيز.
تۆستۆ قالخير بۆتۆن داملاردان گؤيه،
كيمسه قالماميشدير گئجه اوجاقسيز.
قرآن تلاوتين دينله‌يير هامي،
مناره‌دن قالخير اذان نغمه‌سي.
معبودا باش اگير گۆن باتان چاغي،
هر كس مسجدلرده قالديرير سسي.
اصيل معنويات
بۆرۆيۆر يوردو،
«رشيديه»لرده
برپا ائديلير.
تسكين تاپير قلبي، شاعرده دئيير:
«- سعادته دوغرو تبريزدير گئدير.»
او قيزيل دوراني
تاريخ اونودماز،
او گۆنلر باهارين گلين چاغييدي.
تبريز بير شه‌هر
يوخ، بير حكومت يوخ،
حيات نفسييدي، عزت باغييدي.
ملَك‌لر گؤيلردن يئنه‌رك
يئره،
چيچك ياغديرديلار تبريز اۆستۆنه.
لاكن، هر زمان‌دا اولدوغو كيمي،
اهرمن دورموشدو اونون قصدينه.
يخادَعُونَ اللهَ
وَالذَّينَ امَنُوا
(البقره/ 9)
تاريخ‌‌دؤندۆ، بير گۆن،
باشقابير«دوله»-
«باش وزير» مقامين كئچيرتدي اله.
رسواي اولوب قاچدي «وثوق‌الدوله»،
گلدي ايش باشينا مشيرالدوله!
«مخبر السلطنه» اولدو واليسي،
حيله‌كار او تۆلكۆ بيليردي ايشي.
شهريور آييندا گلدي تبريزه،46
چؤكمۆشدۆ «دوله»لر بورادا ديزه.
لاكن بو تۆلكۆنون چانتاسي دولو،
حيله‌لر، مكرلر ايله دوپدولو.
سيماسي دگيشيك قلبي قاپقارا،
اؤزۆده بيليردي كيم گلميش هارا.
تبريزه باش اگير گئنيش افقلر،
بيلير «مهدي قولو»،
اگمز بو شه‌هر.
كائنات بورجلودور، دُنيا بورجلودور،
تبريز دُنياسينا،
سما بورجلودور.
ديزه چؤكدۆرمك چين بئله شه‌هري،
حيله‌نين، ريانين چوخ وار اثري.
قالدي‌‌شهر ايچينده اون- اون‌ايكي‌گۆن،
سونرا ائتدي قازاق خانادا دۆگۆن.
اِنَّ
مَوْعِدَهُمْ الصُّبْحُ اَلــَيسَ الصُّبْحُ بــِقَريب
(هود/81)
اوغلونو او گئجه
قوجاقلاميشدي،
اونا آنا قده‌ر باغلييدي تبريز.
يانيب آليشيردي آنا آدينا،
تاريخده قويوردو مقدس بير ايز.
سون كره اولاراق
آلا قاپي دا،
او آخشام منبرده بير نطق سؤيله‌دي.
بوغازيندان قوپان اعترافلارا،
آللاهي، ملگي شاهد ائيله‌دي:
منيم سؤزۆم بودور:«- ائشيتسين هامي،
اسلامين، قرآنين يوردودور بورا.
بيز اسلام قولويوق، معنوي قولو،
دؤنمه‌ريك بو يولدان گئتسك‌ده هارا.»
اوگۆن ذيحجه‌نين سون
گۆنۆ كيمي،
كدرله ياد ائتدي محرّم ليكدن.
دئدي:«دينله‌يين سيز امام حسين(ع)ـين،
وداع خطبه‌سيني بير آز دريندن.
باخ!
امام حسين (ع) تك من ده دئييرم،
اؤلكه‌دن ييغيشسين ظلمۆن بساطي.
مني اؤلدۆرسه‌لر، دارا چكسه‌لر،
آتمارام مقدّس اولو عينادي.»47
* * *
بو، سون نطقۆ ايدي
خياباني‌نين،
قانادين سرميشدي قارانليق گئجه.
سحر نه دوغاجاق هئچ بيلينميردي،
اولو فاجعه‌ني من يازيم نئجه؟
تــَحْسَبُهُمْ
جَميعاً وَ قُلُوبُهُمْ شَتــّي
(الحشر/ 14)
مخبر السّلطنه، حيله كار تۆلكۆ،
او گئجه هرزادا بير سققه ووردو.
اونوتدو آزادليق ادعالارين،
دئدي قازاقلارا:«- كودتا ائدين!
اؤلدۆرۆن،يانديرين،داغيدين،ييخين!
اونون آخيرينا، سونونا چيخين!
بوغون هر بير ياندا آزادليق سسين،
ملّتين بوغازين، كسين نفسين.
اسمه‌سين داغلاردا بيرده ياز يئلي،
اؤتۆرۆن شه‌هره گۆجلۆ، گۆر سئلي!
قورودون اۆره‌كده آرزو چشمه‌سين،
بوغون هر بير ياندا آزادليق سسين!..»
* * *
شَهْرين آلتي آيليق
امنيتي‌ني،
پوزماغا صرف ائتدي او همّتيني!
شهريور آيينين ايگيرمي بيري،
گئجه وقتي، قازاق آلدي شه‌هري.
حمله ائيله‌ديلر آلا قاپي‌يا،
قان قوسدوردولار او گئجه هامي‌‌يا.
اؤلدۆرۆب، قان‌تؤكۆب، اود يانديرديلار،
دونون ييغيب كؤچدۆ اؤلكه‌دن باهار.
امنيت پوزولدو، ظلم آلدي يئرين،
يئنه بؤيۆك ملّت اولدو ديده‌رگين.
اۆچ يۆز ائوي قازاق غارت ائيله‌دي،
تۆلكۆلۆك تاريخده باخ گؤر نئيله‌دي؟
«مخبر السلطنه»
گيره‌نده شهره،
اۆچ گۆنلۆك غارته وئردي اجازه48.
سونرا «خياباني» جنازه‌سيني،
ايسته‌ييب قازاقدان،«- تئز گتير!» دئدي.
«خياباني» سحر دستنماز
آلدي،
تحت الحنكي‌ني بوينونا سالدي.
حسن، هاشم، محمود،
رباب، فاطمه،
نمازا قالخديلار آنايلا بيرگه.
نماز قورتارماميش دؤيۆلدۆ قاپي،
«سرتيب زاده»
ايدي. «- گلمه هئچ بري.»
دئدي: «ائوده قال، هئچ ائشيگه چيخما،
گؤزله مني گليم سنين دالينجا.»
لاكن او گلمه‌دي ناهارا قده‌ر.
شيخ محمد قالدي، ائتسين نه‌ته‌هر؟
من يازا بيلميرم، سن دۆشۆن درين:
باخ قيزيم، يئرينه «سرتيپ‌زاده»نين،
قازاقلار گلديلر گۆن اورتا چاغي،
توتسونلار بو ائوده بير «اولو ياغي».
خياباني دامدان قاچيردي داما،
خير النساء وئردي تفنگي اونا.
ووردولار قازاقلار «خير النّسا»ني،
ائله بيل زينب(س)ي يا كه زهرا (س)ني.
كيچيك اوشاقلاري اسير ائتديلر،
كتابين داغيديب شِيخين، گئتديلر.
وُ اُوْفُوا
بــِالْعَهْد اِنَّ الْعَهْدَ كانَ مَسْئــُولا
(الاسرا/ 34)
«شيخ حسنعلي»يه
سيغيندي رهبر،
شيخ، شجاعت ايله گؤستردي هنر.
ايچه‌ري حيه‌طه خياباني‌ني
آپاريب، گيزلتدي او فدائي‌ني:
قرآن فدايي‌سين، ديل فدائي‌سين،
اسلام فدائي‌سين، ائل فدائي‌سين.
گۆنشي گيزلتدي بير زيرزميده،
شيطان آت اوينادير، باخ‌سن طالعه!
او گئجه، او ائوده كيمسه ياتمادي،
باشيندان پريشان فكري آتمادي.
خياللار او گئجه گؤيلره اوچدو،
دئديلر:«- مقدّس آرزولار پوچدو!»
گؤزلرده گؤز ياشي حلقه‌له‌نيردي،
گؤيدن يئره ماتم هئي اله‌نيردي.
صاباحا يوللانان آرزو قوناغي،
يانديرا بيلميردي بيرجه چيراغي.
دئدي كي:«- اذن وئر!»شيخ حسنعلي:
«- گئديم باشدان ساووم باشا گلني.
دانيشيم مخبر السلطنه ايله،
سني عفو ائيله‌دي او كافر، بلكه!»
خياباني دئدي:«- جناب شيخ! آمان!
معنوي مقامين يۆكسكدير اوتان!
او نامردجه‌سينه ووروبدو خنجر،
نامرد ايله دوستلوق اولور نه ته‌هر؟»
شيخ دئدي:«قوي‌گئديم بلكه‌تاپديم يول،
سن ده بير آز دگيش، بير آز ساكت اول!»
خياباني دئدي:«- جناب شيخ! دينله!
اوّل ايلقاريم وار منيم دينيمله.
مقدّس بو يولدا شهيد اولماغي،
سئچميشم، سئچمه‌رم آلچاق قالماغي.
منه‌ده سنه‌ده حسين (ع) مولادير،
باشيميز اۆستۆنده واردير بير قادر.»
اۆزۆنۆ، گؤزۆنۆ اؤپدۆ شيخ اونون،
دئدي:«- قال ائويمده‌سن، اولسون بوگۆن.»
شيخ محمد اونا بيرده سؤز وئردي:
«- گؤرسم من ائوينده سنين قازاقي،
مرمي اويناتمارام، تفنگ آتمارام،
من بو ماجرايا سني قاتمارام.»
وَلا تَـقُولُو
لِمَنْ يقْتــَلْ في سَبيلِ الله اَمْواتٌ بَلْ اَحْياء وَلكِنْ لا
تــَشعُرُون.
(البقره/ 154)
اوگۆن بيردن بيره ايكيندي
چاغي،
حيه‌طده شيخ گؤردۆ دؤرد بئش قازاقي.
الينده تفنگي وورا بيله‌ردي،
آياغي اۆستۆنده دورا بيله‌ردي.
بيرلحظه دۆشۆندۆ، وئرميشدي ايلقار،
اؤز - اؤزۆنه دئدي ايندي اۆچ يول وار:
«بيرينجي يول، همن تسليم اولماقدير،
بو يولو سئچن هر بيركس آلچاقدير.
ايكينجي بودور كه قازاقي وورام،
بيرداها ترپه‌نيب آياغا دورام.
بودا ممكن دگيل، دوستا وئرديم سؤز،
منيم عمليمه دُنيا تيكيب گؤز.
اونا دئديم كي: «من ائتمرم دعوا.
باخ، سنين ائوينده سالمارام غوغا.»
اۆچۆنجۆ يول قالميش: شهادت يولو،
دۆزگۆنلۆك، صداقت، عشق ايله دولو.»
* * *
ايگيرمي ايكينجي گۆن
شهريورده،
ماتم اؤز قانادين سرميشدي يئره.
بير داها عاشورا تكرار اولوردو،
بير باغري قان لاله يئنه سولوردو.
بير باشقا شهيده مزار قازيلدي،
اونون باش داشينا بئله يازيلدي:
«عشقين معراجينا شهيد قاووشدو،
ملگي‌ده اؤتدۆ، گؤيدن ساووشدو.
فضيلت شهيدي49 أوچدو گؤيلره،
جسدي اورادا سريلدي يئره.
عقيده اوغروندا، مرام اوغرواندا،
مسلكي اوغروندا ، اينام اوغروندا،
شهيد اولدو، حسين (ع) مولاسي‌كيمي.
آغريسي آغريدير منيم قلبيمي.»
وَالسَّلاُم
عَلَيـْكُم وَ رَحْمَةُ الله وَ بَرَكاتــُهُ
جسدي سۆرۆندۆ
خياوانلاردا،
يۆز مينلر قورولدو ختم او شهيده.
غصب كار باغلادي هر بير مسجدي،
تبريزده اۆره‌كلر دؤندۆ مسجده.
بير ده « صادقيه » مدرسه‌سينده،
گيزليجه فاتحه اوخوندو اونا50.
هر كسين آغزيندان آتش ياغيردي،
بازاردا، كوچه‌ده چوخ يانا - يانا.
آغلادي تهراندا رشتده،
شيرازدا،
حقّين بارداغيله سيراب اولانلار.
دئييب آغلاشديلار فارس شاعرلري،
انسانليق مۆلكۆنه قدم قويانلار:
«مظلوم خياباني» قاني
قايناسا،
بۆتۆن كفن گئيه‌ر ايران اؤلكه‌سي.51
گؤيلرده تفنگي اونون اويناسا،
بۆرۆير دُنياني حقّين نفسي.
سون
