آرديندان بولوتلارين، غروبون آل قانلاري،
دامير داملا - داملا ماوي گؤيون اۆزۆنه.
گاهدا هيلالي، آيين اوزاقلاردان چاخيري،
گۆنشين سوسموش، ساري، ضعيف رنگلي گؤزۆنه.
بير شاهين شفقلرين، ان درين اعماقينا،
يول آچير، چيرپيناراق - آچاراق قانادلارين.
بوزالير داها گۆنش، اۆفۆقلر ساري چالير.
سانكي بير قاوان دئيير: «شفقلر، سوسون، وارين!»
سؤنمه اي گۆنش! بيرآن، دايان قوي واله اولوم
ايچينده شفقلرين، شاهي‌نين سۆزمگينه.
سارالتما قانادلاري، چاتيشسين دايان سنه،
اۆره‌گين يانميرمي بس بوگؤزه‌ل اۆزمگينه؟
قوي حيران - حيران باخيم اونون محو اولماغينا،
قيزيل رنگه چالينان شفقلر دنيزينده.
باخسان بير بو يارالي شاهينه، كيم سيزيري
آل قانلار نقطه - نقطه گئتديكجه او ايزينده.
اي غروب! سؤنمه دايان يوردومو قارا ائتمه
يادا بيرجه آن گؤزله، يئتيريم قوجاغينا ...
قاچيرسان نييه مندن؟ چاتارام آخر سنه
پۆله‌ييب قالايارام كؤزلري اوجاغينا ...
كيچيك
شعرلر - ص 107- 1345.
