آنا،
كؤرپه واختلاريمدا،
بئشيگيمده ياتان زامان،
لايلا چالدين حزين سسله،
نغمه‌لرله يوخو آلديم،
رۆيالاردا سئيران قيلديم.
ايمكليگه، ايمكليگه،
تا آتيشديم يئريمگه،
«تاتي - تاتي بالا»،
دئيه،
نغمه قوشدون، قوشما دئدين،
اوخشامالار گۆللنديردين.
قيشدا آغير گئجه‌لرده،
تاپماجايلا، شعرلرله،
ناغيللارلا باشيم قاتدين.
قوشما دئدين پرده پرده.
منده اولان بو شلاله،
هيجاني سن اوياتدين،
جۆر به جۆره سؤز اؤيرتدين.
ياغيش يئره داملاياندا،
قيش اؤتۆلۆب ياز چاتاندا،
اولدوز سۆزۆب آي باتاندا،
قيزاراندا داغدا باتي،
غملر هيجوم ائيله‌ينده،
گؤزلريندن ياش داملادين،
كؤنۆلۆندن سؤز، باياتي،
مني قيلدين دردله آشنا.
بوي آتديقجا، افتخارلا،
بويوما سن بوي بويلادين.
منه جوراب توخوياندا،
كۆرسۆده باغرينا باسيب،
عزيزليكله سوي سويلادين.
بئله‌ليكله بويا چاتديم.
يئنه سؤزدن ال اۆزمه‌دين،
جاوان واختيم چاشان زامان،
سؤزله منه اينام وئردين،
اينجيتديمسه چوخدا سني،
دوداغين هئچ واخت بۆزمه‌دين.
اۆره‌گيمين زمي‌‌سينده،
آنا، شعرين توخمون سپدين.
اؤز اوغلونو شاعير قيلدين،
اينجه قلبه، سؤزه ماليك.
آنا، شعريم بس دئمه‌لي،
سنينكيدير، سنينكيدير.
آنا، منيم سؤز دؤلتيم،
سنينكيدير، سنينكيدير.
قوربان اولسون شعريم سانا،
اي هۆنرلي بيلگين آنا.
سؤز دؤلتيم قوربان سانا،
اؤزۆم آنا، گؤزۆم آنا...
زنگان لوحه‌لري
- ص 74 - 5 / 1 / 47 - تبريز .
