سن منيم شعريمين روحونا دؤندۆن،
مقدس آرزولو تبريزيم منيم.
سيلينمير كؤنلۆمدن قهرمان آدين،
مقدس آرزولو تبريزيم منيم.
عشقيني آلميشام اۆره‌گيمه، بيل!
من كي يانيندايام، گؤزلريني سيل!
دانيش بير، هاردا بس دادلي- دوزلو ديل؟
مقدس آرزولو تبريزيم منيم.
من سنده تاپميشام بابك عنادين،
باهار گۆللرينين قوخوسون دادين.
چيخماز خاطيريمدن هئچ زامان آدين،
مقدس آرزولو تبريزيم منيم.
اي منيم حياتيم بؤيۆك آماليم،
عشقيم، افتخاريم، جاه و جلاليم،
سندن آيريلمازدير فيكريم، خياليم،
مقدس آرزولو تبريزيم منيم.
سيخينتي ايچره سن مني آتمادين،
تزه فاشيستلره اؤزۆن قاتمادين.
قلبيني اؤزگييه گئديب ساتمادين.
مقدس آرزولو تبريزيم منيم.
سنه باغلانيبدير بۆتۆن آماليم.
سنسيز ايندي آخي پيسدير احواليم.
گل دؤيوش عزميله قويما تك قاليم.
مقدس آرزولو تبريزيم منيم.
كيچيك
شعرلر - ص 21 .
