سني چئينتمرم نامرد يادلارا،
اولو اجداديمدان قالان مكانيم.
نئجه من ياشاييم آدسيز نشان‌‌سيز،
تاريخيم، شرفيم، داماريم، قانيم،
اولو زنگانيم.
قورقودلاردان قالان اؤيۆد قايناغي،
حكيم خونجيلرين حكمت بولاغي،
ائليمين، يوردومون يانار چيراغي،
عزّتيم، وارليغيم، دۆشۆنجه‌م، جانيم،
اولو زنگانيم.
سنه وطن دئديم، هيدجي ساياق،
كئشيگينده دوردوم ار كيمي، اوياق،
بۆتۆن وارليغيما سن اولدون داياق،
پناهيم، يورد - يووام، آنام، آمانيم.
اولو زنگانيم.
يوردومدا قويمادي ياد بيرجه داشي،
يارادير الينده‌ن اۆره‌گيم باشي.
سوسمارام دۆشمنه ياغييا قارشي،
هر زامان سؤيله‌يير قوجام، جوانيم،
داماريمدا جوشان قاينايان قانيم،
يايلاغيم، قيشلاغيم، يازيم، آرانيم،
اولو زنگانيم.
زنگان
لوحه‌لري - ص 10 .
