آنا! زيارتدن نه‌دن دويمورسان؟
بير آي اؤنجه گئتدين سن خوراسانا.
«غريب امام رضا» دئيه چاغيردين،
نيسگيلين ياغديردين آذربايجانا.
قاپي‌دان بيرجه باغ سووزو آلمايان،
تك، بوردان دمشقه-
مكّه‌يه گئدير.
بيلير هارا گئتسين، هارا گئتمه‌‌سين،
آنام ياخشي ائدير، هر نه كي ائدير.
مقدس‌دير منيم آنامين قوينو،
اوندا حق قوخوسو، حق نظري وار.
روحو حق عشقيله يوغرولموش اونون،
هر زامان چيچكدير، سانكي نوبهار.
طالعي آجي‌دير، گۆنۆ قارادير،
امام رضا كيمي غريبدير آنام.
عؤمرۆن باشا وئرير ايگيدجه‌‌سينه
اونو ديري ساخلير اعتقاد، اينام.
زنگان
لوحه‌لري - ص 17- ارديبهشت 77 .
