ايندي منه قالميش بيرجه شكليندير،
گؤزۆمۆ تيكميشم شوخ گؤزلرينه.
سنه اينانميشام، صداقتين وار،
اي آغير گۆنلرده خاطيره منه.
گؤزه‌ليم وحشيلر كمينده ياتيب،
سنه ياغديرارلار چوخ بالا- قادا.
گل منيم يانيمدا دؤيۆش آپاراق،
آخي اۆچ قوولونو بير سالسان يادا:
بير دئدين:«صاديقم سنه، دؤنمره‌م،
باشقالاري اۆچۆن فيكره دالمارام.»
بيرده:«مشعليمي يئره قويمارام،
عشقيمسه تورونا يادين سالمارام.»
هر زامان سؤزۆنه قوي اينانيم من،
بشريت بۆتۆن گؤزله‌يير سني.
منيمله قول – قولا گل گئده ك بوردان،
گل گئده ك دؤيوشه، تك قويما مني...
سارسيلدا بيلمه‌دي توفانلار بيزي،
سنين عشقين بؤيۆك داياغيم اولدو.
بو قارانليق آغير اوچروملو يولدا،
مهربان گؤزلرين چيراغيم اولدو.
اهانت ائشيتديم، وطنسيز قالديم،
آغير سۆرگۆنلره آتديلار مني.
تكجه سن قالدين اي قومرال باخيشلي!
پول- چؤره‌ك دوستلاري ساتديلار مني.
سن دئدين:«هميشه گؤزلرم سني.»
اۆره‌گيمه منيم گۆج باغيشلادين.
عشقينله نغمه‌لر يازديم ها يازديم،
دؤندۆ سرلوحه‌يه او گؤزه‌ل آدين.
گلمزدي خياله باشيما گلن،
گؤرۆرسن كي نه‌لر گلير باشيما.
وطن اولماياندا، حياتدا يوخدور،
هر ياندا قاتديلار زهه‌ر آشيما.
سؤيله توتماسينلار گۆلۆنجه مني،
وطن عاشيقي يم، فخردير منه.
عصرين جلادي نين قوللارينا دۀ،
قوربان اولاجاقدير جانيم وطنه.
بو يولدان قورخمورام، يانيلميرام‌دا،
حياتيم باغليدير بو يولا منيم.
سني‌ده هر زامان بئله ايسته ره‌م،
وئرمه امگيمي باخ بادا منيم.
كيچيك
شعرلر - ص 21 و 22 – 1348- واسمنج.
