هر كسه من گليب انسان دئمه‌رم،
انسان تعصّبي چكيره‌م، تبريز!
دۆزلۆك، پاكليق، تقوا تبليغ ائديرم،
فضيلت توخومو اكيرم، تبريز.
من مظلوملار نسلي، قوللار اوغلويام،
تاريخ قالاسيندا چوخ باغيرميشام.
بۆتۆن انسانليغي، مردانه‌ليگي،
هر يئرده امدادا هئي چاغيرميشام.
تۆركۆن خولقو خويو پاك اولموش البت،
او آلچاق، اؤزۆنه تۆرك سؤيله‌مه‌سين!
من اونلا هئچ زامان بيرلشنمرم،
تۆركلۆگۆ مئيداندا توپ ائيلمه‌سين.
انسانليغا اخلاق گؤزۆيله باخميش،
سعادت پايلاميش بشره، هر تۆرك.
خئيرخواهليق، دۆزلۆك اولموشدور ايشي،
يايميشدير دۆزلۆگۆ هر يئره، هر تۆرك.
فورمادير، قاليبدير ملي هويّت،
هر فورما اۆچۆن بير مضمون لازيمدير.
مضمون معنا وئره‌ر فورمايا البت،
بو منيم سون سؤزۆم، بو سون يازيمدير.
تبريز يوللاريندا - ص 94.
