مأذون!
ناله چكدين حياتيندا سن،
فلگين فنيندن فريادا گلدين.
«اۆزمين روباه‌بازليق ائتدي آسيمان»، [1]
روزگار جؤورۆندن سن دادا گلدين.
دئدين:
«غم وار، غمخانه‌ده واريميش،
بختيم ياتميش، دؤنمز باشدان آخان سو!»
آلوولو كؤنلۆندن چيخان اوخلاري،
گؤيه ساري بير - بير آتدين رو به رو.
زمانه قالمادي سنين قئيدينه،
وئرمه‌دي مۆرادين آسيمان سنين.
صياد اولدون، يار تورونا دۆشمه‌دي،
قارا قفس كۆنجۆ اولدو مسكنين.
آمما سئودا هئچ چيخمادي باشيندان،
تۆكنمه‌دي عشقين شوري ديليندن،
تاپانمادين‌سادا سيرداش سيررينه،
آيريلمادين سون گونه دك ائليندن.
گؤهر ايدين گليب مۆفته ساتيلدين،
سوسدون، دئدين: «خريداريمدير آلان.»
يامانليق بايقودور انسان اوغلونا،
دئدين:«قالسا بير ياخشيليقدير قالان!»
«آيايدين گئجه‌دير» بودور گلميشم،
خريدارلار دوروب صف به صف مأذون.
اسير باد صبا، «عيدين صباحي»،
سريلميش سنينچۆن رف به رف مأذون.
دۆزگۆنم، گلميشم سؤز آلام سندن،
«تمنام زياددير، بختيم يار دگيل!»
بير گدايام، هرله‌نيرم قاپيندا،
«شاه، گدايي سئومك عيب و عار دگيل.»
قاشقايي
لوحه‌لري - ص 6 .
