يوخلاسين هشتي‌سينده قوي قاپيوين،
يئري يوخدور، يوواسي يوخدور اونون.
دار دۆنيادا ثروتين سئير ائت:
دؤشه‌گي، يورقاني: ايكي قاردون.
سنين اول ساختاكار جلالينا هئچ،
دگمز اصلا اينان اونون اؤلۆمۆ.
گۆنده اونلارجا انسان اؤلدۆرۆسن،
قورخمادان،
هئچ چكينمه‌دن ووروسان!
گئجه‌دير ايندي،
قوي ياتيب ياتسين
بالاجا بو سفيل سرگردان
گۆندۆز اؤلدۆردۆگۆنلرين اوغلو...
يئني كنددن گليب او، تبريزه
آناسي:«- شهره گئت، بالا! ايش تاپ
غئيرتينله چؤره‌ك قازان‌دا»
دئميش.
سنه بير زحمتي كي يوخدور اونون
گير ائو ايچره، قازان‌دا آسميشلار
همده، چوخلو يئميش.
تبريزين نعمتي سنين اولموش!
نه بيليم كيملرين دؤلي‌ميش‌سن!
بودا تقديردير كي شيرازدان،
گله سن بوردا شاهليغا، جلاّد!
قاپيوين هشتي‌سينده بۆرگه‌لنه
قاردونا،
ياتا ناشاد.
تبريز يوللاريندا - تبريز - 1351 - ص 62.
