قاشقايي واردير
مادام كي توركجه‌‌سي واردير.
توركجه‌‌سي ياشايار
قاشقايي ياشايانا كيمي.
توركجه ائليندير،
ائل‌ده توركجه‌نين.
بيري - بيريندن آيريلماز گول - بولبول كيمي،
بودا بير ديلدير مينلر ديل كيمي.
ائله ياشاماق حقّي وئرميش،
ائل‌ده اونو ياشاتميش.
قاشقايي ايله بيرليكده ديلي وار،
ديلي ايله بيرليكده بير وطني وار
ايران آدلي.
بودا بير وطندير مينلر وطن كيمي.
ائل‌‌سيز وطن،
وطن‌‌سيزده ائل،
معناسيز اولار.
چونكو وطن
ائله ياشاماق حقّي وئرميش،
ائل‌ده اونو ياشاتميش.
ائل ايله بيرليكده توركجه‌‌سي وار،
توركجه ايله بيرليكده بير وطن وار.
وطن ايله بيرليكده بير اولوس
وار،
اوزون اوزادي بير اولوس.
دُنيانين هاراسيندان باشلار هاراسينا قده‌ر،
آلتايلاردان قيبچاقلارا قده‌ر
بير اولوس كي،
ائله ياشاماق حقّي وئرميش،
ائل‌ده اونو ياشاتميش.
ائل ايله بيرليكده بير اولوس وار،
اولوس ايله بيرليكده بيرده ديني وار
بير ميليارد انسانين كؤنولونو الان دين،
ائلين، توركجه‌نين، وطنين، اولوسون ديني.
ائله ياشاماق حقّي وئره‌ن
ديليمي، ائليمي، وطنيمي، اولوسومو،
سئومگي اؤيردن دين
كؤتوگومو، كؤكومو، ريشه‌مي سئوديرن دين.
مدينه‌دن،
مكّه دن، كربلادان
گلن دين.
بو منيم كؤكومدور، كؤتوگومدور.
ديليمدير، وطنيمدير.
ائليمدير، اولوسومدور.
كئچميشيمدن گلن سسدير
گله‌جگيمه وئرديگيم نفسدير.
سس‌‌سيز، نفس‌‌سيز اولماميش دينيم،
منيم اسلام دينيم.
