آرزوسوندا وارام، او آخشاملارين،
كي آنام سولاردي آبپاشلا يئري.
سونرا سۆپۆره‌نده نغمه دئيه‌ردي،
آنامين عشقينه بۆلبۆلۆن بيري.
آيين قورصو يئرين مۆلكۆن آلاندا،
آنام چاغيراردي:«يئرلري گتير.»
و بيزده سئوينجك آچيب يۆك يئرين،
پنجره ايچينه قويارديق بير- بير.
پالازلاري آنام سه‌ره‌ردي يئره،
اۆستۆندن سالاردي يئرلريميزي.
يايين آخشاميدي ديغيرلاداريق،
يئرلرين اۆستۆنده بير- بيريميزي.
اۆستۆمۆزه آنام چيغيراردي چوخ:
«چكيلين بالالار يئرلري ساليم،
سونرا هر اويوندان چيخيرسيز چيخين،
بالا قوربان اولوم، درديزي آليم!»
يئرلري سالاندان سونرا، آناميز،
بير يورقان ايچينه توپلاردي بيزي.
ناغيلا باشلاردي مين محبّتله،
آنامين گلنده كؤكسۆنه سؤزۆ.
بيزده سئير ائده‌رديك ناغيل باغيندا،
گؤيلرده تيكرديك مرمر قصيرلر.
آنام آغزي سولو، افسانه‌لردن،
وئره‌ردي بيزلره مين شيرين خبر.
واخت اولاردي باجي- قارداشلاريملا.
آنامين قوينوندا يوخو آلارديق.
حيه‌طه گلردي گئجه قوشلاري،
اۆستۆمۆزه آي‌دا سرپردي ايشيق.
زنگان
لوحه‌لري - ص 19 .
