عجب يئريندن ائديبدير او شوخ غزاله سني،

كي جومدوروبدو درين فلسفي خياله سني.

حيات گئرچگي‌نين اول گۆل اۆزلۆ جئيراني،

غزال ظن و خياله ائديب حواله سني.

قاميشليغين قاميشي ميثلي وصل آختاراراق،

سينر[1] فغانه گتيرميشدير آه و ناله سني‌‌‌.

گئجه - گۆنۆز نيازيمدير ايلاه منّاندان،

زمانه جايناغي اوغراتماسين زواله سني‌‌‌.

تميز خميره‌ن ايچينده سئچيب درين يئتنك،[2]

يئتيردي ياخشي او علاّمه‌ميز كماله سني‌‌‌.

رياسي زاهيدين آلداتمادي‌‌‌، عجب قيلدي‌‌‌،

فضولي ايله نسيميله هم پياله سني‌‌‌.

ديار غئيره گر اولسان‌دا وصله‌ي ناجور‌‌‌،

بو يوردا‌‌‌، بو وطنه باغلاييب قباله سني‌‌‌.

سن اي خطيب وطن‌‌‌! خصم حجتّين سيندير،

او سالدي باسغينا[3]‌‌‌، هيجره مني‌‌‌، ملاله سني‌‌‌.

گۆن اؤيله گۆن‌‌‌، وطن اؤيله وطن اولا كي گؤره‌م،

سوسوز بو يوردومون اۆستۆنده بير شلاله[4] سني‌‌‌.

حقيقت آختاران اجداد پاكيميز حقينه،

ايلاهدان ديله‌رم چاتديرا جلاله سني‌‌‌.

ائده بو يازغي[5] سي اَسوَد غريب ملّتيمين،

كئچن تواريخينه جانلي بير رساله سني‌‌‌.

اَپوش[6] نسلي‌نين ايللرجه تند بادينده،

گۆنشلي يوردوما بيرده بئجرده هاله سني.

سن ايندي قيسمته باخ دۆزگۆن‌‌‌، ايشلري سئير ائت،

حواله ائيله‌‌ميشم من‌ده بير خياله سني.

اردبيل لوحه‌لري - ص  15.